2 Timote2
1Ooto awe Timote, eecuke ya nii añiinam, taak sempe ti kaasampan enka Yéesu Eenucee ya naasampane ka unaa.2Inkéyyoo ti kilim enka ánsiyaam ka ti hisoku hátikin hícump pakan, kalaŋan ko pakan keehintiyee, payenka éfikayini ko lompo kakalaŋan pakakee.3Samat nii asoocaali eenape ati Yéesu Eenucee ya, aañaŋaa kasayan himpaac ha hitii hiti kúnuul ka.4Asoocaali eeloŋe ti páhin, akalapatanooliyantoo niŋ hiti keeneetaat pusoocaali, kati náhin héesuume ha áhampaatiin a ateyoo.5Apan lompo, aŋa eenanfe ti pítikinool piti katey, ayinaat hicoopu panteeloo ya niŋ áhinut eeha katey ka nkicakane ha.6Ayaya enfakat añaŋe piyeno áyaañ a kati ali ti pamaañal pa piti pasukal pa.7Timote, niŋ aakaayananoolaa kunuuwi ti eeha inci iyyem ha ti hisoku, Ateeteyo afaayankanani áapimeyi eehuu púlooŋ.8Náwuno tan óo tan Yéesu Krista, akina ati miin ma miti Dawid, náalitaniyee ti keekete ka. Ekooŋan ya éesuume eyyuu inci íntuunan.9Kamma inci íntuunan ekooŋan ya éesuume ya eyyuu, ewune íyyemi ti hicuku kúnuul, apan incenkee niŋ ñiseel samat nii akanca. Pale hilim ha hiti Pútuun pa hicenkutee niŋ ñiseel.10Eehuu hiwune inci insayan hicuku kúnuul óo kúnuul kamma pakan paka payenka Pútuun pa mpimamale ka, ancuk poko lompo kataakaa kafakan ka kiti Yéesu Eenucee ya niŋ hamake etenko hiti cancowiyaaw.11Ehe hilim heehintiyee:“Niŋ uketaa niŋ Eenucee ya,efuuyeniyaa kaloŋa neyoo lompo.12Niŋ umukutaa ti waah óo waah,efuuyeniyaa lompo pumansa neyoo.Niŋ upookoo,akina lompo afaapook unaa.13Niŋ uneetaataa pakan keehintiyee,akina afaatowo eehintiyee,kaatuko ayinaat káalaacin faŋoo.”14Towo kánawunan pakan paka enkuu. Kúpananii hátikin Pútuun pa, sokii timpi kálaacinool kamma kilim, eehuu hitaakut nafaa, fo niŋ neetaat káapucalool kunuu keeyem ka ti káasiitan.15Hín kata óo kata kitii kati kúsuum Pútuun pa, samat nii áhina eenape eetaakut eeha afaasuu, apan nakalaŋan pakan paka pitempo tak hilim ha hiti tooñaa ya.16Láaŋ kilim keetaakut nafaa keenapoolut niŋ káyinan ka, kaatuko keeyem ka tenko efikahaŋ toko nkálaaŋe Pútuun pa.17Kilim ka kiteyii efikihancaloolo samat nii maasontuwaay meefisakantoo ummutowo ti hiweñu. Himene niŋ Filet unka teyii.18Kayesanaayesan pusonii tooñaa ya, apan nkápucalool káyinan ka kiti pakakee paka ti hisokuyii nii Pútuun pa pipayaapa élitanii unaa ti keekete ka.19Pale kéeyinane ka ti Pútuun pa, Pútuun pa píhiniihin kapiyank ti káyinan ka kiteyii samat nii kaatah ekumpaan keeyanke. Kaatuko kiiceekiic ti hilim ha hiti Pútuun pa nii: “Ateeteyo ámeyimeyi pakanoo,” te, “An óo an eesoke nii akina ati Ateeteyo, áwunko heenaput.”20Ti ekumpaan eti usaanum, taakaataak pikaleela niŋ epool óo epool, neetaat nii piti sanoo niŋ fotom piti kótifoloo lamma piyem lupo, pale focaa piti pupapaloo niŋ piti hikaf. Pikee pa piti káasikool keetaake hikaw, pikee pa piti káasikool keetaakut hikaw.21Ooto, an óo an eekuulane faŋoo ti heesuuwanana, afaayeno waah uti káasisikool uti hikaw, eloŋoo efeekuul, naataak hikaw ti Ahámpaatiin a ati ekumpaan ya, apan namemanoolo kati náhin páhin óo páhin peenape.22Timote, láaŋ pálafi peenaput piti uhiineen innapan heecoonoole, káyinan, pálafi, niŋ kásuumaay, ŋes enkuu púlooŋ niŋ payenka nkaluum ka Pútuun pa niŋ yaan eekuule.23Pale láaŋ pílaacinool peetaakut nafaa niŋ fotom hikaw, kaatuko pítaakool mpúpukii.24Unaa pimiikan pa pakati Ateeteyo uñaŋutaa pítaakool, pale uñaŋaa paneene ti an óo an, núuyiniyaa kakalaŋan hiti Pútuun pa, núuyiniyaa lompo kamukut niŋ kéeciita ka.25Nuucoonanoolaa ti paneene keepooke ka unaa. Pikee pa Pútuun pa mpíhinii kápuwunko pawenalii nkámeyi tooñaa ya,26apan kunuuwii nkúñohoonii, nkafak hikuucu ha hiti Seetaani ya, eecokii ya kápihin eeha néelafiye ha.
Wycliffe Bible Translators, Inc.