Agumesehani8
Lagumuchun guran
1Ábati laritagun Bungiu luagun Noé hama animaalugu ha lúmabaña tidan ugunei. Aba láfuragüdün garabali ligibuagun múa; aba lagumeserun duna ararira;2aba ladourun lísensen-agei lilulin barana luma lubenari sielu. Aba lásügürün huya,3aba lagumeserun duna ararira murusun murusun. Luágubei san-dimí weyu ararireinatimahaali duna,4wéyubei disedü lidan lisedün hati ligía tadagarun ugunei luagu wübü le gíribei Ararátü.5Aba lasigirun duna ararira, furumiñetibei weyu lidan lidiisin hati, gayaraahali burí larihín lábulugu wübü.6Lárigiñe bián wein weyu, aba ladaaruni Noé tufunederan ugunei to buga ladügüboun,7Ábati lígiragüdün aban dunuru wuriti, aba lerederun dunuru ligía áhamaha yaroun yagüroun agurabahei lamabeidun múa.8Lárigiñeti buga lira ábanya lígiragüdün Noé aban unhun lun larihin anhein mábeihali lubéi múa;9ábayati tagiribudun unhun tugía tidoun ugunei ladüga madari tan halíaba lan temeraagua lugundun wéirigili lan buga lubuinga ubouagu. Ábati línchuni Noé lúhabu, aba lárügüdünu unhun tugía aba lebelaagüdünu tidoun ugunei.10Sedü weyu lárigiñe, ábaya lóunahanu Noé unhun.11Aguñedeinaali tagiribudunbei unhun. Barüina tuguyati murusun tilimun wewe oliwu tiyumulugu, ítara liña lubeiti lasubudiruni Noé luagu amabeideinaali lan buga ubóu.12Sédüya weyu lárigiñe, ábaya lóunahanu unhun tuguya, gama lumoun magiribudúnharu.13Dan le sisi-san-ábanhali irumu lau Noé ligía lamabeidun múa. Furumiñe weyu lidan furumiñeti hati, aba lagidaruni Noé tábulugu ugunei, aba larihin luagu mábeihali lan múa.14Lubaabei weyu wein-sedü lidan libiaman hati, mábeitimahali múa.15Ábati lariñagun Bungiu lun Noé:16—Furiba tídangiñe ugunei tau búmari, birahüñü hama bídiñugu.17Sagabaña giñe sun animaalugu ha búmabaña ñein: Dunuru, animaalu áüdübüna hama ha aduruuharügübaña múarugu, ñüdün hamaamuga, garahüñügua hamaamuga, buíngüda hamaamugei ubóu.18Ábati láfuridun Noé tau lúmari, lirahüñü hama lídiñugu tídangiñe ugunei.19Furitiña giñe sun animaalu ha áüdübüna, ha aduruuharügübaña múarugu, hama ha áhamahabaña.20Lárigiñe aba ladügün Noé aban latarü lun Bungiu, aba lanügün aban hádangiñe kada hawuyeri animaalugu hama dunuru geigúaditiña aba láguduniña keisi adagaragüdüni gudawarügüti lun Bungiu.21Dan le lirimichunbalin Bungiu lubuidun íhemeni ligía aba lariñagun: «Míñaragundigianaali múa luagu hadurun gürigia, ladüga lúmagiñe hañüraü gürigia luágugubeirügü wuribani lasaminara. Magumuchaguagüdün naaña giñe sun animaalugu kei nadügüni guentó.22“Anihaguarügaali ligíame ubóu, ñeinbei ábunaguni luma alubahani; ñeinbei lárouga luma lidiliga, ñeinbei luribouga luma lubachouga, ñeinbei giñe wéyuagu luma áriebu” ».Bible Society of Honduras