Philippians2
1Payh canŏq, hê sŭng Siđăch Yơt Dưnya gĕh sinlơ ta-iơq tapơq lây, hê gĕh sinlơ tăm pawal lây lŭh a sinlơ tăm sinđach, hê gĕh vatip tăm lăp ti lây sŭng Siđăch Wênh, hê gĕh nuih talaq yâh sinđach nggâm nuih yăh sinđach lây,2nŏq căh ôp di vênh di lôch sinlơ vui hơn ănh je, nŏq cồ pôp ŏh gĕh simơ nuih tôr, lăm gĕh sinlơ tăm sinđach, vatom muôi sŭng nuih wênh, sinâng tăm simơ du sinlơ.3Đăng ôp vrŭq lây vưt lŭh a nuih cơnh sĭq ayh u nơm ha mvăc sinlơ sindraq ôm puh, palâq vlâq, sŏq nuih talaq tănjưr nơm, sên tamun ndây măq vlơ a nơm.4Ăp ndu vâng ayh sinâng tât vrŭq wŏng wŏq di gĕh tuyh twơ an nơm iưn, en hôm mo tuyh twơ an khây tamun ndây wŏq.5Căh gĕh nuih tôr canŏq sŭng ndăng pôp ŏh, khoi cồ nuih tôr sŭng Siđăch Yơt Dưnya Yêsu,6cồ Candranh gât gĕh măt sŭng swan nggui Siđăch Trôq, pành đăng sên vrŭq jơ văt di jăp di gân cồ sinlơ tăm simơ prơn bây Siđăch Trôq.7Palâq sĭq vlâq, Siđăch ôp an nơm lŭh vâq vâq n'hâm lăm chuq sŏq swan nggui dĭch năc, gĕh dĕh lŭh sŭng rup nggui dân ca con tamun, nggâm gĕh deng sây pành hăp n'hăp dân ca du mvu con tamun,8Siđăch gĕh tănjưr dêh nơm lăm wŏq sinlơ tôq iêt di tât chưt, tât daq chưt vlơ chhơ pagăn.9Payh canŏq, Siđăch Trôq khoi iơq Nĕh hao vi prĭh dông lĕq bây paq an Nĕh săq prĭh măq vlơ a ăp săq,10chĕq an iêt chăng tât săq Siđăch Yêsu de, ăp nkrŭng vlơ trôq, u ntĕh, u vasŭq tĭq, phải chŏl nkrŭng jưr,11bây ăp lapiêt nhai lŭh pành Siđăch Yơt Dưnya Yêsu cồ Cô Voq, vatom sinlơ sindraq sindil sĭq Siđăch Trôq, cồ Vap.12Payh canŏq, ơ khây tamun yâh sinđach ănh je, dân ca dăh bây vrŭq pôp ŏh wân lawân tôq camvŭm, nŏq đăng gal ayh lăm gĕh măt ănh je, en vrêq heq tôq iêt gŏq dông sŭng vrŭq đăng gĕh măt ănh, pôp ŏh căh rĭh bây sinăc wŏq yơt nơm de nggâm sinlơ phŭng candŭh bây râm săq.13Mvăc Siđăch Trôq cồ Candranh gât ôp vrŭq sŭng pôp ŏh chĕq choh cơnh choh ôp bây nuih cơnh yăh Siđăch de.14Căh ôp ăp vrŭq cồ đăng răm vuh vôq lưr ha tăm cammlăh,15chĕq pôp ŏh gĕh jêng gayh khây tamun con đăng tŭq lây gơm chhŏh gĕh bây soch jrŏh Siđăch Trôq de, đăng taq laq lăm hôm mrĭh vlăc canđal chhe njang viêm chhât bây vông tanruq, en u tŭq nŏq pôp ŏh tagăh silang ca khây vông ŭnh sŭng dưnya,16lăm jơ gân camvŭm hôm mrĭh, mvăc sinlơ liq măt ănh je sŭng năr Siđăch Yơt Dưnya de nŏq pành nơm đăng mprăng sŭng sinlơ valay chĕq, khoi đăng pành n'hyoq chŏnh valay prơn.17En tât daq cồ nơm ănh heq tapinh n'ham chĕq vrŏh vlơ con pađăc nggâm păch pađăc sinlơ tôq camvân pôp ŏh de, nŏq ănh gât vayh nuih, bây vui hơn simơ bây lĕq săq pôp ŏh.18Pôp ŏh khoi canŏq, căh vayh nuih nggâm hơn vui simơ bây ănh.19Sŭng Cô Voq, cồ Siđăch Yêsu, ănh camvân di sô pađăr Ti-mô-thê tât mơq pôp ŏh, chĕq ănh khoi sây vlĭh nuih talaq lăm gưt khây vrŭq sĭq pôp ŏh.20Mvăc ănh đăng gĕh vu lây gĕh simơ du nuih talaq dân ca dêq nŏq, cồ tamun lĕq nuih talaq sinâng tât khây sinlơ tuyh twơ sĭq bây pôp ŏh,21Mvăc khây tamun ndây ayh wŏng miêng khây tuyh twơ an nơm, đăng gal khây vrŭq sĭq Siđăch Yơt Dưnya Yêsu de.22Nhâng pôp ŏh gưt sinlơ rĭh yăh dêq nĕh de, mvăc dân ca con bây vap, dêq nĕh gĕh ôp vrŭq an Sipơp Yăh simơ bây ănh.23Payh canŏq ănh camvân jôl pađăr dêq nĕh sŏng lăm ănh gưt vrŭq sinlơ nơm de canŏq caheq èn.24Nhâng ănh tôq camvân gân u Siđăch pành nơm ănh khoi sô tât mơq dom pôp ŏh.25Măt ndây, ănh sinâng tât vrŭq pađăr Ep-ba-phô-đich saq sĭq vlâq tu pôp ŏh, dêq nĕh cồ tamun pôp ŏh nggâm ganai tăm ôp vrŭq khoi cồ tăm klŏq simơ bây ănh, cồ tamun tât a pôp ŏh bây khoi cồ tamun nong iơq an sinlơ hôm mrĭh an ănh.26Mvăc sây singgal pành dêq nĕh lĕq prơn mbêr câp gĕh gŭq bây lĕq săq pôp ŏh, bây sây si-yưr nuih mvăc khây pôp ŏh gĕh chăng pành dêq nĕh pâh vlam jirâng.27Mvăc nhâng cồ dêq nĕh gĕh jirâng mơch chưt, en nhâng Siđăch Trôq gĕh yâh sinđach dêq nĕh, en đăng gal sinđach ayh dêq nĕh ngăn, en cồ hôm nơm ănh wŏq, chĕq ănh đăng wŏq sinlơ si-yưr nuih vyăq van'han.28Payh canŏq, ănh dŭh dăh pađăr dêq nĕh saq, chĕq lăm vlam vlâq dêq nĕh, pôp ŏh khoi hơn vui, bây ănh khoi byăh si-yưr nuih.29Mvăc nŏq, căh wŏq iau dêq nĕh sŭng Siđăch di lĕq nuih talaq yăh vui, bây khoi căh wŏq sŏq nuih talaq nong iơq yăh bây khây vu ndây ca nŏq,30payh mvăc vrŭq chăq Siđăch Yêsu Krit de nŏq dêq nĕh tât daq mphăch chưt, lăm pađăc sinlơ hôm mrĭh nơm chĕq ôp di lôch phân khăq vlâq sŭng sinlơ tachŏq pôp ŏh de chĕq ân an ănh.
FAR EAST BROADCASTING COMPANY