Udiana Ñwed Ndidem12
Yoas Adiọñ Tembịd
1Ke ayọhọ isua itiaba ke ukara Yehu, Yoas amaado adidem, ndin anye amaakaara ke Yeruselem isua aba. Anyịñ eka amọ akedo Sibia; anye aketo Beeseba.2Yoas amaanam se inen ke anyen Abọọñ ke afịd isua se aku Yehoiyada aketemme anye.3Ado, awo ikiwuudo mme ñkoñ-ñkoñ itie; mbon awo ekesʌk ekaka iso enam mme uwa enyʌñ efọp insensi ke ndo.4Yoas amaabo mme aku, “Ikoono afịd akʌk e-ebenne edi nte adisana enọ ke tembịd Abọọñ, akʌk e-ekebọọhọ ke ubadawo, akʌk e-ekebọọhọ eto akaaña ake mme awo ekenamma ye akʌk enọ imaesịd e-ekebenne edi tembịd.5Yak aku keedekeed abọ akʌk ato keed ke atu mme akamaakʌk, ndin aben adiọñ ñkpọ se ibiara ke tembịd.”6Ado ke ayọhọ isua edịb mme ita ke ukara Adidem Yoas mme aku ikisʌkkọ idọdiọñ tembịd.7Ke ntoro Adidem Yoas amaakoot aku Yehoiyada ye mme aku mfen ndin amaabịp ammọ, “Nsoo ido ndufo idiọññọ se ibiara ke tembịd? Ikiibọọ akʌk aba ito mme akamaakʌk ndufo, ado iyaak inọ nọ edat ediọñ tembịd.”8Mme aku emaenyịmme ke mmimọ idiibọọhọ aba akʌk ito mbon awo ñko ke mmimọ idiidiọññọ tembịd ke idem mmimọ.9Aku Yehoiyada amaaben akebe atịppe adudu ke ukʌb amọ. Anye amaanịm anye ke mben akpokoro uwa, ke ubọk nnasia ke awo adʌkkọ tembịd Abọọñ. Mme aku ake ekekpemeke anyenusʌñ emaesịn afịd akʌk se ekeben edi tembịd ke akebe ado.10Ini akeedodo ammọ emaekịt ke akʌk awak ke akebe ado, awedñwed adidem ye ekamba aku emaedi, edibat akʌk ekebenne edi tembịd Abọọñ ndin edọñ ke mme ekpad.11Ke emaediọọñọ ibad akʌk, ammọ emaenọ ideen ekebooho ese utom ke tembịd akʌk. Emaekama akʌk ado ekpe mbon se ikinam utom ke tembịd Abọọñ, mme akọñeto ye mme abọbufọk,12mme akọọkufọk ye mme akpịkke itiad. Ammọ emaedep eto ye udọdiọñ itiad se ekama ediọñ tembịd Abọọñ, emaenyʌñ ekpe akʌk akem afịd mme ñkpọ se ekedat ediọñ tembịd.13Awo ikikamake akʌk se ekeben edi tembịd inam mme besịn silfa, mme ufadikañ, mme usan usiime ñkpọ, mme adukpoñ ye mme ñkpọ kold me silfa mfen ediinịm ke tembịd Abọọñ;14ekekpe enọ mbon utom, e-ekedatta ediọñ tembịd Abọọñ.15Ammọ ikiyemme mbon se ekenọọ akʌk ebo ekpe mbon utom edinam ibad sia ammọ emaenam akpanikọ ke afịd ñkpọ.16Awo ikibenne akʌk aketooho mme uwa ndudue ye uwa idiọọkñkpọ idʌk tembịd Abọọñ; akenie mme aku.17Ke idaha ado Hasel adidem Aram amaakaa akenwana ye Kad anyʌñ adat anye. Ndin anye amaawọññọ akaa adinwana ye Yeruselem.18Ado Yoas adidem Yuda amaakoono afịd mme ndisana ñkpoduoho a-mme eteete amọ ekediọññọ, Yehosafad, Yehoram ye Ahasaiya, mme ndidem Yuda, ye mme enọ a-anye ke idem amọ akediọññọ ye afịd kold e-ekekịtte ke itie unịmñkpọ ke tembịd Abọọñ ye ufọkadidem ubọọñ, ndin anye amaanọ esọk Hasel adidem Aram, ndin anye amaatịmme akpọñ Yeruselem.19Amaado mme ñkpọ mfen ke ukara Yoas, ye afịd se anye akenam, ado nte awo iwette ke ñwed mbʌkutom mme ndidem Yuda?20Mme adaaha amọ emaedʌk edioomo ebaña Yoas enyʌñ ewot anye ke Bed Milo, ke usʌñ e-etịkkeke eka Sila.21Mme adaaha e-ekewotto anye ekedo Yoosabad ayịn Simied ye Yehosabad ayịn Soma. Anye amaakpa emaenyʌñ ebuuk anye ye mme eteete amọ ke Abio Defid. Ndin Amasaiya ayịn amọ amaadat itie amọ nte adidem.Biblica, Inc.