Đọc 1 SAMUEL 1

1 SAMUEL1

Samuel Puinaw te Thyaasahnaw

¹Efraim muaram kya Ramathaim-zofim khua khe ccungccapaw lu kheit um zah a min tuh Elkanah acikuh; aning tuh Jeroham ccapaw, Jeroham tuh Elihu ccapaw, Elihu tuh Tohu ccapaw, Tohu tuh Efraim phinpaw Zuf ccapaw nynh thua.²Elkanah tuh zu zuning a hoi; lu kheit min tuh Hannah cikuh zah, ccangpaw lu kheit min tuh Peninnah acikuh. Peninnah tuh ccaaw a hoi, thuasalama Hannah tuh ccaaw hoi khyh.

³Elkanah tuh vaaw Bawipaw kha beik khylan te silaw khylan a umnaw khua kyate Shiloh khua lang kum takyh a cceih. Eli ccapaw hae lu ning Hofni te Finehas tuh Shiloh khua kyaze Bawipaw ranpibawi hae nynh thua hae.⁴Elkanah nynh si a law nin khe, a zu Peninnah te a ccapaw hae te a ccanung hae balyn kha mih hanpaw raveih kha a pya hae;⁵Bawipaw nynh Hannah kha ccaawsaahnaw kaw a pya khyh zemah, Elkanah nynh a sungsah keiccuze ccoupaw leit ning kha a pya.⁶Bawipaw nynh ccaawsaahnaw kaw a pya khyh keiccuze a rhawnung nynh amaw kha a thinriasah khylan palei a ccyaku.⁷Tuhcite kum kheit koute kum kheit palei acyihkuh; Hannah nynh Bawipaw inn lang a ccia takyhte, Peninnah nynh leih a ccyaku. Tukeiccuze Hannah tuh rah zah looh mah leih ae khyh.⁸A vawpaw Elkanah nynh, “Hannah, pawccemou na raw? Pawccemou na ae khyh? Pawccemou na ngaethya? Kae tuh nang na hanlan ccapaw lu haw laeze ka hoyhua khaw?” a cipya.

⁹Shiloh khua kya a ae a neih kou hae te, Hannah tuh thokuh zah Bawipaw malang khe saw a sang. Ranpibawi Eli tuh Bawipaw beikinn thuakawtung pe umpaw haungnaw kyakhe a haung.¹⁰Hannah tuh a lungria myarya thae zah Bawipaw kalan sawsang zah thawte a rah.¹¹Hannah nynh hynh-e byakinkunaw hynh a rae: “Pou vaaw Bawipaw , na seenung ka riathaenaw hynh muihpyate nae liathui zah, na seenung hynh ning leite, ccapise nae pya zetuh, a hiin lungkhu balyn amaw kha Bawipaw kalan ka pya cih. Misutui te ruithyapaw atui kha neih lan khyh zah, a sang kha ngo thua lan khyh,” a ci.

¹²Bawipaw malang saw a sang cciamang lyakhe, Eli nynh a mung kha phang a do.¹³Hannah nynh roi accae lei lante saw a sang; a mung kyalya kha piasah zah, a roi tuh thae lan a um khyh keiccuze aruipaw nynh thua cite Eli nynh a tua.¹⁴Tukeiccuze Eli nynh amaw kha, “Hohseciamou na rui ung cih? Na misutui kha ccaring nung ccavae,” a cipya.¹⁵Thuasalama Hannah nynh, “Thua khyh, ka bawipaw, kae tuh myarya a lungriathaepaw nopinung nynh ka thua; misutui thuasah, ruithyapaw atui thuasah ka neih khyh, Bawipaw malang khe ka thinlung kha nynh ka laee.¹⁶Na seenung hynh nopi hoyleipaw lang yn ria nan, pawccecize myarya lepaw ka lungriathaenaw te ka ngaethyanaw kha nynh ka ho cciamang,” a cipya.¹⁷Tetuh Eli nynh, “Ngaengante la cceih ccavae; Israel Pachia nynh na ngiakupaw kha ae pya vae sah,” a cipya.¹⁸Te Hannah nynh, “Na seenung kae tuh na malang maehoynaw ka mue vae sah,” a cipya. Te nopinung tuh a umnaw lang cceih zah a vawpaw ryte ae hae neih hae zah, ngaethyanaw maesue hoi vae khyh.

¹⁹Minmin tuh awkhua takaw te tho hae zah Bawipaw kha a beik hae; te Ramah khua umpaw mih inn langkhe a ki hae. Elkanah nynh Hannah kha ikhae zah Bawipaw nynh Hannah kha a liathui.²⁰Accyh yn zaw te, Hannah tuh ccaawpoi zah ccapaw kha a saah, tuh-e ccapaw tuh Samuel cite min a phu, pawccecize aning nynh, “Amaw tuh Bawipaw kalan ka ngiakupaw nynh thua,” a ci.

²¹Elkanah te a innbyn hae balyn tuh kum takyh raepaw silawnaw kha Bawipaw kalan rae khylan te bya a kinkupaw kha pya khylan a cceih hae.²²Thuasalama Hannah tuh cceih khyh, pawccecize aning nynh a vawpaw kha, “Imua tuh Bawipaw malang thuakhaete, tuin kya zungzae a um nawlan, mateitui phia athua koute palou ka cciakhae cih; aning tuh thyaasahpaw ccungccaw lang zungzae hanlan ka pya cih,” a cipya.²³A vawpaw Elkanah nynh, “Ahoyhua na ci hawte cyih, mateitui na phia mawlaezung ngaw hing; Bawipaw nynh a bya palia kha tynsah vae sah,” a cipya. Tukeiccuze nopinung nynh mateitui a phia mawlaezung um zah imua kha matei a zusah.²⁴Imua kha mateitui he a phia te, kum thum acihpaw tangnuapaw sa kheit, chanvuih ephah ccangkheit te misutui ling kheit ryte imua kha cciakhae zah, Shiloh khua umpaw Bawipaw inn kya a thuakhae; imua tuh a no ung.²⁵Tangnuapaw kha theih hae zah, imua kha Eli kalan a cciakhae hae.²⁶Te Hannah nynh, “Pou ka bawipaw! Na hiin thyhte, ka bawipaw, kae tuh hynh-e kya namaw malang thadynte Bawipaw kalan saw a sangpaw nopinung kha nynh ka thua.²⁷E imua hanlan saw ka sang zah ka ngiakupaw kha Bawipaw nynh yn pya vae.²⁸Tukeiccuze amaw tuh Bawipaw kalan ka hohsaku vae; a hiin lungkhu balyn, aning tuh Bawipaw kalan pya athua vae,” a ci.
Te nopinung nynh Bawipaw hanlan tuin kyakhe a cciataw vae. Hannah Sawsangnaw

¹Hannah nynh sawsang zah,“Ka thinlung tuh Bawipaw kyaa lungtua;ka thawzung tuh ka Pachia kyahangthung athua.Ka taenaw kyakhe ka lungtua keiccuzeka khalang nynh ka rhaw hae khaa sarya hae.

²“Bawipaw hawte Athyaapawhumhung mah um khyh,namaw laelan humhung mahum khyh;ah Pachia alopaw Lungpi um khyh.

³Lysakute byaho nan vae oh,nae mung kyate tansakunaw byapousah nan oh;pawccecize Bawipaw tuhtynre nyhpaw Pachia thua zah,cyipaw miakaw khaakhin a saetu nynh thua.⁴A thawsae hae paw li tuh akhya,thuasalama a nyaa hae paw nynhthawzung a hoi hae.⁵Mih vueso hae paw tuh looh muekukhylan vaeluakuh hae,thuasalama mih vuelaw hae paw tuhmih vuelaw vae khyh.A tin hae paw tuh ccaaw lu saria saah vae hae,thuasalama ccaaw pataea hoipaw tuh a lanme vae.⁶Bawipaw nynh theih hae zaha hiinsah hae;Michi khua lang sahbung hae zaha thosah thui hae.⁷Bawipaw nynh ryachisah hae zaha hoirumsah hae;zakawsangsah hae zahhang mah a hangthung hae.⁸Bawi hae ryte haungsah kheih lan tesawtuanaw tungkhung khaccou khylan,a ryachipaw kha laenoi kyatehangthung zah,a nyaapaw kha buhhaw apumkuhpawkyate a hangthung.Pawccecize laephi tung hae tuhBawipaw kya-e thua hae zah,tuh-e tung hae vawlan khelaephipi kha a nung.

⁹“Alungzipaw a ccungccaw haeccu kha a thungkhaw hae,thuasalama ccungccaw hoylei hae paw tuhmohnaw kya vua athua cih hae;pawccecize ccungccaw nynha thawsaenaw liate tae khyh.¹⁰Bawipaw rhaw hae tuhzoihtatyh lan khya athua cih hae;Ahang Huaccepaw nynh vaawlui khekholung a thyhsah cih.Bawipaw nynh laephi adianaw ciabya a pia cih;a siapharan kha thawzung a pya cih zah,amaw nynh chitui thuhpawa ccungccaw huhan khaa hangthung cih,” a ci.Eli Ccapaw hae Hoyleinaw

¹¹Elkanah tuh Ramah khua e a inn langkhe ki zah, imuapaw tuh ranpibawi Eli malang khe Bawipaw rya kha a lah.

¹²Eli ccapaw hae tuh a ccouseikuh hae; minmin nynh Bawipaw kha thuasah,¹³ccungccaw hae hanlan ranpibawi hae ryalaw kha thuasah pawlangria khyh hae. Lukhakheit nynh silawnaw a rae vae ze, ranpibawi a ryalahtupaw nynh yn cceih cih zah, saw tuh accoh cciamang lyakhe a kuih te yn ccyngpaw ccangthum lang apheipaw phedung khate¹⁴talyng-ang khyhze tuiso-ang khyhze talyng-ang khupaw khyhze ang lungkhu langkhe a sua cih; tuh-e apheipaw phedung nynh a sua khopaw balyn tuh ranpibawi nynh a lawkuh cih. Shiloh khua a thua hae paw Israel hae balyn kha tuhcite leih a cyipya hae.¹⁵Tuhpiaze, atho kha maee te u athua mawkhe, ranpibawi a ryalahtupaw nynh yn cceih cih zah silawnaw a raetupaw kha, “Ranpibawi hanlan epya lan saw kha yn pya; pawccecize athungkuhpaw na saw kha tuh lawkuh lan khyh, ahepaw saw kha nynh a lawkuh cih,” cite leih a cipya.¹⁶Tuh-e paw nynh amaw kha, “Atho hynh maee te kae u ty hin sah, tukoute na ry zeihte na lawkuh cih,” cite a hopya ze, aning nynh, “Thua khyh, atu ccaccei maw nae pya cih; tuhkhyhze tuh ka lawkude vae cih,” cite leih a cipya.¹⁷Tuhcite ccangvae hae seinaw tuh Bawipaw muihnaw kya myaryamaw ale; pawccecize minmin nynh Bawipaw kalan pyapaw uccaw hae kha a theihrya hae. Shiloh Khua e Imuapaw Samuel

¹⁸Imuapaw Samuel tuh laaw te kuakuhpaw ranpibawi angki kha kikute Bawipaw malang rya a lah.¹⁹A nung nynh angkiccua adihpaw kha leih huipah zah, kum takyhte raepaw silawnaw kha rae khylan a vawpaw ryte a ccia vae hae ze, tuh-e tuh kum takyhte leih a ccyngpya.²⁰Te Eli nynh Elkanah te a zu kha hythua leih pya hae zah, “E nopinung nynh Bawipaw kalan a pyapaw lasung hanpaw hynh, Bawipaw nynh e nopinung kyahin ccaaw ae pyaru vae sah,” a cipya; tukoute mih inn lang leih a ki hae.

²¹Te Bawipaw nynh Hannah kha hythua a pya, aning nynh ccaawpoi zah ccapaw lu thum te ccanung lu ning a saah. Imuapaw Samuel tuh Bawipaw malang khe a lethung. Eli Innbyn kha Profehbya Honuanaw

²²Eli tuh myarya taw vae. A ccapaw hae nynh Israel hae balyn kya a cyisahnaw hae te tungkunaw bu thuakaw kya ryalah hae paw nopi hae ryte a ikheih hae paw kha a paaw nynh marya a thae.²³Aning nynh minmin kha, “Hynhcihawpaw uccaw hae hynh pawccemou na cyi oh? Ahoy leipaw na cyi oh paw kha ccungccaw balyn kyate phe ka thae.²⁴Ka ccapaw hae, hynhte cyih nan oh; Bawipaw ccungccaw hae nynh pong zeihsakuh hae zah ka thaepaw bya tuh bya hoypaw thua khyh.²⁵Lu kheit nynh ccangpaw lu kheit tungvaw a sei lanze, lukhakheit nynh Pachia kalan miseipaw hanlan ccawkunaw a raepah kho; thuasalama lukhakheit nynh Bawipaw tungvaw a sei lanze, hum nynh mou ccawkunaw a raepah vae cih?” a ci. Thuasalama mih paaw bya kha ngae khyh hae; pawccecize minmin chia lanpaw kha Bawipaw rynaw nynh thua.

²⁶Imuapaw Samuel tuh a pynrua lethung zah, Bawipaw malang te ccungccaw malang maehoynaw houhouh a mue.

²⁷Pachia ccungccapaw nynh Eli kalan yn thua zah, “Bawipaw nynh hynhte a ho, ‘Izip ram, Faro kuihkaw see lang a tang lya hae ze, na minpaaw a innbyn hae kya ka langpyaku hae.²⁸Aning kha ka ranpibawi lang tang lan, ka silawhang kalan kae lan, mynkhuhpaw u lan te ka malang khe ranpibawi angki kiku lan Israel phin hae balyn kyate ka po; te Israel ccungccaw hae nynh maee te u hae paw ka kya-e pyapaw uccaw hae balyn kha na minpaaw a innbyn hae kalan ka pya hae.²⁹Tuhte mang athua pite, pawccemou kaw ka pya hae thyhte yn pya hae paw ka kya-e silawnawpaw hae te pyapaw uccaw hae kha karankunaw mit te dote, ka ccungccaw Israel hae nynh yn pya hae paw miakaw kya-e ahoy huaccepaw khate na thosah hae zah, kae laeze na ccapaw hae kha saw na tuahua hae?’ a ci.³⁰Tukeiccuze Bawipaw , Israel Pachia nynh a hopaw tuh: ‘Na innbyn hae te na minpaaw innbyn hae nynh ka malang khe zungzaete a tee a pou cih hae,’ a ci; thuasalama Bawipaw nynh atu a hopaw tuh: ‘Tuh-e bya tuh kae te sawkuh ccavae sah; pawccecize saw yn tua hae paw tuh saw ka tua cih hae zah, yn theihrya hae paw tuh theihryanaw a ccou cih hae.³¹Dotua, na innbyn kya phe taw lan a hiinpaw lu kheit san a um khyh nawlan, na thawzung te na minpaaw innbyn thawzung kha ka vua ccyh tuh yn thua cih.³²Tetuh Israel hae tungvaw pya athua cih paw hoirumnaw balyn kha lungriathaete karankunaw mit te na do cih; na innbyn kyaze phe taw lan a hiinpaw lu kheit san um lan khyh.³³Ka silawhang kyate ka vua lei lanpaw na innbyn kya-e lu kheit kyalyapaw tuh na mitmohsah khylan te na lungriathaesah khylan haang athua cih; na innbyn hae balyn tuh thaloi te a chih cih hae.³⁴Na ccapaw hae lu ning Hofni te Finehas tungvaw yn thua cih paw hynh nang na hanlan muihsahnaw athua cih—parouh mawte nin kheit lungkhu a chih cih hae.³⁵Ka thinlung te ka tuanaw kya a um thyhte a cyih cih paw, alungzipaw ranpibawi lu kheit kha kamaw hanlan ka langsakuh cih; amaw hanlan atynpaw inn kha ka sakpah cih zah, chitui thuh athuapaw ka ccungccaw malang khe aning nynh a tee a pou zungzae cih.³⁶Na ciihan kya-e a laehypaw miakaw nynh ngunphua phe kheit thuasah, sanlou phe kheit thuasah ngiaku khylan amaw kalan oun cceih cih hae zah, Sanlou beihtaraw ka aebua ccaw, ranpibawi te asekuhpaw ryalaw hankhakheit kya beih yn nungbua, cite a hopah cih hae,’ a ci,” cite a hopya. Samuel kha Konaw

¹Imuapaw Samuel tuh Eli kuihkaw kya Bawipaw rya kha a lah. Tuh ccyh lya tuh Bawipaw bya tuh azya; vizin hae mah azya.

²Tuh ccyh lyakhe a mit thawzya vae zah hoyte ngawmuih kho lei vae paw Eli tuh amaw khaan kya a ih;³Pachia maeekhua tuh chih loh khyh, te Samuel tuh Pachia thingkua a umnaw Bawipaw beikinn lungkhu khe a ih.⁴Bawipaw nynh, “Samuel! Samuel!” cite ko zah aning nynh, “E kya mang ka um!” a cipya.⁵Te Eli kalan ccue zah, “Nae ko zah kae thua vae,” a cipya. Thuasalama Eli nynh, “Kae ko khyh; bua la ih,” a cipya. Tukeiccuze ki zah a ih.⁶Bawipaw nynh, “Samuel!” cite bua a ko. Samuel nynh thokute Eli kalan cceih zah, “Nae ko zah kae thua vae,” a cipya. Thuasalama Eli nynh, “Ka ccapaw, kae ko khyh; bua la ih,” a cipya.⁷Samuel nynh Bawipaw kha nyh loh khyh zah, Bawipaw bya tuh a kalan phypya thua loh khyh.⁸Bawipaw nynh Samuel kha vae thumnaw a ko. Aning nynh thokute Eli kalan cceih zah, “Nae ko zah kae thua vae,” a cipya. Tetuh Bawipaw nynh imuapaw kha a ko cipaw Eli nynh a ny.⁹Tukeiccuze Eli nynh Samuel kha, “La cceih lah, la ih; aning nynh he ae ko ze, nang nynh, ‘Bawipaw , yn hopah, na ryalahtupaw nynh phang ka ngae,’ na cipah cih,” a cipya. Tukeiccuze Samuel tuh cceih zah a umnaw kya a ih.

¹⁰Bawipaw tuh yn cceih zah tuin kya yn thadyn zah, “Samuel! Samuel!” cite langmaw a komae hawte bua a ko. Te Samuel nynh, “Hotua ccaleih, na ryalahtupaw nynh phang ka ngae,” a cipya.¹¹Te Bawipaw nynh Samuel kha, “Dotua, a thaepaw miakaw a nakaring voi ning mawte ringtering lan accae cih paw ccangkhakheit kha Israel hae tungvaw kya vyavya ka rae vae.¹²Tuin nin vae tuh Eli innbyn te asekuh lante ka honua vae paw balyn kha athonaw te athangnaw cia ka ccingsah cih.¹³A ccapaw hae nynh Pachia the a thyasahnaw hae paw hoyleinaw kha mang a nyh pite, minmin kha a khee khyh hae keiccuze, a innbyn kha zungzae hanlan vyavya de ka tah vae, cite ka hopya vae.¹⁴Tukeiccuze Eli innbyn kya-e hoyleinaw tuh silawnaw te thuasah, pyapaw uccaw te thuasah seishawnaw raepya kho papin thua vae lan khyh, cite Eli innbyn tungvaw kya bya ka kinku vae,” a cipya.

¹⁵Samuel tuh tuin kya khuadae cia a ih; te Bawipaw inn e thuakaw hae kha a hung. Samuel nynh tuh-e vizin tuh Eli kya hopya lan a rih.¹⁶Eli nynh Samuel kha, “Ka ccapaw, Samuel,” cite ko zah, Samuel nynh, “E kya mang ka um,” a cipya.¹⁷Eli nynh, “Pawmou ae hopya? Kae hynh yn phei nan. Ae hopyapaw balyn kha ccangkhakheit nae phei zetuh, Pachia nynh na tungvaw kya tuhlae accih lante cyih vae sah,” a cipya.¹⁸Tukeiccuze Samuel nynh pawpaw mah phei leite marya a hopya. Tetuh Eli nynh, “Amaw tuh Bawipaw nynh thua; ahoy a cipaw kha cyih vae sah,” a ci.

¹⁹Samuel tuh yn lethung, Bawipaw tuh a kya um zah, a bya kha kaw kheit sanmah laekhu lang ccawsahpah khyh.²⁰Israel hae balyn nynh, Dan khua kyate Beersheba khua kyacia, Samuel tuh Bawipaw profeh doliaku lan umpaw nynh thua cipaw a ny hae.²¹Bawipaw tuh Shiloh khua kya palei a langkuh, Shiloh khua kyakhe Bawipaw amaw ccaccei nynh Samuel kalan khe Bawipaw bya lante a phyku.

¹Te Samuel bya tuh Israel hae balyn kalan a thua. Pachia Thingkua A Law hae
Tuin ccyh lyakhe Filistin hae tuh Israel hae kha dou khylan a sueluakuh hae, te Israel hae tuh minmin dou khylan Ebenezer khua kya rya hae zah, Filistin hae tuh Afek kya a rya hae.²Filistin hae tuh Israel hae kha dou khylan atantante um hae zah, rhaw he a tuk hae tuh Filistin hae nynh Israel hae kha tae hae zah, rhawtuknaw hmin kya thong pali loukaw a chih hae.³Rhawkaw hae tuh ryahmin kalan he oun thua hae te, Israel piccan hae nynh, “Pawccemou atunin kya Bawipaw nynh Filistin hae malang khe rhaw oun shungsah? Bawipaw tuh aening kalan yn cceih zah ah rhaw hae thungnaw kyate oun khum nawlan, Bawipaw byakin thingkua kha Shiloh khua kyate hynh-e kalan cciakhae oh sih,” a ci hae.⁴Tukeiccuze Shiloh khua langkhe ccungccaw saw hae zah, cherubim laku kya umpaw vaaw Bawipaw byakin thingkua tuh tuin kyate a cciakhae hae. Eli ccapaw hae lu ning Hofni te Finehas tuh Pachia byakin thingkua ryte a um hae.

