2 Timote3
1Pale méyi eehe, ti kunoom ka kikelan ka kiti púlunta pa, efitaako kunoom kéeciita meemak.2Kaatuko pakan paka efikayeno kéelafiye faŋii, kéelafiye mañ, nkamec, nkáseepinoolo, nkayeno piteñala, étikatuul pupukayii, etikasok apalaka, etikakuul.3Etíkalafi an, etikaponket an, efikasok heenaput ti pakan paka, étikayini ecocokanoolo, efikakanc, nkanat heenape.4Efíkaful ti pakakee paka, éfikahin waah péemiiloolut, apan nkafomanoolo. Nkálafi héesuumii ha pihaŋ pálafi Pútuun pa.5Efikawen nii keetaake káyinan, pale nkapook sempe etenko. Láaŋ payenkuu fiyaaw!6Pakakee teyii nkanakonako ti pukumpaan, nkacaakool pakaal paka keecohatiit ka, ancuk kátuulii. Pakaal paka payenkuu keemeeŋe umuuyen, apan nkanapan pálafi óo pálafi peenaput.7Tan óo tan nkálafi kakalaŋ héeyeeni, pale étikameyi tooñaa ya cántum.8Pikalaŋana pa payenkuu kapookaapook tooñaa ya samat nii fa Yanes niŋ Yampeles nkapooke fa Móyiis. Kunuuwii keepaana, káyinan ka kiteyii kitaakut nafaa.9Pale étikalaaŋan, kaatuko pakan paka púlooŋ éfikameyi nii kataakut kunuu, samat nii fa intaakiye fa Yanes niŋ Yampeles.10Pale awe Timote, áameyimeyi meemak eeha inci inkalaŋan ha, niŋ pawenalam, eeha inci íllafiye ha íhinu, káyinan ka kutoom, kamukut ka kutoom, fa inci íllafiye fa pakan paka, fa inci insiiŋiye fa kíp,11niŋ fa inci inkallanee fa. Aámeyimeyi lompo kúnuul ka keetaakiyaam ka ti saatee ya eti Antiyok, eti Ikoñum, niŋ eti Listal, fa inci inkallanee fa meemak, pale Ateeteyo naafakanam tenko púlooŋ.12Páni an óo an éelafiye eloŋ éesuume Pútuun pa ti káyinan ti Yéesu Eenucee ya, afaakallanee.13Pale keenaput ka niŋ payenka nkacok ka faŋii fa nkaneetaat fa, efikatowo ti pikaayu hátikin ti heenaput ha hiteyii. Efikacaakool pakakee paka, poko faŋii lompo nkacaakoolee.14Pale awe, eeha ankalaŋanee ha íyyinan nii hiti páni, towo káyinan ti eehuu, kaatuko áameyimeyi keekalaŋanuu ka.15Kápiliŋ maañiiyaayi ankalaŋanee pakiical pa peesampanee pa piti Pútuun pa, apan mpuwufani ecohato ancuk aafakanee pínapii ti káyinan ti Yéesu Eenucee ya.16Waah óo waah weekiicee ti hilim ha hiti Pútuun pa, pikina pútunke pakan paka kapikiic wo, apan nuutaak nafaa ti kakalaŋan pakan paka tooñaa ya, ti káyisan an la naamuuyene, ti kaacoonanool an éehinut pinap, niŋ ti kakalaŋan an ápihin heecoonoole.17Ancuk kéeyinane ka ti Pútuun pa kataakaa waah óo waah ewwa nkasoolahe, kati káhin páhin óo páhin peenape.
Wycliffe Bible Translators, Inc.