2 Timote1
1Inci Póol, eeyem a apoñapoñ ati Yéesu Eenucee ya samat nii fa Pútuun pa mpílafiye fa, yem ti hikiicu. Inci poñeepoñ kati túunan eloŋ ya eyya mpíyinanane ya unaa pínapii ti Yéesu Eenucee ya.2Inci kicanuu, awe Timote eeyem a samat nii añiinam aŋa inci íllafiye meemak. Alímaati Pútuun pa Paapaa ya, niŋ Ateeteyo Yéesu Eenucee ya ati unaa kasampani, nkataak paket hikaw ti awe, nkawufani kásuumaay.3Inci sokaa Pútuun pa apalaka, túulaatuul po samat nii fa símaamayam nkáhine fa. Intúul po niŋ kunuu keetempane kaatuko taakut eeha inci iññaŋe kawatan faŋam. Hánant hanakan intowiyi énawuno ti kaluum ka kutoom.4Niŋ inci náwuniyaa mukuni, íllafiyi hicuku nene ancuk taakaa pásuuma penfakat.5Inci náwunaanawuno lompo káyinan ka kitii kiti pánipani ka. Káyinan enkuu kiyeniye ti maamaa atii aal Lowis, niŋ íññaa atii Enis, ínhiiniyam nii aataakaataak ko lompo.6Ekina ewune, inci ínnawunani aakati pítikool kaaleew ka kiti kawun enka Pútuun pa mpuwufanuu ka ta inci innaŋe ta sipeesam ti awe.7Kaatuko Kunuu ka keenape ka kiti Pútuun pa kuwufanut unaa pacuk piti ewatate, pale pacuk piti sempe, piti pálafi niŋ piti ecocokanoolo.8Ooto timpi suu káatuunan kiti Ateeteyo ati unaa. Timpi suu kutoom lompo, kaatuko inci oopa ti núkuluma kamma akina. Pale sempe ensa Pútuun pa mpuwufanuu sa, siiŋo tenso aakati cuk kúnuul niŋ inci kamma káatuunan ekooŋan ya éesuume ya.9Pútuun pa pifakane unaa, mpiyonkal unaa upuyeniyaa pakan etempo keesampanee. Neetaat nii heenape núuhinaa, pale kamma eeha mpihintane ha íhinu niŋ panap etempo. Puwufanaawufan unaa eehuu pínapii ti Yéesu Eenucee ya púlunta pa píliilumee.10Apan fiye píyisanaayisan unaa eehuu púlooŋ ti éfulii ya eti Yéesu Eenucee ya Afakana ya ati unaa. Akina ápucaloole sempe sa siti eket ya, náanapii ti ekooŋan ya éesuume ya ápiyisan unaa eloŋ ya eepayantoo ya.11Kiti ekooŋan ya éesuume eyyuu Pútuun pa mpimamalaam átuunana, apoñapoñ niŋ akalaŋana.12Ekina ewune inci íyyemi fiye ti hicuku kúnuul. Pale inci suuwut kaatuko méyimeyi ti aŋa íyyinane ya, apan ínhiiniyam nii áyiniyini efaas eeha naañomanaam ha fo ti hinoom ha hiti kíiti ya.13Kilim ka kiti tooñaa ya enka ánsiye ka ti inci, kalaŋan ko tak pakakee paka. Cok piliit ti káyinan ka kitii, apan íllafi niŋ pálafi pa péefulii pa ti Yéesu Eenucee ya.14Faas eeha Pútuun pa mpuñomanuu ha. Faas ho ti kayankanan ka kiti Kunuu ka keenape ka keekine ka ti unaa.15Samat nii fa ammeya fa, kéeyinane ka pakati mah ma miti Asii púlooŋ kayesanaam-yesan pusonii, focaa lompo Figel niŋ Heemogen.16Pale Onesifol niŋ miin ma miteyoo, álimaati Ateeteyo ataak teyii paket hikaw. Kaatuko naloomamloom kaanimpan, apan asuuwut kamma inci iyyem ti núkuluma.17Pale ta náacolii ta Room, naaŋesam meemak fo acukam.18Alímaati Ateeteyo ataak teyoo paket hikaw ti hinoom ha hiti kíiti ya. Awe faŋi méyimeyi fanfaŋ fa naayankananaam fa meemak ti saatee ya eti Efes.
Wycliffe Bible Translators, Inc.