Heremíasi50
Lábürühan Babilónia
1Anihán ñunsu le lariñagagüdübei Aburemei lun profeta Heremíasi libügürü Babilónia, hageira Kalüdéana:2«Apurichiha huméi katei le, subudigüda huméi hadan néchanigu, tulé huméi fanidira; maramuda humá ni kata. Ariñaga humá: “Ragüwa Babilónia! Rédeiha bungiu Beli lau busiganu, Buinha bungiu Marüdúku lau anufudei! Rédeiha habungiutegu lau busiganu luma anufudei!”3Ladüga anitén aban néchani hawagun nóruterugugiñe le lunbei lígiruni hageira kei aban fulasu le mageirawati. Úaañame aganóutiña ñein, ni gürigia ni animaalugu, hanurahaba súngubei».Hagiribudun Ísüraelina
4Lariñahare Aburemei:—Lídanme dan ligía, hayabinba lánigu Ísüraeli hama lánigu Hudá ayahuaheina áluahana, au, Aburemei le Habungiute.5Hálügüdahaba luagu lémeri Sión, ábame houdin ñeinhin ariñageina: “Keimoun lumoun Aburemei, óundaragua wamá luma lidan aban daradu magumuchaditi, le mabulieidúati”.6—Ítara haña meha numutuniña kei mudún féridihaña, ha mabuidunti hadundehaniña hóuniri, aba hígiruniña lun heferidirun, lun houdin luéigiñe aban wübü lun luagun amu, darí lun habulieiduni hafarügan.7Dántiha le hadariruniña háganiñu, aba héiginiña, hariñagatiha: “Mama wagía gadurunbei luagu hafigouhan kóntüra Aburemei, le íchugubei ibagari houn, hemenigin hagüchagu”.8«Hanuraha Babilóniagiñe, hageiragiñe Kalüdéana! Furí humá kei adundehatiña mudún habá habá mudún!9So nadüga lun hóundaragun saragu ageiraü ha nóruteruguna ha gabafutiña lun hábürühan lidan aban luagun Babilónia. Hafileihaba lau ábame hárügüdüni. Wuriburuguna buítiña hagía, dan le hachüürünu hagimaran, macharatiña.10Hasagarahabaña Kalüdéana, hasagarahabaña darime habuinchagun. Au, le Aburemei ariñagubalin.
Lábürühan Babilónia
11«Huguya Kalüdéana, ha buga asagarahabaliña numutuniña, Ru humá ugundani húniwagua! Hachubaha kei aban tiraüraü bágasu sagadirugu! Hachubaahóua kei gabayu!12Gama lumoun hageira, luma huburugute lerederuba buin lau busiganu. Ligíaba árigili hadan sun néchanigu, ábanbei fulasu mageirawati le mábeiti ani maganóunwabei ñein.13Lugundun nagañiduba, ábame nígiruni súngubei málouga, kei aban fulasu mageirawati. Hanufudedaguba sun ha ásügürütiña ñéingiñe lau harihini abeichúni le libihubei.14«Ragǘ huméi hubara achüühatiña gimara, geyegua huméi Babilónia! Chü humoun sun higimaran luagun, ladüga lafigouhan kóntüra au, le Aburemei.15Hagúaraha le lánina wuribu luéigiñe sun oubaü! Lederegeragua Babilónia lungua! Héiguouga wáyelesi, gulúagua baríeiru! Anihán náguyugüdüni le hadügübei: Fáyeigüda huméi luagu ladüga. Adüga humá lun keimeme le ladügübei!16Mígira humá ni aban Babilónia le lunti lábunagun o le lunti lalubahan. Danme harihini terencha wuribu gagünrinchaguaditi, ábame hagiribudun hageiroun, kada aban anuraheina».Lagiribudun Ísüraeli
17—Ítara liña Ísüraeli kei aban mudún féridiharu to héibaahan liñún. Furumiñe, aba léigini lurúeite Asiria; lárigiñe, aba láhiachuni Nabukodonosoru le lurúeite Babilónia labu.18Ligía nariñagunbei, au, le Aburemei Suntigabafu, le Lubungiute Ísüraeli: Nabeichubei lurúeite Babilónia lau sun lageira kei nadüga lun lurúeite Asiria.19Nagiribudagüdübei Ísüraeli lageiroun, ani kei aban mudún, ladariruba saragu sagadi luagu wübü Karümélu, Basán, luma lidan burí dabíara-agei le lani Éfürain luma Galaadü.20Au le Aburemei ariñagubalin. Lídanme dan ligía, madurunhalime Ísüraeli luma Hudá, mafigoun ligíame, lugundun feruduna nubaña ha lúnbaña nígiruniña wínwanñu.Leferidirun Babilónia
