2 Krungchakuüa12
1Akung kowi Rehoboam chowm mang mih anikma mih khin khe hai aia uang kür ngamlam mih khin khe aia dow CHAKRAMANG kowh ari aiang nuata khai, now Israeluüa maten paw aia kung tawi krawi khai.2Amatni dow CHAKRAMANG luk kowi owmsak dowi chekhai. Naiawng rakowi Rehoboam chowm mang mih tanga ning khe Aigupta pren mang Sisek dow Jerusalem marow mih uang senah khai.3Aigupta pren hownia mang Sisek uang tarü mih khin khe aia hown kowh tawi uowi mih dow kawrnga kari 1,200 hai kawrnga kowi kowh chowm mih siphai 60,000 ia chekhai. Nami klen kowi Libia siphaiuüa, Sukawt siphaiuüa hai Ethiawpia siphaiuüa paw aia hown tawi uowi khai.4Juda pren kowi kowh tap tapat lut mih marow ün aia powngta pe mih dow Jerusalem marow mowr uang towm khai bowt.5Nakhowk khe Juda aluchowuüa dow mang Sisek kowi kram rakowi Jerusalem marow kowi uang takua talawm khai. Nakhowk khe risi Semaia dow Rehoboam hai Juda aluchowuüa tut-e uangah now tek pe mih, “CHAKRAMANG tek mih, ‘Enni nuata ang khai. Naiawng rakowi ang paw kawmat mih mang Sisek rut kowi ang apta enni khowk,’ pakhai,” pape khai.6Nahanow mang Rehoboam hai Israel aluchowuüa dow khamsum khai bowt. Now tek mih, “CHAKRAMANG dow tara nowm chet mih chekhai,” pakhai.7Now CHAKRAMANG dow amatni khamsum mih khi hanow risi Semaia kowi uang tek pe mih, “Amatni uang khamsum mih dow ang khi khowk. Naiawng rakowi amatni kowi dow ang napiakah kown nadowi bowt; amatni kowh ripra dow ang na-eta pe nown kown. Jerusalem marow luk kowi kowh ang kowh kunmaraura maten ang nahüngah kown mih dow mang Sisek kowi ang natawngah kown nadowi.8Nachenganchepaw amatni dow Sisek nimkrüa kowi nauowi kown. Nahanow amatni dow ang vüi lup chang krang hai akeng manguüa vüi lup chang krang tawng iawng chow lang mih natuk büah kown,” pakhai.9Now Aigupta pren mang Sisek dow CHAKRAMANG kim hai mang kim kowi kowh uowi mih dawngthawnguan maten pawla bowk khai. Aia dow kuh hown kowh Sawlawmawn thawpah mih kawngma ün khowm padow pawla bowk khai.10Naiawng rakowi mang Rehoboam dow kuh hown kowh kawngma takcha kowi kri hown kawngma mih thawpah khai. Now naiawngün kawngma nachawng kownkow aia dow mang kimplawt chawng mih siphaiuüa kowi peah kurdik khai.11CHAKRAMANG kim kowi mang kowkowi mih khin khe kangchawng mih siphaiuüa dow naiawngün kawngma dowkla se mang tut-e tawi reng chekhai. Now akung kowi amatni dow naiawngün kawngma mih kangchawngra kim kowi uang towah büah khai.12Mang Rehoboam khamsum khai rakowi aia luk kowi kowh CHAKRAMANG kowh kunmaraura dow taing khai, now aia dow asaima pat piakah dowi chekhai. Nakhowk khe paw Juda pren kowi mih tawngbak mih arah kowi dow aiungma tak chekhai.13Now Jerusalem kowi chowm mang mih dow Sawlawmawn kowh chapa Rehoboam chekhai. Aia dow 41 ning khe chowm mang khai, now aia dow lairanit ning mowr chowmla mang khai. Nami khin khe aia dow aia kowh mangra mih pani kowh pani akhawtma changah khai. Israel chenchapuüa kowh arah maten hownia CHAKRAMANG aiamat nauowiah kownkow kloah mih dow Jerusalem marow chekhai. Rehoboam kowh u dow Amawnuüa chenchap Naima chekhai.14Mang Rehoboam dow CHAKRAMANG mik kowi angakma mih lup chang khai. Tawngplawng kowchow panow aia dow CHAKRAMANG naukrang tuk kown nau dowi chekhai.15Mang Rehoboam kowh akeng mih lup lawnguan dow auown hownia chur pat risi Semaia ruiah mih bowih kowi hai risi Ido ruiah mih ming tang bowih kowi arui uowi chekhai. Now Rehoboam kowh siphai hawmh hai Jeroboam kowh siphai hawmh dow atungma tasen reng chekhai.16Akung kowi Rehoboam dow kowng hanow a-pa David marow kowi maru dupah khai. Aia takcha dow achapa Abija mih ta chowm mang khai.
The Seed Company