Hobu20
1Ígira bumutina lau maguraasuni luma mederaaguagüdüni ligía nabusenrubei nóunabunibu.3Anaba bumutina lau bererun gama lumoun subudi numuti ida luba lan nóunabunibu.4Subudi bumuti luagu ítara liña lan lúmagiñe añahein lan gürigia ligibuagu ubóu.5Murusunrügüñein ladurarun hagundan gürigia ha wuribabaña, luágurügüñein fiu dan lubuidun hadaani.6Íbini iñu hamá kei sielu, chülǘ ligía hábulugu luagu dúeri.7Hagumuchuba kei hádiga animaalu, ibidiñebei houn hamadagu halíañanu lan.8Hagumuchaguba kei aban uénedü, ani úabei ni aban adarirutiña.9Ha meha aganóubaña hama, ani ariha hamañaha, marihindigia hamaañame.10Háguyugüdübei hasaanigu le meha híweruhabei hawéi gudemetiña houn lárigoun.11Harariruba lidoun hamúaha buinñu lau erei luma nibureini.12Semeeti hasandiruni wuribani, darí lun hadügün kamá héigiñein;13ágüdaha hamuti lisemén wuribani hayumulugu aba héigini hámaru hámaru.14Gama lumoun dan le harageiruguhali, aba lasaliragun tupeisininme hewe.15Aba hewerehani irisini le buga héigibei; sagá lumuti Bungiu hawéi harageirugugiñe.16Hachuuhañahaña tupeisinin hewe, ani láfarubaña péisini ligía hilagubei.17Mátunbaña ha wuribabaña lídangiñe míligi luma sírudu le éibaagubei kei duna.18Sun le buga hagañeirubei, gasu háguyugüdüni; siñabei héigaaguni ni hewesiruni harisin.19Adüga hamuti meha habusenrun hau gudemetiña; óuyedatiña burí tau muna to mama hábunagun.20Magufurumadaditiña meha; sun katei uámaati houn;21ani haliluatiña lun sun katei. Ligía siñabei lubéi ladurarun lubuidun hadaani.22Gagibedunme hámati, gagibedun hemegeirun; lábürühaba háhabu wuribatiña hawagun.23Danme háfaagun habuinchagüdüni haragei, ligíame larariragüdüni Bungiu ligañi hawagun.24Ánhaña esefura tuéi aban áruma to gürabu, hárügüdübaña tau aban gimara to buronse.25Táfuduragubei gimara hágubu, láfuridame tígiri luéigiñe habana. Habuinchuba lau anufudei;26lóuburagubaña aban óunwenbu luburiga. Lagumuchaguagüdübaña aban watu gemeti le memegeirunwabei línchawaguniwa, hagía hau sun haduheñu.27Larufudubei sielu hafigoun, ábame liñuragun múa lun líchugun hadurun.28Danme lábürühan ligañi Bungiu hawagun, leferidiruba sun harisin.29Ligía afayeiruahaü le lúmagiñebei Bungiu habá gürigia ha wuribabaña, ligía ubunuruni le laranserubei habá.
Bible Society of Honduras