Hobu16
1Gíbeñahaali katei líbeina le naganbun. Huguya, lubaragiñe hámalihanina, rúrügütün lidere dan nun.3Magumuchadibei san dimurei burí málati le? Ka uagu heredera asigenerana?4Lun hamuga huguya lan lídanbei nufulasun guentó, nadimurehaña hamuga giñe kei huguya; nánhingichuñein hamuga nichügü adüga bula hau, gíbeti hamuga lunti nariñaguni hun,5dimurei burí le lunti námalihanün lau, lun níchugun dǘgüdaguaü luma anigi hun.6Gama lumoun ni ánhana adimureha magalumarunti nigarigu, ni ánhana ámanicha mawalidaguntina.7Gumuhali Bungiu lau sun nere; gidala sun numadagu nuéi,8aba ladaürünina. Adimurehati wuriba nuagu; rúhali nidurun le madügün numuti.9Éibaaha lumutina Bungiu, günringualana, ayawadagua lumutina kei aban animaalu gáñiti, aríagua lumutina kamá hamuga lágani au.10Guririguatiña gürigia nau, añawarihatiña nun, rugua hagía agufudein nuagu lun háünabudagüdünina.11Ru laadina Bungiu háhaburugun gürigia wuribatiña ha gáfarahatiña.12Darangilu niña yebe, aba lárügüdünina luéigiñe nigiina aba lámurudunina aba lagünrinchagunina, adüga ligía lun nuagun lan tadagaha ligimaran.13Chügua lumutu ligimaran nuagun luéigiñe sun oubaü; chülüguatu nídangiñe magudemehabuga ligía nun, aba látulurun nisasa múarugun.14Adaaguati saragu biti nuagu, ábürühati nuagun keisi aban wuriburuguna.15Aba nadaürün daüguaü súsutu buin au lau íruni, aba nabuluchagüdüni nábulugu lidan kaliki.16Ginene nigibu lárigi nayahun, burúaali narihin,17lau sun madügünñahagidina lan wuribani ni ka un, ani haruma ligía nufurieigin.18Anihán katei wuribati le, le adügǘbei nun, agúahati luagu irichaü; múa, mábunabei nagúarahan!19Mosu aniheinbei lan kaba lan adimureha nuagu sielu, anihein nubuyein yágüta,20lun lariñaguni naritagun ligibugiñe Bungiu, ariha láamugei Bungiu náguira;21aban le lunti ladimurehan lun Bungiu luagu nufulesein, kei ladimurehoun luagu lufulesein aban gürigia ligibugiñe amu.22Fiu irumu le mégeibei nubá, ásügüreina liña, ani nídiña luéigiñe üma le magiribudagülebei.
Bible Society of Honduras