⁵Bawipaw byakin thingkua tuh ryahmin kalan he a thuakhae hae te, Israel hae balyn tuh laephi phe thyh lan thawte a sia hae.⁶Tuh-e a siarua hae paw roi kha Filistin hae nynh he a thae hae tuh, “Hebru hae ryahmin kya tuhcite thawte a siarua hae paw tuh paw suilan mou athua?” a ci hae. Minmin nynh Bawipaw byakin thingkua tuh ryahmin kya a thua vae cipaw he a nyh hae te,⁷Filistin hae tuh rih hae zah, “Mih ryahmin kya pachia hae a thua vae hae,” a ci hae. Te minmin nynh, “Aening hanlan ngaethya lan kou um! Pawccecize hynhcihawpaw hynh langmawlya cyihkuh boi khyh.⁸Aening hanlan ngaethya lan kou um! E athungpaw pachia hae huhan kyate hum nynh mou oun luesah kho cih? E hae tuh ramkaw kya Izip hae kha shethya aphuinphuin te a theih hae paw pachia hae nynh thua hae.⁹Pou Filistin hae, nae rawthung sah lah, pisepuisaku tua oh, Hebru hae tuh nae see lang a la tang hae hawte, minmin see lang na tang khyh nawlan oh, pisepuisakuh oh lah, rhawtuk oh,” a ci hae.

¹⁰Tukeiccuze Filistin hae nynh a tuk hae; Israel hae tuh shung hae zah mimaw inn raveih lang a ccue hae. Myarya lepaw chiakunaw um zah, Israel ccu rhawkaw thong sung thum a chih hae.¹¹Pachia thingkua kha a lua hae; Eli ccapaw hae lu ning Hofni te Finehas tuh a chih hae. Eli Chinaw

¹²Benjamin phinpaw lu kheit tuh rhawtuknaw kyate ccue zah, tuin nin khe Shiloh khua kya a thua, a boeining kha seii zah a lu vawlan vuiping a phingku.¹³He a thua te, Eli tuh laanpi pe a haungnaw kya haung zah phang a la ngaw, pawccecize Pachia thingkua hanlan a lungriathae. Tuh-e paw tuh khualae lang yn tee zah thongpang he a hopah hae tuh, a khuapi mawte a rah hae.¹⁴A siarua hae paw roi kha Eli nynh he a thae te, “Tuh-e siaruanaw roi tuh pawmou athua?” a ci. Te tuh-e ccungccapaw tuh palou yn thua zah, Eli kha a hopya.¹⁵Eli tuh sung takua kum tarya cih vae zah ngawmuih kho lei lan ciate a mitmoh vae.¹⁶Tuh-e paw nynh Eli kha, “Kae hynh rhawtuknaw kyate kae thuapaw nynh thua; rhawtuknaw kyate atunin po kae ccue,” a cipya. Eli nynh, “Ka ccapaw, pawtemou athua?” a cipya.¹⁷Te bya yn thuakhaetupaw nynh, “Israel hae tuh Filistin hae malang te a ccue hae, rhawkaw hae kya myarya lenaw chiakunaw a um; na ccapaw hae lu ning Hofni te Finehas mah a chih hae, Pachia thingkua kha phe a law hae,” a cipya.¹⁸Tuh-e paw nynh Pachia thingkua cite he a ho te, Eli tuh koikua pe umpaw a haungnaw kyate nulang a khuliakuh; a nging khya zah a chih, pawccecize aning tuh taw vae zah ari vae. Eli tuh Israel hae kya kum sung pali cia byapiatu nynh thua.

¹⁹Eli a monung, Finehas zu tuh ccaawpoi zah a ccaaw vyavya pui. Aning nynh Pachia thingkua kong thuasah, a rangpaw te a vawpaw a chi hae paw kong thuasah he a thae tuh, bakhung zah a ccaaw a pui; pawccecize neitangia ccinaw nynh a thuanua.²⁰Vyavya a chi dyn khe nopi hae nynh, “Rih nan, ccapise na saahkuh vae,” a cipya hae. Thuasalama aning nynh byakhung vae khyh hae, pawlangria khyh.²¹Aning nynh Ikhabod cite min a phu, asuilan tuh, “Phu-enaw tuh Israel kyate a nuekuh vae,” cipaw nynh thua, pawccecize Pachia thingkua tuh rhaw hae nynh lah hae zah, a rangpaw te a vawpaw mah a chih vae hae.²²Aning nynh, “Phu-enaw tuh Israel kyate a nuekuh vae, pawccecize Pachia thingkua tuh rhaw hae nynh a law vae hae,” a ci.

¹Filistin hae nynh Pachia thingkua kha lah hae zah Ebenezer kyate Ashdod khua lang a cciakhae hae;²te Filistin hae nynh Pachia thingkua kha lah hae zah Dagon beikinn lungkhu lang teekhae hae zah Dagon pachia pe khe a nung hae.³Ashdod khuaccaaw hae nynh awkhualan awkhua takaw he a tho hae tuh, Bawipaw thingkua malang laekhu kya a khuliakuhpaw Dagon kha a muih hae. Tukeiccuze Dagon tuh lah hae zah a umnaw khe bua a nung hae.⁴Thuasalama minmin nynh awkhualan awkhua he a tho hae tuh, Dagon tuh Bawipaw thingkua malang laekhu kya a la huekuh, a lu te a kuih voi ning tuh pae zah, thuakawccaw vawlan khe a la khang; Dagon pyn kyalya tuh a la um vae.⁵Tukeiccuze Dagon ranpibawi hae te Dagon inn lungkhu lang a tee hae paw balyn nynh Ashdod khua umpaw Dagon inn thuakaw kha sy leite atunin cia a kawphalyh hae.

⁶Ashdod khuaccaaw hae kha Bawipaw kuih nynh vawsaw a pya hae, Ashdod khua te a pepan um hae paw kha mih thinphangsah hae zah balyh ccinaw te vawsaw a pya hae.⁷Ashdod khuaccaaw hae nynh uccaw a umtuzia kha he a muih hae tuh, minmin nynh, “Israel Pachia thingkua a thungnaw nynh aening tungvaw te ah pachia Dagon tungvaw kya vawsaw oun pya keiccuze tuh-e thingkua tuh aening kya a um lanpaw thua khyh,” a ci hae.⁸Tukeiccuze ccungccaw sawte Filistin bawi hae balyn kha pum hae zah, “Israel Pachia thingkua hynh pawtemou ah cyih cih oh?” a ci hae. Gath khuaccaaw hae nynh, “Pachia thingkua tuh kaening kalan nue thua sah,” a ci hae. Tukeiccuze minmin nynh Israel Pachia thingkua kha Gath khua lang a nue hae.⁹Thuasalama Gath khua lang a cciakhae kou hae te, Bawipaw kuih nynh tuh-e khua tuh rawse zah myarya lepaw siikunaw kha a umsah; khuaccaaw hae adih ale balyn kha detah hae zah balyh te a ccisah hae.¹⁰Tukeiccuze Israel Pachia thingkua kha Ekron khua lang a ky hae. Pachia thingkua tuh tuin khua kya he a thua te, Ekron khuaccaaw hae nynh, “Kaening te kae ccungccaw hae hynh chia khylan Israel Pachia thingkua tuh pawccemou kae kalan oun cciakhae hae?” cite a sia hae.¹¹Tukeiccuze ccungccaw sawte Filistin bawi hae balyn kha pum hae zah, “Israel Pachia thingkua hynh ccanglang ky oh, kaening te kae ccungccaw hae hynh oun chia khyh nawlan amaw a umnaw hmin lang kisah oh,” a ci hae. Pawccecize khua pynpi kya chinawpaw siikunaw a um. Pachia kuih nynh tuin kya vawsaw myarya a pya hae;¹²a chih lei hae paw tuh balyh te ccikhaekuh hae zah, khuapi kya-e siaruanaw tuh vaawlui kyacia a kaethung. Israel lang Thingkua A Kikhae hae

¹Bawipaw thingkua tuh Filistin ram kya sawpaw sah sari a um.²Te Filistin hae nynh ranpibawi hae te apawe hae paw kha ko hae zah, “Bawipaw thingkua hynh pawtemou kae cyih cih? A umnaw langkhe paw uccaw te mou kae kyde cih cipaw oun hopya tua oh,” a cipya hae.³Minmin nynh, “Israel Pachia thingkua kha na ky oh ze, amaw makhaete ky nan oh, cyiseinaw silawnaw khate kisah oh. Tetuh nae ngedan cih zah shawkhaw na thua cih oh,” a ci hae.⁴Te minmin nynh, “Amaw kae pyathui lanpaw cyiseinaw silawnaw tuh pawmou athua?” cite khia hae zah, minmin nynh, “Filistin bawi hae milu thyhte, sui te raepaw balyh azuh ccangpangaw te sui pazu ccangpangaw kha na pya cih oh; pawccecize nae balyn tungvaw te nae bawi hae balyn tungvaw kya a thuapaw shethya tuh alokuh.⁵Tukeiccuze ram a rosahpaw nae balyh azuh hae te nae pazu azuh hae kha na rae cih oh zah, Israel Pachia kha phu-enaw na pya cih oh; naemaw te nae pachia hae te nae ram kya vawsawnaw pya leite poh ae um kho oh.⁶Izip hae te Faro nynh mih lung a khungsahku hae hawte pawccemou nae lung na khungsakuh bua cih oh? Aning nynh minmin kha phe ccih lan de a tah kou hae te, minmin nynh Israel ccungccaw hae kha cciasah leite umlae khyh hae zah, minmin tuh a pou hae khaw?⁷Tukeiccuze vaetuale thawpaw te matei zukuhpaw vaetua pinung, taphu khangkuh boi leipaw sa ning kha vaetuale taphu khang oh, mih taw hae kha tuh a pi te asawkunaw lang, inn lang cciakhae oh.⁸Bawipaw thingkua kha lah oh lah, vaetuale vawlan khang oh, te cyiseinaw silawnaw lante na pyathui oh paw sui te raekuhpaw azuh hae kha tuh-e thingkua pe khe ccangpaw thingkua kyakhe nung oh. Te saw oh lah, cceih hae sah.⁹Te dotua oh; amaw ram lang a cceihpaw laanpi Beth-shemesh khua langkhe a ccia zetuh, aening tungvaw kya hynh-e vawsawnaw lepaw a raetupaw tuh amaw nynh thua; thuasalama tuhte athua khyh zetuh, aening oun tuktupaw tuh aning kuih thua khyh, aening tungvaw acyihkuh seipaw nynh thua cipaw ny lan,” a ci hae.

¹⁰Ccungccaw hae nynh tuhcite a cyi hae; matei zukuhpaw vaetua pinung sa ning kha vaetuale taphu khang hae zah, mih taw hae kha inn kya a khung hae.¹¹Bawipaw thingkua ryte sui te raekuhpaw mih balyh azuh hae te sui pazu hae a nungnaw hae paw thingkua kha vaetuale vawlan a khang hae.¹²Vaetua hae tuh Beth-shemesh laanpi langkhe lawbabin lan sia biate a cceih hae; voilang ranglang maekuh khyh hae, Filistin bawi hae nynh Beth-shemesh ramri cia a zui hae.

¹³Beth-shemesh khuaccaaw hae tuh accya kya mih chanvuih a rue cciamang hae. Ngawdo hae zah thingkua kha he a muih hae tuh, lungpawte a cciadue hae.¹⁴Vaetuale tuh Beth-shemesh khuapaw Joshua loo lungkhu lang tee zah tuin kya a thadyn. Tuin kya lungtungpi a um; vaetuale thingphe kha koi hae zah vaetua hae kha Bawipaw kalan maee-ute silawnaw lang a mang hae.¹⁵Levi phin hae nynh Bawipaw thingkua te a pe umpaw thingkua, sui uccaw hae a umnahpaw kha lah hae zah, lungtungpi vawlan a nung hae. Te Beth-shemesh khuaccaaw hae nynh maee-ute silawnaw kha rae hae zah, tuin nin khe Bawipaw kalan silawnaw a rae hae.¹⁶Filistin bawi lu pangaw hae nynh tuh-e tuh he a muih hae te, tuin nin khe Ekron khua lang a ki hae.

¹⁷Filistin hae nynh Bawipaw kalan cyiseinaw silawnaw lang a pyathui hae paw sui balyh azuh hae tuh: Ashdod khua hanlan ccangkheit, Gaza khua hanlan ccangkheit, Ashkelon khua hanlan ccangkheit, Gath khua hanlan ccangkheit, Ekron khua hanlan ccangkheit nynh thua;¹⁸Filistin bawi hae nynh a uk hae paw khuapi hae balyn kha alung azya thyhte, akoihkuhpaw khuapi hae thuasah, akoihkuh leipaw khuapi hae thuasah sui pazu azuh hae kha a pya hae. A pe kya Bawipaw thingkua a nungnaw hae lungtungpi tuh Beth-shemesh khuapaw Joshua loo kya atunin cia ccaekia lang a um ung. Kiriath-jearim kya Thingkua

¹⁹Bawipaw nynh Beth-shemesh khuaccaaw hae abang, sung sari kha a chia hae, pawccecize minmin nynh Bawipaw thingkua kha a do hae, Bawipaw nynh minmin kha patae a chia hae keiccuze ccungccaw hae tuh rawkhuite a um hae.²⁰Te Beth-shemesh khuaccaaw hae nynh, “E athyaapaw Pachia, Bawipaw malang hummou a thadyn kho cih? Aening kya a um khyh nawlan hum kalan mou a cceih cih?” a ci hae.²¹Tukeiccuze minmin nynh Kiriath-jearim khuaccaaw hae kalan khe locceihtu hae kha saw hae zah, “Filistin hae nynh Bawipaw thingkua kha bua oun ky vae hae. Oun cceih oh lah, lawkuh oh,” a cipya hae.

¹Te Kiriath-jearim khuaccaaw hae nynh oun cceih hae zah Bawipaw thingkua kha lah hae zah, mua vaw umpaw Abinadab inn langkhe a cciakhae hae. Minmin nynh Bawipaw thingkua a do-oihtu lang Abinadab ccapaw Eleazar kha a thyaasah hae.

²Kiriath-jearim khua kyakhe tuh-e thingkua a thua nin kyate ccyh hynhsepi cia, kum kuin loukaw a um; te Israel hae balyn nynh Bawipaw kalan bawmnaw mue khylan a sia hae. Samuel nynh Byapia hae

³Tetuh Samuel nynh Israel hae balyn kyakhe, “Nae thinlung balyn te Bawipaw kalan na ki oh zetuh, ramccang pachia hae te Astartes khozinung hae kha nae kyate vua oh. Nae thinlung kha Bawipaw kalan hawisah oh lah, amaw kyalya kha beik oh, te Filistin hae kuih kyate ae luesah cih oh,” a cipya hae.⁴Tukeiccuze Israel nynh Baal pachia hae te Astartes khozinung hae kha vua hae zah Bawipaw kyalya kha a beik hae.

⁵Te Samuel nynh, “Israel hae balyn kha Mizpah khua kya pum oh, kae nynh Bawipaw kalan saw kae sangpah cih oh,” a cipya hae.⁶Tukeiccuze minmin nynh Mizpah khua kya a sueluakuh hae, te tui kha the hae zah Bawipaw malang khe a bu hae. Tuin nin kya looh-aesung hae zah, “Bawipaw tungvaw kae sei vae,” a ci hae. Te Samuel nynh Israel hae kha Mizpah khua kya bya a pia hae.

⁷Israel hae tuh Mizpah khua kya a sueluakuh vae hae cipaw kha Filistin hae nynh he a thae hae tuh, Filistin bawi hae nynh Israel hae kha a ccianua hae. Tuh-e konglang tuh Israel ccungccaw hae nynh he a thae hae tuh Filistin hae raw kha a rih hae.⁸Israel ccungccaw hae nynh Samuel kha, “Filistin hae kuih kyate oun khum nawlan sawsang lah, aening hanlan Bawipaw ah Pachia kalan dae leite siatua,” a cipya hae.⁹Tukeiccuze Samuel nynh matei zu ungpaw tuutaw kha lah zah, Bawipaw kalan a pynpi te maee-ute silawnaw kha a rae; Samuel nynh Bawipaw kalan khe Israel hanlan sawsang zah, Bawipaw nynh a leih.¹⁰Samuel nynh maee-ute silawnaw a rae lyakhe Filistin hae nynh Israel hae kha tuk khylan oun naenuaku hae; thuasalama tuin nin khe Bawipaw nynh Filistin hae kha roi myarya ccae lante kholungthyhsah nua hae zah, mih lung pong a muasah hae; te minmin tuh Israel hae malang khe a ccue vae hae.¹¹Te Israel ccungccaw hae tuh Mizipah khua kyate pou hae zah Filistin hae kha Beth-kar kyacia deehuite a chia hae.

¹²Tetuh Samuel nynh lung kha lah zah Mizpah te Jeshanah laku kya bing zah, “Bawipaw nynh kaening hynh atu cia oun bawm,” ci zah Ebenezer cite min a phu.¹³Tukeiccuze Filistin hae tuh rhaw shung hae zah Israel hae ram lang tee vae khyh hae; Samuel she lya balyn tuh Bawipaw kuih nynh Filistin hae kha a rawse hae.¹⁴Filistin hae nynh Israel hae kya-e a law hae paw khua hae kha Ekron kyate Gath kyacia Israel hae kalan pyathui athua; Israel hae nynh mih ram kha Filistin hae kuih kyate bua a mue hae. Israel hae te Amor hae laku kya mah daenaw a um.

¹⁵Samuel tuh a hiin lungkhu balyn Israel hae kya byapiatu lang a tang.¹⁶Kum takyhte Bethel, Gilgal te Mizpah khua lang po lekuh lan khuaccong zah, tuin khua hae balyn kyakhe Israel hae kha bya a pia hae.¹⁷Tukoute a inn a umnaw Ramah khua lang a ki; tuin khua khe Israel hae kha byading te a uk hae, te tuin kyakhe Bawipaw elang silawhang kha a rae. Siapharan Ngianaw

¹Samuel nynh he a taw te, a ccapaw hae kha Israel hae kya byapiatu lang a nung hae.²A ccatawccaw min tuh Joel thua zah lu ningnaw a ccapaw min tuh Abijah nynh thua; minmin tuh Beersheba khua kya byapiatu hae nynh thua hae.³Tuhzemah a ccapaw hae nynh a laanpi kha zui khyh hae, muenaw kalan khe a cceihsei hae; pyaruh kha lawkuh hae zah byading kha a ro hae.

⁴Tetuh Israel piccan hae balyn tuh sueluakuh hae zah Samuel kalan Ramah khua lang cceih hae zah,⁵“Nang tuh na taw vae zah na ccapaw hae nynh na laanpi kha zui khyh hae; tukeiccuze ccangpaw minphuin hae hawte, oun uktu lang siapharan oun khangpah,” a cipya hae.⁶Tuhcite, “Oun uktu lang siapharan oun khangpah,” cite he a ho hae tuh, tuh-e bya nynh Samuel kha a lunghoysah khyh. Samuel nynh Bawipaw kalan sawsang zah,⁷Bawipaw nynh Samuel kha, “Ccungccaw hae nynh ae hopya hae paw bya balyn kha ngaetua; minmin nynh nang kha ae vua khyh hae, minmin kya siapharan ka thuanaw kha yn vua hae paw nynh thua.⁸Izip ram kyate ka poukhae nin hae kyate atunin cia kae kha yn vua hae zah ccangpaw pachia hae kha beikte ka tungvaw a cyi hae hawte, nang na tungvaw mah a cyi hae.⁹Atu tuh mih bya kha ngaepah hae; thuasalama raeringnaw hoyte na pya cih hae zah, minmin a uk cih hae paw siapharan nynh a ukzia kha muihsah hae,” a cipya.

¹⁰Tukeiccuze Samuel nynh amaw kalan siapharan a ngia hae paw kyakhe Bawipaw bya balyn kha a hopya hae.¹¹Aning nynh, “Nanning ae uk cih oh paw siapharan nynh a ukzia tuh hynhte athua cih: nae ccapaw hae kha a ko cih hae zah a marangle ccikuhtu, a marang ccikuhtu te a marangle hae malang a ccuetu lang a nung cih hae;¹²milu thong kheit uktu, milu sung pangaw uktu, lu haw uktu lang a nung cih hae, abang kha leithuetu te a loohruetu, rhawtuk-zunghe raetu te a marangle uccaw raetu lang a nung cih hae.¹³Nae ccanung hae kha zimuin raetu, anghyngtu te sanlou thoutu lang a ko cih hae.¹⁴Nae loo, nae misu khokhu te nae oliv khokhu hae lakuze ahoy huaccepaw kha a lah cih zah a ryalahtu hae kha a pya cih hae.¹⁵Nae ccathae te nae misu khokhu kya-e pumhaw pumkheit kha a lah cih zah a kuihkaw e bawi hae te a ryalahtu hae kha a pya cih hae.¹⁶Nae ryalahtu hae te nae seenung hae, nae vaetua hae te nae lann hae kyaze ahoy huaccepaw kha a lah cih zah a rya a lawsah cih hae.¹⁷Nae tuuphu hae kya-e pumhaw pumkheit kha a lah cih zah, nanning tuh a see hae lang na tang cih oh.¹⁸Te tuin nin vae tuh naemaw nynh na poku oh paw nae siapharan keiccuze na sia na rua cih oh; thuasalama tuin nin vae tuh Bawipaw nynh ae leih vae lan khyh oh,” a cipya hae.

¹⁹Thuasalama ccungccaw hae nynh Samuel bya kha ngae ry khyh hae; minmin nynh, “Thua khyh! Kaening oun uk lanpaw siapharan kae ry,²⁰tuhteze nynh ccangpaw minphuin hae te kae lokuh bua cih, kae siapharan nynh oun uk cih zah kae malang toikute kae rhaw hae kha oun tukpah cih,” a ci hae.²¹Samuel nynh ccungccaw hae bya balyn kha a thae te, tuh-e tuh Bawipaw nakaring kya a hopya.²²Bawipaw nynh Samuel kyakhe, “Mih bya kha ngaepah hae lah, minmin hanlan siapharan khangpah hae,” a cipya. Te Samuel nynh Israel ccungccaw hae kha, “Nae khua raveih lang la ki oh,” a cipya hae. Siapharan lang Saul Ponaw

¹Benjamin phin, a min Kish cikuhpaw mihoipaw lu kheit a um; Kish tuh Abiel ccapaw, Abiel tuh Zeror ccapaw, Zeror tuh Bekorath ccapaw, Bekorath tuh Afiah ccapaw nynh thua.²Kish nynh a min Saul cikuhpaw ccapaw lu kheit a hoi, aning tuh apuithyapaw ccangvae nynh thua. Israel ccungccaw hae laku kya aning laeze a puithyapaw pise um khyh; aning tuh ming hae laeze a lu te a raw ahanghua.

³Saul a paaw Kish kya-e lann hae tuh a zo hae. Tukeiccuze Kish nynh a ccapaw Saul kha, “Mikung lu kheit hoeikute cceih lah, lann hae kha la ccungtua,” a cipya.⁴Minmin nynh Efraim muaram te Shalishah ram kya po lekuh lan a ccung hae zemah muih khyh hae. Te Shaalim ram kya po lekuh lan a ccung hae zemah, tuin ram kya mah muih khyh hae. Te Benjamin pee kya po lekuh lan a ccung hae zemah muih khyh hae.

