Ibraayiib10
1Whag teena tidaayiit harꞌook yꞌeent tꞌiiteeb oobhaat ikati nuun bateeh teekna kiikeen. Oon usabbii aree, whawil hawli harꞌii itramiidt, tikaraama taakna baliib Ukwaasanaayt ibaadaatee dehaay yꞌeen timmiimaab kiikwaasna.2Beet tuuna tiiktiyeek, bareeh uumiyaaw hooy ingideet toona kitti han? Uudehay iyꞌabid kassaah gaalhoob nhas iiktiina, aree idanuubeesoohna gwabab kahissiyaan.3Laakiin baliit tikaraama hawilka idanuub shꞌaseen.4Eeshꞌaawwa tiyaati booywa idanuub giigseeneet toona kaꞌadgiriyaan.5Shaawti Umasiih tuduniya eeyanihoob, baruuh:“Baruuk tikaraamaawwa oomiyaawwa kitehariwa,laakiin anii dehaay garoob tisoomira.6Baruuk atoolwaat karaamaawwa, idanuubeet karaamaawwahaay radaayaab kitta.7Malya ani ‘Ani tooy eefi, tuun ooktaabiib aniib kataabtuyaa Ukwaasanaay, baruuk harriiweet toona sakaniyi jillaay ani yꞌaabi.’ adi.” idi.8Baruuh hankaab, “Tikaraamaawwa uumiyaawwa, atoolwaat karaamaawwa idanuubeet karaamaawwa baruuk hariwaab kitta, bareeh han haay radaayaab kitta.” idi. (Whag laakiin beet tuuna daamtiyeet yhiriw).9Malya baruuh, “Ani tooy eefi, baruuk harriiweet toona sakaniyi jillaay ani yꞌaabi.” idi. Baruuh toona tusuuriit daasiya idꞌiit tumalya itkwikw.10Aree been wharawaay, Yasuuꞌaab Umasiihiib ugarooyt karaamaati geebii hinin mugaddasaab niki.11Bꞌeebka ifagiiriya kassaah udiiniit waajibtoohna itakwikwna. Aree doorka doorka baraah baliit tikaraama teekna karramamiina, laakiin taan tikaraama idanuubi giigsiti kaꞌadgiriyaan.12Laakiin Umasiih ugarooyooh ookna diimaab idanuubeet karaama ikwaas. Baruuh Ukwaasanaay maygwadii dehaay nꞌati isꞌa.13Been udoorii aree baruuh yꞌashooyaah bariiyeeh iragadaayi whii daameeneet toona hangiit.14Baruuh gat karaamaatee aree mugaddasaab ikeen baliib diimaab timmiimaab ikwaas.15Aashuuk Imugaddasa han toon toona dehoon ibadehana. Baruuh hankaab:16“Uun baruuh ugalad ani bareeyooh geeb iikwasi andiyeeb ikatibeen udoori harꞌii, indi Wꞌankwana.Aniib whag bareeyeehna iginꞌaayeeb daasi andi,aree bareeyeehna igirmaayi kehii iiktib andi.” indi.17Malya baruuh masi:“Idanuubeehwa yꞌamag shagaayeehwashaawti shꞌi kaadi.” indi.18Aree baliit taana afoomeenihoob, shaawti danuubeet karaama daayi kiidiin.19Aflaay isanaayaan, Yasuuꞌiib ubooyii Oomhiin Winneet Umugaddas ishuumtiib akra ginꞌa hooy nibariyeek,20baruuh gayi salalwa midhhani salalwa tusitaaraati geebii dehoon ingal, been baruuh aree, Yasuuꞌiib ugaru ikati.21Ukwaasanaay ugawiib win fagiiri nibari.22Aflaay nhas ginꞌiiwwa sidki iimaaniiwwa Ukwaasana beeti nidawleet toonaati. Tumaagtii nhas ikatiin ginꞌaayeewwa nhas yamee shagwaadh garooywa Ukwaasana beeti nidawleet toonaati.23Ukwaasana uwaadiyaayooh kaleewiiniyeet toona aamannay akay, hinin nitfadhiidheeb isꞌaya daayiib nꞌabkeet toonaati.24Aree taktak nimshabiibeet toonaatu, taktak shamtiit ooreerwa tudaayiinaayti dꞌuuywa rhisnayeet toonaati.25Hiddaab nimmarriyeet toona ishna baadꞌiina, gwadi bak sakeena, laakiin taktak nisꞌakiireet toonaatu, aree Wꞌankwanaayt tuuyin han tidiwileet toona rhiteena.26Usidkiit kanaant nimriyi harꞌii, masi kanee danuub nidꞌeek, idanuubi jillaay karaamaat daayi kiidiin.27Laakiin whukwimiit tooyinti sꞌayaamtiiwwa Ukwaasanaay yꞌashu tami tindiit toonꞌi tꞌakraanaati mirkwaaywa toobhaat tikati.28Muusaay whag iribka rhamaat anu iiya. Beet tuuna aree maloob tari mhay badehi ibidehanihoob tiikti.29Aflaay baliin Ukwaasanaay Wꞌoor abaabeen kak gwidakaana winneet jasaameeneeb hiisteena? Ukwaasanaay ugalad bareeh tumaagtii isinhas aaw isirhiis? Eeshuuk tinꞌimaateeb aaw neewiini? Baraah ujasa wꞌastehaleeneeb kak amaagkaab iikti indiyeeb uginꞌookna hooy dꞌiina!30Bak diyaab ikatiib hinin nikteen, baruuh “Ani illaati andi, hooy itkwis andi.” diyaabi. Baruuh masi, “Wꞌankwana udehayooh haakami indi.” diyaabi.31Ukwaasana udhhaniinaay yꞌayeeb idhibti winneet mirkwaay tibariina ikati.32Yasuuꞌaab hooy tikanneeb baliib eebꞌi yhankaaneeb shꞌaana, eembꞌi igwirha hooy timtaraamneeb, tilhanay hooy lhamtaaneeb shꞌaana.33Door gaal oodehayi suurii neewamtaana aree amaag titweeraayna. Door weer baliib bak itweeraayni geeb daraag daraagii tingadna.34Baliib usijniib iifiinnee dehaay nꞌakwmanaataana, igadhꞌeeyook maraamamti afirhaa agbiltaana, baraakna iknaayaakna daayikaabwa daayimwa miraay tibreeteeb tiibriineet toona tiktiinnayt, agbiltaana.35Aflaay oon Wꞌankwanaay wꞌaamanti fidnaab baagiidna. Baruuh win miyaaw haay yꞌi indiyeet toona shꞌaana.36Daayi sabir oontꞌa tehariwna, malya aree Ukwaasana harriiweet toonaati dꞌuuy tisoorariimna. Aflaay kastooh baruuh waadiyaayaab ikatiyeet iyaay tiyadna.37Uuktaab indi,“Oontꞌa shalikt middaatiib, been uyꞌiiniib yꞌi indi aree iidleel kiidi.38Laakiin aniib uushbu uungaal, wꞌiimaanii iidhhan indi.Aree bareeh gaal han hooy itꞌagiireek,ani bariiyooh geeb afirhi kaadi.” indi.39Laakiin hinin agartiit kwidheen dehay kinki, laakiin aamaniit eedhhaniin nikati.
The Seed Company