YESAYA38
Xezekiya Ɔnyɛ Gu Isarɛ
1I ɔwi wɔmɔ ame ne, Xezekiya ɔmɔɛ̃ ɔnyɛ gɔ ɔwe i kukpi ku ngbã ndɛ̃. Ɣaa kanyaɖidze Yesaya, Amoz ɔbi ɔkɛlɛ Xezekiya kɔrɛ ɔɣere wũ sɔ, "Bosate sɔ loɣere-ɔ sɔ: Ledza fɔ iyo sɛ alasɔ ato aakpi, aibasarɛ."2Ne Xezekiya ɔfirikira katɔ̃ ɔsɔ̃ ibere ɔkparamakayi ɔɣere Bosate sɔ,3"O Bosate, nyigi kumɛgɔ losɛgu-ɔ i ɔnukuare ame, fiɛ ku wũ ɔtu ɔɖuɖu isu itã-ɔ ne, lobara nnɛ nlɛ i fɔ anɔ." Ne Xezekiya ɔpɛ kaku ɔbiɛ boroboro gbaã ne.4Bosate ɔledza Yesaya ika iɖegu sɔ:5"Kpese aaɣere Xezekiya sɔ, 'Bosate wɔ nɖe fɔ ɔse David Ɣaa sɔ: Loɔnɔ fɔ kayiikparama lonya fɔ nnɔmɛ ne ɔso loasia-ɔ akɔ aweo-aru i fɔ agbanayi iso.6Fiɛ loaɖi-ɔ gu ɔmagɛ̃siare wɔgbe lobɔrɛgu i Asiria igara nrɔɔ̃ ame. Loakpɛ̃ i ɔmagɛ̃siare wɔgbe iti.7" 'Ikparĩ nɛ ɔto ɔtã-ɔ sɔ ɔ̃abara i nnɛ ɔɣɛ iso nɖe sɔ:8Loatã kuɣɛ̃ kusɔ ɔkpese kama sitĩ iweo gɔ kuɔya i Axaz sitĩ iso.' " Ne ɔso kuɣɛ̃ kusɔ ɔkpese kama sitĩ iweo dzɛ kuɔso.9Nnɛ i Yuda igara Xezekiya ɔtsɛrɛ ɔsɛ gɔ ɔnyɛ fiɛ ɔsarɛ i ngbe ne:10Loɣɛ sɔ, "I wũ siporoporoi ame ne,ikote sɔ loakɛlɛ ikpibiɔloyura wũ agbanayi tsɔra?"11Loɣɛ sɔ, "Loisibanya Bosate,Bosate i magbanadze karɔ̃ isoloisibanya maturi awuneɣee loisibawegu mma mpia i kayiiso.12Lɛ masɛrɛnyɔisose ikpayo ne,mabiɛ wũ iyo mafɔ ne i wũ kɔrɛ.Lɛ sikatiwedze ne, loɔkarĩ wũ ngbã,ɔ̃ɔyura me ɔɖi i sikati kawekɔ̃;kasɛ̃ i kakɔme ne ato abɔ wũ ngbã kawirikɔ̃.13Lona ɔtu loya gbɔgbɔɔgbɔ ɔɖesɛrã,ɣɛɛ lɛ dzata ne, ɔbibiɛ wũ akui ɔɖuɖu;kasɛ̃ i kakɔme ne, ato abɔ wũ ngbã i kawirikɔ̃.14Lofafã lɛ kadzarakpakpai ɣee kakpakpaĩ,lobiɛ lɛ ilɔpɔ nɛ nsi kaku.Loɔnyɔ kato anɔ ɔɔfɛ̃ me.Loto lomararã so, O Bosate, ba fɔ me!"15Ɣɛɛ be loawo ɔɣɛ?Ɔ̃ɔɖe me ika fiɛ ɔ̃ mɔmɔ loɔbara nnɛgbe.Loasɛ i karɔ̃ibɔso ame i wũ akɔ ɔɖuɖuala wũ ɔkala ibo gu ibɛbɛrɛ nɛgbe ɔso.16Sate ara wagbe igbã iso i maturi si ngbã ne;fiɛ wũ siwarã ana sɛ sina ngbã i wã ame.Asa me atara aɣedzaatã losi ngbã.17Iɖe me kusia gbaãsɔ loki i ibo gu ibɛbɛrɛ nɛgbe igbã ame.I fɔ kuɖɔɛ ame ne, aɖi meabɔrɛgu i ikpibiɔ ame;asu wũ akpi ɔɖuɖu asɛi fɔ kama.18Alasɔ ikpibiɔ iibawo-ɔ ɔle,kukpi iibawo kuka ɔka ɔle-ɔ;mma nsɛ makɛlɛ ikpibiɔ ameiibawo ɔri ɔnyɔ ɔtã fɔ ɔnukuareiɖe.19Magbanadze, magbanadze nsɛ male-ɔ,lɛ loto lobara nɔme;mase aaɖe ma mabi ikai fɔ ɔnukuareiɖe iso.20Bosate to ɔ̃aɖi mefiɛ boaka aka ku kuka siwɛ̃ arabo agbanayi ɔɖuɖui Bosate isɔrɛyo ame.21Yesaya ɔɔɣere ma sɔ, "Mikɔtɛ aboi misia i iramua iso ne ɔto ɔ̃asarɛ."22Xezekiya ɔkarɛ ɔfegu sɔ, "Be loaɖe ikparĩ sɔ loto loata losɛ Bosate isɔrɛyo ame?"The Seed Company