⁵Zuf pee kya he a thua hae tuh, Saul nynh a cceihkheih hae paw a mikungpaw kha, “Ki ccavae sih, tuhkhyhze tuh ka paaw nynh lann hae elang a thinphang leite aening elang a thinphangsei cih,” a cipya.⁶Thuasalama a mikungpaw nynh, “E khua kya Pachia ccungccapaw lu kheit a um, aning tuh sawtuanaw a ccoupaw nynh thua. A hopaw bya miakaw tuh accing. Amaw kalan cciatua sih; ah zui lanpaw laanpi kong kha poh oun hopah kho,” a cipya.⁷Saul nynh a mikungpaw kha, “Ah ccia lanze ccungccapaw kha pawmou ah ccyngpah cih? Pawccecize ah zaw lungkhu kya sanlou phe thang vae, Pachia ccungccapaw elang ccyngpya lanpaw lasung um khyh. Pawmou ah hoi?” a cipya.⁸Mikungpaw nynh Saul kha, “Dotua, ngun shekel tamae ka hoi; ah laanpi oun hopya nawlan tuh-e tuh Pachia ccungccapaw ka pya cih,” a cipya.⁹(Israel ram kya langmawlya tuh Pachia kha byakhia khylan a cceihpaw lukhakheit nynh, “Rang, muihtu kalan cceih sih,” cite leih a la ci; pawccecize atu profeh cikuhpaw hynh langmawlya tuh muihtu a la ci hae.)¹⁰Saul nynh a mikungpaw kha, “Ahoy; rang, cceih sih,” a cipya. Tetuh Pachia ccungccapaw a umnaw khua lang a cceih hae.

¹¹Khua kalan ccia lan sangpyng kya a kaethung lya hae khe tui the lan oun cceih hae paw liaccaw hae kha tungkuh hae zah, “E kya muihtu a um tou?” cite a khia hae.¹²Minmin nynh, “A um, nae malang khe mang um. Rangsakuh oh, atunin khuaccaaw hae nynh hminthyaa kya silawnaw rae lan a ci hae keiccuze khua lungkhu lang atasy mawkhe nynh a ccia.¹³Khua lungkhu lang he na tee takaw oh te, hminthyaa kalan ae lan a cciathung mawkhe amaw kha na la muih cih oh. Aning nynh silawnaw kha hythua a pya cih keiccuze aning a thua makhia ccungccaw hae nynh ae lan khyh hae; tukoute kopaw ccungccaw hae nynh a ae cih hae. Atu la cceihthung oh, amaw kha palou na la tungkuh cih oh,” a cipya hae.¹⁴Tukeiccuze khualae lang a cceihthung hae. Khualae he a tee hae tuh, hminthyaa kalan ccia khylan mih kalan yn cceihpaw Samuel kha a muih hae.

¹⁵Saul yn thua maw nin khe, Bawipaw nynh Samuel kya phykuh zah:¹⁶“Awkhualan atu ccyh kya Benjamin pee kya-e ccungccapaw lu kheit kha na kalan kae saw cih zah, tuh-e paw kha ka ccungccaw Israel hae uktu lang chitui na thuh cih. Aning nynh ka ccungccaw hae kha Filistin hae kuih kyate a khum cih hae; pawccecize mih siaruanaw tuh ka kya yn thua zah ka ccungccaw hae teingnaw kha ka muih vae,” a ci.¹⁷Samuel nynh Saul kha he a muih te, Bawipaw nynh Samuel kha, “Kae hopyapaw ccungccapaw kha khah-e paw nynh thua. Aning nynh ka ccungccaw hae kha a uk cih hae,” a cipya.¹⁸Te Saul nynh Samuel kha koikua kalan khe naenuakuh zah, “Pawkyamou muihtupaw inn a um? Beih yn hopya tua,” a cipya.¹⁹Samuel nynh Saul kha, “Muihtupaw tuh kamaw nynh ka thua; hminthyaa kalan ka malang khe cceih, pawccecize atunin kae te looh aekheih lan, te awkhualan awkhua nang kha kae cciasah cih zah na thinlung kya umpaw balyn kha kae hopah cih.²⁰Nin thum azo vae paw na lann hae kha tua nan vae hae, pawccecize phe muih vae hae. Te Israel hae balyn nynh hummou a ry hae? Nang te na minpaaw ccaawno hae kha thua khyh tou?” a cipya.²¹Saul nynh, “Kae tuh Israel phin hae kyaze adih huaccepaw Benjamin phinpaw ka thua khyh tou? Kae innbyn tuh Benjamin phin kya-e innbyn hae balyn kyaze anyaa huaccepaw nynh thua. Pawccemou tuhcite nae hopya?” a ci.

²²Tetuh Samuel nynh Saul te a mikungpaw kha cciakhae hae zah innkhaan lungkhu lang a teekhae hae, te a ko hae paw ccungccaw sung thum loukaw kyaze sawtua huanaw hmin kyakhe a haungsah hae.²³Te Samuel nynh anghyngpaw kha, “Nang kae pyapaw, taekhiate kae nungsahpaw hanpaw kha yn lawtua,” a cipya.²⁴Anghyngpaw nynh aphae te akyngkuhpaw kha lah zah Saul malang khe a nung. Samuel nynh, “Dotua, kae ccypyapaw tuh na malang nung athua vae. Aetua; pawccecize kopaw mikhia hae ryte na aekheih ccaw oh cite khah-e kha accyh khyapaw kya na malang nung athua vae,” a cipya.
Tuhcite tuin nin khe Saul tuh Samuel ryte a aekheih hae.²⁵Minmin tuh hminthyaa kyate khua lungkhu lang he a cceih hae tuh, innccuvaw khe Saul elang inaw phaepah hae zah a ih.²⁶Te khuadaetakaw khe Samuel nynh innccuvaw umpaw Saul kha ko zah, “Tho ccavae, kae saw cih,” a cipya. Saul tuh tho zah, Samuel ryte parouhte laanpi lang a cceih hae. Samuel nynh Saul Chitui Thuh

²⁷Khuate lang he a thua hae te, Samuel nynh Saul kha, “Na mikungpaw kha ah malang a la ccia lalo nawlan hopah, aning po a cceih lalo koute, nang tuh hein kya sosoh umhy hin, Pachia bya kha kae nysah cih,” a cipya.

¹Samuel nynh chitui paling kha lah zah Saul lu kha bu zah a myng koute, “Bawipaw nynh a ccungccaw Israel hae uktu lang chitui ae thuh vae. Bawipaw ccungccaw hae kha na uk cih hae zah, mih pepan e rhaw hae kuih kyate na khum cih hae. Te Bawipaw nynh a ccungccaw hae uktu lang chitui ae thuh vae cinawpaw muihsahnaw tuh hynh-e hynh athua cih:²Atunin ka kyate he na pou te, Benjamin pee Zelzah khua e Rachel shawku kyakhe pise lu ning na la tungkuh cih oh; minmin nynh nang kha, ‘Ccung lan na ccianuapaw lann hae kha a muih vae hae, atu tuh na paaw nynh lann hae kong kha a thinphang leite, nang na elang kha a thinphang zah: Ka ccapaw konglang hynh pawtemou ka cyih cih? a ci,’ cite ae la hopah cih hae.³Te tuin kyate po na la cceih cih zah Tabor phaesi ku kya na la thua cih; tuin kyakhe Bethel e Pachia kalan a cceih hae paw lu thum nynh nang kha ae la tungkuh cih hae, lu kheit nynh miaa taraw sa thum a ccyng cih, ccangpaw lu kheit nynh sanlou ccangthum kha a ccyng cih zah, ccangpaw lu kheit nynh savingtui-ung te misutui kaw kheit kha a ccyng cih.⁴Minmin nynh nang kha bya ae beih cih hae, sanlou ccangning kha ae pya cih hae zah na lawpakuh cih hae.⁵Tukoute Filistin rhawkaw hae umnaw Gibeath-elohim kya na la thua cih; tuin kya khualae lang na tee lyakhe phyly, tintang, daw, te tyng a khua hae paw kha mih malang nungte hminthyaa kyate oun cceihbung hae paw profeh hae phu kheit kha na la tungkuh cih oh; minmin tuh synku leite profehbya a ho cih hae.⁶Te Bawipaw muisaw tuh na tungvaw yn thua cih, nang mah minmin ryte synku leite profehbya na hobua cih zah mingccangpaw lang na tang cih.⁷Tuh-e muihsahnaw hae tuh he na tung hae te, cyi lan accan cite na muih thyhte la cyih, pawccecize Pachia tuh na kya a um.⁸Te kae ka malang khe Gilgal lang na la cceih ty cih; maee-ute silawnaw te ccawkunaw silawnaw kha rae khylan na kalan kae cceih cih. Na kya kae thua zah na cyi lanpaw kae muihsah mawlaezung nin sari nae la ngaw cih,” a cipya.

⁹Samuel kyate ccia lan vae cite Saul nynh a maeleihku lyakhe, Pachia nynh thinlung ccangpaw kha a pya; tuh-e muihsahnaw hae balyn tuh tuin nin khe accing.¹⁰Minmin tuh tuin kyate Gibeah kya he a thua hae te, profeh phu kheit nynh aning kha a tungku hae; te Pachia muisaw tuh aning kya yn thua zah, tuh-e hae ryte synku leite profehbya a hokheih hae.¹¹Saul nynh profeh hae ryte profehbya a hobuapaw kha langmawlya Saul a la nyh hae paw balyn nynh he a muih hae tuh, “Kish ccapaw tungvaw kya pawvema acyihkuh? Saul mah profeh lang a tangbua vae vosi?” cite lu kheit te lu kheit a hoku hae.¹²Tuin kya-e lu kheit nynh, “Mih paaw tuh hummou athua?” a ci. Tukeiccuze, “Saul mah profeh lang a tangbua vae vosi?” cipaw bya tuh byaphung lang a tang.¹³Saul tuh profehbya a ho koute ahangnaw hmin lang a cceih.

¹⁴Saul a pupaw nynh Saul te a mikungpaw kha, “Teilangmou na ccia oh?” cite khia hae zah, Saul nynh, “Lann hae ccung lan nynh kae ccia; muih kho thua lan khyh cipaw kae nyh te, Samuel kalan kae cceih,” a cipya.¹⁵Saul a pupaw nynh, “Samuel nynh paw bya mou ae hopya oh, yn hopya tua,” a cipya.¹⁶Saul nynh a pupaw kha, “Lann hae kha a muih vae hae cite yn hopya,” a cipya. Thuasalama Samuel nynh a hopyapaw siapharan lang tangnaw kong kha ccapyh san hopah khyh. Siapharan lang Saul Kong Phynaw

¹⁷Samuel nynh ccungccaw hae kha Mizpah khua kya Bawipaw kalan ko hae zah,¹⁸“Israel Pachia, Bawipaw nynh hynhte a ho, ‘Israel kha Izip ram kyate ka cciakhae zah Izip hae kuih kyate thuasah, nanning ae tuaa ae sah oh paw peenaw hae balyn kuih kyate thuasah kae luesah oh,’ a ci.¹⁹Thuasalama vawsawnawpi te riathaenaw na teing oh paw balyn kyate ae khum oh paw nae Pachia kha atunin na vua oh zah, ‘Thua khyh! Kae hanlan siapharan oun khangpah,’ na ci oh. Tukeiccuze atu tuh nae phin raveihte, nae puizia raveihte Bawipaw malang poutua oh,” a cipya hae.

²⁰Te Samuel nynh Israel phin hae balyn kha poukhae hae zah, Benjamin phin tuh ccungthydungte po athua.²¹Benjamin phin kha mih puizia raveihte Samuel nynh poukhae hae zah, Matri puizia hae tuh ccungthydungte po athua hae. Nyathyakou kya Matri puizia hae kha pise raveihte poukhae hae zah Kish ccapaw Saul tuh ccungthydungte po athua. Thuasalama Saul kha ccung hae zah muih khyh hae.²²Tukeiccuze Bawipaw kha bua khia hae zah, “Ccungccapaw kha hein kya yn thua tou?” a ci hae, te Bawipaw nynh, “Dotua, uccaw hae laku kya nynh a reku,” a ci.²³Tetuh ccue hae zah Saul kha tuin kyate a cciakhae hae. Ccungccaw hae malang he a thadyn tuh, tuh-e hae balyn laeze a lu te a raw tuh a hanghua.²⁴Samuel nynh ccungccaw balyn kyakhe, “Bawipaw nynh a popaw ccungccapaw hynh na muih oh tou? Ccungccaw hae balyn kyaze aning te a lokuh hae paw lu kheit san um khyh,” a ci. Tetuh ccungccaw balyn nynh, “Siapharan tuh a hiinshe sae vae sah!” cite a sia hae.

²⁵Samuel nynh ccungccaw hae kha siapharan kawhoinaw te a ryalaw kha a hopya hae; aning nynh tuh-e hae tuh ccauh kya zei zah Bawipaw malang a nung. Te Samuel nynh ccungccaw hae kha mih inn raveih lang a kisah hae.²⁶Saul mah Gibeah khua e a inn lang cceih zah, Pachia nynh mih thinlung a thosah hae paw, mih rawthung hae paw tuh a cceihbua hae.²⁷Thuasalama ccungkia lei hae paw nynh, “E paw nynh pawtemou oun khum kho cih?” a ci hae. Saul kha sarya hae zah lasung kha ccyngpah khyh hae. Thuasalama Saul tuh daebabi lan zya a um. Saul nynh Ammon hae Taenaw

¹Sawpaw sah kheit aro koute, Ammon minphuinpaw Nahash nynh cceihthung zah Jabesh-gilead khua kha a koihlu; te Jabesh khuaccaaw hae balyn nynh Nahash kha, “Kaening te nawccawkheihnaw rae lah, na rya kae lawpah cih,” a cipya hae.²Thuasalama Ammon minphuinpaw Nahash nynh minmin kha, “Nae ranglang mit kae khoi oh zah, tuhcite Israel hae balyn tungvaw kya thethyanaw ka rae ze nynh, nanning ryte nawccawkheihnaw ka rae cih,” a cipya hae.³Jabesh khua e piccan hae nynh Nahash kha, “Kaening nynh Israel ram pynpi kalan locceihtu hae kha kae saw nawlan hae, nin sari cia ccyh oun pya hin. Kaening oun khum lanpaw lu kheit san a um khyh ze, namaw kalan kae apkuh cih,” a cipya hae.⁴Locceihtu hae nynh Saul khua Gibeah kya a thua hae te, tuh-e kong tuh ccungccaw hae kha he a thaesah hae tuh, ccungccaw balyn tuh thawte a rah hae.

⁵Saul tuh tangnuapaw hae nulang zuikute loo langte yn thua; te Saul nynh, “Ccungccaw hae hynh pawccemou a raw hae?” a ci. Tukeiccuze Jabesh khuaccaaw hae thongpang kha a hopya hae.⁶Tuh-e thongpang he a thae te, Pachia muisaw tuh Saul tungvaw kya thungnaw te yn thua zah, myaryamaw a thinria.⁷Tangnua toi kheit kha lah zah zoihtatyh lan pong be zah locceihtu hae kuih khate Israel ram pynpi kalan ky hae zah, “Saul te Samuel nulang zuiku lan a pou ry leipaw miakaw tuh a tangnuapaw hae kha hynhcite cyipya athua cih!” cite a hosah pya hae. Tetuh ccungccaw hae tungvaw kya Bawipaw rawrinaw tuh yn thua zah, minmin tuh lungngingte oun pou hae.⁸Saul nynh Bezek khua kya he a pum hae tuh, Israel hae cciing thum, Judah hae thong sung sari acih hae.⁹Jabesh khua kyate oun thua hae paw locceihtu hae kyakhe, “Jabesh-gilead khuaccaaw hae kha, ‘Awkhualan, khuanin aso lyakhe luenaw na mue cih oh,’ cite la hopah oh,” a cipya hae. Locceihtu hae nynh cceih hae zah Jabesh khuaccaaw hae kha he a hopah hae tuh, mih lungtua.¹⁰Tukeiccuze Jabesh khuaccaaw hae nynh, “Awkhualan kya nae kalan kaemaw toulou kae apkuh cih zah, ahoy na ci oh hawte kae tungvaw na cyih cih oh,” a cipya hae.¹¹Awkhualan khe Saul nynh ccungccaw hae kha phu thum lang a pum hae. Awkhualan awkhua takaw te ryahmin lungkhu lang tee hae zah khuanin aso lan cia, Ammon hae kha a bae hae; te a hiinhy hae paw kha lu ning te a umkheihthya lei lan hae, a phia hae.

¹²Ccungccaw hae nynh Samuel kha, “ ‘Saul maesae nynh tou aening hynh oun uk cih?’ cite a hopaw kha hummou athua? Kae chia ccaw hae, kae kalan oun pya,” a cipya hae.¹³Thuasalama Saul nynh, “Atunin humhung kha mah chia thua lan khyh, pawccecize Bawipaw nynh Israel hae kya atunin luenaw a thuakhae vae,” a ci.

¹⁴Samuel nynh ccungccaw hae kha, “Rang oh, Gilgal khua lang cceih oh sih lah, tuin kyakhe siapharan lang tangnaw kha thawsah thui oh sih,” a cipya hae.¹⁵Tukeiccuze ccungccaw balyn tuh Gilgal khua lang cceih hae zah, Gilgal khua kya Bawipaw malang khe Saul kha siapharan lang a khang hae. Tuin kyakhe Bawipaw kalan ccawkunaw silawnaw kha rae hae zah, Saul te Israel hae balyn tuh myaryamaw mih lungpaw. Samuel nynh Bya A Hopya hae

¹Samuel nynh Israel hae balyn kyakhe, “Nae hopya oh paw balyn kha kae ngaepah oh zah siapharan kha kae khangpya vae oh.²Dotua oh, atu tuh siapharan nynh ae cciakhae vae cih oh; kae tuh ka taw vae zah ka sang mah apaw vae, ka ccapaw hae tuh nae kya a um hae. Ka di lyate atunin cia kae cciakhae vae oh.³Hein kya mang ka umphia hynh; Bawipaw malang te chitui thuh athuapaw malang kya ccaekiakhanku tua oh. Ahum tangnuapaw mou ka law boi? Ahum lann mou ka law boi? Hummou ka ling boi? Hummou ka tuaa ka sah boi? Ka mit kha mohsaku khylan hum kuih kya-e mou pyaruh kha ka lawku boi? Ka lawkupaw a la um lanze, kae pyaru cih oh,” a cipya hae.⁴Minmin nynh, “Kaening hynh nae ling khyh, na tuaasah khyh, humhung kuih kya-e uccaw mah na lah khyh,” a cipya hae.⁵Samuel nynh minmin kha, “Ka kuih kya pawpaw mah na muih khyh oh paw kong kya Bawipaw tuh nae malang ccaekia thua zah, chitui thuh athuapaw ccungccaw tuh atunin ccaekia nynh thua,” a cipya hae. Te minmin nynh, “Bawipaw tuh ccaekia nynh thua,” a ci hae.

⁶Samuel nynh ccungccaw hae kyakhe, “Moses te Aaron kha ryalaw pya hae zah nae minpaaw hae kha Izip ram kyate a poukhae hae paw Bawipaw tuh ccaekia nynh thua.⁷Nanning te nae minpaaw hae hanlan Bawipaw nynh khumnaw rya a lawpaw balyn kha kae hopah cih oh, tukeiccuze atu Bawipaw malang bya kae pia ccaw oh thadyn oh.⁸Jakob nynh Izip ram thua zah Izip hae nynh minmin kha he a tuaa a sah hae tuh, nae minpaaw hae nynh Bawipaw kalan sia hae zah Bawipaw nynh Moses te Aaron kha a saw hae, minmin nynh nae minpaaw hae kha Izip ram kyate poukhae hae zah, e hmin kya a umsah hae.⁹Thuasalama Bawipaw mih Pachia kha a ning hae; te aning nynh minmin kha Hazor siapharan Jabin a rhawbawipaw Sisera kuih kalan thuasah, Filistin hae kuih kalan thuasah, Moab siapharan kuih kalan thuasah a zua hae; rhaw hae nynh minmin kha a tuk hae.¹⁰Te minmin nynh Bawipaw kalan sia hae zah, ‘Bawipaw kha kae vua zah Baal pachia hae te Astartes pachia hae kha rya kae lawpya keiccuze kae sei vae; thuasalama atu kae rhaw hae kuih kyate oun luesah lah, nang kha kae beik cih,’ a ci hae.¹¹Te Bawipaw nynh Jerubbaal, Barak, Jefthah te Samuel kha saw hae zah, nae pepan e nae rhaw hae kuih kyate ae luesah oh zah, khyndadyh lan na um oh.¹²Ammon hae siapharan Nahash nynh nanning rawsete ae ccianua oh paw kha he na nyh oh te, Bawipaw nae Pachia tuh nae siapharan lang mang a tang pite, kae kha, ‘Thua khyh, siapharan nynh oun uk sah,’ cite nae hopya oh.¹³Dotua oh, na poku oh paw te na ngia oh paw siapharan tuh hein kya a um vae; dotua oh, Bawipaw nynh nae hanlan siapharan ae nungpya vae oh.¹⁴Bawipaw kha na rih oh zah amaw rya kha lawpyate, a bya kha mah ngaete, Bawipaw kawbya kha rawse leite, nanning te ae uk oh paw siapharan nynh Bawipaw nae Pachia kha na zui oh lanze ahoy cih.¹⁵Thuasalama Bawipaw bya kha ngae leite, Bawipaw kawbya kha na rawse oh ze, Bawipaw kuih nynh nanning te nae siapharan kha ae rawse cih oh.¹⁶Tukeiccuze atu phang thadyn oh lah, Bawipaw nynh nae muihnaw kya a cyih cih paw hynh-e alesaepaw uccaw hynh dotua oh.¹⁷Atunin hynh chanvuih rue ccyh thua khyh khaw? Kholungthyhsah zah khuaa a rawsah nawlan, Bawipaw kha ka ko cih; nae hanlan siapharan ngiakute Bawipaw malang na rae oh paw hoyleinaw tuh myarya ale cipaw kha na nyh cih oh zah na muih cih oh,” a cipya hae.¹⁸Tukeiccuze Samuel nynh Bawipaw kha ko zah tuin nin khe Bawipaw nynh kholungthyhsah zah khuaa a rawsah; te ccungccaw balyn nynh Bawipaw te Samuel kha myarya a rih hae.

