2 Кур.кн21
1Вара Иосафат шке ача-кочаж-влак деке ушнен, тудым нунын пелен Давид-Олаште тоеныт. Олмешыже кугыжалан Иорам эргыже шогалын.2Иорамын шольыжо-влак: Азарий, Иехиил, Захарий, Азарий, Михаил да Сафатий. Нине чыланат Израиль кугыжа Иосафатын эргыж-влак лийыныт.3Ачашт нунылан пӧлек шотеш шуко шӧртньым, шийым да шергакан ӱзгарым, тыгак Иуда мландысе чоткыдемдыме ола-влакым пуэн. А кугыжан кучемвийым Иорамлан пуэн, вет тудо кугэргыже лийын.4Кунам Иорам ачажын кугыжанышыжым вуйлаташ шогалын да кучемвийже пеҥгыдемын, тудо шке шольыжо-влакым да израиль калык кокла гыч икмыняр вуйлатышым керде дене пуштын.5Кугыжалан шогалмыж годым Иорам кумло кок ияш лийын да Иерусалимыште кандаш ий вуйлатен.6Тудын ватыже Ахавын ӱдыржӧ улмаш. Сандене Иорам, Ахав тукым семынак, Израиль кугыжа-влакын корнышт дене коштын да Господь шинча ончылно шуко осал пашам ыштен.7Но Давид дене ыштыме ойпидышыжлан кӧра Господь тудын тукымжым ынеж пытаре улмаш, вет Тудо Давид ден тудын эргыж-влаклан «тендан тукымдан лампыже нигунам ок йӧрӧ» манын сӧрен.8Иорам вуйлатыме годым Едом Иуда кугыжанышын кидше йымач лектын да шкаланже кугыжам шогалтен.9Тунам Иорам шке сарзывуйжо да орван сарзыж-влак дене тушко каен. Идумей-влак тудым да орван сарзе вуйлатыше-шамычым авырен налыныт, но Иорам йӱдым тарванен да нуным кырен шалатен. [Но вара Иудан сарзыже-влак мӧҥгышкышт куржыныт.]10Едом таче кече мартеат Иуда кид йымалне огыл. Тиде жапыштак Иорамын кидше йымач эше Ливна лектын, вет Иорам шке ача-кочаж-влакын Господь Юмышт деч кораҥын улмаш.11Тудо тыгак Иуда курыклаште кумалме вер-влакым ыштен – Иерусалимыште илыше-шамычым шояк юмо-влаклан кумалаш таратен, Иуда калыкым чын корно гыч кораҥден.12Тудлан пророк Илия деч серыш толын, тушто каласыме лийын: «Тыге Давид кугезе кочатын Господь Юмыжо ойла: тый Иосафат ачатын да Иуда кугыжа Асан корнышт дене огыл,13а Израиль кугыжа-влакын корнышт дене каенат. Ахав тукым семын Иудам да Иерусалимыште илыше-шамычым шояк юмо-влаклан кумалаш таратенат. Эше тый шке шольыч-влакым, шке ачатын тукымжым, пуштынат, а нуно тый дечет сайрак лийыныт.14Сандене Господь тыйын калыкет, эргыч ден ватет-влак да уло погет ӱмбаке кугу орлыкым,15а тыланет кӧргарверым пытарыше шучко черым колта. Кӧргет гыч кӧргарвер лекмешке, тиде чер кече гыч кечыш шуйна».16Иорам ваштареш Господь эфиоп-шамыч воктене илыше филистим ден араб-влакым таратен.17Нуно Иуда ӱмбак каеныт, тушко керылт пуреныт да кугыжан пӧртыштӧ улшо чыла погым, тыгак эргыж ден ватыже-влакым руалтен налыныт. Тудын эн изи Охозий эргыже веле кодын.18Тидын деч вара Господь тудын кӧргарвержым паремдаш лийдыме чер дене черландарен.19Тиде чер кече гыч кечыш шуйнен, а кокымшо ий мучаште чыла кӧргарверже тӱжвак лектын. Иорам пеш чот орланен колен. Ача-кочаж-влаклан ыштыме семын калык тудын лӱмеш тулотым ылыжтен огыл.20Иорам кугыжалан шогалмыж годым кумло кок ияш лийын да Иерусалимыште кандаш ий вуйлатен. Вес тӱняшке тудо шортмо йӱлам эртарыдыме каен. Тудым Давид-Олаште, но кугыжа-влакым пыштыме шӱгарлаш огыл тоеныт.
Institute for Bible Translation, Finland