Hobu17
1Agumucheina liña nuguraasun; ayarafadeina niña lun lagumuchun nibagari; lagurabahañadina numuaha.2Gürigiarügüñanu gadügaditiña bula nurugabu; wéyuagu áriebu hau añawariha nun.3Gama lumoun buguya Aburemei, gayaraati bóunabun nuéigiñe; ka gayaraabei ladügüni buéidigia?4Buguya le aramudubalin lualin ichügü tuéi hanigi, mígiraba lun hagañeirunina.5Ha agarabaagutiña hawagun hamadagu luagu fáyeiti, hasufuriruba hasaanigu ilamaü.6Adügaadibu lun hadimurehan súngubei wuriba nuagu, luma lun hásueragun nigibuagun.7Burúa narihin lau igarigu, ítara liña núgubu kéigubeirügü aban lamuñounga.8Dan harihini ha buídubaña katei le, aba taweiridun hanigi; aba hagañidun, aba hanügünina keisi gürigia wuribati.9Ariñagatiña hawougua luagu richagua hamá, luagu haruma lan háhabu.10Gama lumoun ñübuin humá ñahoun sun huguya, ani madaribadina ni aban chu tau haganagua.11Agumucheina liña luéyuri nibagari, günringuati sun nisaminan luma nayumahan.12Gama lumoun huguya, adüga humuti áriebu lun wéyuagume; lau sun búriga lan, ariñagatün luagu yarafaali lan larugounga!13Óunwenirügüñein gayara nagurabahan, luma narounrun arumuga lidan luburiga.14Héweraü luma umúahaü, hagía nagübürigubaña, hagía níbirigu!15Halía leredera nemenigin? Hagéi lubuidun nidaani?16Larariruba funagia numa lidoun larúeihan óunweni, lun wemeraagun úara lidan múa?
Bible Society of Honduras