Heremíasi51
Lagünrinchawaguniwa Babilónia
1Lariñahare Aburemei: «Nóunaha aban garabali le gagünrinchaguaditi luagun Babilónia hama Kalüdéana.2Nadügüba lun hóuseruni áganiñu Babilónia kei türigu le achüürǘti garabalirugun; nadügüba lun hígiruni lumúan úouga aganóutiña ñein. Danme lachülürün luéyuri lamiselu, hábürühaba luagun lídangiñe sun oubaü.3Seti hamóun achüühatiña gimara hagimaran! Daü hamóun hadaüragun to lánina wuribu! Magudemehabu humá houn nibureinhaña ha Babilóniana; günringua humaña hasudaranigu sunsuinagubei!4Lidan sun hageira Kalüdéana, herederuba gürigia riwagu múarugu ǘmada,5lugundun lau sun afigouhaali lan Ísüraeli luma Hudá nigibugiñe, buíngüda haméi hageira lau figóu, au, le Aburemei Suntigabafu, le Lubungiute Ísüraeli, mágurun nágiña.6«Hanuraha Babilóniagiñe! Sefulá le gayaraati! Móunwegua humá luéigiñe lifigoun Babilónia! Anihán lóurate nafayeiragüdüniña luagu le ladügübei, ani nafayeirubei kei ladüna!7Aban meha weru lauti golu Babilónia núhaburugu, le abacharuadagüdütiña sun lílana ubóu. Guratiña meha néchanigu tídangiñe diwéin tuguya, aba heferidiruni hachügü.8Gama lumoun sódini, aba lábürühan Babilónia aba lañaünrüdagun. Hayahuaha luagu! Barǘ humá árani lun liwounun anhein areidagua».9Agaranihaadiwa lun Babilónia, gama lumoun mareidagunti. Ígira huméi keimoun yáagiñe, kada aban lageiroun, ladüga chülüha luriban Babilónia sielun, iñuraguati dúerirugun.10Gáñeigüda lumuti Aburemei waricha. Higougu, keimoun Sión, abahüdaguei le ladügübei Aburemei le Wabungiute.11Busenti Aburemei lagünrinchaguni Babilónia, ani agaguda laali giñe káteimeme le hadan lurúeitegu Media. Lafayeiragüdün Aburemei le, luagu le hadügübei tun litenpulun. Seti humóun gimara! Ragǘ huméi hidaüdina!12Iñura huméi fanidira le liseinin lábürühoun luagun lubarieirun Babilónia! Ru humá hanwoun óunigihatiña! Ru humá aríaahatiña! Seti humá sádara!Ladüga aransehali Aburemei, ani ladügüñein sun buga le leledegubei ladügün kóntüra lílana Babilónia.13Buguya Babilónia, le lubadubei óunwenbu burí duna éibaaguati, ani anihein burí irisini wéinamuti buma, chülüha lagumuchun bidaani!14Fiñuhali Aburemei Suntigabafu luagu libagari, ariñageina: «Labuinchagüdübadibu hau áganiñu kei chagagaru, ábame hagañeirunibu wuriburugu».
Uremu lánina lalawahóuniwa Bungiu
15Aburemei adügübalin múa lau lubafu; derebugugüdalei ubóu lau lichú lau; tulegualéi sielu lau lualin lichügü.16Lau lumalali le ítarabei kei wayuhuru, ahuuhagüda lumuti duna sielu, warigüda lumuti dúeri lígirugugiñe ubóu, durunguagüda lumuti labirihaniga labadinagua huya, sagá lumuti garabali le ñéingiñe lubéi lareidei.17Ibidiouguati hau sun wügüriña, nibusigarigüda hamuti guáriuagu le adügübaliña: Iyawaü ha iyeenitiña guáriuagu, ani mabagaritiña;18kátaña mebegitiña guáriuagu, nibusigaridünatiña, lagünrinchagubaña Aburemei danme laguseragüdün.19Mítaranti Lubungiute Hakobu kei guáriuagu hagía, Lubungiute Hakobu adügübalin sun le aniheinbei! Anúadira lumuti Ísüraeli keisi lumegen. Aburemei Suntigabafu líribei.Babilónia labeihagüle Wabureme
20«Babilónia, buguya numalinbei, nárumate lánina wuribu! Bau, nagünrinchagua néchanigu luma agumadihani.21Bau, günringuatina gabayu habu ha wariñubaña hanagan, karü habu ha abugahabarun.22Bau, günringuatina wügüriña hama würiña, wéiyaaña mutu hama ñǘbürigiña, wügüriña nibureinhaña hama würiña nibureinhaña.23Bau, günringuatina hóuniri mudún hau sun mudún, ábunagutiña múa hama bulu bágasu ha lánina bunaguaü, gumadimatiña hama lánigu urúei.Labeichúniwa Babilónia
