Luke14
1एक सब्त के दिन, जे कि विश्राम के दिन हल, यीशु भोजन करे ला फरीसियन के अगुवन में से एगो के घर गेलन। ओही अगुवा ओही भोज में दोसर फरीसियन के भी नेऊता देलक हल। ओखनी सभे के सभे यीशु के उनका पर दोष लावे ला कोई बहाना खोजे के कोशिश में बड़ी गौर से देख रहलऽ हल।2ओज्जे पड़ी यीशु के सामने एगो आदमी हलन जेकरा एगो अईसन बेमारी हल जेकरा वजह से ओकर हाथ गोड़ बड़ी सूज गेल हल।3यीशु यहूदी व्यवस्थापक आउर फरीसियन से जौन ऊहाँ पर मौजूद हलन पूछलन, “का व्यवस्था में सब्त के दिन लोगवन के चंगा करे ला सही हे, कि नऽ?”4ओखनी जवाब नऽ देलन। येहिगुने यीशु अपन हाथ ऊ आदमी पर रखलन आउर ओकरा चंगा कर देलन। फिनो यीशु ऊ आदमी से कहलन कि ऊ जा सकलन हे।5आउर ऊ, ऊहाँ पर मौजूद दोसर आदमियन से कहलन, “जदि तोहनी में से केकरो बेटा चाहे बैल रहे जौन सब्त के दिन कुईयाँ में गिर जाय, तऽ का तोहनी जल्दी से ओकरा बाहरसी नऽ खींच लेवऽ।”6फिनो ओखनी ओकर जवाब देवे में सक्षम नऽ हलन।7जखनी यीशु गौर से देखलन कि जौन लोगवन के भोज में बोलावल गेलन हल ओखनी ऊ, ऊ आसन पर बईठे लागी चुन रहल हल जहाँ दृष्टान्त से खास लोग बईठऽ हलन। येहिगुने ऊ ओखनी के ई सुझाव देलन।8“जखनी कोई आदमी तोहनी में से केकरो वियाह के भोज में नेऊता दे हे, तऽ ऊ जगह पर मत बईठिहऽ जहाँ पर मेहमान लोग बईठऽ हथन। हो सकऽ हे कि ओखनी कोई अईसन आदमी के ऊ भोज में बोलईलन होत जौन तोरो से भी जादे खास होतन।9जखनी ऊ मेजवान जौन तोहनी दूनो के अपन भोज में नेऊता देलन हे देखतन कि तोहनी में से सभे लोग कहाँ बईठल हऽ, तऽ ऊ तोरा से कहतन, ई आदमी के अपन आसन पर बईठे दऽ! तखनी तोरा सभे से नीचलका आसन पर बईठे पड़तक, आउर तोरा बेईज्जती भी होवे पड़त।10एकर बदले, जखनी कोई आदमी तोहनी के कोई भोज में नेऊता दे हथन, तऽ जा के सभे से नीचला जगह पर बईठिहऽ। फिन जखनी ऊ आदमी जौन सभे के ऊ भोज में नेऊता देलन हे अईतन, तऽ ऊ तोरा से कहतन, हे दोस्त, आके ऊँचा आसन पर बईठऽ! तऽ ओखनी सभे लोग जौन तोरा साथे भोजन कर रहलन हे देखतन कि ऊ तोरा इज्जत मर्याद कर रहलन हे। 11काहेकि परमेश्वर ओखनी के नम्र बनईतन जौन अपने आप के बड़का बनावऽ हे, आउर ओकरा बड़ा बनईतन जौन अपने आप के नम्र बनावऽ हे।”12तब यीशु ऊ फरीसी से भी जौन ओकरा भोज लागी नेऊता देलन हल कहलन, “जखनी तूँ दिन के भोज चाहे रात के भोज लागी नेऊता दिहऽ तऽ खाली अपन दोस्तवन परिवारवन चाहे अमीर पड़ोसियन के नेऊता मत दिहऽ, काहेकि बाद में ओखनियो, तोरा भोज में नेऊता दे के तोर बदला चुका देतन।