Luka2
1Figono fila Agusitini, ng'achale mkomi va Lumi alagiche vanu vonda va ung'achale va Lumi vavalilwe.2Ilyo nde ikali lya kwanja vanu kuvalilwa, vakati Koneli peakali mkomi va inyi lya Silia.3Vanu vonda vahelelie kuvalilwa, kila munu ku kaye lyake pevababilwe.4Yusufu avangile lugendo kuhuma mwani va Nasaleti weuge inyi lya Galilaya, akahelela mwani va Betelehemu yeugehe inyi Yudea, pono peababilwe ng'achale Dawudi. Yusufu ahelile ukoya kwakuva ahumile mukilelo kya Dawudi.5Ahelelie na Malia kuvalilwa, mdala yeamwehetile, yeakali na lusololo.6Pevali Beselehemu, kigono kyake kyakubaba pekifikile,7akababile msongola, akamfwike fisepe. Baho akamvasise mukibudi, mulibani lya kuliya vang'oko, kwakuva sevapatile pono pakuvasa vagenji.8Muinyi yila kukali na vakwamilaji vevali vikwikala mukitava kyakukwamila, vakidima va vang'oko vawo pamie.Vakwamila vidima vang'oko9Ndumindumi va kuluhano kwa Nguluvi vakavahumie na Ukomi va Mtwa ukavang'alie palubali ponda, navo vakaogofya hilo.10Ndumindumi uyu va Nguluvi kuluhano akavalongie, “Mbihile kwogofya! Ndivaletie njowo nofu chechikuvakedusa vanu vonda.11Neng'uli kumwani va Dawudi, ababilwe mkombosi venu, mwene ndi Kilisito, Mtwa!12Ilyi kimanyilo kwa nyenye, mukumulola mwana kyali anyengilwe fisepe na agonichwe mulibani lya kuliya vang'oko.”13Bahobaho lipinga likomi lya vadumindumi va Nguluvi kuhuma kuluhano vakatang'ana na ndumindumi uyo va kuluhano kwa Nguluvi. Vakamnjuma Nguluvi vakilonga,14“Ukomi va Nguluvi ugehe kukyanya hilo, Lutengamaso kwa vanu vevagehe muinyi yonda vevakeliwe na mwene.”15Vala vandumindumi va kuluhano kwa Nguluvi pevawuyile kuluhano, vakwamilaji valonganile, “Tuhelele ku Betelehemu tukalole kila kyekihumie, kyeatulongie Mtwa.”16Baho, vakanyilie, vakamuwene Malia na Yusufu na yula mwana kyali yeanyengilwe kisepe na agonichwe mulibani lya kuliya vang'oko.17Vakwamilaji pevamuwone yula mwana, vakavalongie vasasi njowo cha mwana cheavalongiwe na ndumindumi va kuluhano kwa Nguluvi.18Vonda vevapulike njowo icho chevalongilwe na vakwamilaji vakadudwive.19Ila Malia avikile njowo chonda munumbula lyake na kugahocha hilo.20Vala vakwamilaji vawuyile kukitava kya kukwamila, kuno vakimufunya Nguluvi na kumnjuma kwa finu fyonda fyevapulikile na kufiwona, gyonda gakali ngita pevakali valongilwe na ndumindumi va kuluhano kwa Nguluvi.21Pefikile figono finane, kigono kya kudumula bina, akemeliwe litawa lyake Yesu. Litawa ilyo agavilwe na ndumindumi va kuluhano kwa Nguluvi vakati Malia akali ihela lusololo.22Figono pefyafikile fya Yusufu na Malia kung'alichwa ngita pevang'ang'ilwe na Malagicho ga Musa cheagavilwe na Nguluvi. Ndena vakamnyamue mwana, vakahelela nave ku Yelusalemu vakamsindike pautalo lya Mtwa Nguluvi.23Ngita isimbwilwe Mumalagilicho lya Mtwa, “Kila msongola ivikwa pang'alili pa Mtwa.”24Kangi vahelelie neke vaheche usembe, vakaheche ng'unda vavili awu mapwipwi gavili ngita Malagicho gya Mtwa gegilagichwa.25Chipindi icho ukoya mwani va Yelusalemu pakali na munu yumwi, msanzi na akumsuka Nguluvi, litawa lyake Simioni. Mwene akali ichindila kwa ng'efu ukombosi va Isilaeli na Muhe va Nguluvi akali pamwi nave.26Muhe va