24«Gama lumoun nafayeirubei Babilónia hama sun Kalüdéana keisi hadüna ligibugiñe hagu sun huguya, luagu le hadügübei lun Sión. Au, le Aburemei ariñagubalin.25Kóntürañadina buagu, buguya wübü gagünrinchaguaditi, buguya le agünrinchagubalin sun múa. Au, le Aburemei ariñagubalin. Niñurubei núhabu lun nabeichunibu, Nabalabaagüdübadibu luéigiñe dübü, nadügübadibu ábanme wübü gudaali.26Meseriwidunbei ni aban dübü le erederubei bárigirugu lun tábunawagun muna. Ábanbadibu fulasu mageirawati lun sun dan.27«Ru huméi liseinin wuribu fulasurugu! Win huméi fidu, seti humaña gürigia lun hábürühan luagun Babilónia! Óundaragua humaña lílana Ararátü, Miní luma Ásükenasü lun hábürühan luagun! Ru humá aban heneraali lun ladundehani wuribu! Awansegüda humaña gabayu kei chagagaru gáñitiña!28Seti humaña néchanigu lun hábürühan luagun; seti humaña lurúeitegu Media hama lani gumadimatiña hama sun lánigu, luma sun fulasu le lábugiñebei hagumadin».29Adadagarati múa, ladüga lagunfuliruñein Aburemei le aranseha láalibei lun ladügüni Babilónia ábanme hanufunati fulasu mageirawati.30Rédeiha hageindagun lisudaranigu Babilónia, Rédeigua tidan muna to ñéingiñe lubéi hageindagua; gumuha here, henegerügaaña würiña. Ragüwa burí haburugute lau erei, gudawa tuguya burí haban.31Aban lárigi aban héibaagun láutiña uganu, ariñaga lun lurúeite Babilónia luagu ragüwa lan luburugute sunsuinagubei.32Ragüla ágani lémeri burí duna le éibaaguati, gudala burí fulasu le ñéingiñe lubéi hageindagua aba habuinchun súdaragu lau anufudei.33Ladüga lariñahare Aburemei Suntigabafu le Lubungiute Ísüraeli: «Málübei anhein líbaagua ágani Babilónia, ábame ladügüraguni kei türigu múarugu».34Lariñahare Herusalén le luburugute Sión: «Günringua lumutina Nabukodonosoru le lurúeite Babilónia, aba léiginina; ígira lumutina kei aban asiedu málati. Hulú lumutina kei aban mónsturu baranahana; kimule ligía lau le hínsiñetimabei lun nídangiñe, le líbiri aba láguruni. Lafayeiha Babilónia luagu le ladügübei nun! Hafayeiha Kalüdéana hawagu gürigia ha háfaragubaña nuéi!»Füramasei lun Ísüraeli
36Lariñahare Aburemei: «Níchugubei biricha bun, nafayeiragüdübaña báganiñu luagu le hadügübei bun. Namabeidagüdaali duna sunsuinagubei, luma burí lísensen-agei lidunari Babilónia,37darime lun lerederun lárigirugu kei bugan ifei, lerederuba hábiñeme animaalugu, ábanbei fulasu le maganóunwati ñein, hanufunabei houn sun gürigia.38Sun Babilóniana hadürürühaba kei liñún, aünha hagíame kei harahüñü liñún.39Lídanme láguduniña lárouga, ábame nátagüdüniña uniñein to gabacharuadagüdaatu lun heferidiruni hachügü. Ítara luba hábürühan lidoun arumuguni magumuchaditi le ídangiñebei magagudunbaña lanme. Au, le Aburemei ariñagubalin.40Lariñahare ábame nanügüniña kei hanügǘn mudún hama gábara lun háfarawagun».Lábürühan Babilónia
41Ábürüha Babilónia, uburugu le wéiritimabei ladimurehoun ubouagu, heigua, gáñeiwa, Aba hanufudedagun néchanigu dan le harihini!42Darugua barana lau Babilónia, darugualá lau lanarime burí luéinamun lugudi.43Rédeiha burí luburugute kei lanarime fulasu mageirawati, kei múa mábeiti le mábiñewati, le ñein lubéi ua hamá aganóutiña, le ñéingiñe lubéi másügürün lan ni aban.44«Nabeichubei bungiu Beli Babilónia, newerehagüdübei le hulú laalibei lun. Miábindigiaañame néchanigu lumoun. Ábürüha burí lubarieirun Babilónia!45Furí humá ñéingiñe