2 Krungchakuüa11
1Rehoboam dow Jerusalem marow kowi kowting hanow Juda krungchakuüa hai Benjamin krungchakuüa maten kowi kuaah khai. Now siphai lang iung miuüa kowi 180,000 ia aia lang ruiah khai. Naiawng aia chang mih dow tawngphak pra kowh Israeluüa kowi senah hanow amatni kowh pren aia powngta pe kown nau rakowi chekhai.2Nachenganchepaw risi Semaia kowi Thurai uang tek pe mih,3“Juda pren mang Sawlawmawn kowh chapa Rehoboam, Juda krungchakuüa, Benjamin krungchakuüa maten hai akeng miuüa maten kowi en natek pe kown mih,4‘Enni kowh tainau Israeluüa hown nakowtasen kownkow hangkow tarü büa diah; enni mih chowlowkkow kim kowi plan büa diah. Tawngplawng kowchow panow maiawng phaw mih dow ang nauah kowh chekhai,’ pape diah,” pakhai. Naiawng rakowi amatni dow CHAKRAMANG kowh ana pek iawng Jeroboam hown tasen dowi kowi kim prakowi plan bowk khai.5Rehoboam dow Jerusalem marow kowi ta uowi khai. Aia dow Juda krungchakuüa hai Benjamin krungchakuüa kowh marow kowi akhawtma krawi chang pe tap khai.6Naiawngün marow dow Bethlehem, Etam, Tekoa,7Betzur, Soko, Adulam,8Gat, Maresa, Zif,9Adoraim, Lakhis, Azeka,10Zora, Aijalawn hai Hebrawn chekhai.11Naiawngün marow dow akhikhawtma aia changah khai, now naiawngün arah towng kowi dow siphai aluchowuüa kowi aia tow pe khai. Now naiawngünuüa vüi dow chakkham, kanrawn sau hai grep tui aia tow pe khai.12Nami klen kowi naiawngün marow nakhawtla ngamlam kownkow marow towng kawngma hai reh ün aia krawi tow pe khai. Naiawng hai Juda krungchakuüa hai Benjamin krungchakuüa dow aia nimkrüa kowi uowi khai.13Israel pren kowi kowh uamowuüa maten hai Leviuüa maten dow Rehoboam kowi tangila rakowi aia tut-e Juda pren kowi uang büah khai.14Jeroboam hai aia kung kowi kowh uang ta uowi mih Israel pren manguüa dow Leviuüa kowi pe changah uamow lup dowi bowt chekhai. Naiawng rakowi Leviuüa dow amatni kowh marow hai tawncher thing rah dowm ta towla hanow Juda pren hai Jerusalem marow kowi uang powt büah khai.15Jeroboam dow arah kroma mih kowi kowh chupiiara kowi nape changah uamow lup kownkow aia nau mih maru kowi towah khai. Naiawngün uamowuüa dow Jeroboam thawpah mih chia chah rup kowi chupiia khai.16Israel krungchakuüa maten hownia CHAKRAMANG Israeluüa kowh Thurai kowi süngürma hown cham miuüa dow Leviuüa hown Jerusalem marow kowi uang tawi powt khai. Naiawngün Israeluüa uang tawi mih dow CHAKRAMANG amatni pipu-uüa kowh Thurai vüi naia chang phuchua kownkow chekhai.17Amatni rakowi sum ning mowr dow Juda pren hai Sawlawmawn kowh chapa Rehoboam kowh mangra mih akhikhawtma uang phaw khai. Tawngplawng kowchow panow nami sum ning mowr dow amatni mih David hai Sawlawmawn tiama kowi mang reng tak chekhai.18Rehoboam dow Mahalat hown tachawng khai. Mahalat kowh pa dow David chapa Jerimawt chekhai, now aia kowh u Abihail dow Jese chapa Eliab chama chekhai.19Mahalat hown kowh Rehoboam kaah mih chapauüa dow Jeus, Semaria hai Zaham büah chekhai.20Akung kowi Rehoboam dow Absalawm chama Maka hown plan tachawng khai. Maka hown kowh aia kaah mih chapauüa dow Abija, Atai, Ziza hai Selomit büah chekhai.21Rehoboam kowh dow masi 18 ia, changla masi mih narma 60 ia, chapa 28 ia hai chama 60 ia chekhai. Naiawngün masi hai changla masi mih narmauüa pungmadawng kowi Absalawm chama Maka kowi aia lang sakrauah khai.22Rehoboam dow Maka chapa Abija kowi atainau-uüa pungmadawng kowi aluchow thawpah khai. Tawngplawng kowchow panow aia kung kowi nauang ta chowm mang kown mih Abija kowi aia nau rakowi chekhai.23Aia dow chanlaima hown achapauüa kowi peah kurdik hanow Juda krungchakuüa süng hai Benjamin krungchakuüa süng kowi kowh tap uowi mih marow kowi cham chinah ne khai. Now amatni kowi dow chakkham ahuma aia peah khai, now masi akawmma aia paw pe khai.
The Seed Company