Luke16
1यीशु अपन चेलवन से ई कहलन, “एक बेरा एगो धनवान हल जेकरा भीर एगो घर के भण्डारी हल। एक दिन कोई आदमी ऊ धनवान के जानकारी देलन कि ऊ भण्डारी अईसन बुरा काम कर रहल हलऽ कि ऊ धनवान अपन ढेरमनी धन गँवईले जा रहलन हल।2येहिगुने ऊ, ऊ भण्डारी के अपना भीर बोला के ओकरा से कहलन, जौन हम सुनली हे कि जौन तूँ कर रहलऽ हे ऊ भयानक हे! हमरा लिखित में ऊ चिजवन के अंतिम जानकारी दऽ जेकरा व्यवस्था तूँ कर रहल हे, काहेकि अब तूँ हमर घर के भण्डारी बनल नऽ रहवऽ!3तऽ ऊ भण्डारी अपने आप से कहलन, हमर मालिक हमरा अपन भण्डारी बनल रहे से निकासे वाला हे, येहिगुने हमरा सोचे पड़त कि का करे के चाही। हम एतना मजबूत भी नऽ ही कि मट्टी कोड़े के काम करम, आउर भीख माँगे में हमरा लाज लगऽ हे।4हम जानऽ ही कि हम का करम जेकरा से लोग हमरा अपन घरे बोला लेतन आउर हमरा लागी इन्तजाम करतन जखनी ई हमरा भण्डारी के काम से हमरा निकास देतन!5येहिगुने ऊ ओखनी सभे के जेकरा पर ओकर मालिक के कर्जा हल एक-एक कर के अपना भीर बोलईलन। ऊ पहिलका से कहलन, हमर मालिक के तोरा भीर केतना कर्जा हे?6ऊ आदमी जवाब देलन, 3, 700 लीटर जैतून के तेल। ऊ भण्डारी ओकरा से कहलन, अपन खाता-बही लऽ, आउर बईठ जा, आउर झटपट कर्जा के 1, 500 लीटर में बदल दऽ!7ऊ दोसर आदमी से कहलन, तोरा पर केतना बकाया हे ऊ आदमी जवाब देलन, एक हजार टोकरी गेहूँ। ऊ भण्डारी ओकरा से कहलन, अपन खाता-बही लऽ आउर कर्जा के 800 टोकरी में बदल दऽ!8जखनी मालिक सुनलन कि ओकर भण्डारी का करलन हे तऽ ऊ, ऊ अन्यायपूर्ण भण्डारी के बड़ी चलाक होवे ला ओकर बड़ाई करलन। सच ई हे कि, ई संसार के आदमी ई विषय में परमेश्वर के लोगवन से जादे चलाक हे कि ओखनी अपन अगल बगल के लोगवन से कईसन प्रेम भाव रखऽ हथन।9आउर यीशु आगे कहलन, हम तोरा से कहऽ ही, ई दुनियाँ में जौन अन्यायपूर्ण धन तोहनी ही हे ओकरा खुद ला दोस्त बनावे ला इस्तेमाल करऽ। ऊ घड़ी जखनी धन खतम हो जायेत, ऊ दोस्त अपन घर में तोहनी के इज्जत करतन, जे कि अनन्त निवास में बनल रहत।10अईसन लोग जौन तनिसा धन के विश्वासयोग्यता के साथ उपाय करऽ हथन तऽ ओखनी बड़ी में भी विश्वासयोग्य रहतन। अईसन लोग जौन तनिसा में धन के उपाय करे में छली हे, ओखनी बड़ी में भी अधर्मी रहतन।11येहिगुने जदि तोहनी अधर्म के धन में विश्वासयोग्य नऽ रहलऽ, तऽ सच्चा धन तोहनी के कौन सौंपतन?12जदि तूँ ऊ दौलत के जौन दोसर लोग के हे विश्वासयोग्यता के साथे उपाय नऽ करलऽ हे, तऽ तोरा केकरो से ई उम्मीद नऽ करे के चाही कि ऊ तोरा तोर अपन दौलत देतन।13कोई दास एक समय पर दूगो अलग-अलग मालिक के सेवा करे में असमर्थ होवऽ हे। जदि ऊ अईसन करे के कोशिश करलन, तऽ ऊ एगो से जलन रखतन आउर दोसर से प्रेम रखतन, ऊ ओखनी में से एगो के साथे विश्वासयोग्य रहतन आउर दोसर के तुच्छ जानतन। तूँ अपन जिनगी परमेश्वर के सेवा करे ला निछावर नऽ कर सकलऽ हे जदि तूँ अपन जिनगी में सांसारिक धन आउर दोसर दुनियेवी दौलत के हासिल करे ला सौंप रहलऽ हे।”14जखनी फरीसियन जौन ऊहाँ पर मौजूद हलन ई सुनलन जेकर यीशु शिक्षा दे रहलन हल, तऽ ओखनी उनकर मजाक उड़ईलन काहेकि ऊ धन के प्रेमी हलन।15बाकि यीशु ओखनी से कहलन, “तोहनी दोसर लोगवन के मन में ई सोचे देवे लागी कोशिश करऽ हऽ कि तोहनी धर्मी हऽ, बाकि परमेश्वर जानऽ हथन कि सच में तोहनी केकरा जईसन हऽ। धियान रखऽ कि परमेश्वर ऊ बड़ी-मनी चीज से घिनामन मानऽ हथन जेकरा लोग बड़ी खास के जईसन बड़ाई करऽ हथन।”