21«Ábürüha humá luagun lumúan Merataímü luma hawagun lílana Pekodu! Éibaaha humaña, günringua humaña sunsuinagubei! Gúnfuli huméi sun le nariñagubei hun! Au, le Aburemei íchugubalin lúrudu lun ladügǘn».22Aganbúati lamuri wuribu fulasurugu, le lánina óunwenbu günringuaü.23Halagua Babilónia, le lumarüdiyun sun ubóu! Ma lanarime anufudei hasandirun néchanigu lau harihini le asuseredubei lun Babilónia!24Babilónia, buguya guánarügü esetirubei sádara bubarua, aba bábürühan tidoun ibidiñounga bun. Aba berederun adaürǘwa ñein siñauga báfuridun ñéingiñe ladüga bebedaagun lun Aburemei.25Darala Aburemei tagei lárumate, aba lasagarunu lárumate ligañi, ladüga anihein aban dasi lun ladügüni Aburemei Suntigabafu lidan hageira Kalüdéana.26Ábürüha humá luagun lídangiñe sun oubaü! Dará humóun lagei leigin! Günringua huméi! Merederalá ni aban wínwanñu.27Áfaragua humaña sun lisudaranigu! Fugiabugu hagía! Chülüha haweyuri, luma lóurate habeichún!28(Hamalali ha anurahabaña Babilóniagiñe lun uburugun Sión abahüdaguei luáguti labeichuni Bungiu Babilónia luagu le ladügübei tau ténpulu.)29«Wa humá houn sun achüühatiña gimara, lun hayabin ageindagua luma Babilónia! Geyegua huméi uburugu ua láamuga ni aban esefuruti! Fayei huméi keisi ladüna! Adüga humá lun kei ladüga! Ladüga liñuragun lungua nuagun, au, le Aburemei le Sándubei, le Lubungiute Ísüraeli.30Ligía hábürühaba lubéi lílana ha nibureinhaña lau óunweni ǘmadarugu, hilagua hagíame sun lánigu ha wuriburuguna lidan weyu ligía».31Lariñahare Aburemei Suntigabafu: «Gürigia barügua tungua, kóntürañadina huagu; chülüha huéyuri, lóurate habeichún.32Hachugeraguba ábame héiguadun, úabei kaba lan iñuraguaün. Nébedubei sun burí huburugute, ábame lágudun sun geyegua hau».33Lariñahare Aburemei Suntigabafu: «Hasufuriruña lánigu Ísüraeli hama lánigu Hudá lidere dan. Daü hamá háganiñu ani máhatiña hígiragüdüniña.34Gama lumoun héreti hesefuragüle, ani Aburemei Suntigabafu líribei. Ligíaba ariha lun líchuguni haricha houn, lanügüba darangilaü lun fulasu luma lanarime anufudei houn lílana Babilónia».35Lariñahare Aburemei: «Wuribu kóntüra Babilónia hau sun lílana! Kóntüra lábutigu hama chu taugu ha ñéinbaña!36Wuribu kóntüra ha garíaahadibaña ñein: lun lálülüdün hau!37Wuribu kóntüra lisudaranigu: Lun hadadagarun lau anufudei! Wuribu kóntüra hagabayun tuma hakarün! Wuribu kóntüra lisudaranigu ha terencha: Lun hítaradun kei würiña! Wuribu kóntüra harisin: Lun líweruhoun hawéi!38Wuribu kóntüra hadunari éibaaguati: Lun lamabeidun. Ladüga hageira hagübüri burí guáriuagu Babilónia, lǘlügüdaaña lau.39—Ligía hadügüba lubéi mesu áraabuna, ounli áraabuna hama awesüturusu hábiñe Babilónia. Maganóundigiaañame gürigia ñein.40Lerederuba kei Sodoma luma Gomora luma burí uburugu le lubadubei, dan le lagünrinchawagunbei. Maganóunhañame gürigia ñein, ni íbini lun herederagun ñein. Au, le Aburemei ariñagubalin.41«Laranseruña aban néchani héreti hama saragu urúeigu lun hayabin lídangiñe fulasu díseti luéigiñe nórute.42Barütiña gimara tuma eféin, hanarimetiña, magudemehábutiña, ítara liña hagúarahan kei liréin barana, wariñu haña hawagu gabayu. Aransetiña lun wuribu kóntüra Babilónia.43Rédeihali lurúeite Babilónia deregüdagu lau anufudei lau laganbuni uganu le, sanditi íruni luma gáriti kei aban würi agaridutu».44—Niábinba sódini kei aban liñún le áfuriduti dabíararugugiñe laru Hordán lun lidoun fulasu le ñein lumuti sagadi hilumati súnwandan, ábame nanuragüdüniña Babilóniana ñéingiñe, ábame níchuguni le nabusenrun lun lagumadihan. Lugundun Kagia ítarabei kei au? Ka gayaraabei lageindagun numa? Ka hóuniri mudún gayaraabei lagagibudagun numa?45Aganba huméi le naransehabei kóntüra Babilónia; kóntüra hageira Kalüdéana au le Aburemei: Íbini harahüñü mudún ha ñǘbüritimabaña, hanügǘba, hanufudeduba ha aganbutiña ayanuha luagu.46Hanarimebei liréin lábürühan Babilónia, darime lun lánhingichun múa, ábame laganbún hagúarahan lidoun burí líbiri néchani.Bible Society of Honduras