Áfuriduni21
Lúrudu hawaguti idamuni
1Anihán burí lúrudu le lunbei bíchuguni houn Ísüraelina:2Ánhabu agañeiha aban idamuni Ebüréu, luadigimariba bun sisi irumu, lídanme lisedün irumu, ábame bígiragüdüni, mafayeihanga ligía.3Anhein lábugua lubéi lachülüra, lábuguaba giñe lidin, anhein buga gámari lubéi, tídiba lúmari luma;4anhein labureme lubéi íchugubei würi lun, aba tagaraüdün lau, terederuba würi hau sun tirahüñü lun labureme, ábame lidin idamuni lábugua.5Gama lumoun anhein mabusenrun idamuni lidin ladüga tínsiñe lúmari hau lirahüñü luma labureme lun,6lunti lanügüni labureme ligibugiñoun Bungiu, ábame layarafadagüdüni lun bena, ábame láfuduruni larigei. Ítara luba lidamun lan lun sun dan.7Anhoun lalugura mutu liráü lun idamunime, mígirawagüdünboun kei hígirawagüdüniwa idamuni ha wügüriña.8Anhein mabusenrun tabureme lanügünu lúmarime ladüga timisiñe lun, gasu lánharun lun lafayeirúniwa luagu táfuridun; gama lumoun íbini mínsiñe tan lun, siñabei lalugurunu lun ni aban terencha.9Anhoun líchiga lun liráü lun lúmarime, gasu lóuserunu kei liráü.10Anhein anüga ábanya lúmari, madüraagun lubéi léñaha líchugubei tun to furumiñetu, ni teigin, ni tadaüragun, ni tiricha kei úmari.11Gama lumoun anhein míchugun lan ǘrüwa katei le tun, gayaraabei tidin mafayeihanga luagu tígirawagüdün.Lúrudu luáguti áfarahani
12Le áchuaguti aban gürigia, aba lounwen le áchuawagubei, lasiadirúba le áchuahabei lun lounwen.13Gama lumoun anhein mama lubéi lau labusenrun ladügei, nariñagubei lun halíaba lan gayara lan lidin aramudagua.14Gama lumoun le agañiduti luma gürigia líledi aba láfaruni hilagubei, báluahabei, íbini lidin aramudagua luagu nani latarü, ábame basiadiruni lun lounwen.15Le áchuaguti lúguchu o lúguchi lasiadirúba lun lounwen.16Le íweruhati aban gürigia gayaraati alugura laali lan le líweruhabei o aniheingua lan lábugiñe lubafu, lasiadirúba le íweruhabei lun lounwen.17Le anabuti lúguchi o lúguchu, lasiadirúba lun lounwen.18Anhein labuleseira aban gürigia lágani lau dübü o tau lan agufudein lidan hageindagun, masiadirúnbei le abuleseihabei anhein mounwen le abuleseirúbei. Gama lumoun anhein larounragüda gabanarugu,19lárigiñe aba lásaaragüdün ani aba lagumeserun éibuga lau badun, gasu lafayeiruni lárani luma dan le leferidirubei lun.20Le agayuahati luagu lidamun lau wewe, aba láfaruni hilagubei, lafayeihaba luagu láfarahan.21Gama lumoun anhein abagarida aban weyu o sügǘ lau mafayeihanhalime luagu, ladüga lani labureme idamuni ligía.22Ánhaña ageindagua bián wügüriña hámagua, aba habuleseiragüdün aban würi dageinatu, aba tagüriaagun, gama lumoun mayarafadunga lun tounwen, le gadurunbei, lafayeirubei le lamuriahan túmari würi tuguya, según le hariñagun aguseragüdütiña.23Gama lumoun anhoun asandira würi tuguya yarafa lun tounwen, lafayeihóuba ibagari luagu ibagari,24agu luagu agu, ari luagu ari, úhabu luagu úhabu, ugudi luagu ugudi,25churati luagu churati, biti luagu biti, buleseiti luagu buleseiti.26Le agayuahati luagu lagu lidamun, aba labouchuni lagu, gasu lígiragüdüni leweñegua labouchuni lagu.27Anhein láhalacha aban lari, gasu lígiragüdüni leweñegua lari.Lúrudu burí luáguti buleseiti
28Anhein labugucha aban bulu bágasu aban wügüri o aban lan yebe würi, aba lounwen gürigia ligía, lafarúba bágasu ligía lau dübü ani meiginwabei lǘgürügü, gama lumoun madügǘnwabei ni kata lau labureme.29Ánheinti héchuñahaali lubéi bulu bágasu ligía abuguha, aba láfarun aban gürigia, lafarúba bágasu ligía lau dübü. Ánheinti subudi lubalin labureme luagu hechu lan bágasu ligía abuguha, ani magüürün lumuti, lasiadirúba giñe lun lounwen.30Anhein mafarún, lun aguburahóuarügü lan, gasu lafayeiruni le aguburahóubei, leweñegua libagari.31Ligiaméme lúrudubei anhein wügüri lubéi irahü labuguchubei bágasu o würi tan irahü.32Anhein labugucha aban bágasu aban idamuni, lafarúba bágasu ligía lau dübü hilagubei, ábame lichugún darandi murusun pülata lun labureme idamuni keisi fáyeiti.33Anhein achiga aban gürigia aban fusu, lígirei madaüga, aba léiguadun aban bágasu o aban lan burigü lidoun fusu ligía,34gasu lafayeiruni labureme fusu labureme animaalu, ábame lerederun labureme fusu lau animaalu hilaali.35Anhein labugucha lilügün aban gürigia bágasu lilügün amu, aba láfaruni hilagubei, lunti lalugurúniwa bágasu le áfarahabei, ábame lafanreinhóun lebegi, luma lǘgürügü bágasu le abuguchúbei, lamidan lun kada aban.36Gama lumoun anhein subudiwa lubéi luagu léchunñaha lan bágasu ligía abuguha, ani meberesenti labureme, gasu lichugún aban bágasu lun labureme le abuguchúbei, leweñegua lilügün, ábame lerederun bágasu le óunwebei lun.Bible Society of Honduras