YESAYA39
Xezekiya Ɔfɔ Makpabo Ma Lobɔrɛ I Babilonia
1I ɔwi wɔmɔ ame ne Merodax-Baladan, wɔ nɖe Babilon igara Baladan, ɔbi ɔsese Xezekiya siko dzɛ ɔtsɛrɛ ku karatã alasɔ ɔnɔ ɔ̃ ɔnyɛ gu isarɛ.2Xezekiya ɔfɔ mafɔ magbe ku isoɣɔ fiɛ ɔte ma irabiara nɛ nse i ɔ̃ ara kakɔlakɔ̃ - sikãfudza, sikãrɛtɛa, akɔrɔ̃kɔrɔ̃ra, nnɔĩ sɛɛ, ɔ̃ akpakpɛ̃ra ɔɖuɖu gu irabiara nɛ nse i ɔ̃ ara kakɔlakɔ̃. Kuira iikuti i igaraiyo ɣee ɔ̃ sigarakaɖekɔ̃ ɔɖuɖu nɛ i Xezekiya iite ma.3Ne kanyaɖidze Yesaya ɔkɛlɛ Igara Xezekiya kɔrɛ ɔsɛ ɔ̃akarɛ wũ sɔ, "Be i marɛrɛ̃ mamɔ ɔɣɛ fiɛ lɛ mabɔrɛ?"Ne Xezekiya ɔtã mmuai sɔ, "Mabɔrɛ i karɔ̃ dzoroa iso, Babilon mabɔrɛ."4Ne kanyaɖidze ɔkarɛ sɔ, "Be manya i fɔ igaraiyo?"
Xezekiya ɔtã mmuai sɔ, "Manya irabiara i wũ igaraiyo. Kuira iikuti i wũ karana ame gɔ loite ma."5Kere ne Yesaya ɔɣere Xezekiya sɔ, "Nɔ nnɛ i Bosate Ɔlesate to ɔɣɛ:6Ɔwi to ɔba kokooko gɔ irabiara nɛ i fɔ igaraiyo gu nwa ɔɖuɖu i fɔ mawa ɔkɔla iba iabo nɔme ne, maasore wã makɛlɛgu Babilon. Bosate sɔ maibakuti kuira masɛ.7Fiɛ fɔ mawa mawɛ̃, fɔ mɔmɔ ima gu sosina ma maɣe matã-ɔ ne, maasore ma makɛlɛgu fiɛ maagɔ̃ ma maakpese maɖabo i igaraiyo i Babilon igara kɔrɛ."8Ne Xezekiya ɔtã Yesaya mmuai sɔ, "Bosate itɔ̃me nɛ aɣɛ lɛ." Alasɔ Xezekiya ɔɣere so sɔ, "Isobuɛ gu kaɣɔ to aawe ku wũ i ɔ̃ agbanayi ame."
The Seed Company