Philippians1
1Phao-lô nggâm Ti-mô-thê, cồ dĭch năc Siđăch Yơt Dưnya Yêsu de, wĭnh păng mơq lĕq khây vatom gŭn sŭng Siđăch Yơt Dưnya Yêsu, cồ khây tamun tôq u palây Phi-lip, nggâm mơq khây gru bây khây chung kwŏng.2Ngwân sinăc yăh bây sinlơ yăh iên a Siđăch Trôq, cồ Vap bây Siđăch vơn de, cồ Siđăch Yơt Dưnya Yêsu, gŭq u vlơ pôp ŏh.3Ănh may mo Siđăch Trôq ănh je sŭng ăp dâq căh tôr tât pôp ŏh,4Sŭng ăp camvŭm vơu ngwân ănh je an ăp ndu pôp ŏh, wân lawân pađăc camvŭm vơu ngwân sŭng sinlơ yăh hơn vui5mvăc ju vrŭq tăm doq ti pôp ŏh de sŭng Sipơp Yăh a lăm daq vôq di tât vrêq heq;6payh ơ tôq nhâng bâng sĭq vrŭq heq, pành Candranh gĕh pơq vôq ôp khây vrŭq yăh sŭng pôp ŏh nŏq khoi ôp jêng yăh lawân diêt tât năr Siđăch Yơt Dưnya Yêsu;7bây ănh, nhâng cồ vrŭq dip gal lŭng chĕq sinâng canŏq sĭq lĕq săq pôp ŏh, mvăc ănh jơ pôp ŏh sŭng nuih talaq nơm, lĕq săq pôp ŏh cồ khây tamun tăm ôp vrŭq bây ănh don ju sinăc yăh, lawân sŭng nhi jingo ănh je, nggâm sŭng sinlơ nhai cŏh bây candân gân an Sipơp gŭn.8Mvăc Siđăch Trôq cồ Candranh candân ănh de, canŏq caheq ănh lĕq nuih câp camvân lĕq săq pôp ŏh a nuih talaq yâh sinđach Siđăch Yơt Dưnya Yêsu de.9Bây vrŭq ănh vơu ngwân nŏq cồ sinlơ tăm sinđach pôp ŏh de hor lŭh vênh rămvi, gât gĕh dông hao gŏq wŏq sŭng sinlơ dân gưt nggâm ăp sinlơ cồ jru hwi,10chĕq pôp ŏh lôch prơn gưt singgal lŭh sinlơ lây cồ yăh dông lĕq, chĕq an pôp ŏh gĕh soch jrŏh bây đăng gĕh gatŭq lây prênh haih gơm chhŏh di tât năr Siđăch Yơt Dưnya de,11gĕh vênh rămvi play jo sinlơ sŏng yăh de don ju Siđăch Yơt Dưnya Yêsu, dâl sĭq tât sinlơ sindraq sindil nggâm sinlơ tapơ payom Siđăch Trôq.12Ơ pôp ŏh, ănh cơnh pôp ŏh gưt tu tơm khây sinlơ rabăh rabơp tât bây ănh nhâng tănlŭh dân payh cồ sinlơ tao măq Sipơp Yăh de.13Tât daq, sinlơ krêh loih ănh je u sŭng Siđăch Yêsu Krit gĕh jêng lŭh dân dân u sŭng lĕq săq congti sên jơ nhi ganwâr nggâm khây tamun ndây,14bây gŏq ndu pôp ŏh, don vrŭq krêh loih ănh je, gĕh kranh gajăp sŭng Siđăch, lĕq nuih prơn chha mŭnh nhai lŭh tanrong Siđăch đăng phŭng candŭh.15Cồ tât daq gĕh ndu nhai lŭh Siđăch Yơt Dưnya payh cồ tăm ncom bây tăm canănh, en khoi gĕh ndu nĕh pađau tămti a nuih talaq yăh,16cồ khây tamun payh ơ nuih talaq sinđach, gưt pành