Ibritotee4
Edike Sanbatixxi Hafuura Adhdhaa Mageniinke Ardi'a
1Yoona Mageniinxe hafuura adhdhaba e'yatee uwwendeemmaxxi iitti addachchiisa ta'anna hexxeemmashshanni hexxeemmaxxee ha'nonaa'ni ayyinna eettene'a geyebaak gatabaashsha xexxe'anto.2Ookkone manni'a wengeele lallabendeemmahshanni no'aanna lallabende'een; yaane kinni insa'ne lanqeeka ookkonee hiyyichcho amanati adhdha gonpheemmaxxee insa'ne'a la'o uwweba'a.3No'o amannennek kinni eettene Mageniinxe hafuura adhdhabaa e'yinannon;Magenikinna «Tennexxee mufatennexxi‹Anxe hafuura adhdhabaa e'yinaba'a› » hiyye'een.Kaddo malee'e butta duuchcha dadendeexxe yannanaa'n huje isixxi muuxendeexxen.4Eettene torbaxxe barraxxee mitte booncho'n, «Eettenee torbaxxa barra Mageni huje ifixxe duuchchinaa'n hafuura adhdheen» hiyyedheen.5Iittanni tennee bakka'ninni higgeenni «Anxe hafuura adhdhabaa haranga e'yinaba'a» hiyyaan.6Eettene hafuura adhdhabaa ta'anna e'yaakiir mitti mitti hedheen; ediseexxi eettenee eloxxa odo laqemak manni ajajema gophatenaa'n kexxeexxa hafuura adhdhabaa e'yineba'a.7Tennexxee Mageni, «Techcho» hiyyeexxi higgeen mitte barra mure; tinninna heddo bari uduma Daawwiti darree'ni «Techcho hafuura isika laqqinoole qalbe ha'nooxxa jabeessexxinoqqe'e» hiyyende konnechchi edo kulendeemmashshaten.8Iyyaasu hafuura adhdha insa'ne'a uwwe'echcho kadde'eele ookkoneechchi uduma Mageni haaroba «Techcho» hiyya'n wele barraxxee silaat haaso'ammabaan.9Tennexxee Mageniinke ardi'a Edike Sanbatixxi hafuura adhdha ta'anna edi'a hexxeen.10Tinninna kaddeechchi Mageniinxe hafuura adhdhabaa e'yaak duuchchi, Mageni ifixxe hujenaa'n hafuura adhdheemmashsha isinna iittanni ifixxe hujenaa'n hafuura adhdhaan.11Yoona ayyinna ookkone mannixxa ajajensha gophaka fakkeenna hordofeexxi ibabaashsha, eettene Mageniinxe hafuura adhdhabaa e'yatee jabaanto!12Mageniink hiyyichchi hedhaakenna hujaaken; lame qarke wolaantichchi caala qara afe'eeken; lubbotanna irra, mikitakanna dhuka gargarti hiissaa qici'a lullugee e'yaan; qalbetika yaadanna yaada qo'nisee afaan.13Mageniinxe ille edo sho'ondaaxxi mitte dadanna hexxeba'a; no'o ifixxee hiissichcho uwwa hassissaake isi edo duuchchiinxi yaane ce'e hiteexxenna xuddi hiteexxen.Qeesoletika Umo Qeesichcho Yessuusi'i
14Yoona iimuwwatibaa me'eeka Lumoka umo qeesichcho Mageniinka Belto Yessuusii'i anfeennaxxee amana no'oxxa jaabeessine abixxino.15No'o anfeennek umi qeesichchi ifigopha no'oxxe'ni no'aa mararaaken; isi mitte cubbonna hujeba malee'e duuchchiinxe yaanenni no'oshshanni hega uudeme'eeken.16Yoona mararte alfinnonna'aanna hassissaaxxe yaane'n no'oo gargaraaka badhaadha alfinnannoshsha eettene badhaadhiinxe mootebaa amanati shinqo.The Word for the World International