Fádirigu9
Lagumeseruni Aarón lafadirihan
1Luagu liwidün weyu aba lagúarun Moisesi lun Aarón hama lirahüñü luma houn wéiyaaña mutu ha lílana Ísüraeli.2Aba lariñagun lun Aarón:—Barüba aban bágasu ñǘraügili lun adagaragüdüni luagu figóu, luma aban mudún le úati mégeiti luagu lun bedewehani kei adagaragüdüni gudawarügüti ábame banügüni ligibugiñoun Wabureme.3Ariñagabá houn Ísüraelina lun hanügün aban liraüraü gábara lun adagaragüdüni luagu figóu, aban bágasu ñǘraügili luma aban mudún ha ábanti irumu hau, ha úati mégeiti hawagu lun hedewehaniña keisi adagaragüdüni gudawarügüti,4aban bágasu wügüri luma aban mudún lun hafarúniwa keisi adagaragüdüni lánina arandaruni. Lun giñe hanügün aban idewesei le fulúaruauti ñóunwaguatu lau garaba, lugundun larufudaguba Wabureme lungua houn uguñe.5Aba hanügüni Ísüraelina sun le uágubei lariñaga Moisesi houn tigibugiñoun kianpu lánina óundaruni, aba hayabin sun lílana fulasu aba herederun rara ligibugiñe Wabureme.6Ábati lariñagun Moisesi:
—Anihán le lariñagubei Wabureme lun hadügüni. Adüga huméi, ábame larufudagun Wabureme lungua hun lau óunwenbu uéiriguni.7Lárigiñe aba lariñagun Moisesi lun Aarón:
—Yarafabá luagun latarü, ábame banügüni badagaragüdün luagu figóu luma animaalu le lunbei badagaragüdüni keisi adagaragüdüni gudawarügüti lun ferudunawa lan bifigoun luma hafigoun Ísüraelina. Rubeime giñe hadewese Ísüraelina lun ferudunawa lan hafigoun kei lariñaguni Wabureme.8Aba layarafadun Aarón luagun latarü aba líbuguni ligiina bágasu ñǘraügili le ladagaragüdübei luagu lifigoun.9Lárigiñe aba hanügüni lirahüñü hitaü lun, aba ladüdüragüdüni Aarón lifinga lidan hitaü ligía aba láhurudaguni luagu liganchun latarü, aba láturuni hitaü le ígiragubei lugudina latarü.10Lárigiñe aba láguduni agülei, riñón luma le gagülebei luagu lubana animaalu le adagarawagüdübei luagu figóu luagu latarü, kei buga lariñaguni Wabureme lun Moisesi.11Ánheinti lǘgürügü animaalu ligía luma lura aba láguduni bóugudi tuéi kianpu-agei.12Dürǘ lumuti giñe Aarón ligiina animaalu le edewehóubei keisi adagaragüdüni gudawarügüti, aba hanügüni lirahüñü hitaü lun, aba láwiyuruni ligibuagu latarü luma geyegua lau.13Lárigiñe aba hanügüni lábulugu animaalu ligía lun, luma lúgubu le amurusuhóuaali, aba láguduni luagu latarü,14lárigiñe aba lachibuni lisasa animaalu ligía luma liyada, aba láguduni luagu latarü kéigubeirügü animaalu ligía dayarügü.15Ru lumuti giñe Aarón idewesei luagu hafigoun Ísüraelina. Aba lanügüni liraüraü gábara le adagarawagüdübei luagu hafigoun lílana fulasu, aba ladürürüni ligiina, aba ladagaragüdüni luagu figóu kei ladügüni lau le buga aban idewesei.16Dan le larufuduni animaalu le edewehóubei keisi adagaragüdüni gudawarügüti, kei lubudubu ladügei.17Lárigiñe aba ladagaragüdüni idewesei fulúaruauti, aba lanügün murusun tídangiñe aba lágudunu luagu latarü lau sun adagaragüdüni gudawarügüti le lánina binaafin.18Dürǘ lumuti giñe Aarón ligiina bágasu wügüri luma mudún le híchugubei Ísüraelina keisi adagaragüdüni lánina arandaruni. Aba hederegeruni lirahüñü hitaü lun, aba láwiyuruni ligibuagu latarü luma geyegua lau.19Derege hamuti giñe lagüle bágasu luma lagüle mudún lun, lili, agülei le luágubei lumegegu, lani riñón luma le gagülebei luagu lubana,20aba híchuguni agülei úara luma aniguagu. Ábati láguduni Aarón agülei luagu latarü.21Ánheinti lau haniguagu luma hayada, adügarügü lumuti échuni le lánina arufudúni ligibugiñe Bungiu kei buga lariñaguni Wabureme lun Moisesi.22Aba liñuruni Aarón lúhabu hóugiñe Ísüraelina aba labiniruniña, lárigiñe ladügüni adagaragüdüni luagu figóu, adagaragüdüni gudawarügüti luma adagaragüdüni le lánina arandaruni, aba ladireirun luéi latarü.23Lárigiñe aba lebelurun Moisesi luma Aarón tidoun kianpu lánina óundaruni, dan le háfuridunbei, aba habiniruniña Ísüraelina. Ábati larufudagun Wabureme lungua houn lílana fulasu lau óunwenbu larugounga:24Aba lasaliragun watu gemeti liñúarügiñe Wabureme aba lagumuchaguagüdüni animaalu le yebe lunbei lagudúniwa lau sun agülei le luágubei latarü.
Dan le harihinbalin Ísüraelina katei le, aba hagúarahan sun Ísüraelina lau ugundani, aba habuluchagun darí ladagarun herebe múarugu.
Bible Society of Honduras