Ис36
1Езекий кугыжан латнылымше ий вуйлатымыж годым Ассирий кугыжа Сеннахирим Иуда тукымын чоткыдемдыме чыла олаж ӱмбак керылтын да нуным сеҥен налын.2Ассирий кугыжа Лахис гыч рабсакым кугу сарзывий дене Езекий кугыжа дек Иерусалимыш колтен. Тудыжо Межйӧрышӧ пасуш наҥгайыше корно воктенысе Кӱшыл пӱяш вӱдым колтышо канал воктелан шогалын.3Тудын дек полат вуйлатыше Елиаким, Хелкий эрге, возкалыше Севна да курымсерышым возышо Иоах, Асаф эрге, лектыныт.4Рабсак нунылан каласен: «Езекийлан ойлыза: ”Тыге кугу кугыжа, Ассирий кугыжа, ойла: тый молан инанен илет?5Тый яра мутым веле ойлыштат. А сарлан шонен моштымаш ден вий-куат кӱлыт. Мыйын ваштарешем шогалын, кӧлан инанет?6Теве тый Египетлан, тиде тодылалтше омыж пондылан, эҥерташ шонет. Кӧ тудлан эҥерта, тиде вондо тудын кидышкыже керылт пура да шӱтен лектеш. Теве мо лиеш нунын дене, кӧмыт фараонлан, Египет кугыжалан, инанат.7Але тый мыланем ’Ме шке Господь Юмыланна инанена’ манат? Но Езекий огыл мо Тудын кӱкшакаласе кумалме вер ден жертвенникше-влакым пытарен да Иуда ден Иерусалимлан ’Иерусалимыште улшо тиде жертвенник ончылно гына кумалза’ манын ойлен?8Ассирий кугыжа озам дене сделкым ыште: мый тылат кок тӱжем имньым пуэн кертам, но тый нунылан имнешке-влакым муын кертат мо?9Кузе тый озамын кеч эн изи вуйлатышыжым чактарен кертат? Египетын орва ден имньыжлан инанет?!10Господьын кумылжо почеш огыл мо мый тиде кундемым пустаҥдаш толынам? Тудо мылам каласен: ’Тиде мландыш кай да тудым пустаҥде!’”»11Тунам Елиаким, Севна да Иоах рабсаклан каласеныт: «Мемнан дене, шке тарзет-влак дене, арамей йылме дене кутыро – ме умылена. Пырдыж ӱмбалне улшо калык ончылно мыланна еврей йылме дене ит ойло».12Рабсак нунылан вашештен: «Мыйын озам нине мут-влакым тыйын озатлан да тылат веле каласаш колтен шонет мо? Уке, пырдыж ӱмбалне шинчыше еҥ-влакланат! Нуно тендан дене пырля шке шурыштым кочкаш да шке шондыштым йӱаш тӱҥалыт!»13Тунам рабсак шогалын да кугу йӱкын еврейла каласен: «Кугу Ассирий кугыжан мутшым колыштса!14Кугыжа тыге ойла: тек Езекий тендам огеш ондалкале. Тудо тендам утарен ок керт.15Тек Езекий ”Мемнам Господь утара, тиде ола Ассирий кугыжан кидышкыже пуымо ок лий” манмыж дене шӱмыштыда Господьлан инанымашым огеш шочыкто.16Ида колышт Езекийым. Ассирий кугыжа тыге ойла: мый денем тыныс ойпидышым ыштыза да мый декем лекса. Тунам те кажныже шке виноград ден смоква пушеҥгыда гыч саскам кочкыда да шке тавыда гыч вӱдым йӱыда.17А вара мый толам да тендан гаяк вес мландыш – шурно ден йошкар аракан, кинде ден виноград аҥан мландыш – тендам наҥгаем.18Тек Езекий ”мемнам Господь утара” манмыж дене тендам ок ондалкале. Иктаж вес калыкын юмыжо Ассирий кугыжан кидше деч шке мландыжым утарен мо?19Кушто Емаф ден Арпадын юмыжо-влак? Кушто Сепарваимын юмыжо-влак? Нуно мыйын кидем деч Самарийым утареныт мо?20Нине мландын юмышт кокла гыч кӧ шке мландыжым мыйын кидем деч утарен? Господь мыйын кидем деч Иерусалимым утара шонеда мо?»21Калык шып шинчен, ик мутымат пелештен огыл. Кугыжа тыге кӱштен каласен улмаш – «тудлан ида вашеште».22Полат вуйлатыше Елиаким – Хелкий эрге, возкалыше Севна да курымсерышым возышо Иоах – Асаф эрге, Езекий деке кушкедме вургеман толыныт да тудлан рабсакын чыла шомакшым каласеныт.
Institute for Bible Translation, Finland