Ariñawagúni16
1Gürigia aransehabaña, gama lumoun lúmañein Bungiu lagumuhóun dimurei.2Buiti sun le hadügübei gürigia lidan haritagun, gama lumoun Bungiu aguseragüdübalin saminaü.3Rubei sun le badügübei lúhaburugun Bungiu, ábame lóunwenbudun le baransehabei.4Adüga laali Bungiu sun katei lau aban saminaü: Íbini gürigia ha salufuribaña lubá luéyuri abeichúni.5Magundanti Bungiu hau gürigia pántatiña, madisebei habihini habeichúniwa.6Lau ínsiñehabuni luma inarüni ferudunawa lan figóu, lau líchugun gürigia inebesei lun Bungiu ladiseda luéi wuribani.7Dan le hínsiñe lan lóuserun aban gürigia lun Bungiu, íbini láganiñu gürigia ligía arandaragüda lumutiña Bungiu luma.8Buítimati murusun le agañeirúbei lau arumani sügǘ lau saragu le agañeirúbei lau marichaü.9Gürigia lúnbaña haransehan, Bungiu lun ladundehani héibugun.10Adimurehati urúei luéigiñe lóubadina Bungiu; ani aguseragüdaali lau úarani.11Balansu luma amisuraagülei, ábürühati labun laguseragüdün Bungiu; ligía adügübalin sun balansu.12Mabuidunti hadaagun urúeigu wuribani, ladüga luagu hala lederebuguda irichaü.13Hínsiñetiña ha adimurehabaña lau arumani luma inarüni houn urúeigu, ariha hamaña lau ugundani.14Lóunagüle óunweni ligañi urúei, ani chuti hau ha óuchubaña hagalumaruni.15Füramasei lánina ibagari, lugundan urúei, ani ítara liña lareini kei lesetirun huya.16Buítimati libihín lichú aau sügǘ lau golu; buítimati gunfurandaü sügǘ lau pülata.17Díreitiña gürigia richaguatiña luéi wuribani. Ha óunigirutiña hóuserun hóunigiraguña houngua.18Lárigi pantaü liabin günringuaü; lárigi anaaguni unguaü liabin ábürühani.19Buítimati banaagun bungua ǘnabugu hama gudemetiña sügǘ lau gafanran ban lidan harisin ha pántabaña.20Ha alidihatiña buidu, buiti lidin houn; fuleseiwatiña ha hemenigibaña luagu Bungiu!21Ha asaminarubaña lau lichú aau barüwatiña kei chútiña aau; afiñeragüdatimati dimurei buiti.22Lubuidun ichügü kéisigubeirügü lísensen ibagari; libidiounigan giñe aau, larufudahóun houn ibidiougua tau.23Ha asaminarutiña lau lichú aau, buiti hadimurehan, afiñeragüdatimati giñe hererun.24Dimurei burí bímeti ítara liña kei sírudu; bímegüdati, ru ligía iseri erei.25Anihein burí üma laganóun kamá suruti, gama lumoun óunweni lébehabei.26Ha nadagimeinbaña, ádaha lumutiña halama lun hawadigimaridun, nadagimeingüda lumutiña ilamaü le hasandirubei.27Ítara haña gürigia ha salufuribaña kei aban régigi lánina wuribani; íbini hererun lenege ligemeri watu,28Ha salufuribaña agubuhatiña wuribu, ha marasualugubaña, gáganiguagüdatiña.29Ha hanarimebaña, yeegua hamutiña hamadagu, aba hanügüniña lidoun üma wuribati.30Ha haritaguabaña hadügün wuribani ámuruha hamuti hagu. Ha adügaañabaña wuribani ágürüha hamuti hayumáru.31Afayeiruahaü aban ibagari migifeti houn gürigia ha richaguabaña, ítara liña hagaruban kei aban ridi.32Buítimati gaguraasuni sügǘ lau ganigi, buítimati lágüdaagun gürigia lungua sügǘ lau lagañeirun uburugu burí.33Gürigia achüürübei ubunuruni, gama lumoun Bungiu laubei lagumuhóun dimurei.
Bible Society of Honduras