¹⁹Ccungccaw balyn nynh Samuel kha, “Na see hae kaening hynh kae chi khyh nawlan, Bawipaw na Pachia kalan saw beih oun sangpah; pawccecize kae seinaw balyn vawlan khe kaemaw elang siapharan ngiakupaw hoyleinaw kha kae biachih vae,” a cipya hae.²⁰Te Samuel nynh ccungccaw hae kha, “Rih nan oh; e hoyleinaw balyn hynh na rae vae oh, tuhzemah Bawipaw zuinaw kyate ccanglang maeku leite, nae thinlung balyn te Bawipaw rya kha lah oh;²¹a thane leipaw te a khum kho leipaw, amia um leipaw uccaw hae nulang zuikuh sei nan oh, pawccecize khah-e hae tuh ccungkia leipaw nynh thua hae.²²Alesaepaw a min keiccuze Bawipaw nynh a ccungccaw hae kha vua lan khyh hae, pawccecize nanning kha amaw ccungccaw lang raeku lanpaw kha Bawipaw lungry nynh thua.²³Tuhpiaze nae hanlan sawsang leite ka uk keiccuze Bawipaw tungvaw ka sei lanpaw tuh ka kyate sawkuh sah. Akyhpaw te adingpaw laanpi kha kae ccangpah cih oh.²⁴Bawipaw kha rih oh lah, nae thinlung balyn te lungzite a rya kha lah oh; pawccecize nae hanlan ryalaw lepaw a lawpaw kha tua oh.²⁵Thuasalama hoyleinaw kha na rae ung oh zetuh, naemaw te nae siapharan kha parouh mawte ae maemih cih oh,” a cipya hae. Aphung Thua leipaw Saul Silawnaw

¹Saul nynh a uk takaw lya tuh kum … acih vae; aning nynh … kum te kum ning lungkhu Israel kha a uk.

²Saul nynh Israel hae thong thum kha a po hae; thong ning tuh Saul ryte Mikmash te Bethel muaram kya um hae zah, thong kheit tuh Janathan ryte Benjamin ram, Gibeah khua kya a um hae; tuhlaepaw ccungccaw hae kha mih umnaw mih bu raveih langkhe a kisah hae.³Jonathan nynh Beba khua e Filistin rhawkaw hae kha tae zah, tuh-e tuh Filistin hae nynh a thae hae. Te Saul nynh ram pynpi phe lekuh lan, “Hebru hae nynh thae hae sah!” cite mungkae a tu.⁴Saul nynh Filistin rhawkaw hae a tae hae cipaw te Filistin hae nynh Israel hae kha a hua hae cipaw kha Israel hae balyn nynh he a thae hae tuh, Saul kalan Gigal khua langkhe ccungccaw hae kha a ko hae.

⁵Filistin hae tuh Israel hae te tukku lan marangle thong sung thum, marang rhawkaw thong taruh te rili kin e laesia zeih acih hae paw rhawkaw hae tuh a sueluakuh hae; te cceihthung hae zah Beth-aven khua nithua lang e Mikmash khua khe a rya hae.⁶Israel hae nynh vawsawnaw kya nynh kae um cipaw kha he a nyh hae tuh (pawccecize rhawkaw hae tuh myarya a teing hae), ccungccaw hae tuh lungkarung hae, akhunaw hae, lungpi hae, shawku hae te tuisung hae lungkhu khe a rekuh hae.⁷Abang Hebru hae tuh Jordan vaw kha zua hae zah Gad ram te Gilead ram lang a cceih hae. Saul tuh Gilgal khua kya um ung zah, ccungccaw hae balyn nynh thyngkute a zui hae.

⁸Samuel nynh accyh a khyapya thyhte nin sari a ngaw; thuasalama Samuel tuh Gilgal lang yn thua khyh zah ccungccaw hae tuh Saul kyate a ccue vae hae.⁹Tukeiccuze Saul nynh, “Maee-ute silawnaw te ccawkunaw silawnaw kha hynhlang ka kalan oun cciakhae oh,” a cipya hae. Aning nynh maee-ute silawnaw kha a rae.¹⁰Maee-ute silawnaw kha he a rae kou takaw khe Samuel tuh yn thua; Saul nynh tungku khylan cciadue zah salaam a pya.¹¹Samuel nynh, “Pawmou na la cyi?” a cipya. Saul nynh, “Ccungccaw hae nynh ka kyate a ccue hae paw kha thuasah, khyapaw accyh kya nae thua khyhpaw kha thuasah, Filistin hae tuh Mikmash khua kya a sueluaku hae paw kha thuasah he ka nyh te,¹²‘Filistin hae nynh ka umnaw Gilgal khua lang yn ccianua vae cih hae, Bawipaw thawccinaw kha ka ngia loh khyh,’ ka ci zah, tukeiccuze kamaw te kamaw nangsekute maee-ute silawnaw kha ka rae,” a cipya.¹³Samuel nynh Saul kha, “Na cyipaw hynh ngaeenaw ccaccing nynh thua; Bawipaw na Pachia nynh ae pyapaw kawbya kha na zui khyh. Na la zui zetuh, Bawipaw nynh na peenaw kha Israel hae kya zungzae a tynsah cih,¹⁴thuasalama atu tuh na peenaw tyn vae lan khyh; Bawipaw nynh a rypaw thinlung a ccyngkuhpaw ccungccapaw kha a ccung vae; Bawipaw nynh kaw ae pyapaw kha na zui khyh keiccuze, Bawipaw nynh aning kha a ccungccaw hae a uktu lang a khang vae,” a cipya.¹⁵Te Samuel tuh thokuh zah Gilgal khua kyate Benjamin ram, Gibeah khua lang a cceih. Tuhlaepaw ccungccaw hae tuh rhawkaw hae kalan ccia khylan Saul kha a zui hae; minmin tuh Gilgal khua kyate Benjamin ram, Gibeah khua lang a cceih hae. Rhawtuk lan Paccynkunaw
Saul nynh a kya umpaw rhawkaw hae kha ria hae zah za taruh loukaw acih.¹⁶Saul, a ccapaw Jonathan te mih kya umpaw ccungccaw hae tuh Benjamin ram, Geba khua kya a um hae; Filistin hae tuh Mikmash khua kya a rya hae.¹⁷Filistin hae ryahmin kyate ccungccaw thiingtu hae tuh phu thum lante a pou hae; phu kheit tuh Shual ram, Ofrah khua lang a cceih hae,¹⁸ccangpaw phu kheit tuh Beth-horon khua lang cceih hae zah, ccangpaw phu kheit tuh ramkaw lang Zeboim accya lang a hawipaw mua langkhe a cceih hae.

¹⁹Israel ram pynpi kya sivawsuhtu lu kheit san um khyh, pawccecize Filistin hae nynh, “Hebru hae nynh thaloi hae, ccoi hae kha raekuh lan khyh hae,” a ci hae;²⁰tukeiccuze Israel hae balyn tuh mih tamuin, mih muinzung, hae te rungkou kha phe he lan tawku khylan Filistin hae kalan leih a cceih hae.²¹Tamuin te muinzung tawnaw mee tuh shekel pum thum pum ning thua zah, hae tawnaw mee te thuingnawpaw ccungngue bingnaw mee tuh shekel pum thum pum kheit nynh thua.²²Tukeiccuze rhawtuk nin kya Saul te Jonathan holeite, mih kya umbua hae paw ccungccaw hae tuh lu kheit sanmah thaloi te ccoi hoi khyh hae.

²³Te Filistin rhawkaw hae phu kheit tuh Mikmash laansi langkhe a cceih hae.

¹Nin kheit tuh Saul ccapaw Jonathan nynh a rhawtuk-uccaw a ccyngtu ccangvaepaw kha, “Rang, khuhlang raw e Filistin rhawkaw hae kalan cceih sih,” a cipya. Thuasalama a paaw kha hopah khyh.²Saul tuh Gibeah khua atelang e Migron khua kya umpaw ccalee ku kaw khe a um; amaw kya umpaw rhawkaw hae tuh za taruh loukaw acih hae,³Shiloh khua kya umpaw Bawipaw ranpibawi Eli ccapaw Finehas a ccapaw Ikhabod a unopaw Ahitub ccapaw Ahijah tuh ranpibawi angki ccyng zah a umbua. Jonathan a cceih vae cipaw kha ccungccaw hae nynh nyh khyh hae.⁴Jonathan nynh Filistin rhawkaw hae kalan ccia lan a paccynkunaw laansi kyakhe voi ning mawte chialungsakan hae um zah, ccangkheit min tuh Bozez thua zah, ccangpaw ccangkheit min tuh Seneh nynh thua.⁵Chialungsakan ccangkheit tuh thahlang khe Mikmash khua lang hawi zah, ccangpaw ccangkheit tuh alia langkhe Geba khua lang a hawi.

⁶Jonathan nynh a rhawtuk-uccaw a ccyngtu ccangvaepaw kha, “Rang, khuh-e vingdungawkuh lei hae paw rhawkaw hae kalan cceih sih; Bawipaw nynh aening hanlan rya poh oun lawpah kho; pawccecize ccungccaw alung liate thuasah, azya liate thuasah Bawipaw khumnaw kha humhung nynh mah khee kho lan khyh,” a cipya.⁷A rhawtuk-zunghe ccyngtu nynh, “Na lung nynh a ry hawte cyih ccaleih. Na kya mang ka um; na tuanaw hawte nynh ka tuanaw tuh athuabua,” a cipya.⁸Tetuh Jonathan nynh, “Khuh-e ccungccaw hae kalan ccia lan zah langsapyaku lan hae.⁹Minmin nynh, ‘Nae kalan kae thua maw cia oun la ngaw oh,’ a ci hae ze, ah umnaw hmin kya thadyn lan zah minmin kalan ccia lei lan.¹⁰Thuasalama minmin nynh, ‘Kae kalan oun cceih oh,’ a ci hae ze, ccia lan; pawccecize Bawipaw nynh minmin kha aening kuih kya oun pya vae. Tuh-e tuh aening elang muihsahnaw athua cih,” a cipya.¹¹Tukeiccuze parouh mawte Filistin rhawkaw hae kalan khe a langsapyaku hae; te Filistin hae nynh, “Dotua oh, Hebru hae tuh a rekunaw hae akhunaw kyate oun pou vae hae,” a ci hae.¹²Rhawkaw hae nynh Jonathan te a rhawtuk-zunghe ccyngtu kha ko hae zah, “Kae kalan rang oh, hankhakheit kae muihsah cih oh,” a cipya hae. Jonathan nynh a rhawtuk-zunghe ccyngtu kha, “Ka nulang te yn zui; pawccecize Bawipaw nynh minmin kha Israel kuih kalan a pya vae hae,” a cipya.¹³Te Jonathan tuh a kuih a ccu te vawthung zah, a rhawtuk-zunghe ccyngtu nynh a nulang te a zui. Filistin hae tuh Jonathan malang khe khuliakuh hae zah, a nulang te a rhawtuk-zunghe ccyngtu nynh a chia hae.¹⁴Jonathan te a rhawtuk-zunghe ccyngtu nynh masaty a chia hae paw kyatuin, ekah angankuh loukaw akopaw laephi kyakhe, lu kuin loukaw a chia hae.¹⁵Ryahmin kya, loo kya te ccungccaw balyn kyakhe siikunaw a um; rhawviatu rhawkaw hae te thiingtu hae heize a thyngkuh hae; innrysuekuh zah siikunaw pipi lang a tang.

¹⁶Benjamin ram, Gibeah khua e Saul rhawviatu hae nynh do hae zah, nulang malang phiariphiarae a ccue hae paw Filistin hae kha a muih hae.¹⁷Saul nynh a kya umpaw rhawkaw hae kha, “Milu ria oh, hummou aening kyate a pou, dotua oh,” a cipya hae. Milu a ria hae tuh, Jonathan te a rhawtuk-uccaw ccyngtupaw um vae khyh hae.¹⁸Saul nynh Abijah kha, “Pachia thingkua kha hynhlang yn lah,” a cipya. Pawccecize tuin ccyh lya tuh Pachia thingkua tuh Israel hae kya a cceihbua.¹⁹Saul nynh ranpibawi a hopya lyakhe, Filistin hae ryahmin kya ngaluin-ngaluin ccaepaw roi tuh houhouh athan; Saul nynh ranpibawi kha, “Na kuih kha sawbung tua,” a cipya.²⁰Saul te a kya umpaw ccungccaw balyn tuh sueluakuh hae zah rhawtuknaw kalan a cceih hae; Filistin hae tuh mimaw te mimaw thaloi te baekuh hae zah, lungmuanaw pipi a um.²¹Langmaw lyaze Filistin hae kya um hae zah minmin ryte ryahmin kalan a cceihkheih hae paw Hebru hae mah Saul te Jonathan ryte a umkheih hae paw Israel hae kalan maekuh hae zah a umbua vae hae.²²Tuhawte, Efraim muaram kya a rekuh hae paw Israel hae balyn nynh Filistin hae a ccue vae hae cipaw he a thae hae tuh, rhawtuknaw kya panbua hae zah Filistin hae kha thawte a deehui bua hae.²³Tuhcite Bawipaw nynh Israel kha tuin nin kya taenaw a pya.
Rhawtuknaw tuh Beth-aven khua khunglang po athua, Saul ryte um hae paw rhawkaw hae tuh ria hae zah mih balynte thong haw loukaw acih hae. Rhawtuknaw tuh Efraim muaram lang cia apazaekuh. Saul nynh Tuaty leite Thyalawnaw A Rae

²⁴Saul nynh tuin nin khe tuaty leite rya a lawsei. Rhawkaw hae tungvaw thyalawnaw kha rae zah, “Ka rhaw hae kha phu ka law maw hae, zete ccyh athua maw looh a aepaw miakaw tuh thyalawnaw mue sah,” a ci. Tukeiccuze rhawkaw hae tuh looh ae khyh hae.²⁵Rhawkaw hae balyn nynh khoibu kha thuanua hae zah, laekhu kya khoitui a um.²⁶Rhawkaw hae nynh ramkaw a thua hae tuh, khoitui tuh accaw cciamang; thyalawnaw kha a ri hae keiccuze mih kuih kha mih khalang lungkhu lang pukuh khyh hae.²⁷Thuasalama a paaw nynh rhawkaw hae kya thyalawnaw bya a hopaw kha Jonathan nynh nyh khyh; tukeiccuze a kuih te a ccyngpaw hoitang dung khate khoidaw kha sua zah a kuih te he a ae tuh a mit a ccaethya hua.²⁸Rhawkawpaw lu kheit nynh, “Na paaw nynh rhawkaw hae kha thyalawnaw te tynkaring lan hopah hae zah, ‘Atunin looh aepaw miakaw tuh thyalawnaw mue sah,’ a ci. Tukeiccuze rhawkaw hae tuh mih thawzya vae,” a cipya.²⁹Tetuh Jonathan nynh, “Ka paaw nynh ram hynh vawsaw a pya; e khoitui ccapyh ka taangtua keiccuze ka mit accaethyapaw hynh dotua oh.³⁰Rhawkaw hae nynh mih rhaw hae kya-e luadepaw uccaw kha atunin rythyte a ae hae ze, pawcih baban mou ahoyhua cih; atu tuh Filistin hae kha patae ah theih kho vae khyh oh,” a ci.

³¹Tuin nin kya Filistin hae kha Mikmash khua kyate Aijalon khua kyacia a chia hae, rhawkaw hae tuh myarya mih thawzya;³²tukeiccuze rhawkaw hae nynh luadepaw uccaw kha ccianua hae zah tuu hae, tangnuapaw hae te vaetuataw hae kha lah hae zah laephi kya a theih kou hae te, rhawkaw hae nynh sachii ryte a aede hae.³³Te tuh-e kong tuh Saul kyakhe, “Dotua, rhawkaw hae nynh chiise ryte aede hae zah Bawipaw kya a sei hae,” cite a hopya hae. Te Saul nynh, “Nanning tuh nae lungzi vae khyh; hynhlang ka malang hin lungtungpi ccangkheit oun tou oh,” a cipya hae.³⁴Saul nynh, “Rhawkaw hae laku lang la cceih oh lah, minmin kyakhe, ‘Ccungccaw balyn nynh mih tangnuapaw khyhze mih tuu kha oun cciakhae hae sah lah, e kyahin theih hae sah lah, ae hae sah; chiise ryte aedete Bawipaw kya sei nan oh,’ cite hopah oh,” a cipya hae. Tukeiccuze tuh-e khuazi khe rhawkaw hae balyn nynh mih tangnuapaw hae kha oun cciakhae hae zah tuin kyakhe a chia hae.³⁵Te Saul nynh Bawipaw hanlan silawhang kha a duapya; tuh-e tuh Bawipaw elang a duapyapaw masaty silawhang nynh thua. Jonathan A Chinaw Nae

³⁶Te Saul nynh, “Khuazi khe Filistin hae kha deehui oh sih lah, awkhua khuadae cia minmin kha theih oh sih; lu kheit san haang nan oh sih,” a cipya hae. Minmin nynh, “Ahoy na ci hawte cyih ccaleih,” a ci hae. Thuasalama ranpibawi nynh, “E kyahin Pachia kalan naekuh hin oh sih,” a ci.³⁷Tukeiccuze Saul nynh Pachia kha ngia zah, “Filistin hae kha ka deehui cih hae tou? Minmin kha Israel hae kuih kalan na pya cih hae tou?” a ci. Thuasalama tuin nin kya Pachia nynh byakhung khyh.³⁸Saul nynh, “Ccungccaw cciakhaetu hae balyn, hynhlang rang oh; e seinaw hynh atunin pawtemou yn tho cipaw kha ccungtua oh sih.³⁹Pawccecize Israel a khumtu Bawipaw tuh a hiin thyhte, tuh-e seinaw tuh ka ccapaw Jonathan tungvaw a um lanze heize, aning tuh a chih ccaccing cih!” a ci. Thuasalama ccungccaw hae balyn laku kya bya a khungrupaw lu kheit san um khyh.⁴⁰Saul nynh Israel hae balyn kyakhe, “Nanning tuh san kheit kya na um cih oh zah, kae te ka ccapaw Jonathan tuh san kheit kya kae um cih,” a cipya hae. Ccungccaw hae nynh Saul kha, “Ahoy na ci hawte cyih ccaleih,” a cipya hae.⁴¹Te Saul nynh, “Pou Bawipaw , Israel Pachia, pawccemou atunin na ryalahtu hynh bya nae khung khyh? E cyiseinaw hynh ka tungvaw thuasah, ka ccapaw Jonathan tungvaw thuasah a um ze, pou Bawipaw , Israel Pachia, Urim kha oun pya; thuasalama e cyiseinaw hynh na ccungccaw Israel hae tungvaw a um ze, Thummim kha oun pya,” a ci. Te ccungthydungnaw tuh Jonathan te Saul tungvaw khe ccah zah ccungccaw hae tuh a lue hae.⁴²Te Saul nynh, “Kae te ka ccapaw Jonathan laku kya ccungthydungnaw kha rae oh,” a ci. Te Jonathan kya accah.

⁴³Tetuh Saul nynh Jonathan kha, “Pawmou na cyisei, yn hopah,” a cipya. Jonathan nynh, “Ka ccyngpaw hoitang dung khate khoitui beihtaraw kha ka taangtua; hein kya mang ka um, ka chih cih,” a cipya.⁴⁴Saul nynh, “Pachia nynh ka tungvaw tuhcite cyih sah lah, tuhlaeze mah cyih vae sah; na chih ccaccing cih, Jonathan!” a cipya.⁴⁵Te ccungccaw hae nynh Saul kha, “Israel tungvaw kya hynh-e taenaw lepaw a raepaw Jonathan tuh tou a chih cih? Tuh-e tuh cyihkuh nan sah! Bawipaw tuh a hiin thyhte, a lu kya-e a sangrua ccangkheit sanmah laekhu lang ccah lan khyh; pawccecize aning tuh Pachia ryte atunin rya a lahkheih hae,” a cipya hae. Tuhcite ccungccaw hae nynh Jonathan kha shawkhaw hae zah chih khyh.⁴⁶Te Saul nynh Filistin hae kha deehui leite a kitaw hae; Filistin hae tuh mih umnaw hmin lang a cceih hae. Saul Rhawtuknaw

⁴⁷Saul nynh Israel hae siapharan lang he a tang te, a pepan e a rhaw hae balyn—Moab hae, Ammon hae, Edom hae, Zobah siapharan hae te Filistin hae kha rhaw a tuk hae; rhaw a tuknaw miakaw kya minmin kha a tae hae.⁴⁸Rawthungte rhawtuk zah Amalek hae kha a chia hae, Israel hae kha minmin a luadetu hae kuih kyate a luesah hae.

⁴⁹Saul ccapaw hae tuh Jonathan, Ishvi te Malkhishua nynh thua hae; a ccanung hae lu ning min tuh: atawccanung min tuh Merab cikuh zah, asoihuanung min tuh Mikhal acikuh.⁵⁰Saul a zu min tuh Ahinoam cikuh zah Ahimaaz ccanung nynh thua. A rhawkaw hae bawipaw min tuh Abner cikuh zah Saul a paaw uno Ner ccapaw nynh thua;⁵¹Saul a paaw tuh Kish thua zah, Abner paaw Ner tuh Abiel ccapaw nynh thua.

⁵²Saul a hiin lungkhu balyn tuh Filistin hae kha thawte a tuk hae; Saul nynh athawsaepaw te arawthungpaw a muihpaw miakaw kha a rhawkaw lang a khang hae. Saul nynh Amalek hae Taenaw

¹Samuel nynh Saul kha, “A ccungccaw Israel hae uktu siapharan lang tang khylan nang kha chitui thuh lan Bawipaw nynh kae hynh yn saw; tukeiccuze atu Bawipaw bya hynh ngaetua.²Vaaw Bawipaw nynh hynhte a ho, ‘Israel hae nynh Izip ram kyate a pou lya hae ze, minmin kha rawsete a doutu Amalek kha de ka tah cih.³Atu la cceih lah, Amalek kha la tuk, mih hoipaw balyn kha khaleih la roh; minmin kha haang nan hae, nopi te pise, imua te nosi, tangnuapaw te tuu, kalauh te lann kha theih hae,’ a ci,” cite a hopya.