13एकर बदले, जहिया तूँ भोज करिहऽ, तऽ गरीब अलचार, लँगड़न चाहे अंधरन के नेऊता दिहऽ।14जदि तूँ अईसन करवऽ तब तूँ धन्य होवऽ, तऽ परमेश्वर तोरा इनाम देतन। काहेकि ओखनी तोर बदला चुकावे में असमर्थ रहतन। तूँ पक्का हो सकल हऽ कि परमेश्वर तोरा ऊ घड़ी एकरा वापस लौटईतन जहिया ऊ धर्मियन के पुनरुत्थान करतन।”15जौन लोग उनका साथे भोजन कर रहलन हल ओखनी में से एगो उनका ई कहते सुनलन। ऊ यीशु से कहलन “परमेश्वर सभे ऊ लोगवन के सच में आशीष देलन हे जौन ऊहाँ खुशी मनावे पईतन जहाँ राजा के रूप में परमेश्वर सभे कुछ पर राज करऽ हथन!”16यीशु ई दृष्टान्त के साथ ओकरा जवाब देलन, “एक बेरा एगो आदमी बड़का भोज करलन। ऊ ढेरमनी लोगवन के आवे लागी नेऊता देलन।17जखनी भोज के समय आयेल, तऽ जौन लोग के ऊ नेऊता देलन हल उनका भीर ऊ अपन दास के भेजलन, अखनी आ जा, काहेकि सभे कुछ तईयार हे!18बाकि जखनी दास अईसन करलन, तऽ ऊ सभे लोग जेकरा नेऊता देवल गेल हल बतावे लगलन कि ओखनी काहे नऽ आ सकलन हे। ऊ पहिलका आदमी जेकरा भीर ऊ दास गेलन हल, कहलन, हम अभी-अभी एगो खेत मोल, किनली हे आउर हमरा ऊहाँ जा के ओकरा देखे ला जरुरी हे। कृपया विनती कर के अपन मालिक से हमरा नऽ आवेला मांफ कर देवे लागी कह दिहऽ।19दोसरका आदमी बोललन हम अभी-अभी पाँच जोड़ा बैल मोल किनली हे आउर हम राजा के ओकरा परखे ला जरुरी हे कृपया विनती कर के अपन मालिक से हमरा नऽ आवेला मांफ कर देवे ला कहऽ दिहऽ।20एगो दोसर आदमी बोललन, हम अभी-अभी वियाह करली हे येहिगुने हम नऽ आ सकली हे।21येही से ऊ दास अपन मालिक भीर लौट अईलन आउर सभे लोग जौन ओकरा से कहलन हल ऊ ओकरा बता देलन। घर के मालिक बड़ी खिसिया के अपन दास से कहलन, नगर के गली-कूची आउर शहर के चौराहा पर जल्दी से जा आउर गरीब के आउर अलचार के अंधरन के आउर लँगड़न के खोज के ओकरा ईहाँ हमर घर में लेके आवऽ!22ओकर बाद ऊ दास चल गेलन आउर ओईसहीं करलन, आउर ऊ वापस आके कहलन, हे स्वामी, तूँ हमरा से जौन करे लागी कहलऽ हल हम ऊ कर देली हे, बाकि अखनी भी आउर मेहमान लागी जगह बचल हे।23येहिगुने उनकर मालिक दास से कहलन, तऽ फिन नगर के बाहरे चल जा। सड़क पर लोगवन के खोजऽ। बाड़ा वाला कस्सत सड़क पर नऽ खोज करऽ। ऊ जगह में रहेवालन लोगवन के हमर घरे आवे लागी मजबूर कर के निवेदन करऽ। हम चाहऽ ही कि ऊ लोग से भर जाय!24एकर अलावे हम तोरा से कहऽ ही कि ऊ आदमी जेकरा हम पहिले नेऊता देली हल भोज के मजा नऽ ले पईतन, काहेकि ओखनी आवे से मना कर देलन हल।”