Nguluvi akali amulongie kuva seifuwa mbaka amlole Kilisito Mtwa.27Simioni akiva alongochwe na Muhe va Nguluvi, aheleli pakaya lya Nguluvi. Baho Vasasi va Yesu vakamsindike pakaye pa Nguluvi vamgitile ngita peisakilwe na Malagicho ga Musa.28Simioni akamnyamule Yesu mumiwoko gyake, baho akamfunyile Nguluvi akilonga,29“Nonde Mtwa umleke mchulila vako ahelele kwa ulutengamaso. Ngita peulongie30Kwa meho gangu ndimwene mkombosi vako,31Kwakuva umuhagule aveche mkombosi va vanu va inyi chonda,32Uyu welu vakuvagubikila vanu se Vayawudi vamchele Nguluvi. Na kuletela ukomi kwa vanu vako va Isilaeli.”33Daada vake na maye vake Yesu vakali vadudwive luchowo lwa mwana gaalongile Simioni.34Simioni avafunyile, akamlongie Malia, maye vake Yesu, “Mwana uyu ahaguliwe na Nguluvi kwa kuyaga na kukomboliwa na kuchulubuchwa kwa vanu volofu kuinyi lya Isilaeli. Mwene ivecha kimanyilo kuhuma kwa Nguluvi dakikanilwa na vanu vonda,35na mahocho ga vanu volofu gigubutulwa. Na veve mwene, uvasi weuge ngita lipanga likali livawa numbula lyako.”36Kukali na mvichi yumwi mdala, akali mgogolo hilo litawa lyake Ana, muhinja va Fanueli, va likabila lya Asheli. Mdala huyu ekalile na mgosi vake kwa myaka saba kuhuma peatolilwe.37Baho akali mwigani mbaka vakati akiva mgogolo va myaka semanini na chitai. Vakati ugo gonda akali Mukaye akimgundamikila Nguluvi ngajila kuliya kinu na kusuka palumie na pamunyi.38Saa yiyila, mdala yula ihumiche pautalo pa vanu, akamuhongiche Nguluvi na kuvalongela luchowo lwa mwana kwa vanu vonda vevakali vikuuchindila ukombosi va vanu va ku Yelusalemu.39Yusufu na Malia pevasindile kugita finu fyonda fyefisakilwe na malagicho gya Mtwa, vawuyile kumwani kwawo Nasaleti ukoya Galilaya.40Mwana yula akulile, kwongeleka ludali na amemile uginyange na akamemile na usanzi va Nguluvi.41Vasasi va Yesu vakali vachovie kuhelela ku Yelusalemu, kila mwaka vakati va lihungu lya Pasaka.42Yesu peakali na myaka kumi na givili, vakahelela pamwi na Yesu ku lihungu lila lya Pasaka ngita pevagitila kila mwaka.43Pevamalile lihungu, Yusufu na Malia vakavangile kuwuya pakaye lyawo, ila mwana vao Yesu asigalie ku Yelusalemu ila vasasi vake sevachele.44Vachelile kuva agehe pamwi na lipinga lya vanyalugendo, vagendile lugendo lwa kigono kyonda, baho vavangile kumsaka pagati lya lukolo na vaganja vawo.45Sevamwonile ndena, vakawuyile ku Yelusalemu neke kumsaka.46Kigono kya udatu, vamuwene pakaye lya Nguluvi pagati lya vawulanichi Vakiyawudi vakali, akivapulikicha na kuvahucha mahucho.47Vonda vevapulike malichwi gake vakadudwive luhala lwake na mahigo gake gya unginyange.48Vasasi vake pevamuwene vakadudwive. Maye vake, amuhuchile, “Mwana vangu, wuli utugitile endee? Daada vako na nene tukali tukukusaka kwa kusugwima.”49Yesu akavahigile, “Mukunisakila liki? Semchele kuva nditakilwe kuvecha pakaye lya Daada vangu?”50Ila vasasi vake sevachele malichwi geavalongie.51Baho, Yesu pamwi na vasasi vake vakawuya Nasaleti ukoya akali akuvaginya. Na Maye vake akaendelie kuvika njowo icho.52Yesu akaendelie kukula na kuhongeleka uginyange na utali na akaginile kuvecha msanzi kwa Nguluvi na vanu.
The Word for the World International