⁴Tukeiccuze Saul nynh ccungccaw hae kha pum hae zah Telaim khua khe milu a ria hae, ccu rhawkaw cciing ning, Judah rhawkaw hae thong haw acih hae.⁵Saul tuh Amalek hae khua kya thua zah accya khe a buh hae.⁶Saul nynh Ken ccungccaw hae kha, “Cceih oh! Pou oh! Amalek hae kyate la cceih oh, minmin ryte kae rohbia sei cih oh; pawccecize Israel hae nynh Izip ram kyate a pou lya hae ze, minmin kha ngaethya na umsah oh,” a cipya hae. Tukeiccuze Ken ccungccaw hae tuh Amalek hae kyate a pou hae.⁷Saul nynh Amalek hae kha Havilah khua kyate Izip nithua lang umpaw Shur khua kyacia a tae hae.⁸Amalek siapharan Agag kha a hiin te a kyng, thuasalama ccungccaw balyn kha tuh thaloi te khaleih a ro hae.⁹Saul te ccungccaw hae nynh Agag te ahoy huaccepaw tuu, vaetua, athopaw tuutaw te ahoypaw uccaw balyn kha khaleih ro leite a haang hae; anyaapaw te ccungkia leipaw balyn kha tuh khaleih a ro hae. Saul kha Siapharan kyate Vuanaw

¹⁰Bawipaw bya tuh Samuel kalan yn thua zah:¹¹“Saul kha siapharan lang ka la khangpaw tuh ka ngaesikuh, pawccecize kamaw zuinaw kyate maeleihkuh zah, kaw ka pya hae paw kha zui khyh,” a ci. Samuel tuh a thinria zah Bawipaw kalan azi zidae a sia.¹²Samuel tuh Saul te tungku khylan awkhua takaw te tho zah a cceih, te Samuel kyakhe, “Saul tuh Karmel khua lang cceih zah, ning leinawpaw lungbing kha a bingku, te po sulue zah Gilgal khua lang a cceih,” cite a hopya hae.¹³Samuel nynh Saul kalan he a thua te, Saul nynh amaw kha, “Bawipaw nynh hythua ae pya vae sah; Bawipaw nynh kaw yn pya thyhte ka cyi vae,” a cipya.¹⁴Thuasalama Samuel nynh, “Athua lanze, ka naw te ka thaepaw tuu a siapaw roi te vaetua a siapaw roi tuh pawmou athua?” a cipya.¹⁵Saul nynh, “Amalek hae kyate oun thuakhae hae paw nynh thua; pawccecize ccungccaw hae nynh ahoy huaccepaw tuu te vaetua kha Bawipaw na Pachia kalan silaw nawlan a haang hae; tuhlaepaw kha tuh khaleih kae ro,” a cipya.¹⁶Te Samuel nynh Saul kha, “Zya dae! Atazi Bawipaw nynh yn hopyapaw kha kae hopah cih,” a cipya. Aning nynh, “Hotua,” a cipya.

¹⁷Samuel nynh, “Namaw na tuanaw kya adihpaw na thua zemah, nang tuh Israel minphuin hae lu na thua khyh tou? Bawipaw nynh Israel siapharan lang chitui ae thuh.¹⁸Bawipaw nynh rya ccangkheit law lan ae saw zah, ‘La cceih lah, misei hae, Amalek hae kha marya la roh hae, maemih athua mawlaezung hae la tuk hae,’ a ci.¹⁹Athua lanze, pawccemou Bawipaw bya kha na ngae khyh? Pawccemou rhaw hae kya-e luadepaw uccaw kha na lah kangmaw zah, Bawipaw muihnaw kya hoyleinaw kha na rae?” a cipya.²⁰Saul nynh Samuel kha, “Bawipaw bya kha ka ngae, Bawipaw nynh yn sawnuathepaw ryalaw kha ka ccianua, Amalek siapharan Agag kha ka thuakhae zah, Amalek hae kha marya ka ro hae.²¹Thuasalama luadepaw uccaw kya-e tuu te vaetua, ro lanpaw uccaw hae kya-e ahoy huaccepaw kha Gigal khua kya Bawipaw na Pachia kalan silaw nawlan cite ccungccaw hae nynh a law hae,” a cipya.²²Te Samuel nynh,“Bawipaw bya zuinaw kyakhemyarya a lungrythua hawte,maee-ute silawnaw teccangpaw silawnaw hae kyakheBawipaw tuh myaryaa lungrythua cih tou?Thanccingte, kawngaenaw tuhsilawnaw laeze ahoyhua,bya zuinaw tuh tuutepawatho laeze ahoyhua.²³Pawccecize kaw-einaw tuhpawepaw hawte seinaw le zah,lungkhungnaw tuhhoyleinaw te zohtuhbeiknaw hawte seinaw ale.Bawipaw bya khana vua vae keiccuzenang kha siapharan thuanaw kyateae vua vae,” a cipya.

²⁴Saul nynh Samuel kha, “Ka sei vae; ccungccaw hae kha ka rih hae zah mih bya ka ngae keiccuze Bawipaw kawbya te na bya kha ka eisei vae.²⁵Tukeiccuze atu, ka seinaw yn ngaethya lah, Bawipaw kha ka beik ccaw, kamaw te kikheih sih, cite kae ngiaku,” a cipya.²⁶Samuel nynh Saul kha, “Nang te kikheih lei lan; pawccecize Bawipaw bya kha na vua zah, Bawipaw nynh nang kha Israel siapharan thuanaw kyate ae vua vae,” a cipya.²⁷Samuel nynh ccia lan vae cite a maeleihku lyakhe, Saul nynh a boei dung apaki kha kyng zah thoh seiikuh.²⁸Te Samuel nynh Saul kha, “Bawipaw nynh Israel peenaw kha na kyate atunin ccaccei hin thoh seii vae zah, nang laeze ahoy huapaw na innpaw kalan a pya vae.²⁹Tuhpiaze, Israel Phu-enaw Pachia nynh tuh hynbya ho lan khyh zah a tuanaw mah paleihkuh lan khyh, aning tuh ccungccaw thua khyh zah a tuanaw mah paleihkuh lan khyh,” a cipya.³⁰Te Saul nynh, “Ka sei vae; tuhzemah ka ccungccaw hae kya-e piccan hae malang te Israel hae malang kya sawtuanaw yn pya lah, Bawipaw na Pachia kha ka beik ccaw, kamaw te kikheih sih,” a cipya.³¹Tukeiccuze Samuel tuh Saul nulang a zuikuh; te Saul nynh Bawipaw kha a beik.

³²Tetuh Samuel nynh, “Amalek hae siapharan Agag kha hynhlang ka kalan yn cciakhae oh,” a ci. Te Agag tuh rarymamaw lante Samuel kalan a cceih. Agag nynh, “Thanccingte, e hynh myarya ccihpaw chinaw nynh thua,” a ci.³³Thuasalama Samuel nynh,“Na thaloi nynh nopi hae khaccaaw leite a nung hae hawte,na nung tuh nopi hae kyazeccaaw leite a um cih,”a cipya. Te Samuel nynh Agag kha Gilgal khua Bawipaw malang khe zoihtatyh lan a bae.

³⁴Te Samuel tuh Ramah khua lang a cceih; Saul tuh Gibeah khua kya umpaw amaw inn lang a cceih.³⁵Samuel nynh Saul kha a chi makhia muih vae khyh, thuasalama Samuel tuh Saul elang a ngaethah. Bawipaw nynh Saul kha Israel siapharan lang a la khang keiccuze a ngaesikuh. Siapharan lang David Chitui Thuhnaw

¹Bawipaw nynh Samuel kha, “Hohseciamou Saul elang na ngaethah cih? Israel hae kya siapharan thuanaw kyate aning kha ka vua vae. Na saki kya chitui ruinkuh lah, cciatua; nang kha Bethlehem khuapaw Jesse kalan kae saw cih, pawccecize a ccapaw hae kyakhe kamaw elang siapharan lu kheit kha ka paccyn vae,” a cipya.²Samuel nynh, “Pawtemou ka cceih kho cih? Saul nynh tuh-e tuh a thae ze, yn theih cih,” a ci. Bawipaw nynh, “Vaetua tohlaw sa kheit kha cciakhae lah, ‘Bawipaw kalan silaw lan kae thua vae,’ cite na ho cih.³Silaw lan Jesse kha ko lah, na cyi lanpaw kha kae muihsah cih; a min kae hopyapaw kha kamaw elang nang nynh chitui na thuh cih,” a cipya.⁴Bawipaw nynh kaw a pya thyhte Samuel nynh cyih zah, Bethlehem khua lang a cceih. Khua kya-e piccan hae tuh amaw kha tungku khylan thyngkute oun thua hae zah, “Daenaw lante tou nae thua?” a ci hae.⁵Samuel nynh, “Daenaw lante; Bawipaw kalan silaw khylan kae thua vae; thyaasakuh oh lah, silaw lan ka kya cceihbua oh,” a cipya hae. Jesse te a ccapaw hae kha thyaasah hae zah silawnaw kalan a ko hae.

⁶He a thua hae te, Eliab kha do zah, “Bawipaw kya-e chitui thuh athuapaw tuh atu Bawipaw malang a umpaw hynh nynh athua ccaccing,” cite a tua.⁷Thuasalama Bawipaw nynh Samuel kha, “A muinsan te a pynrua ahangpaw kha do nan, pawccecize amaw kha ka vua vae; pawccecize Bawipaw nynh tuh ccungccaw nynh do hawte do khyh; ccungccaw nynh tuh atolang e muinsan kha a do, thuasalama Bawipaw nynh tuh thinlung kha a do,” a cipya.⁸Te Jesse nynh Abinadab kha ko zah Samuel malang khe a cciasah. Samuel nynh, “E paw hynh mah Bawipaw nynh a popaw thua khyh,” a cipya.⁹Te Jesse nynh Shammah kha cciasah zah, Samuel nynh, “E paw hynh mah Bawipaw nynh a popaw thua khyh,” a ci.¹⁰Jesse nynh a ccapaw hae lu sari kha Samuel malang cciasah hae zah, Samuel nynh Jesse kha, “Bawipaw nynh hynh-e hae hynh lu kheit sanmah po khyh hae,” a cipya.¹¹Samuel nynh Jesse kha, “Hein kya na ccapaw hae mih balynte a um hae tou?” cite a khia. Jesse nynh, “Asoi huapaw a um ung, thuasalama aning tuh tuu a rin,” a cipya. Te Samuel nynh Jesse kha, “Ccungccaw saw lah, amaw kha kosah hae; aning yn thua mawlaezung hein kya haung lei lan,” a cipya.¹²Jesse nynh saw hae zah aning kha a thuakhae hae. Aning tuh a ngesaw selalyng lan cih zah, a mitdae puithya zah a puithyapaw nynh thua. Bawipaw nynh, “Thokuh lah, amaw kha chitui thuh; pawccecize hynh-e paw hynh nynh athua,” a cipya.¹³Samuel nynh chitui ruinkuhpaw saki kha lah zah, a uno hae malang khe chitui a thuh; tuin nin te vae tuh Bawipaw muisaw tuh David tungvaw kya thawmawte a thua. Samuel tuh thokuh zah Ramah khua lang a cceih. David nynh Saul Tintang A Khuapya

¹⁴Bawipaw muisaw tuh Saul kyate pou zah, Bawipaw kyate yn thuapaw muisaw hoyleipaw nynh aning kha vawsaw a pya.¹⁵Saul a ryalahtu hae nynh Saul kha, “Dotua, Pachia kyate yn thuapaw muisaw hoyleipaw nynh nang kha vawsaw ae pya.¹⁶Ae do-oihtu hae paw na ryalahtu hae nynh tintang a khuathyapaw kha kae ccung nawlan kaw oun pyatua; Pachia kyate yn thuapaw muisaw hoyleipaw nynh he ae thuanua ze, aning nynh tintang ae khuapah cih zah na dan cih,” a cipya hae.¹⁷Tukeiccuze Saul nynh a ryalahtu hae kha, “Tintang hoyte a khuathyapaw kha yn ccungpah oh lah, yn thuakhaepah oh,” a cipya hae.¹⁸Ccangvaepaw lu kheit nynh, “Bethlehem khuapaw Jesse ccapaw tuh tintang a khuathya, a rawthung, rhawtuk a thya, byahonaw kya haw zah a puithya; te Bawipaw tuh a kya a um,” a ci.¹⁹Tukeiccuze Saul nynh Jesse kalan locceihtu hae kha saw hae zah, “Tuu a rinpaw na ccapaw David kha ka kalan yn saw,” cite bya a taw.²⁰Jesse nynh sanlou phupaw lann sa kheit, misutui kha saving tui-ung ccangkheit, miaataw sa kheit kha lah zah a ccapaw David kyate Saul kalan a ky.²¹David tuh Saul kya thua zah, a ryalaw kya a tee. Saul nynh myarya sungsah zah, a rhawtuk-zunghe ccyngtu lang a tang.²²Saul nynh Jesse kalan ccungccaw saw zah, “David tuh ka malang maehoynaw a ccou keiccuze ka ryalaw kya um sah,” cite bya a taw.²³Pachia kyate yn thuapaw muisaw hoyleipaw nynh Saul kha a thuanua takyh vae ze, David nynh tintang kha lawkuh zah a kuih te a khua; tetuh Saul tuh hoyhua zah leih a dan, te muisaw hoyleipaw tuh a kyate leih a pou. David te Goliath

¹Filistin hae nynh mih rhawkaw hae kha rhawtuk lan Judah ram Sokoh khua kya a pum hae; Sokoh te Azekah laku umpaw Efes-dammim kya a rya hae.²Saul te Israel hae tuh sueluakute Elah accya kya rya hae zah, Filistin hae kha dou khylan paccynkute a um hae.³Filistin hae tuh accya voikheit lang raw e mua vawlan khe thadyn hae zah, Israel hae tuh accya voikheih lang raw e mua vawlan khe a thadyn hae, mih laku khe accya a um.⁴Dong taruh te khaw ning hang zah myarya thungpaw, Gath khuapaw Goliath cikuhpaw tuh Filistin hae ryahmin kyate yn pou.⁵A lu kya sohin lukhung khungkuh zah sohin shekel thong pangaw aripaw sivaw angki kha a kiku.⁶A ccu kya sohin mawccae nawkuh zah a raw hae laku kya sohin ccoi kha a vawku.⁷A ccoi alua tuh phaeccya cia cih zah, a ccoi dung kya-e sivaw tuh shekel za taruh ari; a khawriaphua ccyngtu tuh a malang khe a cceih.⁸Goliath nynh thadyn zah Israel rhawkaw hae kha o hae zah, “Nanning nynh pawccemou rhawtukku lan nae pou oh? Kae tuh Filistin ccungccaw ka thua zah, nanning tuh Saul ryalahtu hae na thua khyh oh tou? Naemaw hanlan ccungccaw lu kheit oun po oh lah, ka kalan yn cceihbung sah.⁹Aning nynh kae kha yn tae zah yn chia kho ze, kaening tuh nae ryalahtu lang kae tang cih; thuasalama kae nynh ka tae zah ka chia ze, nanning tuh kae ryalahtu lang na tang cih oh zah kae rya na lah cih oh,” a cipya hae.¹⁰Tuh-e Filistin paw nynh, “Atunin kya Israel rhawkaw hae kha tukku lan kae hyy oh! Ccungccaw lu kheit oun po oh lah, kae tukku tua cih,” a ci.¹¹Filistin paw bya kha Saul te Israel hae balyn nynh a thae hae tuh, mih bungzou zah myarya a rih hae.

¹²David tuh Judah ram Bethlehem khua e Efrath phin Jesse ccapaw nynh thua, Jesse tuh ccapaw lu tarya a hoi. Saul she lyakhe tuh-e ccungccapaw tuh taw vae zah a kum tang vae.¹³Jesse ccapaw hae kya-e atawccaw hae lu thum nynh rhawtuknaw kalan Saul kha a zui hae; rhawtuknaw kalan a cceih hae paw Jesse ccapaw lu thum hae min tuh ccatawccaw Eliab, a zuitu Abinadab te lu thumnaw Shammah nynh thua hae.¹⁴David tuh asoi huapaw nynh thua; atawccaw hae lu thum nynh Saul kha a zui hae,¹⁵thuasalama David tuh Bethlehem kya a paaw tuu kha rin khylan Saul kyate a ki.¹⁶Filistin paw nynh nin sung pali lungkhu awkhua takyh zete takyh pounua hae zah a thadynnua hae.

¹⁷Jesse nynh a ccapaw David kha, “Na upaw hae hanlan hynh-e vae-u ephah ccangkheit te sanlou ccanghaw hynh lah lah, ryahmin lang na u hae kalan khe arangte la cciakhae;¹⁸te rhawkaw thong kheit uktu mih rhawbawipaw hanlan vaetua mateitui ahaawpaw ccanghaw kha mah la phubia. Na upaw hae tuh la viatua hae lah, minmin kyate a dan hae cinawpaw muihsahnaw ccangkhakheit nae ccyng cih,” a cipya.

¹⁹Saul te David a upaw hae te Israel hae balyn tuh Elah accya kyakhe Filistin hae ryte rhaw a tukkuh hae.²⁰David tuh awkhua takaw te tho zah tuu hae kha tuurinpaw kya cciataw hae zah Jesse nynh a naw thyhte, looh kha ccyngbia zah a cceih. Rhawkaw hae tuh siarua biate rhawtuknaw hmin lang a ccia lya hae khe David tuh ryahmin kya a thua.²¹Israel rhawkaw hae te Filistin rhawkaw hae tuh tukku khylan rawsekute a um hae.²²David nynh uccaw kha uccaw a rintu kyakhe a nungsya koute rhawkaw hae kalan ccue zah a upaw hae kha bya a beih hae.²³Minmin ryte bya a hoku lya hae khe, myarya thungpaw Filistin ccungccapaw, Gath khuapaw Goliath cikuhpaw tuh Filistin rhawkaw hae kyate yn pou zah, langmaw a homaepaw bya kha a ho. David nynh a bya kha a thae.

²⁴Israel hae balyn nynh tuh-e paw kha a muih hae tuh, myarya rih hae zah a ccue hae.²⁵Israel hae nynh, “Khuh-e ccungccapaw yn poupaw khuh na muih oh tou? Thanccingte Israel kha theihrya khylan nynh yn pou. Amaw a theihpaw kha siapharan nynh sisua patae a pya cih, a ccanung kha a pya cih zah a paaw innbyn kha Israel ram kya ngunto a luesah cih,” a ci hae.²⁶David nynh a pe a thadyn hae paw kyakhe, “E Filistin paw hynh theih zah Israel kha maethyanaw kyate a luesahpaw tuh pawmou cyipya athua cih? Ahiinpaw Pachia rhawkaw hae kha theihrya lan ciate vingdungawkuh leipaw hynh-e Filistin paw hynh hummou athua?” a cipya hae.²⁷Tuh-e ccungccaw hae nynh, “Amaw a theihpaw kha tuhcite cyipya athua cih,” cite atakaw lya-e bya kha a hopya hae.

²⁸David nynh minmin a hopya hae paw kha a upaw atawccapaw Eliab nynh a thae tuh, David tungvaw a thinria zah, “Pawccemou hynhlang nae ccia? Beihtarawpaw ka tuu kha ramkaw kya humkyamou nae cciataw? Na lysakunaw te na thinlung a hoyleinaw kha phe ka ny; rhawtuk do khylan nynh nae cciabung,” a cipya.²⁹David nynh, “Pawmou ka cyisei? Bya kaw kheit rou khaw ka khia,” a cipya.³⁰Tuh-e paw kyate ccangpaw lu kheit kalan maekuh zah a homae hawte a hopya; ccungccaw hae nynh atakaw lya hawte bua a khung hae.

³¹David nynh a hopaw bya kha a thae hae tuh, Saul kha a hopya pathy hae; te aning nynh David kha a ko.³²David nynh Saul kha, “Aning keiccuze humhung mah a lungthang nan sah; na ryalahtupaw nynh ka cceih cih zah, e Filistin paw hynh ka tuk cih,” a cipya.³³Saul nynh David kha, “Nang nynh e Filistin paw hynh tuk lan na ccianua kho lan khyh; pawccecize nang tuh imua na thua ung zah, aning tuh a ccangvae takaw lya mawte rhawkaw lang a tang vae,” a cipya.³⁴Thuasalama David nynh Saul kha, “Na ryalahtupaw nynh ka paaw hanlan tuu leih ka rin zah, chindeih khyhze vong yn thua zah tuuphu kya-e tuutaw kha a tei ze,³⁵ka deehui zah ka theih koute a khalang lungkhu e tuutaw kha leih ka luesah; chindeih khyhze vong nynh yn zounua ze, a khaw te leih ka kyng zah ka bua zah ka chia.³⁶Na ryalahtupaw nynh chindeih te vong kha parouh mawte ka chia hae; e vingdungawkuh leipaw Filistin paw hynh ahiinpaw Pachia rhawkaw hae kha a theihrya hae keiccuze tuh-e loramsaw hae kya-e sa kheit hawte athua cih,” a cipya.³⁷David nynh, “Chindeih ccutin te vong ccutin kyate yn khumpaw Bawipaw nynh e Filistin paw kuih kyate yn khum cih,” a ci. Tukeiccuze Saul nynh David kha, “La cceih, Bawipaw nynh ae umkhae vae sah!” a cipya.

³⁸Saul nynh David kha a rhawtuk-uccaw a lawsahku; sohin lukhung kha a lu kya khungsah zah sivaw angki kha a kisah.³⁹David nynh Saul thaloi kha rhawtuk-uccaw vawlan khe khangkuh zah ccia lan zuaku tua zah cceih kho khyh; pawccecize tuh-e uccaw hae tuh lawkuh boi khyh. Tetuh David nynh Saul kha, “E hae ryte tuh ka cceih kho khyh; pawccecize e hae hynh ka lawkuh boi khyh,” a cipya. Tukeiccuze David nynh tuh-e uccaw hae tuh a khahku.⁴⁰Te David nynh a hoitang kha ccyngkuh zah vawkhu e naebabingpaw lungpyng ccangpangaw kha pokuh zah, a tuurin uccaw athuapaw a zaw lungkhu khe a sangku; a zae kha a kuih te ccyngkuh zah Filistin paw kha a naenuaku.

⁴¹Filistin paw nynh David kha naenuakuh zah a khawriaphua ccyngtu tuh a malang khe a cceih.⁴²Filistin paw nynh do zah David kha a muih tuh a theihrya, pawccecize aning tuh ccangvae taraw thua zah, a ngesaw selalyng lan cih zah a puithya.⁴³Filistin paw nynh David kha, “Kae tuh ui tou ka thua, ccungngue te nae ccianua?” a cipya. A pachia hae min phyate David kha thya a law.⁴⁴Filistin paw nynh David kha, “Ka kalan yn cceih, na saw kha azouthyapaw pavaw hae te laephi kya-e sarepaw hae kalan ka pya cih hae,” a ci.⁴⁵Thuasalama David nynh Filistin paw kha, “Nang nynh thaloi, ccoi te ccoi dihpaw khate nae ccianua; thuasalama kae nynh tuh nang nynh na theihryapaw vaaw Bawipaw , Israel rhawkaw hae Pachia min te kae ccianua.⁴⁶Atunin ccaccei kya Bawipaw nynh nang kha ka kuih kalan yn pya cih, nang kha kae theih cih zah na lu kae pae cih; te Filistin rhawkaw hae rhua kha azouthyapaw pavaw hae te laephi kya-e sarepaw hae kalan atunin ccaccei kya ka pya cih hae, tetuh laephi pynpi nynh Israel hae kya Pachia a um cipaw kha a nyh cih hae.⁴⁷Bawipaw nynh thaloi te ccoi khate khum khyh hae cipaw kha e zapi hae balyn nynh a nyh cih hae; pawccecize rhawtuknaw tuh Bawipaw kya-e thua zah aning nynh nanning kha kae kuih kalan oun pya cih,” a cipya.