numutuniña, sefuléi kada aban libagari luéi lanarime nigañi.46Máhüchüra humá, manufudeda humá luagu le agülülühóubei fulasurugu. Ámuñegueinarügübei agülülühóuti ságüme irumu, agülülühóuni luáguti lanarimeniga fulasurugu, luma awuribuhani haganagua agumadihatiña.47Lachülürüba lubeiti weyu lun nabeichuniña liguariuan Babilónia. Lerederuba sun Babilónia lau busiganu, buin hau hilaaña.48Lagundaaruba sielu, múa luma sun le aniheinbei, danme lábürühan Babilónia, danme hayabin ha lúnbaña hagünrinchaguni luéigiñe nórute. Au, le Aburemei ariñagubalin.49Gasu lábürühan Babilónia luéigiñe áfarahani burí le ladügübei houn lánigu Ísüraeli, luma áfarahani le ladügübei lidan sun ubóu».Ñunsu houn huríu ha Babilóniabaña
50Huguya ha esefurubaña luéi háfarawagun, anuraha humá, mararamagua humá, ani íbini danme díseedün samina humá luagun Aburemei, haritagua huguyame luagun Herusalén.51Huguya, hariñahare: «Sanditiwa busiganu dan le waganbun hanabuniwa. Daruguati bulíeiguaü lau wagibu, ladüga beluhaña gürigia terencha chülǘ lidoun fulasu le sándutimabei tidan watenpulun».52Gama lumoun lariñahare Aburemei: «Anitebei weyu lun nabeichuniña guáriuagu ha lubungiutegu Babilónia, hamumehaba ha achugútiña lidan sun hamúan.53Íbini anhein iñuragua Babilónia dagá sielun lun liñuruni lubarieirun, nóunahaba áganiñu lárigi ñeinhin lun hagünrinchaguni. Au, le Aburemei ariñagubalin».Lagünrinchawaguniwa Babilónia
54Aganbúati agúarahani lauti igarigu Babilóniagiñe, aganbúati aban óunwenbu areinchuni hageiragiñe Kalüdéana.55Lagünrinchaguñein Aburemei Babilónia, lagumuchaguagüdüñein lareinchun. Hábürühaba áganiñu luagun kei lugudi barana lidan lérouga, hábürühaba luagun lau óunwenbu areinchuni.56Hayabiña agünrinchaguei Babilónia; ragǘ hamaaña awuribuhatiña ha lánigu, halagua hamá hagimaran. Lugundun, le Waburemebei aban Bungiu ligía, le íchugubalin le ladünabei kada aban lun.57Lariñahare Urúei, le Aburemei Suntigabafu: «Nabacharuadagüdübaña ábutigu Babilónia, lánigu ha chúbaña aau, gumadimatiña, awadigimaridutiña lidan arúeihani hama lisudaranigu, ábame hábürühan lidoun aban arumuguni magumuchaditi, másaarunhañame lídangiñe.58Nariñahare au, le Aburemei Suntigabafu: Lidabuberen burí lubarieirun Babilónia, lagurúba sunsuinagubei, gudawa ligíame luéinamun burí lubenari. Meseriwínbei wadagimanu le adüga hamaalibei gürigia luagu, lagumuchuba lárouga houn lidan watu gemeti».Lanügǘniwa lani Heremíasi ñunsu Babilónioun
59Dimurei lóunahan profeta Heremíasi lun Seraíasi, le liráü Neríasi, libari Maseíasi lidan ligadürün lirumudiri lagumadihan Sedekíasi, le lurúeite Hudá. Lídiña Seraíasi luma urúei Sedekíasi lidan luéiyasun Babilónioun keisi aransehati ligabanan urúei.60Abürüha laali bugati Heremíasi ñunsu tidan aban garudia libügürü sun lamiselu le lunbei liabin luagun Babilónia luma líbiri katei le lunbei lasuseredun ñein,61aba lariñagun lun Seraíasi:—Danme bachülürün Babilónia, baliiheime sun ñunsu le.62Lárigiñe ábame bariñagun: “Aburemei, ariñagaadibu luagu bagünrinchagubei lan fulasu le, lun maganóundigiaaña lan ni gürigia, ni animaalugu ñein, ladüga badügaali lan ábanme fulasu mageirawati lun sun dan”.63Lárigiñemeti lásurun baliihanu líburu to, ábame bagüürün aban dübü tuagu, ábame bágurunu lidoun duna Éufüratesi,64bariñagame: “Ítara luba labuluchun Babilónia, másaarunhalime lídangiñe lamiselu le lunbei lóunahani Aburemei luagun”.
Ya lagumucha lererun Heremíasi.
Bible Society of Honduras