16जौन व्यवस्था परमेश्वर मूसा के देलन हे आउर जौन बात भविष्यद्वक्तावन लिखलन, ऊ यूहन्ना बपतिस्मा देवे वाला के आवे के घड़ी तक असरदार हल। तहिया से हम ई शुभ संदेश के प्रचार कर रहली हे कि परमेश्वर राजा के रूप में कईसे शासन करतन। बड़ीमनी लोग हमर सन्देश के अपना रहलन हे बड़ी खुशी से परमेश्वर के राज के हिस्सा बने ला कोशिश कर रहलन हे।17परमेश्वर के पूरा व्यवस्था, ईहाँ ला कि ऊ जौन बेकार लगऽ हे, स्वर्ग आउर धरती से भी जादे टिकाऊ हे।18जौन आदमी अपन औरत से वियाह तोड़ के दोसर औरत से वियाह करऽ हे तऽ ऊ व्यभिचार करऽ हे, आउर जौन मरद ऊ औरत से वियाह करऽ हे जेकर मरद ओकरा से वियाह के रिश्ता तोड़ लेलन हे तऽ ओहू व्यभिचार करऽ हे।19यीशु ई दृष्टान्त भी कहलन “एक बार एगो धनवान आदमी हलन जौन बेसकीमती बैंगनी पोशाक आउर सन के कपड़ा पेहनले रहऽ हलन। ऊ रोजदिन शानदार भोज करते रहऽ हलन।20आउर रोजदिन लोग एगो गरीब आदमी के जेकर नाम लाजर हल ऊ धनवान आदमी के घर के दुआरी पर सुता दे हलन। लाजर के देह घाव से भरल हल।21ऊ एतना भूखल हल कि ऊ रोटी के ऊ टुकड़वन खाय ला चाहऽ हल जौन ऊ मेज से गिरऽ हल जहाँ ऊ धनवान आदमी खा हलन। जखनी ऊ ओज्जा सुतल रहऽ हल तऽ कुत्तवनो आके ओकर घाव के चाटऽ हल।22अन्त में ऊ गरीब आदमी मर गेल। फिन स्वर्गदूत ओकर पुरखा अब्राहम के साथे रहे ला ले गेलन। ऊ धनवान भी मर गेल, आउर लोग ओकर देह के गाड़ देलन।23मरलकन के जगह में, ऊ धनवान बड़ी दुःख झेल रहल हल। अमीर आदमी पताल लोक से नजर उठ के बड़ी दूरे से अब्राहम के देखलन आउर लाजर उनकर गोदी में बईठल हल।24येहिगुने ऊ धनवान आदमी चिल्लईलक, हे पिता अब्राहम, हम ईहाँ धधकल आग में बड़ी जादे तड़प रहली हे! येहिगुने कृपया हमरा पर दया कर के लाजर के ईहाँ भेज दऽ जेकरा से कि ऊ अपन अँगुली के पानी में भींगा के हमर जीभ के ठण्डा करे लागी ओकरा छू लेतन!25बाकि अब्राहम जवाब दे के कहलन, हमर बेटा, याद करऽ कि जौन घड़ी तूँ धरती पर जिन्दा हलऽ तहिया तूँ बड़ी बढ़ियाँ-बढ़ियाँ चीज के मजा चख लेलऽ। बाकि लाजर दुःख में हल। अखनी ऊ ईहाँ शान्ति पा रहलन हे, आउर तूँ दुःख झेल रहलऽ हे।26एकर अलावे, परमेश्वर हमनी के आउर तोर बीच में एगो बड़कागो गबड़ा रखलन हे। येहिगुने जौन कोई ईहाँ से ऊहाँ तोरा भीर जाय लागी चाहतन तऽ ऊ अईसन करे में कामयाब नऽ होतन। एकरो से बढ़ के, कोई भी ईहाँ जहाँ हम ही पार कर के नऽ आ सकलन हे।27तऽ ऊ धनवान आदमी अब्राहम से कहलन, जदि अईसन हे तऽ, हे पिता अब्राहम, हम तोरा से विनती करऽ ही कि लाजर के हमर घरवईया भीर भेज दऽ।28जहाँ हमरा पाँचगो छोटा भाई हे जौन ऊहाँ रहऽ हे। ओकरा से ओखनी के चेतौनी देवे लागी कहऽ दऽ जेकरा से ओखनी भी ई जगह पर नऽ आवे जहाँ हम बड़ी दुःख-तकलीफ झेलते ही!29बाकि अब्राहम जवाब में कहलन, नऽ, हम अईसन नऽ करम काहेकि तोर भईवन भीर ऊ हे जौन मूसा आउर भविष्यद्वक्तावन बड़ी समय पहिले लिख देलन हल। जौन ओखनी लिखलन हे ओखनी ओकर पढ़ सकलन हे, कि ओखनी का लिखलन हे!30बाकि ऊ धनवान आदमी जवाब में कहलन, नऽ हे पिता अब्राहम, ई बड़ी जादे नऽ हे! बाकि कोई ओखनी में से जौन मर गेलन हे ओखनी भीर वापस जईतन आउर ओखनी के चेतौनी देतन, तऽ ओखनी अपन पापी स्वभाव से मन फिरईतन।31बाकि अब्राहम ओकरा से कहलन, जदि ओखनी ऊ बात के नऽ मानऽ हे जौन मूसा आउर भविष्यद्वक्तावन लिखलन हे। फिन तऽ ई भी ओखनी के मदत नऽ कर पईतन कि जदि कोई ओखनी में से जौन मर गेलन हे जा के ओखनी के चेतौनी देतन। ऊ तईयो विश्वास नऽ करतन कि ओखनी के अपन पापी स्वभाव से लौट आवे के चाही।”
Bridge Connectivity Solutions Pvt. Ltd.