⁴⁸Filistin paw nynh David kha tungku khylan he a naenuakuh tuh, David nynh mah Filistin paw te tungku khylan rhawkaw hae kalan khe arangte a ccue.⁴⁹David nynh a zaw lungkhu lang a kuih pu zah lung ccangkheit kha thuaakute henuanawpaw zae te henua zah Filistin paw tuh a terui kya a tung; lung tuh a terui lungkhu lang po sungkuh zah laekhu kya a mae lante a khuliakuh.

⁵⁰Tuhcite David nynh Filistin paw kha henuanawpaw zae te lung ccangkheit khate tae zah Filistin paw kha tungsah zah a chia; David kuih kya thaloi um khyh.⁵¹Tetuh David nynh ccuenua zah Filistin paw vawlan khe a thadyn; a thaloi kha abu kyate poh thuaa zah a chia; tuh-e thaloi te a lu kha a pae.
Filistin hae nynh athung huapaw mih ccungccapaw a chih vae cipaw a muih hae tuh, a ccue hae.⁵²Israel te Judah rhawkaw hae tuh sia biate thokuh hae zah Filistin hae kha Gath te Ekron koikua kyacia a dee hae, vaemaw muepaw Filistin hae tuh Shaaraim kyate Gath te Ekron kyacia laanpi kya po a khuliakuh hae.⁵³Israel hae tuh Filistin hae a deehuinaw hae kyate oun ki hae zah, mih ryahmin kha a law hae.⁵⁴David nynh Filistin paw lu kha lah zah Jerusalem lang a cciakhae; a rhawtuk-uccaw kha tuh a bu kya a nungsya.

⁵⁵David nynh Filistin paw a ccianuapaw kha Saul nynh a muih tuh, rhawbawipaw Abner kyakhe, “Abner, e ccangvaepaw hynh hum ccapaw mou athua?” cite khia zah, Abner nynh, “Pou siapharan, nang tuh na hiin thyhte, aning kha ka nyh khyh,” a cipya.⁵⁶Siapharan nynh, “Ccangvaepaw kha hum ccapaw mou athua, khiatua oh,” a ci.⁵⁷David tuh Filistin paw a chianaw kyate he yn ki tuh, Abner nynh aning kha ko zah Filistin paw lu kha a kuih te ccyng biate Saul malang a thuakhae.⁵⁸Saul nynh, “Ccangvaepaw, hum ccapaw mou na thua?” cite a khia. David nynh, “Bethlehem khuapaw na ryalahpaw Jesse ccapaw nynh ka thua,” a cipya. David te Jonathan Byakinkunaw

¹David nynh Saul kha bya he a hopah kou tuh, Jonathan thinlung tuh David thinlung kyakhe lungde thua zah, Jonathan nynh David kha amaw toulou hawte a sungsah.²Tuin nin khe Saul nynh David kha lawkuh zah a paaw inn lang ki lan ua vae khyh.³Jonathan nynh David kha amaw toulou hawte a sungsah keiccuze David ryte byakinnaw a rae.⁴Jonathan nynh a kikupaw boeining kha khahkuh zah a rhawtuk-uccaw, a thaloi, a li te a taeccia ryte David kha a pya.⁵Saul nynh a sawnaw takyh kya David tuh a laan a sui a ua; tukeiccuze Saul nynh aning kha rhawkaw hae uktu lang a nung. Ccungccaw hae balyn nynh thuasah, Saul a ryalahtu hae nynh heize thuasah David kha mih naw accah.

⁶Inn lang a ki lya hae khe, David tuh Filistin paw a chianaw kyate yn ki lyakhe nopi hae tuh Saul Siapharan kha cciadue khylan hlawsahte, law biate, tyng te lungtuanaw hlawsahte, khuakupaw aphuinphuin kha khuakute Israel khua hae balyn kyate oun pou hae.⁷Nopi hae nynh lungpawnaw a rae lya hae khe,“Saul nynh athong thong te,David nynh accong ccong tea chia hae,”cite liakute hlaw a sah hae.⁸Saul tuh a thin myarya ria, pawccecize tuh-e bya nynh a lunghoysah khyh. Aning nynh, “David tuh athong-asan te a theih cite tua hae zah, kae tuh athong thong a theih cite yn tua hae; aning nynh peenaw laelan pawmou a hoi kho ung?” a ci.⁹Tuin nin te vae tuh Saul nynh David kha lunghiinnaw mit te a do-ih vae. David Chia lan Saul Zuakunaw

¹⁰Awkhualan khe Pachia kyate yn thuapaw muisaw hoyleipaw nynh Saul kha thuanua zah, a inn lungkhu khe lungmuanaw bya kha a ho, tuh ccyh lya tuh David tuh nin takyhte tintang leih a khua hawte a khua cciamang. Saul nynh a ccoi kha a kuih kya a ccyngku;¹¹Saul nynh, “David kha pang kya ka bing cih,” cite tua zah ccoi te khoih salamah David nynh vae ning a lingku.

¹²Bawipaw nynh Saul kha poutaw zah David kya a um keiccuze Saul nynh David kha a ripya.¹³Tukeiccuze Saul nynh a kyate David kha nue zah thong kheit uktu rhawbawi lang a nung, te rhawkaw hae malang khe leih pou zah leih a tee.¹⁴Bawipaw tuh a kya a um keiccuze David tuh a ryalaw miakaw kya a laan a sui a ua.¹⁵David tuh a laan a sui myarya ua cipaw kha Saul nynh a muih tuh, Saul tuh houh a rih vae.¹⁶Thuasalama Israel hae te Judah hae balyn nynh David kha a sungsah hae; pawccecize David tuh mih malang khe a pou a tee bungthungpaw nynh thua. David te Mikhal Zuvaw Tang hae

¹⁷Te Saul nynh David kha, “Hein kya ka ccanung atawccaw huapaw Merab a um; aning kha na zu lang kae pya cih; ka hanlan na rawthung sah lah, Bawipaw rhawtuknaw kha tuktua,” a cipya. Pawccecize Saul nynh, “Kamaw nynh ka kuih ka hangnua lan khyh, Filistin hae nynh aning kha theih hae sah,” cite a tua.¹⁸David nynh Saul kha, “Kae tuh siapharan a paeepaw lang tang lan ciate hummou ka thua? Ka puizia hae te ka paaw innbyn tuh Israel ram kya hummou athua hae?” a cipya.¹⁹Thuasalama Saul ccanung Merab tuh David kalan pya lan accan ccyh lyakhe, Meholah khuapaw Adriel zu lang a pya.

²⁰Saul ccanung Mikhal nynh David kha a sungsah. Tuh-e tuh Saul kha hopah hae zah a lungrythua.²¹Saul nynh, “Mikhal tuh aning hanlan kaang athua nawlan te Filistin hae kuih nynh aning kha a rawse nawlan, aning kha ka pya sah,” cite a tuaku. Tukeiccuze Saul nynh David kha vae ningnaw hopah zah, “Ka paeepaw lang na tang cih,” a cipya.²²Saul nynh a ryalahtu hae kyakhe, “David kyakhe aphiruh lante, ‘Dotua, siapharan tuh na tungvaw lungtuanaw a hoi, a ryalahtu hae balyn nynh mah ae sungsah hae; tukeiccuze siapharan paeepaw lang tang ccavae,’ cite la hopah oh,” a cipya hae.²³Tukeiccuze Saul a ryalahtu hae nynh tuh-e bya tuh David kha zya a hopya hae. David nynh, “Kae tuh a ryachipaw te sawtuanaw a ccou leipaw ka thuapaw hynh do oh lah, siapharan paeepaw lang tang lanpaw tuh azoipaw lang tou na ria oh?” a cipya hae.²⁴Saul a ryalahtu hae nynh, “David nynh hynhte nynh aho,” cite Saul kha a hopya hae.²⁵Tetuh Saul nynh, “David kha hynhte la hopah oh, ‘Siapharan nynh a rhaw hae tungvaw phulawnaw lante, Filistin hae vingdung za kheit laelan, ccangpaw kha a ccanung mee lang ry khyh,’ la cipah oh,” a cipya hae. Saul nynh David tuh Filistin hae kuih te chisah lan a paccyn.²⁶Saul a ryalahtu hae nynh tuh-e bya tuh David kya he a hopah hae tuh, David tuh siapharan paeepaw lang tang lan myarya a lungrythua. Accyh alawe mawkhe,²⁷David tuh a ccungccaw hae ryte thokute cceih hae zah Filistin hae za kheit kha a chia hae; David nynh mih vingdung tuh cciakhae zah siapharan paeepaw lang tang khylan siapharan kalan phe ccing lan a pya. Saul nynh a ccanung Mikhal tuh David kalan zu lang a pya.²⁸Bawipaw tuh David kya a um cipaw te a ccanung Mikhal nynh David a sungsah cipaw kha Saul nynh he a nyh tuh,²⁹David kha houh a rih vae. Tukeiccuze tuin ccyh kyate vae tuh Saul tuh David rhaw lang a tang vae.

³⁰Filistin rhawbawi hae tuh rhawtuknaw kalan atu te atu oun pou hae; David tuh Saul a ryalahtu hae balyn laeze taenaw a muehua, tukeiccuze a minthaannaw tuh houhouh ale. Jonathan nynh David A Pankhae

¹Saul nynh David chia lanpaw kong kha a ccapaw Jonathan te a ryalahtu hae kyakhe a hopya hae. Thuasalama Saul ccapaw Jonathan nynh David kha myarya a sungsah.²Jonathan nynh David kha, “Ka paaw Saul nynh nang kha chia lan a paccynku; tukeiccuze awkhualan awkhua kya raeringkuh; muih kho leinaw hmin kya um lah reku tua.³Ka cceih cih zah na umnaw loo kya ka paaw pe khe ka thadyn cih, te ka paaw kyakhe na konglang kha ka hopah cih; ka nypaw hankhakheit a um ze kae hopah cih,” a cipya.⁴Jonathan nynh a paaw Saul kyakhe David a hoynaw kong kha hopah zah, “Siapharan nynh a ryalahpaw David tungvaw seinaw rae nan sah, pawccecize aning nynh na tungvaw sei khyh, rya a lawpaw hynh na hanlan ahoypaw cci nynh thua;⁵a hiinnaw duaaku leite Filistin paw kha theih zah, Israel hae balyn hanlan myarya lepaw taenaw kha Bawipaw nynh a rae. Tuh-e tuh na muih zah na lungtua; tukeiccuze akonglang um leite David kha chiate, seinaw a hoi leipaw ccungccaw tungvaw kya pawccemou seinaw na rae lanpaw tuh?” a cipya.⁶Saul nynh Jonathan bya tuh ngae zah, Saul nynh, “Bawipaw tuh a hiin thyhte, aning tuh chia thua lan khyh,” cite thyalawkute bya a kinku.⁷Tukeiccuze Jonathan nynh David kha ko zah hynh-e konglang balyn kha a hopya. Te Jonathan nynh David kha Saul kalan cciakhae zah, langmaw hawte a kyakhe bua a um. Mikhal nynh David A Bawm

⁸Rhawtuknaw bua um zah David tuh Filistin hae kha tuk khylan a cceih. Aning nynh patae a chia hae keiccuze minmin tuh amaw malang te a ccue hae.⁹Saul tuh a ccoi ccyngkute a inn lungkhu a haung lyakhe, Bawipaw kyate yn thuapaw muisaw hoyleipaw tuh a tungvaw a thua; tuh ccyh lyakhe David tuh tintang palei a khua.¹⁰Saul nynh David kha pang kya phang bingkuh lan ccoi te khoih lan a ccung; thuasalama Saul kha a lingku mang, tukeiccuze ccoi tuh pang kya a bingkuh. David tuh ccue zah, tuh-e khuazi kya phe a lue.

¹¹Saul nynh David kha awkhua khe chia lan paccyn zah, David kha ngaw khylan a inn langkhe locceihtu hae kha a sawnua hae. David zu Mikhal nynh amaw kha, “Atu khuazi kya na hiinnaw kha na khumku khyh ze, awkhualan tuh chia na thua cih,” a cipya.¹²Tukeiccuze Mikhal nynh David kha thanlan-aw kyate rungsah bung zah, aning tuh ccue zah a lue.¹³Mikhal nynh zohtuh ccangkheit kha lah zah a ikhung vawlan a nung; miaa ming te kuakuhpaw boei te a lu kha bong zah boei a thy.¹⁴Saul nynh David ko lan locceihtu hae kha he a saw hae tuh, Mikhal nynh, “David a ccih,” a cipya hae.¹⁵Saul nynh David do khylan locceihtu hae kha saw hae zah, “Aning kha ka chia ccaw, ikhung ryte ka kalan oun cciakhae oh,” a cipya hae.¹⁶Locceihtu hae nynh he a tee hae tuh, miaa ming te kuakuhpaw boei te a lu bong hae paw zohtuh tuh ikhung vawlan khe a la um.¹⁷Saul nynh Mikhal kha, “Pawccemou hynhte nae ling zah, ka rhawpaw tuh a lue ccaw cite na cciasah?” a cipya. Mikhal nynh Saul kha, “Aning nynh kae kha, ‘Yn ccia sah, tuhkhyhze nang kha kae theih cih,’ yn ci,” cite a hopya. Ramah kya David te Samuel

¹⁸Tuhcite David tuh ccue zah a lue; Ramah khua umpaw Samuel kalan cceih zah, Saul nynh a tungvaw a cyipaw balyn kha a hopya. Aning te Samuel tuh cceih hae zah Naioth khua kya a um hae.¹⁹“David tuh Ramah khua pe Naioth khua kya nynh a um,” cite Saul kha a hopya hae.²⁰Tetuh David kyng khylan Saul nynh locceihtu hae kha a saw hae. Profeh hae phu kya Samuel tuh lupi lang umte profehbya a ho cciamang hae paw kha locceihtu hae nynh he a muih hae tuh, Pachia muisaw tuh Saul a locceihtu hae tungvaw kya yn thua zah, minmin mah profehbya a hobua hae.²¹Tuh-e kong tuh Saul kha he a hopah hae tuh, ccangpaw locceihtu hae kha saw hae zah, tuh-e hae mah profehbya a hobua hae. Saul nynh vae thumnaw locceihtu hae kha saw hae zah, tuh-e hae mah profehbya a hobua hae.²²Tetuh amaw ccaccei tuh Ramah khua lang a cceih. Seku khua kya umpaw tuisung pi kya he a thua te, “Samuel te David tuh teimou a um hae?” cite a khia hae. Te lukheitpaw nynh, “Ramah khua pe e Naioth khua kya nynh a um hae,” a cipya.²³Te Ramah khua pe e Naioth khua langkhe cceih zah, Pachia muisaw tuh Saul tungvaw yn thua. A ccia cciamang lyakhe, Ramah khua pe e Naioth khua a thua mawlaezung profehbya po a ho.²⁴A boeining kha khahkuh zah Samuel malang khe profehbya a ho. Tuh-e nin ninlang te tuh-e khuazi zidae tuh a ccakaete a huekuh. Tukeiccuze, “Saul mah profeh lang a tangbua vae tou?” cite leih a ho hae. David te Jonathan Ruiban Tangnaw

¹David tuh Ramah khua pe e Naioth khua kyate a ccue, te Jonathan kya thua zah, “Pawmou ka cyi? Ka cyiseinaw pawmou a um? Na paaw nynh ka hiinnaw law lan a zuakupaw hynh a tungvaw pawmou ka sei?” a cipya.²Jonathan nynh, “Tuh-e tuh cyihkuh nan sah! Na chih lan khyh. Ka paaw nynh byathan alepaw thuasah, adihpaw thuasah kae kha thaesah leite cyih boi khyh; pawccemou ka paaw nynh hynh-e hynh yn phei cih? Papin yn phei lan khyh!” a cipya.³Thuasalama David nynh, “Kae nae sungsahnaw kha na paaw nynh nyh zah, ‘E hynh Jonathan nynh nyh nan sah, a ngaethah cih,’ cite a tua cih. Thuasalama thanccingte, Bawipaw tuh a hiin thyhte, nang mah na hiin thyhte, kae te chinaw laku kya ccu kaw kheit rou nynh a um,” cite thyalawkute a ho.⁴Jonathan nynh David kha, “Na hopaw miakaw kha kae cyipah cih,” a cipya.⁵David nynh Jonathan kha, “Awkhualan tuh sawpaw thawpaw thua vae zah, siapharan ryte zerya mangkheihnaw kya ka haung khyh ze thuathya khyh; thuasalama nin thumnaw nin zete cia ramkaw kya zya reku khylan ka la cceih cih.⁶Na paaw nynh ka konglang yn la khia ze, ‘David tuh a khua Bethlehem lang ccia lan kae kha pekite yn ngiaku; pawccecize mih puizia hae balyn hanlan kum takyhte leih a rae hae paw silawnaw kha tuin khua kya a um,’ cite na la hopah cih.⁷Na paaw nynh, ‘Ahoy!’ a ci ze, na ryalahtu ka hanlan ahoy cih; thuasalama a thinria ze, hoyleinaw rae lan a paccynkuh cipaw la nyh.⁸Tukeiccuze na ryalahtupaw hynh thaw yn ccitua, pawccecize athyaapaw byakinnaw kha na ryalahtupaw tuh phe na raekhae vae. Thuasalama ka tungvaw cyiseinaw a um ze, namaw ccaccei nynh yn theih; pawccemou na paaw kalan tuh nae cciakhae cih?” a cipya.⁹Jonathan nynh, “Tuh-e tuh na tungvaw cyihkuh nan sah! Na tungvaw kya hoyleinaw ccawsah lanpaw kha ka paaw nynh a paccyn cipaw ka ny ze, nang kha hopya leite kae um cih zawtou?” a cipya.¹⁰Te David nynh Jonathan kha, “Na paaw nynh byarepaw te ae khung ze, hum nynh mou kae kha yn hopah cih?” a cipya.¹¹Jonathan nynh David kha, “Rang, ramkaw lang cceih sih,” a cipya. Tukeiccuze parouh mawte ramkaw lang a cceih hae.

¹²Jonathan nynh David kha, “Bawipaw , Israel Pachia tuh aening ccaekia lang tang vae sah! Awkhualan khyhze sarukheih atu ccyh loukaw kya ka paaw kha ka la khiatua cih zah, David tungvaw kya tuanaw hoypaw a hoi ze, na kalan ccungccaw sawte tuh-e tuh hosahpya leite kae um cih zawtou?¹³Thuasalama ka paaw nynh nang kha vawsawnaw pya lan ae ry ze, khyndadyh lan na ccia nawlan, nang kha hopya leite kae um zah kae cciasah khyh ze, Bawipaw nynh Jonathan ka tungvaw kya tuhcite cyih sah lah, tuhlaeze mah cyih vae sah. Bawipaw tuh ka paaw kya a la um hawte na kya um vae sah.¹⁴Ka hiin ung ze, Bawipaw kya-e zyn lan umpaw sungsahnaw kha ka tungvaw langsah tua; thuasalama ka chi ze,¹⁵Bawipaw nynh David a rhaw hae balyn kha laephi vawlan te a vua hae ze heize, zyn lan umpaw na sungsahnaw kha ka inn kyate papin vua nan,” a cipya.¹⁶Jonathan nynh David ciihan te byakinnaw rae zah, “Bawipaw nynh David a rhaw hae kha phulah vae hae sah,” a ci.¹⁷Jonathan nynh amaw a hiinnaw kha a sungsah hawte David kha a sungsah keiccuze amaw kha mah a sungsahru nawlan David kha bya bua a kinsaku.

¹⁸Jonathan nynh David kha, “Awkhualan tuh sawpaw thawpaw thua vae zah, na umnaw hmin accawnghan cih keiccuze na um khyhpaw a la langkuh cih.¹⁹Sarukheih tuh na la cceihbung cih; langmaw na rekunaw hmin langkhe la cceih lah, tuin kya umpaw lung pe khe na la um cih.²⁰Themuing ka diapaw hawte lung pe langkhe the ccangthum kae kaw cih.²¹Te imuapaw kha kae saw cih, ‘Cceih, the hae kha yn ccung hae,’ kae cipah cih. Imuapaw kha, ‘Dotua, the hae tuh nang te hynhlang sang nynh a um hae, yn khuin hae,’ ka cipya ze, nang tuh nae cceih cih, pawccecize Bawipaw tuh a hiin thyhte, na hanlan khynnaw um zah ri lanpaw um khyh.²²Thuasalama ccangvaepaw kha, ‘Dotua, the hae tuh na khunglang nynh a um hae,’ ka cipya ze, na cceih vae cih; pawccecize Bawipaw nynh nang kha asawnaw lang ae cciasah vae.²³Nang te kae ah hokupaw konglang hynh, Bawipaw tuh nang te kae laku kya ccaekia lang zungzae a tang cih,” a cipya.

²⁴Tukeiccuze David tuh ramkaw kya a rekuh. Sawpaw thawpaw he yn thua tuh, siapharan tuh looh ae khylan a haung.²⁵Siapharan tuh ninhyn a haungnaw, pang pe e haungnaw kyakhe a haung. Jonathan tuh thadyn zah, Abner tuh Saul pe khe a haung; thuasalama David umnaw tuh accawnghan.

²⁶Tuin nin kya Saul tuh pawpaw bya mah ho khyh; pawccecize, “A tungvaw hankhakheit acyihkuh vosi, aning tuh a thyaa khyhpaw nynh thua cih, a thyaa leinaw a um ccaccing cih,” cite a tua.²⁷Thuasalama nin ningnaw nin, sawpaw thawpaw awkhualan khe David umnaw tuh accawnghan. Te Saul nynh a ccapaw Jonathan kha, “Pawccemou Jesse ccapaw tuh inkhawnin thuasah, atunin thuasah looh-aenaw kalan yn thua khyh?” a cipya.²⁸Jonathan nynh Saul kha, “David nynh Bethlehem khua lang ccia lan pekite yn ngiakuh zah,²⁹‘Beih yn ccia sah; pawccecize ka puizia hae tuh tuin khua kya silawnaw poi rae hae zah, ka upaw nynh tuin kya umbua lan bya yn taw. Tukeiccuze na malang maehoynaw ka mue zetuh yn cciasah lah, ka upaw hae tuh beih yn muihsah hae,’ yn cipya. Tuh-e keiccuze siapharan aenaw ccaboi kalan yn thua khyh,” a cipya.

