Fádirigu10
Lifigoun Nadabü luma Abiu
1Aba liabin Nadabü luma Abiu, ha lirahüñü Aarón aba hanügüni kada aban lagei watu gemeti aba híchugun kupali lidoun aba hébeduni aba hanügün aban watu le terenchati ligibugiñoun Wabureme, le uágubei mariñagun lan Wabureme houn lun hadügüni.2Ábati láfuridun watu gemeti liñúarürugugiñe Wabureme aba láguduniña sunsuinagubei. Ítara liña hóunwegun ligibugiñe Wabureme.3Lárigiñe aba lariñagun Moisesi lun Aarón:—Anihán buga le mini lubéi Wabureme dan le lariñagunbei:
«Narufudubei houn ha ayarafadutiña nun luagu sandu nan, arufudanéime nuéirigun houn sun Ísüraelina». Aba lerederun Aarón maniñu.4Lárigiñe aba lagúarun Moisesi lun Misaeli luma lun Elisafán, ha lirahüñü Usieli, le liyaurite Aarón, aba lariñagun houn:
—Sagá humaña hiduheñu tídangiñe sanduariu, barǘ humaña bóugudin tuéi kianpu-agei.5Aba hayabin, aba hóuburaguniña tau guánarügü hadunigun, aba hanügüniña bóugudin tuéi kianpu-agei, kei buga lariñaguni Moisesi houn.
Le yuubei houn fádirigu luma le lúntibei hadügüni
6Lárigiñe aba lariñagun Moisesi lun Aarón luma lun Eleasárü luma Itamárü ha lirahüñü Aarón:—Sun Ísüraelina gayaraati hamuiserun ladüga óunweni le lanügübei gudáü le. Ánheinti huguya, mígira huméi hídiburi tulugu, maheiridagun humounme hadaüragun arufuda ludu, hilaguahiñein giñe, óunahaliñalin Bungiu ligañi hawagun lílana fulasu.7Madiseda humá giñe luéi tubenari kianpu lánina óundaruni, móunwegun humaamuga, ladüga huguya anuadirúaadün lau garaba sagüráuti le lani Wabureme.
Aba hadügüni ítara kei lariñaguni Moisesi houn.8Adimurehayati Wabureme lun Aarón, lariñaga lun:9—Danme lunti lan bebelurun buguya o birahüñü tidoun kianpu lánina óundaruni, moun lumuti hatun diwéin ni uniñein le achouhaali, luéi hóunwegun. Aban lúrudu le lunti sun dan le, le lunbei lásügürün hámagiñe agübürigu hamoun isaanigu,10gayara láamuga hasubudiruni le anuadirúabei lumoun le manuadirúnbei, le harumabei lumoun le wíyebei,11gayara láamuga giñe harufudahani lúrudu le líchugubei Wabureme hun lídangiñe Moisesi houn Ísüraelina.12Lárigiñe aba lariñagun Moisesi lun Aarón luma lun Eleasárü luma Itamárü, ha bián lirahüñü Aarón ha erederubaña:
—Barǘ humóun idewesei to fulúaruautu to erederuboun lídangiñe idewesei le agudúbei lun Bungiu, hou humóun maganouga lébini lurugabu latarü, ladüga aban katei sándutimati lira.13Hou huméi lidan aban fulasu le sagüráuti lugundun ligía yuubei bun hau birahüñü lídangiñe idewesei le águdahoubei lun Wabureme. Ítara liña lariñawagún nun.14Aniguaguti le ideweseibei buídutimati, luma iyadaü le ídemuei, lunti héigini lidan aban fulasu le harumati buguya hama birahüñü ladüga ligía yuubei hun lídangiñe hadagaragüdün Ísüraelina le lánina arandaruni.15Iyadaü, le ídemuei, luma aniguagu le ideweseibei buídutimati, lanügǘba ligibugiñoun Wabureme lun ladagarun keisi idewesei buídutimati, úara luma agülei le adagarawagüdübei, lun lagudún. Bánibei lira hama birahüñü súnwandan kei lariñaguni Bungiu.16Ábati lálügüdahan Moisesi luagu liraüraü gábara le adagaragüdüwabei luagu figóu, ligía lasubudiruni luagu gudawa lan. Ábati lagañidun lun Eleasárü luma lun Itamárü, ha lirahüñü Aarón ha erederubaña, aba lariñagun houn:17—Ka uagu meigin hubalin adagaragüdüni luagu figóu lidan aban fulasu anuadirúati? Aban katei sándutimati lira, ani ru lumuti Bungiu hun lun hanügüni hadurun lílana fulasu huouguoun lun hibihini ferudun lúmagiñe Wabureme luagu hafigoun.18Kei manügün hubalin hitaü tidoun sanduariu, lunti yebe héigini adagaragüdüni lidan fulasu anuadirúati ítara kei nariñaguni.19Aba lóunabuni Aarón:
—Barǘ hamaali hadagaragüdün ligibugiñoun Wabureme uguñe, luagu figóu luma adagaragüdüni le gudawarügüti ani susereñahaali libe burí katei le nun. Anhein hamuga neiga adagaragüdüni luagu figóu uguñe, gúndaati hamuga funagia Wabureme lau?20Dan laganbuni Moisesi katei le, aba lagundaaragun.
Bible Society of Honduras