Mark2
1कुछ दिन बीतला के बाद, यीशु कफरनहूम नगर में लौट अईलन। लोग दोसरा लोगवन तक जल्दिये ई समाचार के फैला देलन कि यीशु आ गेलन हे आउर एगो घर में हथन। 2जहाँ यीशु रुकल हलन ऊहाँ जल्दिये बड़ी लोग जमा हो गेलन। ऊ लोग एतना जादे हलन कि घर भर गेल हल। फिन खड़ा होवे के जगह भी नऽ बचल, ईहाँ तक कि दुआरी के आस-पास भी जगह नऽ बचल। यीशु ओखनी के परमेश्वर के सुसमाचार सुनईलन।3कुछ लोग घर के बगल यीशु भीर एगो अादमी के लेके अईलन जे लकवा मारल हल। चारगो अादमी उनका खटिया पर उठईले हलन।4ऊ लोग ऊ अादमी के जमा होल ऊ भीड़ के चलते यीशु भीर नऽ ले जा सकलन। येहिगुने ओखनी ऊ घर के छत पर चढ़ गेलन, आउर यीशु के ऊपर छत में एगो बड़का छेद कर देलन। ओखनी ऊ लकवा मारल अादमी के उनकर खटिया पर ऊ छेद के जरिये से यीशु के सामने उतार देलन।5जब यीशु ई जान लेलन कि ई लोग के विश्वास हे कि हम ऊ आदमी के चंगा कर सकऽ ही, तऽ यीशु, ऊ लकवा मारल आदमी से कहलन, “हे हमर बेटा, हम तोर पाप के मांफ कर देली हे!”6यहूदी शास्त्री कुछ लोग ऊहाँ बईठल हलन। ओखनी अपन-अपन मन में सोचे लगलन,7“ई अादमी अपने आप के का समझऽ हथन, जे अईसन बात करते हथन? ऊ तऽ अईसन बोल के परमेश्वर के अपमान करते हथन! कोई अादमी पाप के मांफ नऽ कर सकऽ हथन खाली परमेश्वर ही कर सकऽ हथन!” 8ओही घड़ी यीशु अपन आत्मा में जान लेलन कि ऊ अपन मन में का सोच रहलन हे। ऊ ओखनी से पूछलन, “तूँ अईसन काहे सोच रहलऽ हे कि हमरा पाप के मांफ करे के अधिकार नऽ हे?”9हमरा लागी ई लकवा मारल आदमी से का कहे ला आसान होत, “हम तोर पाप के मांफ कर देली हे' चाहे' खड़ा होवऽ! अपन खटिया उठाबऽ आउर चलऽ फिरऽ?”10हम तोरा देखायेम कि “परमेश्वर आदमी के बेटा के धरती पर पापवन के मांफ करे के भी अधिकार देलन हे।” फिन ऊ लकवा मारल आदमी से कहलन,11“खड़ा होवऽ! अपन खटिया उठावऽ आउर घरे चल जा!”12तुरन्त ऊ अादमी खड़ा हो गेलन। जब सभे लोग देख रहलन हलऽ ओही घड़ी ऊ अपन खटिया उठ के बाहरी चल गेलन। ऊ सभे के सभे चौंक गेलन, आउर ओखनी परमेश्वर के स्तुति करलन आउर कहलन, “जौन कुछ अखनी होल ओईसन हमनी पहिले कहियो नऽ देखली हे!”13यीशु कफरनहूम नगर से निकललन आउर फिन से गलील के झील के किनारे-किनारे जाय लगलन। एगो बड़का भीड़ उनका भीर अईलन, आउर ऊ ओखनी के शिक्षा देलन।14जखनी ऊ जा रहलन हल, तऽ ऊ लेवी नाम के एगो अादमी के देखलन, जेकर बाबूजी के नाम हलफई हल। ऊ अपन काम करे वाला चुंगी के चौकी में बईठल हलन जहाँ ऊ चुंगी ले हलन। यीशु उनका से कहलन, “हमरा साथे चलऽ आउर हमर चेला बन जा।” ऊ उठ के यीशु के साथे हो लेलन।15बाद में, यीशु लेवी के घर में खाना खा रहलन हल। बड़ी सा चुंगी लेवे वाला अादमी आउर दोसरा लोग जिनका धार्मिक अगुवा पापी मानऽ हलन यीशु आउर उनकर चेलवन के साथे खाना खा रहलन हल। ऊहाँ अईसन बड़ी लोग हलन जे यीशु के साथे सभे जगह जा रहलन हल।