Ibritotee5
1Mitti mittiniing umi qeesichchi manni giddii'ni filemaan; Mageniinxe kaddeexxe yaane'ni manniinxe tukke kadeexxi cubbottee kaddaaxxa eettenee uwwanna tolcha shiqishatee baalloonsemaan.2Isi ifingee uminni ifixxa ifi gonphe afeeke kadeemmaxxee qalbeefachcho afebaakeeri'aanna deedhake'n ibaakeeri'a marara dande'aan.3Isi ifike umixxe cubbo'aanna wele mannixxe cubbo'a tolcha shiqisa hasiseechchi tennexxeeten.4Aarooni ye'emeemmashshanni Mageni ye'eeke umo qeeseichcho kadoole malee'e konnee ulfinna ifi'a adhdha dande'aak ayyinna hedheba'a.5Iittanni Kiristoosi umo qeesichcho kadatika ulfinna isi ifixxe fedhiinni adhdhebaan; yaane kinni Mageni isoo, «Ati anke Belton, Ani techcho atike Anna kadeennen» hiyye.6Iittanni wele bakka'ni «Melketsedeqike baalloomishsha ati duuchchii woddi'a qeesichchoken» hiyyaan.7Yessuusi tennee butta'ni hedhemma wodda reyotenaa'ni isoo anjira dande'aake Magenibaa soodachchonna kadha lumoxxe raarenninna indiddonni welti shiqise; hara ba'lake kadati ajajemeeemmaxxeenna soodachcho isixxa Mageni laqe.8Mageniinke Belto kadeexxe kaddolenna midde adhdheexxe rakkonaa'n ajajensha barate.9Konne qicinn wo'make kadeexxi afemeechchi uduma isi'a ajajemaake duuchchi'a duuchchi woddixxe anjirensha'a buutote kade.10Melketsedeqike baalloomishsha umo qeesichcho asseexxi Mageni isoo baalloonse.
Amanate'n Jabaatagophatixxee Uwwendeexxa Xexxe'achchiisa
11Tenne yaannexxee haasonnannoxxa heddo yaane anfe'eennen; yaane kinni ha'noxxi qalbeeffachchotixxi dande'a heenoxxe kaddeemmaxxe ha'no'n barrisa ha'urtaan.12Tenne yanna ha'no barachchiisaluwwake sila kada hassissaa wodda, reefi Magniinke hiyyichchixxa siretixxa barachcho ha'noo barachchiisak manji ha'no'aa hasisaan; ha'no'aa hasisaachchinna jabaxxe ita kaddebaak adoten.13Ado hasisaak duuchchi annote kademmaxxee qullumatixxa barachcho isi ege'nebaan.14Jabaxxi ita kinni eloxxa fuggoxxenaa'n gargar hiissatee ifi leenjiseeke lummollamma manni'aaten.The Word for the World International