Agumesehani9
Lidaradun Bungiu luma Noé
1Aba labiniruni Bungiu Noé hau sun lirahüñü, lau dimurei le:—Gibe hamá hirahüñü, buíngüda huméi ubóu.2Sun animaalugu ha ubouagubaña hadadagaruba lau anufudei huéi. Lábugiñeñanu hubafu sun animaalugu ha garabalirugubaña, ha múarugubaña hama ha baranahabaña.3Gayaraati héiginiña sun hawuyeri animaalugu tuma in to habusenrun. Ru numuti sun lira hun.4Gama lumoun anihein aban katei moun lumuti héigini: Moun lumuti héigini animaalu lau lita, ladüga lídanñein lita libagari.5Naguseragüdübei kada wügüri luma kada animaalu luagu lita kada aban hídangiñe. Naguseragüdübei kada wügüri luagu libagari gürigia líledi.6«Le áfaruti aban gürigia líledi hilagubei, láfarayabei giñe amu gürigia, ladüga lenege lan Bungiu ladügüniña gürigia.7Gama lumoun gíbegua hamá hirahüñü, buíngüda humaamugei ubóu hau».8Ariñagati giñe Bungiu lun Noé hau sun lirahüñü:9—Ariha humá, nadügaali nidaradun huma luma hama hadügawagun,10luma hama sun animaalugu ha húmabaña, ha áfuridubaña tídangiñe ugunei: Dunuru, animaalugu ha ibiñani hama ha áraabuna, luma hama sun animaalugu ha ubouagubaña.11Masansiragunbei nidaradun huma: Magumuchaguagüdün naaña gürigia hama animaalugu lau ladibirun ubóu. Mabuluchagüdündigia naali ubóu luéi náfaraguniña lílana.12Anihán liseinin daradu le nadügübei huma luma hama sun animaalugu lun súnwandan:13Ru naaru nani heremuru dúerirugu, teseriwiduba liseininme daradu le nadügübei hama lílana múa.14Danme le nóunahan dúeri ligibuagun múa, tasaliraguba nani heremuru labadinagua dúeri.15Ábameti naritagun luagun daradu le nadügübei huma luma hama sun animaalugu, ábameti madibiragüdün naali lan ubóu luéi lagumuchaguagüdünün.16Danme anuhán lan heremuru dúerirugu, narihuboun, ábame naritagun luagun daradu le nadügübei hama sun gürigia luma hama sun animaalugu ha ubouagubaña lun súnwandan.17Anihán liseinin daradu le nadügübei hama sun gürigia luma hama sun animaalugu ha ubouagubaña.
Ítara liña ladimurehan Bungiu luma Noé.
Noé hama lirahüñü
18Semü, Kamü luma Hafeti, hagía lirahüñü Noé ha áfuridubaña tídangiñe ugunei. Kamü ligía lúguchibei Kanán.19Añahán meha ǘrüwa ha lirahüñübaña Noé, ani hau hadügawagun hagibedaguaya gürigia ubouagu.20Ábunaguni buga lifisiutebei Noé, ábati lagumeserun Noé ábunagua, aba lábunun aban lichari lau beibei, ligía furumiñeti wügüri ábunagubei beibei.21Luáguti aban weyu, aba latun Noé diwéin tauti beibei aba labacharuadun, aba larounrun surusu tidan likianpun.22Dan le larihinbalin Kamü le lúguchi Kanán lúguchi surusu, aba lidin abahüdaguei houn bián líbirigu.23Ábati lanügün Semü luma Hafeti aban gamisa, aba héibugun hanagangiñoun ariheina luagun amu oubaü luéi harihini háguchi surusu, aba hadouragun lau.24Dan le lásaarunbei Noé lídangiñe liwidinun, dan lasubudirunbalin le ladügübei ladarahóun lun,25aba lariñagun lun:«Íñaragua numuti Kanán! Ligíaba idamuni le ǘnabutimabei houn bián líbirigu!»26Aba lasigirun ariñaga:
«Binilei Nabureme Bungiu Semü, lidamun lan Semü Kanán.27Anhalá Bungiu lun laweiridagun Hafeti; aganoualá tidan burí likianpun-agei Semü, ani lun lidamunbei lan Hafeti Kanán».28Wínwanti Noé ǘrüwa-san-dimí irumu lárigiñe ladibirun ubóu,29nefu-san-dimí lubeiti irumu lau dan le lóunwenbei.
Bible Society of Honduras