³⁰Tetuh Saul nynh Jonathan tungvaw myarya a thinria zah, “A ccouseikuhnung te rhawthonung ccapaw! Namaw toulou maethyalawku nawlan te na nung kha a ccakaete maethyalaw khylan, Jesse ccapaw na pokupaw nyh lan khyh nae ci tou?³¹Jesse ccapaw nynh laephi vawlan a hiin lungkhu balyn tuh nang thuasah, na peenaw thuasah tyn lan khyh. Atu ccungccaw saw lah, ka kalan yn thuakhae, aning tuh a chih ccaccing cih,” a cipya.³²Te Jonathan nynh a paaw Saul kha, “Pawccemou aning tuh chia athua cih? Pawmou a cyi?” cite a khung.³³Tetuh Saul nynh Jonathan kha a ccoi te tungsah khylan a khoih; tukeiccuze a paaw nynh David kha chia lan a tuaku ccaccing vae cipaw Jonathan nynh a ny.³⁴Jonathan tuh myarya thinriate ccaboi kyate thokuh zah, tuh-e sawpaw nin ningnaw nin tuh looh ae khyh, pawccecize a paaw nynh David kha a thethyasah keiccuze David elang myarya a ngaethah.

³⁵Awkhualan awkhua khe Jonathan tuh imuapaw kha hoeikuh zah David te tungku lan a hokunaw hae ramkaw langkhe a cceih.³⁶Aning nynh imuapaw kha, “Ccue lah, ka kawpaw the kha yn ccung hae,” a cipya. Imuapaw a ccue lyakhe, the ccangkheit kha tuh-e paw po a khunglang a kaw.³⁷Imuapaw tuh Jonathan the a ccawnaw kya he a thua te, Jonathan nynh imuapaw kha ko zah, “The ccangkheit tuh na khunglang khe um khyh tou?” a cipya.³⁸Jonathan nynh imuapaw kha ko zah, “Rangsakuh, arangte cceih, um nan,” a cipya. Tukeiccuze Jonathan a imuapaw nynh the hae kha khuin zah a bawipaw kalan a cceih.³⁹Thuasalama imuapaw nynh pawpaw mah nyh khyh; Jonathan te David rou nynh tuh-e paccynnaw tuh a nyh hae.⁴⁰Jonathan nynh a zunghe hae kha imuapaw kalan pya zah, “La cceih lah, e hae hynh khualae lang la phu,” a cipya.⁴¹Imuapaw he a cceih takaw te, David tuh lungpum pe te yn thokuh zah laekhu kya a bakhung. Vae thum a bakhung koute, minmin tuh myngkuh hae zah a rawkhaekuh hae; David tuh a rahhua.⁴²Te Jonathan nynh David kha, “Ngaengante la cceih, pawccecize, ‘Kae te nang laku kya, ka ciihan hae te na ciihan hae laku kya Bawipaw tuh zungzae um sah,’ cite parouh mawte Bawipaw min phyate bya ah kinku vae,” a cipya. Te David tuh thokuh zah a cceih; Jonathan tuh khualae lang a tee. David te Athyaapaw Sanlou

¹David tuh Nob khua e ranpibawi Ahimelek kalan a thua. Ahimelek tuh David te tungku lan thyngkute cceih zah, “Pawccemou lu kheit san umbua leite, na makhaete nae thua?” a cipya.²David nynh ranpibawi Ahimelek kha, “Siapharan nynh ryalaw ccangkheit yn naw zah, ‘Kae nawpaw rya konglang hynh humhung nynh mah nyh nan sah,’ yn cipya. Tuin kya, khe kya tungku lan cite ccangvae hae kha ka hopya vae hae.³Tukeiccuze atu na kuih kya pawmou na hoi? Sanlou phe pangaw yn pyatua, tuhkhyhze hein kya a umpaw pawpaw zemah,” a cipya.⁴Ranpibawi nynh David kha, “Sanlou huataw tuh ka kuih kya ka hoi khyh, ccangvae hae nynh nopi hae kya a la sungku hae zetuh, athyaapaw sanlou tuh a um,” a cipya.⁵David nynh ranpibawi kha, “Rya ccangkhakheit hanlan ka ccia lya hawte nopi hae kha kae sungku ccaccing; khuaccong huatawnaw kya heize ccangvae hae uccaw tuh athyaa; mih uccaw tuh atunin thathy tuh hohcihmou houh athyaa vae cih?” a cipya.⁶Tukeiccuze ranpibawi nynh athyaapaw sanlou kha a pya; pawccecize tuin kyakhe Nungpyapaw sanlou laelan ccangpaw sanlou um khyh, tuh-e sanlou tuh sanlou thawpaw te rulae khylan law athua nin khe Bawipaw malang kyate nue athua vae paw nynh thua.

⁷Tuin nin khe Bawipaw malang khee athuapaw, Saul a ryalahtu hae kya-e lu kheitpaw tuh tuin kya a um; a min tuh Doeg acikuh, Edom minphuinpaw thua zah Saul a tuurin hae kya-e lupi nynh thua.

⁸David nynh Ahimelek kha, “Na kya ccoi khyhze thaloi um khyh tou? Siapharan rya kha arangte law aho keiccuze ka thaloi thuasah, ka zunghe hae thuasah ka ccyngkuh khyh,” a cipya.⁹Ranpibawi nynh, “Elah accya kya na chiapaw Filistin paw Goliath thaloi tuh boei te lungdekuh zah ranpibawi angki nulang khe a um; na law ry ze lawkuh, khah-e laelan ccangpaw um khyh,” a cipya. David nynh, “Khah-e thaloi te alokuhpaw um khyh, yn pyatua,” a cipya. David Gath lang A Ccue

¹⁰David tuh thokuh zah tuin nin khe Saul kyate ccue zah, Gath siapharan Akhish kalan a cceih.¹¹Akhish a ryalahtu hae nynh amaw kha, “E paw hynh mih ram kya-e siapharan David kha thua khyh tou? Minmin nynh lawbia hae zah,‘Saul nynh athong thong te,David nynh athong-asan tea chia hae,’ cite liakutehlawsah khyh hae tou?” a ci hae.

¹²David nynh hynh-e bya hynh pekite tua zah Gath siapharan Akhish kha myarya a rih.¹³Tukeiccuze mih malang khe a umtu ziazae kha rulae zah, a muihnaw hae kyakhe a ngaeepaw hawte a umsaku. Aning nynh thuakaw hae kha varivarae hya zah, a tuing kha a khawming kyate a luisah.¹⁴Akhish nynh a ryalahtu hae kha, “Dotua oh, e paw tuh a ngaeepaw nynh thua; pawccemou ka kalan nae thuakhae oh?¹⁵A ngaeepaw ka hoi khyh keiccu tou hynh-e paw hynh ka malang a ngaeenaw langsaku lan nae thuakhae oh? E paw hynh ka inn lungkhu lang a tee cih tou?” a cipya hae. David te A Zuitu hae

¹David tuh tuin kyate cceih zah Adullam lungkarung langkhe a ccue; tuh-e tuh a uno hae te a paaw puizia hae balyn nynh a thae hae te, a kalan a cceih hae.²A riathaepaw miakaw, laebah a hoipaw miakaw te a lungryachih leipaw miakaw tuh amaw kalan a sueluakuh hae; aning tuh minmin kya uktu lang a tang. A kya um hae paw tuh za pali loukaw acih hae.

³David tuh tuin kyate Moab ram Mizpeh khua lang cceih zah, Moab siapharan kha, “Pachia nynh ka hanlan a cyi lanpaw kha ka ny mawlaezung, ka nung te ka paaw tuh na kalan cciate beih umbua hae sah,” a cipya.⁴Minmin kha Moab siapharan kya cciatawsya hae zah, David tuh akhynnaw hmin kya a um lungkhu balyn, tuh-e paw kya a umbua hae.⁵Te profeh Gad nynh David kha, “E lungkarung kya um nan vae, pou lah, Judah ram lang la cceih,” a cipya. Tukeiccuze David tuh pou zah Hereth ramkaw langkhe a cceih. Saul nynh Ranpibawi hae Chianaw

⁶David te a kya um hae paw kha a muih hae cite Saul nynh a thae. Saul tuh Gibeah khua e ahangnaw hmin kya umpaw tamarisk thingku kaw khe a ccoi ccyngkuh zah a haung, a ryalahtu hae balyn tuh amaw kha voilu hae zah a thadyn hae.⁷Amaw kha voilute a thadyn hae paw a ryalahtu hae kyakhe Saul nynh, “Nanning Benjamin phin hae, thaetua oh, Jesse ccapaw nynh nanning balyn kha loo te misu khokhu ae pya cih oh tou? Milu thong kheit uktu te za kheit uktu rhawbawi lang pong ae nung cih oh tou?⁸Tuhte athua keiccu tou nae balynte aruh lante nae phee oh? Ka ccapaw nynh Jesse ccapaw te nawccawkheihnaw a rae hae paw kha lu kheit nynh san nae hopah khyh oh, ka hanlan a ngaethahpaw na um khyh oh, ka ryalahtupaw nynh atunin a cyi vae hawte, kae kha rawse khylan te buh khylan ka ccapaw nynh ka ryalahtupaw a tuhoupaw kha humhung nynh mah nae hopah khyh oh,” a cipya hae.⁹Saul a ryalahtu hae kyaze lupi athuapaw Edom minphuinpaw Doeg nynh, “Ahitub ccapaw Ahimelek kalan, Nob khua lang a cceihpaw Jesse ccapaw kha ka muih;¹⁰Ahimelek nynh aning hanlan Bawipaw kha byakhiapah zah, looh te Filistin paw Goliath thaloi kha a pya,” a cipya.

¹¹Siapharan nynh Ahitub ccapaw Ahimelek te a puizia hae balyn, Nob khua um hae paw ranpibawi hae kha kosah hae zah, mih balynte siapharan kalan a cceih hae.¹²Saul nynh, “Ahitub ccapaw, ngaetua,” cipah zah, aning nynh, “Ka bawipaw, hein kya mang ka um,” a cipya.¹³Saul nynh amaw kha, “Nang te Jesse ccapaw nynh pawccemou aruh lante nae phee oh? Aning nynh atunin a cyi vae hawte, kae kha dou khylan te buh khylan, sanlou te thaloi kha na pya zah aning hanlan Pachia kalan bya na khiapya,” a cipya.

¹⁴Te Ahimelek nynh siapharan kha, “Na ryalahtu hae balyn kyaze David hawte hummou a lungzi? Aning tuh siapharan paeepaw thua zah, na pyn rhawviatu hae lupi te na inn kya sawtuanaw a ccoupaw nynh thua.¹⁵Atunin hynh aning hanlan Pachia kalan masaty bya ka khiapyapaw athua zawtou? Thua khyh! Siapharan nynh na ryalahtupaw tungvaw kya thuasah, ka puizia hae tungvaw kya thuasah pawpaw mah oun seisah nan, pawccecize na ryalahtupaw nynh e konglang balyn hynh patae thuasah, beihtaraw thuasah pawpaw mah ka nyh khyh,” a cipya.¹⁶Siapharan nynh, “Ahimelek, nang te na puizia hae balyn tuh na chih ccaccing cih oh,” a cipya.¹⁷Siapharan nynh a pe thadyn hae paw rhawviatu hae kyakhe, “Maeleihkuh oh lah, Bawipaw ranpibawi hae kha theih oh, pawccecize minmin nynh David kha pankhae hae zah, a ccuepaw kha mang a nyh hae pite yn hopah khyh hae,” a cipya hae. Thuasalama siapharan a ryalahtu hae nynh Bawipaw ranpibawi hae kha chia lan mih kuih hangnua khyh hae.¹⁸Tetuh siapharan nynh Doeg kha, “Doeg, nang nynh maeleihkuh lah, ranpibawi hae hynh theih hae,” a cipya. Edom minphuinpaw Doeg nynh maeleihkuh zah ranpibawi hae kha a chia hae; tuin nin khe laphan laaw te kuakuhpaw ranpibawi angki kikuhpaw sung tarya lu pangaw kha a chia hae.¹⁹Ranpibawi hae khua Nob khua um hae paw kha thaloi te a bae hae; nopi te pise, imua te nosi, tangnuapaw, lann te tuu hae kha thaloi te a bae hae.

²⁰Thuasalama Ahitub ccapaw Ahimelek a ccapaw hae kya-e lu kheit, a min Abiathar cikuhpaw tuh lue zah David kalan a ccue.²¹Saul nynh Bawipaw ranpibawi hae a chia vae hae cipaw kha Abithar nynh David kha a hopya.²²David nynh Abithar kha, “Khah lyaze Edom minphuinpaw Doeg a umbua keiccuze Saul kha a hopah mamin vae cih cipaw khah-e nin kya maw phe ka ny vae. Na paaw puizia hae balyn nynh a chi hae paw tuh kae ka keiccu nynh thua.²³Ka kya um lah, rih nan; pawccecize ka hiinnaw a ccungpaw tuh na hiinnaw ae ccungpaw nynh thua; ka kya um lah, na khyn cih,” a cipya. David nynh Keilah Khua A Khum

¹“Filistin hae nynh Keilah khua kha tuk hae zah, huimin hae kha a luade hae,” cite David kya a hopya hae.²David nynh Bawipaw kha khia zah, “E Filistin hae hynh ccianuate ka tuk cih hae tou?” a cipya. Bawipaw nynh David kha, “Cceih lah, Filistin hae kha tuk hae lah, Keilah khua kha khumtua,” a cipya.³Thuasalama David kha a ccungccaw hae nynh, “Dotua, Judah ram kya heize ah rih oh; Keilah khua lang cciate Filistin rhawkaw hae kha tuk lanpaw tuh hohcihmou ri lan houh um vae?” a cipya hae.⁴Te David nynh Bawipaw kha bua khia zah, Bawipaw nynh, “Thokuh lah, Keilah khua lang cceihbung; pawccecize Filistin hae kha na kuih kalan kae pya cih,” a cipya.⁵Tukeiccuze David te a ccungccaw hae tuh Keilah khua lang cceih hae zah Filistin hae kha a tuk hae, mih sahiin hae kha lawpah hae zah minmin kha patae a chia hae. Tuhcite David nynh Keilah khuaccaaw hae kha a luesah hae.

⁶Ahimelek ccapaw Abiathar nynh Keilah khua umpaw David kalan he a ccue tuh, ranpibawi angki zung kheit kha a ccyngbia.⁷Keilah khua kya David a thua cipaw kha Saul kya a hopya hae. Te Saul nynh, “Pachia nynh amaw kha ka kuih kya yn pya vae; pawccecize koikua te khawnawpaw thingccaw hae a hoipaw khua lungkhu lang teete amaw te amaw a khawsungkuh vae,” a ci.⁸Saul nynh ccungccaw balyn kha Keilah khua lang cciabungte David te a ccungccaw hae kha koihlu khylan te tuk khylan a ko hae.⁹Saul nynh a tungvaw hoyleinaw rae lan a paccyn vae cipaw kha David nynh he a nyh tuh, ranpibawi Abiathar kyakhe, “Ranpibawi angki kha hynhlang yn cciakhae,” a cipya.¹⁰David nynh, “Pou Bawipaw , Israel Pachia, na ryalahtupaw kae ka keiccuze Saul nynh Keilah khua lang cciate khua kha ro lan a paccyn cite ka thae.¹¹Keilah khuaccaaw hae nynh kae hynh amaw kuih kalan yn ap cih hae tou? Na ryalahtupaw nynh ka thae hawte Saul tuh yn cceih cih tou? Pou Bawipaw , Israel Pachia, na ryalahtupaw hynh nae hopya nawlan kae ngiaku,” a cipya. Bawipaw nynh, “Saul tuh yn cceih cih,” a cipya.¹²Te David nynh, “Keilah khuaccaaw hae nynh kae te ka ccungccaw hae hynh Saul kuih kalan oun ap cih hae tou?” cite khia zah, Bawipaw nynh, “Nang kha ae ap cih hae,” a cipya.¹³Tetuh David te za taruh loukaw acih hae paw a ccungccaw hae tuh thokuh hae zah Keilah khua kyate a pou hae; a ccia khonaw hae miakaw langkhe a cceih hae. David tuh Keilah khua kyate a ccue vae cipaw kha Saul kya he a hopah hae tuh, ccia lanpaw kha a umtaw vae.¹⁴David tuh Zif Ramkaw e muaram kya, ramkaw e akhynnaw hmin kya a um. Saul nynh nin takyh a ccung zemah, Bawipaw nynh David kha a kuih kya pya khyh. David nynh Saul A Sibia

¹⁵David tuh Zif Ramkaw, Horesh kya a um lyakhe, Saul nynh a hiinnaw chia khylan a ccung cipaw kha a ny.¹⁶Saul ccapaw Jonathan tuh thokuh zah Horesh kya umpaw David kalan a cceih; tuin kyakhe aning nynh Bawipaw liate khynnaw a mue nawlan thawzung a pya.¹⁷Aning nynh David kha, “Rih nan; pawccecize ka paaw Saul a kuih nynh nang kha ae muih lan khyh; nang tuh Israel siapharan lang na tang cih zah, kae tuh nang ae zuipaw lu ningnaw ka thua cih; tuhte acyiku lanpaw tuh ka paaw Saul nynh mah a ny,” a cipya.¹⁸Te mih lu ning mawte Bawipaw malang khe byakinnaw kha a rae hae; David tuh Horesh kya um zah Jonathan tuh inn lang a ki.

¹⁹Te Zif khuaccaaw hae abang tuh Gibeah khua umpaw Saul kalan cceihthung hae zah, “David tuh kae ram lungkhu, Jeshimon khua alia lang umpaw Hakhilah mua vawlan, Horesh e akhynnaw hmin kya nynh a reku.²⁰Pou siapharan, na ccia ry ccyh kya yn cceihbung vae ii, aning kha siapharan kuih kalan pya lanpaw tuh kaening ryalaw nynh thua,” a cipya hae.²¹Saul nynh, “Ka tungvaw ngaethya nae umsah oh keiccuze Bawipaw nynh hythua ae pya vae oh sah!²²Cceih oh lah, phe ria lan oun cyitua oh; a umnaw hmin te tuin kya hum nynh mou a muih cipaw kha phe ria lan oun dotua oh; pawccecize aning tuh myarya a thyaruh cite yn hopya hae.²³A rekunaw hmin balyn kha akaw-aleih la do oh lah, phe ariapaw bya khate ka kalan nae ki cih oh. Te kamaw ryte ccia lan oh; ram lungkhu a um zetuh, Judah ccungccaw athong-asan hae laku kya aning kha ka ccung cih,” a ci.²⁴Tukeiccuze minmin tuh thokuh hae zah Saul a ccia mawkhe Zif lang a cceih hae. David te a ccungccaw hae tuh Jeshimon alia lang, Arabah ram lungkhu, Maon ramkaw khe a um hae.

²⁵Saul te a ccungccaw hae tuh David ccung lan a cceih hae. David kha he a hopah hae tuh, aning tuh Maon ramkaw kya umpaw lungpi kalan cceihbung zah tuin kya a um. Tuh-e tuh Saul nynh a thae tuh, Maon ramkaw langkhe David kha a deehui.²⁶Saul tuh mua voikheit langte cceih zah, David te a ccungccaw hae tuh mua voikheit langte a cceih hae. Saul te a ccungccaw hae nynh David te a ccungccaw hae kha kyng khylan a naeku lya hae khe, David tuh Saul kyate lue khylan a rangsakuh.²⁷Te locceihtu lu kheit tuh Saul kalan yn thua zah, “Arangte yn cceih; pawccecize Filistin hae nynh ram kha a tuk vae hae,” a cipya.²⁸Tukeiccuze Saul nynh David kha deehui leite umtaw zah, Filistin hae kha tuk khylan a ccianua hae; tukeiccuze tuh-e hmin tuh Luenaw Lungpi a ci hae.²⁹David tuh tuin kyate cceih zah, En-gedi pee kya umpaw akhynnaw hmin kya a um. David nynh Saul kha Theih Khyh

¹Saul tuh Filistin hae a deehuinaw hae kyate he yn ki tuh, “David tuh En-gedi ramkaw kya a um,” cite a hopya hae.²Tetuh Saul nynh Israel hae balyn kya-e popaw ccungccaw thong thum kha ko hae zah, David te a ccungccaw hae kha ccung khylan Sathaw Lungpi langkhe a cceih.³Laanpi pe umpaw tuukhia kya thua zah, tuin kyakhe lungkarung ccangkheit a um; Saul tuh toiku lan a tee. David te a ccungccaw hae tuh lungkarung alungkhu lang adianaw kyakhe a haung hae.⁴David a ccungccaw hae nynh, “ ‘Na rhawpaw kha na kuih kya kae pya cih zah, ahoy na ci hawte a tungvaw na cyih cih,’ cite Bawipaw nynh ae hopyapaw nin tuh hynh-e nin hynh nynh athua vae,” a cipya hae. Te David nynh cceih zah Saul angkiccua apaki kha zya a aw.⁵Saul angkiccua apaki kha a awpya keiccuze David tuh nyalangte ngaesikuh zah,⁶a ccungccaw hae kyakhe, “Bawipaw nynh chitui thuhpaw ka bawipaw tuh Bawipaw kya-e chitui thuhpaw athua keiccuze a tungvaw ka kuih hangnua lanpaw kha Bawipaw nynh yn khee vae sah,” a cipya hae.⁷Tuhcite David nynh a ccungccaw hae kha pe biate hopah hae zah Saul tuk lanpaw kha kaw-ua khyh hae. Te Saul tuh thokuh zah lungkarung kyate pou zah a cceih.