ănh gĕh iơq hao chĕq nhai cŏh an Sipơp Yăh,17sŭng lăm khây tamun payh can'hir cơnh ayh nơm, khây nĕh tămti sĭq Siđăch Yêsu Krit đăng nhâng bâng, pành chĕq vŭq di gŏq sinlơ ji nuih lăp vrŭq krêh loih ănh je.18Nŏq mŏq pành? Chĕq cồ pành trong lây nŏq — ha cồ palôm mvâr ha cồ tapăq nhâng — nŏq Siđăch Yơt Dưnya khoi gĕh nhai lŭh, bây ănh hơn vui sĭq vrŭq nŏq,19mvăc ănh gưt pành vrŭq heq văt tât sinlơ têch yơt an ănh, don sinlơ vơu ngwân pôp ŏh de bây sinlơ nong iơq a Siđăch Wênh Siđăch Yơt Dưnya Yêsu de.20Dân ca sinlơ dŭh dăh câp nggơ bây sinlơ camvân ănh je, nŏq cồ ănh đăng bị ôp an prênh tôr sŭng sinlơ lây lĕq, en gĕh kram gân sŭng ăp sinlơ, chĕq lăm heq ha cồ lăm ndây, Siđăch Yơt Dưnya wân lawân gĕh tapơ payom u rup swan ănh, payh cồ rĭh ha chưt.21Mvăc payh bây ănh, hôm mrĭh nŏq Siđăch Yơt Dưnya, bây chưt cồ vrŭq tuyh twơ.22En hê gât hôm mrĭh sŭng săq swan heq, nŏq bây nơm ănh heq cồ vrŭq jêng gayh tuyh twơ an vrŭq ôp, nŏq ănh đăng gưt nơm săch sŏq maq lây.23Ănh bị piêt sŭng var maq, lăm pành cơnh chĕq lŭh saq sĭq gŭq bây Siđăch Yơt Dưnya, mvăc nŏq cồ vrŭq yăh gŏq dông lĕq,24gât hôm gŭq vlâq sŭng săq swan heq cồ vrŭq yăh vlơ an pôp ŏh.25Lăm tôq nhâng bâng vrŭq nŏq, ănh gưt pành nơm gŭq sĭq vlâq bây hôm rĭh jŏq wŏq bây lĕq săq pôp ŏh, mvăc sinlơ hao măq bây yăh vui hơn sŭng sinlơ tôq camvân pôp ŏh de,26chĕq sinlơ liq măt pôp ŏh de sŭng Siđăch Yơt Dưnya Yêsu sĭq ănh gĕh rămvi ju vrŭq ănh tât vlam pôp ŏh dâq wŏq.27Hôm ayh vrŭq pôp ŏh căh rĭh nhâng di dip bây Sipơp Yăh Siđăch Yơt Dưnya de, chĕq cồ lăm ănh tât bây sên păndĕh pôp ŏh ha lăm ănh đăng gĕh măt, nŏq ănh chăng gĕh sĭq pôp ŏh pành pôp ŏh kranh gajăp sŭng du nuih wênh, bây du nuih tôr chĕq tăm klŏq tăm chŏl payh sinlơ tôq camvân sŭng Sipơp Yăh,28bây đăng vlam khây tamun tăm chŏl ôp an phŭng râm sŭng du vrŭq lây. Heq cồ vrŭq chĕq singgal sĭq sinlơ tarich lawăch chĕq ân an khây nĕh, nhâng cồ chĕq singgal sĭq sinlơ wŏq yơt pôp ŏh de — bây vrŭq heq cồ a Siđăch Trôq.29Mvăc don a Siđăch Yơt Dưnya, sinlơ yăh gĕh paq an pôp ŏh đăng gal ayh chĕq tôq u Siđăch, en khoi chĕq wŏq rabăh rabơp bây Siđăch,30lăm gĕh simơ sinlơ tăm klŏq tăm chŏl cồ pôp ŏh gĕh sây u ănh, bây vrêq heq chăng iêt u ănh.
FAR EAST BROADCASTING COMPANY