25बाद में लोगवन के एगो बड़का भीड़ यीशु के साथे चल रहल हल। ऊ लोगवन तरफ मुड़ के लोग से कहलन,26“जदि कोई हमरा भीर आवऽ हे जौन अपन बाप आउर अपन माय आउर मेहरारू आउर लईकन आउर भईवन आउर बहिनियन से ओखनी से बढ़ के प्रेम करऽ हे जेतना ऊ हमरा प्रेम करऽ हे, तऽ ऊ हमर चेला नऽ बन सकल हे। ओकरा हमरा ओखनी से भी जादे प्रेम करे ला हे जेतना ऊ अपन खुद के जिनगी से करऽ हे। 27जौन कोई अपन खुद के क्रूस नऽ उठावऽ हे आउर हमर आज्ञा पालन नऽ करऽ हे तऽ ऊ हमर चेला नऽ बन सकऽ हे।28मान लऽ जदि तोहनी में से कोई गुम्मट बनावे लागी चाहऽ हऽ, तऽ सभे से पहिले तोहनी बईठ के ई तय करवऽ कि एकरा में केतना खरचा होत।29नऽ तऽ, जदि तोहनी नींव डाल देवऽ आउर बाकि गुम्मट के पूरा करे लागी सक्षम नऽ होवऽ, तऽ जौन कोई भी ई देखतन ऊ तोहनी के मजाक उड़ईतन।30ओखनी कहतन, ई आदमी गुम्मट बनावे लागी शुरु तऽ करलन, बाकि ओकरा पूरा करे में सक्षम नऽ हलन।31चाहे मान लऽ कि एगो राजा भीर दस हजार सिपाही हे। आउर मान लऽ कि कोई दोसर राजा ओकरा पर हमला करे आ रहल हे जेकर भीर बीस हजार सिपाही हे। तऽ अपन सेना के लड़ाई में बाहरे निकलला से पहिले, सभे से पहिले ऊ राजा जरुर अपन सलाहकार से बईठ के ई तय करतन कि ऊ दोसर राजा के हरा सकलन हे कि नऽ।32मान लऽ कि ऊ ई तय करलन हे कि ओकर सेना दोसर सेना के हरा नऽ सकल हे। तखनी ऊ अपन संदेशवाहक के ऊ दोसर राजा भीर भेजतन जबकि अखनी ओकर सेना दूरे हे। ऊ अपन संदेशवाहक के ओकरा से ई पूछे लागी भेजतन, तोरा साथे हमरा शान्ति बना के रखे लागी हमरा का करे पड़तक?33अन्त में, ओईसहीं तोहनी में से कोई पहिले ई फईसला नऽ ले हथन कि जौन कुछ तोर भीर हे तोहनी ओकरा छोड़े लागी चाहऽ हऽ, तऽ तोहनी हमर चेला नऽ बन सकलऽ हे।”34यीशु ई भी कहलन, “तोहनी अईसन हऽ जईसन कि नमक, जौन कि बड़ी काम के होवऽ हे। बाकि जदि नमक अपन नूनगरपन खतम कर देत, तऽ फिनो कोई भी ओकरा फिन से नमक के स्वाद नऽ दे सकल हे।35जदि नमक में अखनी नमक के स्वाद नऽ रहत तऽ अखनी ऊ कोई काम के नऽ रहलक, नऽ तऽ जमीन ला आउर नऽ खाद ला। लोग ओकरा खाली बिग दे हथन। जौन तोहनी हमरा अखनी कहते सुनलऽ हे ओकर बारे में तोहनी के ढेर होशियारी से विचार करे के चाही!”
Bridge Connectivity Solutions Pvt. Ltd.