Зах1
1Дарийын кокымшо ий вуйлатымыж годым кандашымше тылзынже пророк Захарийлан, Варахий эргылан, Иддон уныкажлан, Господьын шомакше лийын:2«Кугезе кочада-влаклан Господь чот шыдешкен.3Калыклан каласе: Господь Саваоф тыге ойла: Мый декем савырныза, – Господь Саваоф ойла, – тунам Мыят тендан деке савырнем.4Кугезе кочада-влак гай ида лий. Ончыч лийше пророк-влак нунылан ойленыт: ”Господь Саваоф тыге ойла: Осал корно ден осал пашадам кодыза”, но нуно Мыйым колыштын огытыл, каласымем шотыш налын огытыл, – ойла Господь.5Кушто кызыт кугезе кочада-влак улыт? А пророк-влак? Нуно курымеш илаш тӱҥалыт мо?6Но Мыйын шомакем ден пунчалем-влак, кудым пророк тарзем-шамычлан ойленам, кугезе кочада-влак дене шукталтын огытыл мо? Тунам нуно ӧкыненыт да каласеныт: ”Илыш корно ден пашаланна кӧра Господь Саваоф мом ышташ шонен пыштен, тудым шуктен”».7Дарийын кокымшо ий кугыжаланымыж годым латикымше тылзын – тиде шеват тылзе лийын – коло нылымше кечынже пророк Захарийлан, Варахий эргылан, Иддон уныкажлан, Господьын шомакше лийын.8Йӱдым мый кончымашым ужынам: теве йошкар имне ӱмбалне пӧръеҥ шинча. Тудо лапверыште, мирт пушеҥге-влак коклаште лийын. Шеҥгелныже йошкар, сар да ош имне-шамыч койыныт.9Мый йодынам: «Нине кӧмыт улыт, мыйын озам?» Мый денем кутырышо Суксо вашештен: «Кӧмыт нуно улыт, мый тылат ончыктем».10Тунам мирт пушеҥге-влак коклаште шогышо каласен: «Тиде нуно улыт, кӧмытым Господь мландымбалне мо ышталтмым ончал савырнаш колтен».11Нунышт мирт пушеҥге-влак коклаште шогышо Господьын Суксыжлан каласеныт: «Ме уло мландым ончал савырнышна, чыла вере – шып-тымык».12Господьын Суксыжо каласен: «Господь Саваоф, Иерусалимым да Иудан моло олажым эше мыняр жап от серлаге? Ынде шымле ий Тый нунылан шыдешкет!»13Тунам Господь мый денем кутырышо Суксылан поро да лыпландарыше шомакым ойлен.14Мый денем кутырышо Суксо мыланем каласен: «Увертаре, Господь Саваоф тыге ойла: Иерусалим ден Сион верч Мыйын чонем моткоч йӱлен,15азапланыде илыше калык-влаклан Мый чот шыдешкенам. Шке калыкемлан шыдем изишлан гына ылыжын, а нине калык-влак тудлан осалым утыждене шуко ыштеныт.16Сандене Господь тыге ойла: Мый Иерусалимыш чаманымаш дене пӧртылам, тушто Мыйын пӧртем угыч нӧлталме лиеш, – ойла Господь Саваоф, – да Иерусалим мучко висыме кандырам шуят.17Эше увертаре: Господь Саваоф тыге ойла: Мыйын олалаштем угыч перкелык лиеш, Господь Сионым лыпландара да угыч Иерусалимым ойырен налеш».18Вара мый вуем нӧлталынам да ныл тӱкым ужынам.19Мый денем кутырышо Суксо деч йодынам: «Тиде мо тыгай?» Тудо мылам вашештен: «Тиде Иудам, Израильым да Иерусалимым шалатен кышкыше тӱкӧ-влак улыт».20Вара Господь мыланем ныл кидмастарым ончыктен.21Мый йодынам: «Нуно мом ыштынешт?» Тудо вашештен: «Нине тӱкӧ-влак Иудам туге шалатен кышкеныт – нигӧат шке вуйжым нӧлталын кертын огыл. А нине кидмастар-влак нуным лӱдыкташ, Иуда мланде ваштареш тӱкыштым нӧлталше да тудым шалатен колтышо калык-влакын тӱкыштым пудырташ толыныт».
Institute for Bible Translation, Finland