Áfuriduni22
Lúrudu burí lun laransehóuniwa damichi
1Anhein íweruha aban gürigia aban bágasu o aban lan mudún, aba láfaruni o laluguruni, gasu lafayeirun seingü bágasu luagu bágasu, gádürü mudún luagu mudún.2Anhein árügüdüwa aban híweruti lidan oura líweruhaña lan, aba libigúniwa, aba lounwen, manügǘnbei lounwen kei áfarahani.3Gama lumoun anhein harugaali lubéi, lanügǘba lounwen kei áfarahani.Le íweruhati, gasu lafayeiruni lebegi le líweruhabei, gama lumoun anhein maseinsun lubéi, lalugurúba lun lafayeirúniwa le líweruhabei.4Anhein adarirúa animaalu le líweruhabei luma wínwanñu, gasu lafayeihan biama luagu aban, gayaraati bágasu lan o burigü lan o mudún lan.5Ánhaña lígiragüda aban gürigia lilügüniña lun heigin sagadi áraabu o le lan ñein lumuti lídibu beibei, aba houdin lilügüniña eiga licharirugu amu, gasu lafayeiruni damichi le hadügübei lilügüniña lau lubuidun-agei katei le licharirugubei.6Anhein águdaha aban gürigia, aba léibaahan watu gemeti, aba lágudun türigu le óundarawaguaali o le lan lúnhali lalubahóun, o sun lan bunaguaü, gasu lafayeiruni le águdahabei sun damichi le ladügübei lau lágudahan.7Anhein areida aban gürigia seinsu o katei lan le gebegiti luma amu gürigia, aba líweruhoun luéi gürigia ligía lúbiñegiñe, lafayeihaba le íweruhabalin biama luagu aban, anhein adarirúa;8gama lumoun anhein madarirún, lunti lanügün tabureme muna ligibugiñoun Bungiu, lun larihín anhein mama lubéi ligía íweruhabalin le areidúbei luma.9Anhein eredera aban gürigia lau aban bágasu, o burigü, o mudún, o daüguaü o furumiñeguarügü katei le eferidiruti, aba lariñagun aban luagu lani lan; lanügǘba hakesin bián gürigia hagía ligibugiñoun Bungiu, le gadurunbei, lafayeihaba biama luagu aban lun le aban.10Anhein areida aban gürigia aban bágasu, o aban lan burigü, o aban lan mudún o furumiñeguarügü animaalu luma amu, aba lounwen animaalu ligía, labuleseirun, o líweruhoun úouga arihiti,11lunti láfiñurun gürigia ligía lun le aban lidan liri Bungiu, luagu mama lan líweruhan le lareidubei le aban luma. Ábame lafiñerun labureme animaalu lun, ábame mafayeihan lan.12Gama lumoun anhein aríagu liña lubéi lun líweruhoun animaalu ligía, gasu lafayeiruni lun labureme.13Anhein láfarun lubéi aban animaalu áraabuna animaalu ligía, lun mafayeihan lan ni kata, gasu larufuduni animaalu hilaali ligía.14Anhein afuredeiha aban gürigia aban animaalu luma amu, aba lounwen o labuleseirun animaalu ligía úouga labureme ñein, gasu lafayeiruni le afuredeihabalin animaalu damichi;15gama lumoun anhein ñeinñein lubéi labureme, mafayeihanbei le afuredeihabei ni kata. Anhein buga akilahóuarügü lubéi animaalu ligía, lebegirügüba lakilahóun afayeirúa.
Lúrudu luáguti lubuidun usa luma relihión
16Anhoun leyeeda aban wügüri aban würi mámarigiru to madaraduntu, aba lagamaridunu, gasu lafayeihan, maríei ligíame tuma.17Anhein maha túguchi irahü tuguya líchugunu lun, lun lúmarime, gasu lafayeiruni tebegi irahü mámarigiru lun túguchi.18Mígiraba lun tabagaridun ni aban gabiñarahatu.19Le agamariduti animaalu, lasiadirúba lun lounwen20Le adagaragüdüti houn amu búngiugu, lubaragiñe hamuga lun lan Bungiu ladagaragüda, lasiadirúba lun lounwen.21Móusera humá gürigia terencha wuriba, ladüga terencha meha giñe huguya Ehiptu.22Mamudiragua humaña würiña ha hilaguaaña hámarigu, ni gürigia ha méteñuhaña,23ladüga ánhaña hóusera wuriba, hamuriahame numa lun níderaguniña, níderagubaña,24ábame niabin lau óunwenbu igañi, ábame nagidaruni hibagari lau anarimeni. Ábameti herederun húmarigu mámariga, rédeime hisaanigu méteñuga.25Ánhabu afuredera seinsu lun aban gürigia gudemeti hádangiñe numutuniña, le aganóuti buma, magaburidabá luma kei afuredeihatiña lun hagañeirun, maguburahabá giñe lanwoun.26Anhoun líchiga gürigia ligía ladaüragun bun lun buma tan darí lafayeihan, águyugüdaboun lun dan le lálüdün weyu,27ladüga tuguyarügüñoun luma lun ladouragun laugua luéi lidiliga, anhoun michu ban lun, kábagia au ladouragua laugua? Ánheinti amuriaha ídemuei numa, níderagubei, ladüga gudemehabutina.28Manabaguabéi Bungiu míñaragunbeime le agumadihabei bageira.29Madarasaralá banügün idewesei nun lídangiñe sun balubahan luma tídangiñe buniñe diwéin.Bíchugubei furumiñeti bisaani nun,30kéigubeirügü giñe furumiñetiña hemeilihan bilügüniña bágasu, hama bilügüniña mudún. Gayaraati herederun sedü weyu tuma háguchu, gama lumoun liwidün weyu, bíchuguniña nun.31Lunti gürigia lan deregeguatiña houngua huguya nun. Meiga humá animaalu ha háfarun animaalugu gáñitiña áraabu, ru humaña houn ounli.
Bible Society of Honduras