Ariñawagúni17
1Buítimati teigín fein deretu lidan abagariduni darangilati sügǘ lau saragu fedu tidan aban muna ñein lumuti wuribu.2Ubúeingu ha benefabaña, chülütiña lun hagíaba lan hayubudiri isaanigu ha marichabaña, ani gafanrantiña lidan alagan kei híbiri isaanigu.3Watu gemeti óuchagubalin golu luma pülata, ánheinti saminaü, Bungiu óuchagubalin.4Gürigia ha salufuribaña hama ha yéebaña, adügatiña gasu tau iñeñein wuribatu.5Ha adügütiña bula hau gudemetiña, anabagua hamuti Habungiute; ha agundaarutiña lau halamiserun gudemetiña habihubei habeichún.6Habañan wéiyaaña mutu haridinbei; hagübürigu isaanigu hapantagüle.7Mabuidunti lun ibidiougua tau lun ladimurehan lau uéiriguni, ni lun gürigia inebewati lun ladimurehan lau eyeeraguni.8Ha abagaridubaña lídangiñe afayeihani lun madügǘn lan le richaguabei haritaguatiña luagu gabiñegu hamá, ladüga buiti lidin houn lidan sun le hadügübei.9Ha ígirubalin anabawaguni lun lásügürün, agüriahatiña ínsiñeni; ánhañati ha adügamémebalin, dísegüda hamutiña hamadagu.10Belutimati aban ebechúni houn gürigia ha gunfurandabaña sügǘ lau san beiti hawagu ibidiougua tau.11Gürigia ha chagaguabaña wuriburügüñein háluaha gama lumoun lounahóuba aban uganu hanarimeti houn.12Buítimati labuguchúniwa luma aban animaalu gáñiti sügǘ lau luma aban ibidiougua tau dan le busén lan aban katei.13Madisedunbei wuribani hábiñegiñe gürigia ha águyugüdübaña wuribati luagu buiti.14Ítara liña lagumeserun wuribu kei liñurun duna, buítimati ladisedúniwa luéi, sügǘ lau ládarawaguniwa unguaü lidoun.15Ferudunawa hamá gaduruntiña luma hasiadirún maduruntiña, ligía bián katei le auti magundan lan Bungiu.16Ka uagu liabin ibidiougua tau lau seinsu lúhaburugu agañeiha lichú aau, úatiga gunfuranda lan?17Aban umadaü, súnwandan buidu lan, ítara liña kei aban íbiri lidan lidaani idiheri.18Ha ibidiouguabaña aau afayeihatiña hawagu hamadagu, ariha hagía lau hadúeihan.19Ha hínsiñebei houn lun hanabahan, hínsiñeti wuribu houn; ha adimurehabaña wéirigu hawougua, ñoungua hamuti hawaguti guánarügü.20Madaridügü habéi ha wuribabaña isaminan katei le buídubei; tábürühaba iñeñein yeetu lidoun wuribani.21Igarigurügüñein lanüga ibidiougua tau lun lúguchi, úati gürigia gúndaati lau lúguchi lan aban ibidiougua tau.22Árani buiti anigi gúndaatu, ánheinti íruni gidati lídangiñe erei.23Ha salufuribaña resibitiña katei lau mabuiduni aramudaguarügü, lun hésegeruni léibugun irichaü.24Lichú aau, ligía háluahabei ha huálibaña ichügü, ánhañati ha ibidiouguabaña aau, úati aban katei buiti háluahan.25Isaanigu ha ibidiouguabaña aau, lébuna igañi luma igarigu houn hagübürigu.26Mabuidunti lun hafayeirawagüdün gürigia ha madurunbaña, ni lun habeichún gürigia ha inebewabaña.27Lichú aau lilouguan yanu, lualin ichügü gálumaü.28Íbini ibidiougua tau, abahüdǘwati kei chuti aau luma kei huali tichügü dan le maniñu lan.
Bible Society of Honduras