16जे लोग यहूदी शास्त्रियन हलन आउर फरीसी समाज के सदस्य हलन, ओखनी देखलन कि यीशु पापी आउर चुंगी लेवे वाला आदमियन के साथे खाना खा रहलन हे। ओखनी यीशु के चेला से पूछलन, “ऊ पापियन आउर चुंगी लेवे वाला आदमी के साथे काहे खा-पियऽ हथन?”17जब यीशु ऊ सुनलन जे ऊ पूछ रहलन हल, तऽ ऊ यहूदी धरमगुरु ऊ आदमी से कहलन, “भला चंगा लोग के वैद्य के जरुरत नऽ होवऽ हे। एकर उल्टा, जे लोग बेमार हथन उनका वैद्य के जरुरत होवऽ हे। हम ऊ लोगवन के अपना भीर आवेला नेऊता देवे नऽ अईली जौन खुद के धर्मी समझऽ हथन, बाकि उनका बोलावे अईली हे जे जानऽ हथन कि हमनी पाप करली हे।”18अब ऊ घड़ी, यूहन्ना बपतिस्मा देवे वाला के अनुयायी आउर कुछ अईसन लोग जौन फरीसियन के समाज से जुटल हलन ऊ उपवास कर रहलन हल, जईसन कि ऊ हमेशा करते रहऽ हलन। कुछ लोग यीशु भीर आके पूछलन, “यूहन्ना आउर फरीसियन के चेला तऽ हमेशा उपवास करऽ हथन। तोर चेलवन उपवास काहे नऽ करऽ हथन?”19यीशु उनका से कहलन, “जब कोई अादमी कोई औरत से वियाह करे वाला हथन, तऽ वियाह के घर में जब तक दूल्हा के दोस्तवन साथे-साथे रहऽ हथन, तऽ ऊ सच में उपवास नऽ करतन। वियाह के घड़ी दूल्हा के साथे दावत आउर खुशी मनावे के समय होवऽ हे। ई उपवास करे के समय नऽ होवऽ हे, खास कर के जखनी दूल्हा उनका साथे होतन।20बाकि कोई दिन, दूल्हा उनकर साथियन से अलग कर देवल जाय। तऽ ऊ दिन में, ओखनी उपवास करतन।”21यीशु उनका से कहते ही चल गेलन, “लोग पुराना कपड़ा के छेद सुधारे लागी नया कपड़ा के पेवन्द नऽ लगावऽ हथन। जदि ओखनी अईसन करतन, ऊ कपड़ा के धोवे घड़ी, ऊ पेवन्द सिकुड़ जायेत, आउर नया कपड़ा के टुकड़ा पुराना कपड़ा के आउर जादे फाड़ देत। जेकर नतीजा से, ऊ छेद आउर बड़ा हो जा जायेत!”22ओही तरह से, लोग नया दाखरस पुराना चमड़ा के थैला में नऽ भरतन। जदि ओखनी अईसन करतन, तऽ नया दाखरस ऊ चमड़ा के थैला के येही से फाड़ देत, काहेकि जखनी दाखरस उफान मारत तऽ थैला नऽ फैलत। जेकर नतीजा, दाखरस आउर चमड़ा के थैला दूनो बर्बाद हो जायेत। एकर उल्टा, “लोगवन के नया दाखरस चमड़ा के नया थैला में भरे के चाही!”23यहूदियन के सब्त दिन पर, यीशु अपन चेला के साथे गेहूँ के खेत में से होके जा रहलन हल। जब ऊ गेहूँ के खेत में से होते जा रहलन हल, तऽ यीशु के चेलवन गेहूँ के बाल तोड़ रहलन हल। 24जौन ऊ कर रहलन हल उनका देख के कुछ फरीसियन यीशु से कहलन, “ई देखऽ! ऊ सभे सब्त दिन से सम्बन्धित यहूदी व्यवस्था के तोड़ रहलन हे। ऊ अईसन काहे कर रहलन हे सही हे?”25यीशु उनका जबाब देलन, “का तूँ दाऊद राजा आउर उनकर लोगवन के बारे में पवित्रशास्त्र में नऽ पढ़लऽ जब ओखनी भूखल हलन?”26जौन समय पर एब्यातार महायाजक हलन, “ऊ घड़ी दाऊद परमेश्वर के भवन में जा के रोटी माँगलन। महायाजक उनका ओकरा में से कुछ रोटी देलन जे परमेश्वर के सामने रखल हल! हमर व्यवस्था के मुताबिक, ऊ रोटी के खाली याजक ही खा सकलन हल! बाकि दाऊद ओकरा में कुछ खईलन। फिन ऊ ओकरा में से कुछ ऊ लोगवन के भी देलन जे उनकर साथे हलन जे कोई ला सही नऽ हल।” 27यीशु आगे ओखनी से कहलन, “परमेश्वर मानव जाति लागी विश्रामदिन के बनईलन हे। ऊ सब्त के दिन मानव जाति पर बोझा होवे लागी नऽ बनईलन।”28येही से, “साफ हे कि आदमी के बेटा सब्त दिन के भी प्रभु हथन!”
Bridge Connectivity Solutions Pvt. Ltd.