Ibraayiib9

1Oontꞌa ugalad whankaani ibaadaati gaanuun ibari, tubuuti kehii mugaddas mhiin han ibari.2Tukheema tꞌatam. Tugurfa tꞌawwaliinaatiib lambaati mꞌabakaawwa, tutarabeesaawwa Ukwaasanaay dehaay ittiyeewiin yhadhiiwwa iifiin.3Tusitaara tumalyaati harꞌii gaw Oomhiin Winneet Umugaddas ittiyoodi iifi.4Tehooyteeb dimꞌaraayt firꞌati mhiin libaani kwaraarsiti jillaaywa ugaladi sanduukwa kassaah dimꞌaraay assamaaba. Mannaab tiibriit dimꞌaraayt karoora hooy tiifi, Haaruuniit tukwoolay kadheet tiibri, aree billi awi ugalad kehii kataab iiktiyi iifiin.5Usanduuki mhakwal Umatuuni karoobiim iifiina, aree yꞌambiraahna usanduuki kehii barara. Been oomhiin idanuub hooy afoomiin. Laakiin oontꞌa teen teena kasteeh ifassarti kaꞌadgirna.
6Naatka oontꞌaaneet takwaakw tiiktiyihoob, ifagiiriya oogaw barraab iifiib diimaab iidꞌaneeb ishagaayoohna shagaamiini jillaay shuumiyaan.7Laakiin ufagiiri uuwin oogaw tehooyteeb shuumiya. Aree baruuh beet toona whawliib gaal door oobhaat saki, aree booy geebooh itfiyik, beentooy baruuh ugarooyooh jillaaywa uudehay gamaamtii kwaasaab iiktiineeb idanuubi jillaaywa karramami.8Aashuuk Imugaddasa tukheema tꞌawwaliit masi teefiyeeb ookiik, Uumhiin Winneet Umugaddas nagaal biikaayeet toona daayiib rhisiin.9Tuun tuuna oontꞌaaneeb udoori sooti ikati. Uumiyaawwa tikaraama tꞌattiyeewiyaatwa oodehay iyꞌibidnaayi ginꞌa isinhisneet toona adgiraab kiikeen.10Baraah tamtiibwa gwꞌatiibwa oobhaat ikeeniit, gwidaat manasabaati shagwadh ikeen. Aan baraah barraab ikati gaanuun gayi nidaam ikatiyeeb ookiik daayiin.
11Umasiih suur akay tooy iifiint tidaayiinayti win fagiiriit eeyanihoob, tukheema toowinwa winneet timmiimaatwa dehay dꞌiraab biikaayeenaati geebii giigiya. Beet tuuna aree toon tuduniyaatii gaat kitti.12Baruuh yaati booywa lagaayi booyiiwwa shuumaab kiiki. Laakiin baruuh Oomhiin Winneet Umugaddas baruuh gaalhoob ooknaay booyii shuumiya, baruuh umidhhan udaayim dehoon imri.13Teeyaawwa iyooyi booywa, lagaay nꞌeetihaashwa nhas baakay oodehayi kehii safamiya. Aflaay baraah tisaradtee nhas iiktiin.14Tuun tuuna sidik tikayihoob, Umasiihiib uubooy kak gwidakaana iitkwikw indi! Baruuh Eeshuuk idaayimaayee ugarooyooh ookna timmiimaat karaama Ukwaasanaay dehaay ifrꞌa. Bariiyuuh uubooy hineeb iginꞌa tooyat istoobiint tiwaraatee isinhiis. Aflaay hinin Ukwaasana udhhaniib shagaamnayeet toona adgirnay.
15Oon usabbii, Umasiih ugalad ugayiinaay bitkeemanaab ikati. Baliin iwaliikameen tikwasa tidaayima suur waadiyaamaat imaar iyadna. Oontꞌa ugalad whankaaneenaay whii tikeet tumaagtii bareeh isfadiigi jillaay baruuh karaamaateeb itoodaar.
16Gaal yaaytiit wasiiyeet inꞌiishihoob, beet toona idꞌiib uutak ayaab ikatiyeet toona ibakii akkadtini.17Uutak dhhaniib ikatiyihoob tuwasiiyi takweet kitbari, laakiin baruuh iyaayihoob takweet tibari.18Tuun tuuna aree ugalad whankaani booy anu takweeteeb daamaab biikaayeet toona rhistini.19Muusa oodehay kasseeh whaggiit tiwasi kasteeh sooyanihoob, baruuh lagaay booy yami geeb hiddaab iyhi, aree adarooya hamoowwa hindi lꞌiidwa iyhaayt, malya baruuh whaggi kitaabwa kasseeh oodehayi kehiiwwa safiya.20Baruuh “Uun baruuh ugaladi booyu, Ukwaasana barooh tisnaakiirneet toon sooyi hookna.” idi.21Oontꞌaaneet, tukheemaawwa batiiteeh timanasabaateeb daameent teena kasteehwa, baruuh oobooy kehii safiya.22Whag aree naatka booyii ateharamtiniyeet toona yharriiw, aree oobooy baafiif afoob kadaaya.
23Baliit taana tibreeti gadami kitꞌani ibariin beet tehayꞌaatii eenhasiineet toonaati. Laakiin taana tibreeteeb eefeent taakna han daayikaat karaama yhariwna.24Umasiih Mugaddas Mhiin oodehayi ayee shagaamamaab shuumaab kiiki, been uumhiin aree oomhiin usidkiinaay kitꞌani ikati. Baruuh teebri teekna shuumiya, aree oontꞌa hini jillaay Ukwaasanaay suurii lawiini.25Iyahuudi fagiiri uuwin Oomhiin Winneet Umugaddas hawilka reewi booyii eebi. Laakiin Umasiih gwida doora ugarooyooh iniiwi jillaay kiibi.26Malya Umasiih tuduniya akhligamtaneekka gwida doora lhamiiniyeet toonaati. Oontꞌa laakiin udamaani wꞌagiyaay gaalhoob lawiya, ugarooyooh karaamaat kwaastiit toomaag giigsiiniyi jillaay lawiya.27Wꞌaadami gaalhoob ibakii iyaayi, aree beenaay harꞌii haakamamiini.28Umasiih han gwida dehayiit maagnaay gaalhoob giigsiiniyi jillaay karaamaat iki. Baruuh malya door lawi indi, maagnaayt haay giigsiiniyee dehaay kiiki. Laakiin baliib barooh yhagit midhhan dehaay haay yꞌiiniyi jillaay lawi indi.

The Seed Company

https://app.library.bible/content/752fe0f7dfba7b5f