⁸Tukoute David mah thokuh zah lungkarung kyate pou zah Saul a nulang te, “Ka bawipaw siapharan!” cite a ko. Saul nynh a nulang he a do tuh, David nynh laekhu kya bakhung zah sawtuanaw a pya.⁹David nynh Saul kha, “ ‘David nynh nang kha vawsawnaw pya lan a zuaku,’ cite a ho hae paw bya kha pawccemou na ngae?¹⁰Atunin mawkhe lungkarung kya Bawipaw nynh nang kha ka kuih kya yn pya cipaw kha na mit nynh a muih vae; abang nynh nang chia lanpaw kha yn tuhou hae zemah, nang kha kae haang. ‘Ka bawipaw tuh Bawipaw nynh chitui thuhpaw athua keiccuze ka kuih ka hangnua lan khyh,’ ka ci.¹¹Apang, dotua, ka kuih kya umpaw na angkiccua apaki hynh dotua; na angkiccua apaki tuh ka aw zah namaw kha kae chia khyh keiccuze, ka kuih kya hoyleinaw thuasah, cyiseinaw thuasah um khyh cipaw kha ccaerarih lan na nyh cih zah na muih cih. Ka hiinnaw chia lan nae ccung salamah na tungvaw ka sei khyh.¹²Nang te kae laku kya Bawipaw nynh bya oun pia vae sah! Bawipaw nynh na tungvaw kya phu yn lawpah vae sah; thuasalama ka kuih nynh nang kha ae rawse lan khyh.¹³Langmawlya e phungtangbya kyaze, ‘Ccungccaw hoyleipaw kyate hoyleinaw a pou,’ cite a um; thuasalama ka kuih nynh nang kha ae rawse lan khyh.¹⁴Israel siapharan nynh hum kha mou rawse zah a pounua? Hummou na deehui? Ui chihpaw tou? Uili tou?¹⁵Tukeiccuze Bawipaw tuh byapiatu thua sah lah, nang te kae laku kya byapae vae sah. Oun dopah sah lah, ka byathan hynh pankhaete na kyate yn luesah vae sah,” a cipya.

¹⁶Tuhcite David nynh Saul kha bya a hopah koute, Saul nynh, “Ka ccapaw David, tuh-e roi tuh namaw roi athua tou?” a cipya. Saul nynh a roisaw zah a rah.¹⁷Aning nynh David kha, “Nang tuh kae laeze na dinghua; pawccecize kae nynh athahpaw te kae liaru zemah nang nynh tuh ahoypaw te nae liaru.¹⁸Bawipaw nynh kae hynh na kuih lungkhu yn nung ccyh lyaze kae hynh nae chia khyh keiccuze, ka tungvaw ahoy lante nae ccuepenawpaw kha atunin nae langsahpya vae.¹⁹Ccungccaw nynh a rhaw kha a muih ze khyndadyh lante a cciasah cih zawtou? Tukeiccuze atunin ka tungvaw na cyipaw hanlan hynh Bawipaw nynh hoynaw khate ae sangru vae sah.²⁰Atu tuh nang tuh siapharan lang na tang ccaccing cih zah, Israel peenaw tuh na kuih kya atyn cih cipaw ka ny.²¹Tukeiccuze nang nynh ka ciihan hae kha na chia khyh nawlan hae te ka paaw puizia hae kyate ka min hynh na la the khyh nawlan Bawipaw min te bya yn kinpakuh,” a cipya.²²Tukeiccuze David nynh tuh-e tuh Saul kyakhe bya a kinpyaku. Te Saul tuh a inn lang a ki, thuasalama David te a ccungccaw hae tuh akhynnaw hmin langkhe a cceih hae. Samuel Chinaw

¹Samuel he chih tuh, Israel hae balyn tuh sueluakuh hae zah a rah hae, te Ramah khua e a inn kyakhe a uu hae.
Te David tuh thokuh zah Paran ramkaw langkhe a cceih. David te Nabal Zu

²Maon kyakhe ccungccapaw lu kheit um zah a hoirumnaw tuh Karmel khua kya nynh a um. Tuh-e paw tuh myarya a hoirum; tuu thong thum te miaa thong kheit a hoi. Karmel khua khe a tuu hae ming kha a ngo hae.³Tuh-e paw min tuh Nabal cikuh zah, a zu min tuh Abigail acikuh. Tuh-e nopinung tuh a hawpaw te a puithyapaw nynh thua, thuasalama pisepaw tuh a rysawthahpaw te a ozia thahpaw nynh thua; aning tuh Kaleb phin nynh thua.⁴Nabal tuh a tuuming a ngo cciamang cipaw kha David nynh ramkaw khe a thae.⁵Tukeiccuze David nynh ccangvae lu haw kha a saw hae; David nynh ccangvae hae kyakhe, “Karmel khua lang, Nabal kalan la cceih oh lah, ka min te bya la beih oh.⁶Hynhcite sawtuate na la hopah cih oh: ‘Na tungvaw daenaw um sah, na innbyn tungvaw daenaw um sah lah, na hoipaw balyn tungvaw kya daenaw um vae sah.⁷Nang tuh tuuming ngotu hae na hoi cite ka thae; atu na tuurin hae tuh kae kya um hae zah, vawsawnaw kae pya khyh hae, Karmel khua kya a um lungkhu hae balyn, mih uccaw pawpaw mah zo khyh.⁸Na ccangvae hae kha khia hae lah, ae hopah cih hae. Tukeiccuze ka ccangvae hae tuh na malang maehoynaw mue vae hae sah; kaening tuh poi tua nin kya nynh kae thua. Na kuih kya a umpaw miakaw kha na ryalahtu hae te na ccapaw David kalan beih oun pya,’ na la cipah cih oh,” a cipya hae.

⁹David ccangvae hae he a thua hae te, tuh-e balyn tuh David min te Nabal kha a hopya hae; te minmin nynh a ngaw hae.¹⁰Thuasalama Nabal nynh David a ryalahtu hae kyakhe, “David tuh hummou athua? Jesse ccapaw tuh hummou athua? Atu she lya tuh mih bawi hae kyate a ccue hae paw ryalahtu patae a um hae.¹¹Ka tuuming ngotu hae elang ka chiapaw saw te ka sanlou te ka tui kha lawpyate, tei kyate oun thua hae paw cipaw ka ny leipaw ccungccaw hae kha ka pya cih hae tou?” a cipya hae.¹²Tukeiccuze David a ccangvae hae tuh maeleihkute ki hae zah, tuh-e balyn tuh David kha a hopya hae.¹³David nynh a ccungccaw hae kha, “Ccungccaw miakaw nynh a thaloi kha a cce kya kekuh sah!” a cipya hae. Te mih balynte mih thaloi kha ccarou a keku hae; David mah a thaloi a kekuh bua; te milu za pali tuh David nulang zuikuh hae zah, milu za ning tuh mih uccaw kha a ngaw hae.

¹⁴Ccangvaepaw lu kheit nynh Nabal zu Abigail kalan cceih zah, “David nynh ah bawipaw kha byabeih khylan locceihtu hae kha ramkaw kyate oun saw hae zah, aning nynh minmin kha saryate a sianua hae.¹⁵Tuhzemah minmin tuh kae tungvaw myarya hoy hae zah, vawsawnaw kae teing khyh, ramkaw kya kae um zah minmin ryte kae umkheih lungkhu balyn, pawpaw uccaw mah papin zo khyh;¹⁶tuu kae rin zah minmin ryte kae umkheih lungkhu balyn, khuazi khuadae oun thungkhaw hae.¹⁷Tukeiccuze atu hynh-e hynh nyh lah, na cyi lanpaw kha tuaku tua; pawccecize kae bawipaw te a innbyn balyn tungvaw kya hoyleinaw rae lanpaw kha byapae athua vae; aning tuh humhung nynh mah bya hopya kho lei lan ciate ccungccathya athua,” a cipya.

¹⁸Tetuh Abigail nynh rangsakuh zah sanlou za ning, misutui kha savingtui-ung ccangning, avoi ty vae paw tuu sa pangaw saw, thoupaw ccathae kha ccathae tounawpaw te kaw pangaw, misu thae aroupaw nge za kheit te thaeku thae aphe za ning kha lah zah, lann hae tungvaw a khang,¹⁹te a ccangvae hae kha, “Ka malang la cceih oh; kae tuh nae nulang te kae cceih cih,” a cipya hae. Thuasalama a vawpaw Nabal kha hopah khyh.²⁰Lann kha ccikuh zah mua aleihpaw kya a rungbung lyakhe, David te a ccungccaw hae tuh a kalan oun rungbung hae zah a tungkuh hae.²¹A tungku maw hae khe, David nynh, “Aning nynh a hoipaw balyn kha ccangkheit san azo khyh nawlan, hynh-e paw nynh ramkaw kya a hoipaw balyn kha alakaw lan nynh ka la rinpya ccaccing; aning nynh ahoypaw kha athahpaw te yn liaru.²²Awkhualan khua he dae te, Nabal te asekuh hae paw balyn kya-e pise lu kheit kha chia leite ka cciataw ze, tuhmaminte thuasah, tuhlaeze mah thuasah Pachia nynh David tungvaw cyih vae sah,” cite a la ho vae.

²³Abigail nynh David kha a muih tuh, lann tungvaw te arangte rung zah, David malang khe laekhu kya a bakhung.²⁴A cculeihpaw khe bakhung zah, “Ka bawipaw, seinaw tuh ka makhae tungvaw kya um vae sah; na ryalahtunung nynh na nakaring kya beih kae hopah sah lah, na ryalahtunung bya hynh beih yn ngaepya tua.²⁵Ka bawipaw, hynh-e ccungccaw hoyleipaw Nabal bya hynh beih ccuinpah nan; pawccecize aning tuh a min a um hawte nynh athua; a min tuh Nabal cikuh zah amaw kya ngaeenaw a um; thuasalama na ryalahtunung kae tuh ka bawipaw nang nynh nae saw hae paw na ccangvae hae kha ka muih khyh hae.

²⁶“Te atu tuh ka bawipaw, Bawipaw tuh a hiin thyhte, nang mah na hiin thyhte, ccungccaw chiapaw seinaw kyate thuasah, namaw kuih ccaccei te phulawnaw raenaw kyate thuasah Bawipaw nynh nang kha ae khee keiccuze, na rhaw hae te ka bawipaw tungvaw kya hoyleinaw rae lan a zuakuh hae paw tuh Nabal hawte thua vae hae sah.²⁷Atu na ryalahtunung nynh ka bawipaw kalan kae ccyngpyapaw hynh-e lasung hynh ka bawipaw ae zui hae paw ccangvae hae kalan pya thua sah.²⁸Na ryalahtunung ka seinaw hynh beih yn ngaethya; pawccecize ka bawipaw nynh Bawipaw a rhawpaw kha na tuk keiccuze, Bawipaw nynh ka bawipaw nang tuh atynpaw inn kha ae sakpah cih; na hiin lungkhu balyn na tungvaw kya hoyleinaw kha muih thua lan khyh.²⁹Lukhakheit nynh nang kha deehui lan te chia khylan ae thonuaku ze, ka bawipaw hiinnaw tuh Bawipaw na Pachia do-oihnaw lungkhu a umpaw hiinnaw sungkua lungkhu khe tungbia athua cih; thuasalama na rhaw hae kha tuh henuanawpaw zae kyate a toikuhpaw hawte a toisakuh cih hae.³⁰Bawipaw nynh namaw konglang a ho vae paw hoynaw balyn kha na tungvaw kya rae zah, Israel uktu bawi lang he ae nung te,³¹akonglang um leite chiise luasahnaw kong thuasah, namaw ccaccei nynh phulawnaw kong thuasah, ka bawipaw nang tuh ngaethyanaw te namaw toulou seisakunaw um lan khyh. Bawipaw nynh ka bawipaw tungvaw kya hoynaw he a rae te, na ryalahtunung hynh yn ning nan vae ii,” a cipya.

³²David nynh Abigail kha, “Atunin kae te tungku khylan ae sawtupaw Bawipaw , Israel Pachia tuh thehoyte um sah!³³Ahoypaw na tuanaw kya hythuanaw um vae sah, chiise luasahnaw kyate thuasah, kamaw kuih ccaccei te phulawnaw kyate thuasah atunin yn kheetu namaw kya mah hythuanaw um vae sah!³⁴Thanccingte nang kha vawsawnaw pyanaw kyate yn kheetu Bawipaw , Israel Pachia tuh a hiin thyhte, kae te tungku khylan arangte nae ccia khyh ze, awkhualan awkhua tuh Nabal ccungccaw pise lu kheit san hiin vae lan khyh,” a cipya.³⁵Abigail nynh a ccyngpyapaw lasung kha a kuih kyate David nynh lawpakuh zah, “Na inn lang lungdaete la cceih; dotua, na bya kha kae ngaepah zah, nae ngiapaw kha kae pya vae,” a cipya.

³⁶Abigail tuh Nabal kya a thua; aning nynh siapharan poi tahawpaw poi kha a inn kya a la tua. Nabal tuh myarya a rui keiccuze lungpawte a um; tukeiccuze khua adae mawlaezung pawpaw mah hopah khyh.³⁷Awkhualan awkhua, Nabal tuh misutui a ruipaw he a ccite, tuh-e konglang kha a zu nynh hopah zah, a thinlung tuh chih zah aning tuh lung hawte nynh athua vae.³⁸Nin haw loukaw aro koute Bawipaw nynh Nabal kha detah zah a chih.

³⁹Nabal a chih vae cipaw kha David nynh he a thae te, “Nabal nynh yn saryanawpaw byathan kha bya yn piapah zah, a ryalahtu kha hoyleinaw kyate yn thungkhawtu Bawipaw tuh thehoyte um sah; Nabal nynh a raepaw hoyleinaw kha amaw vawlan khe Bawipaw nynh a ccawsah vae,” a ci. Te David nynh ccungccaw saw hae zah Abigail kha a zu lang a soihbiasah hae.⁴⁰David a ryalahtu hae tuh Karmel kya umpaw Abigail kya he a thua hae te, “David nynh a zu lang ko lan kaening hynh na kalan oun saw,” a cipya hae.⁴¹Abigail nynh thokuh zah laekhu kya bakhung zah, “Kae tuh ka bawipaw a ryalahtu hae ccu kha a singpaw seenung nynh ka thua,” a cipya hae.⁴²Abigail tuh arangte thokuh zah lann tungvaw a ccikuh; a ryalahtu nopi hae lu pangaw nynh amaw kha a do-oih hae. Abigail tuh David a locceihtu hae kya zuikuh bua zah David zu lang a tang.

⁴³David nynh Jezreel khuanung Ahinoam kha mah zu lang a umkhae; parouh mawte a zu lang a tang hae.⁴⁴Saul nynh David zu athuapaw a ccanung Mikhal kha Gallim khuapaw Laish ccapaw Palti kalan zu lang phe a la pya vae. David nynh Saul kha Bua A Haang

¹Zif khuaccaaw hae tuh Gibeah khua umpaw Saul kalan oun thua hae zah, “David tuh Jeshimon te a hawiliakuh hae paw Hakhilah mua kya a rekuh,” a cipya hae.²Tukeiccuze Saul tuh thokuh zah Israel ccungccaw popaw milu thong thum kha hoeikute Zif Ramkaw kya David kha ccung khylan Zif Ramkaw lang a cceihbung.³Saul tuh Jeshimon te a hawiliakuh hae paw Hakhilah mua vawlan, laanpi pe khe a rya. David tuh ramkaw kya a um; Saul nynh ramkaw lang yn deehui vae cipaw he a nyh te,⁴David nynh dophitu hae kha saw hae zah, Saul tuh yn thua ccaccing cipaw a ny.⁵Tetuh David tuh cceih zah Saul a ryanaw hmin kya a thua; David nynh Saul te a rhawbawipaw Abner, Ner ccapaw nynh a inaw hae hmin kha a muih. Saul tuh ryahmin lungkhu khe ih zah, a rhawkaw hae tuh a pepan po voilu lan a ih hae.⁶David nynh Hit ccungccaw Ahimelek te Zeruiah ccapaw Abishai, Joab neitaw kyakhe, “Ryahmin lungkhu lang, Saul kalan hummou yn zui cih?” cite khia hae zah, Abishai nynh, “Kamaw kae zui cih,” a cipya.⁷Tukeiccuze David te Abishai tuh khuazi khe rhawkaw hae kalan a cceih hae; tuin kyakhe Saul tuh ryahmin lungkhu la ih zah, a ccoi tuh a lu pe laekhu kya a la bing; Abner te rhawkaw hae tuh a pepan po voilu lan a ih hae.⁸Abishai nynh David kha, “Pachia nynh na rhawpaw kha na kuih kalan atunin ae pya vae; tukeiccuze aning hynh laephi kya phang bingkuh lan, ccoi te vae kheit kyalya kae thuing; vae ning ka thuing lan khyh,” a cipya.⁹Thuasalama David nynh Abishai kha, “Aning kha roh nan; pawccecize Bawipaw nynh chitui thuhpaw ccungccaw kha a kuih a hangnua paw tuh sei leite a um cih zawtou?” a cipya.¹⁰David nynh, “Bawipaw tuh a hiin thyhte, Bawipaw nynh amaw kha a theih cih; tuhkhyhze a chi nin tuh yn thua mamin cih; tuhkhyhze rhawtuknaw lang a cceih cih zah a chih cih.¹¹Bawipaw nynh chitui thuhpaw tungvaw kya ka kuih hangnua lanpaw tuh Bawipaw nynh yn khee vae sah; thuasalama a lu pe umpaw ccoi te tui-ung kha lah lah, cceih ccavae sih,” a cipya.¹²Tukeiccuze David nynh Saul a lu pe umpaw ccoi te tui-ung kha lah zah, a cceih hae. Tuh-e tuh humhung nynh mah muih khyh zah nyh khyh, humhung mah a inaw kyate thaekuh khyh; pawccecize Bawipaw nynh thuhbabi lan a isah hae keiccuze mih balynte marya a ih hae.

¹³Tetuh David tuh accya khuraw langkhe cceih zah, asawnaw e mua dung khe thadyn zah, minmin laku tuh myarya asawkuh.¹⁴David nynh rhawkaw hae te Ner ccapaw Abner kha ko hae zah, “Abner! Bya nae khungru lan khyh tou?” a cipya. Te Abner nynh, “Siapharan a kopaw tuh hummou na thua?” cite a khung.¹⁵David nynh Abner kha, “Pise na thua khyh tou? Israel hae kya nang ae lopaw hummou a um? Tuhte athua lanze, na bawipaw siapharan kha pawccemou na ngaw khyh? Pawccecize ccungccaw lu kheit nynh na bawipaw siapharan kha chia khylan a teenua.¹⁶Rya na lawpaw hoy khyh. Bawipaw tuh a hiin thyhte, Bawipaw nynh chitui thuhpaw, na bawipaw kha na ngaw khyh keiccuze nang tuh chi lan na ccan. Atu dotua, siapharan lu pe umpaw a ccoi te tui-ung kha teimou a um vae hae?” a cipya.

¹⁷Saul nynh David roi kha syntaw zah, “Ka ccapaw David, tuh-e tuh namaw roi athua tou?” a cipya. David nynh, “Pou siapharan, ka bawipaw, kamaw roi nynh thua,” a cipya.¹⁸Te David nynh, “Ka bawipaw nynh na ryalahtu hynh pawccemou palei nae deehui? Paw ka cyi keiccu mou? Ka kuih kya paw seinaw mou a um?¹⁹Tukeiccuze ka bawipaw siapharan nynh na ryalahtupaw ka bya hynh yn ngaepya tua. Kae hynh dou lan nang ae tuhoupaw tuh Bawipaw athua ze, silawnaw kha la ccou vae sah; thuasalama ccungccaw athua ze, minmin tuh Bawipaw malang thyalawnaw mue vae hae sah, pawccecize minmin nynh, ‘Cceih, ccangpaw pachia hae kha la beik hae,’ cite yn hopah hae zah, Bawipaw rho laephi kya ka umbua khyh nawlan atunin yn dee hae.²⁰Tukeiccuze ka chii hynh Bawipaw a um leinaw, laephi kalan lua nan sah; pawccecize ccungccaw nynh vamyng sa kheit kha mua vawlan a ccung hawte, Israel siapharan tuh uili ccangkheit kha ccung khylan yn pou vae,” a ci.

²¹Tetuh Saul nynh, “Ka sei vae; ka ccapaw David, yn ki, ka hiinnaw hynh atunin na malang a phute keiccuze vawsawnaw papin kae pya vae lan khyh; kae tuh ka ngaee zah myarya ka cyisei vae,” a cipya.²²David nynh, “Pou siapharan, hein kya ccoi kha mang um! Ccangvae lu kheit nynh yn cceih sah lah, yn lah sah.²³Bawipaw nynh ccungccaw miakaw kha a dingnaw hanlan te a lungzinaw hanlan lasung a pya kalang hae; pawccecize Bawipaw nynh nang kha ka kuih lungkhu lang atunin yn pya, thuasalama Bawipaw nynh chitui thuhpaw kha ka kuih ka hangnua khyh.²⁴Atunin na hiinnaw tuh ka malang a phute thyhte, ka hiinnaw hynh Bawipaw malang a phute sah lah, vawsawnaw balyn kyate yn luesah vae sah,” a cipya.²⁵Tetuh Saul nynh David kha, “Ka ccapaw David, na tungvaw hythuanaw um vae sah! Ryalaw patae na lah cih zah, na ryalaw kya na laan na sui a ua cih,” a cipya. Tukoute David tuh a cceih vae, Saul tuh a umnaw lang a ki. David te Gath Siapharan Akhish

¹David nynh a thinlung kyakhe, “Ninkhakheit tuh Saul kuih te ka chih mamin cih; Filistin hae ram lang ka ccuepaw laeze ka hanlan ahoy huapaw pawpaw mah um vae khyh; Saul nynh Israel ram lungkhu kya kae yn ccungpaw hynh a lungthang cih zah, a kuih kyate ka lue cih,” cite a tuaku.²Tukeiccuze David tuh thokuh zah amaw te a kya um hae paw za taruh ryte Moak ccapaw Akhish, Gath siapharan kalan khe a cceih hae.³David te a rhawkaw hae tuh ccungccaw miakaw mawmaw innbyn raveihte Gath khua khe Akhish ryte a umkheih hae, David tuh a zu hae lu ning, Jezreel khuanung Ahinoam te Karmel khuanung Abigail, Nabal nynh a chitawpaw nomaenung ryte a um hae.⁴David tuh Gath khua lang a ccue vae cipaw kha Saul nynh a thae tuh, ccung vae khyh.

⁵Te David nynh Akhish kha, “Na malang maehoynaw ka mue zetuh, ka um nawlan ram lungkhu e khua khuakheit kya hmin hminkheit kha beih yn pya; pawccecize na ryalahtu kae tuh namaw ryte siapharan khua kya pawccemou ka umbua cih?” a cipya.⁶Tukeiccuze tuin nin khe Akhish nynh Ziklag khua kha a pya; tukeiccuze Ziklag khua tuh atunin cia Judah siapharan khua lang a tang.⁷David nynh Filistin hae ram kya a um ccyh tuh kum kheit sah pali acih.

⁸David te a ccungccaw hae nynh cceihthung hae zah Geshur hae, Girzi hae te Amalek hae kha a thiing hae; pawccecize hynh-e minphuin hae tuh langmawlya te Shur khua lang cceihpaw laanpi kyate Izip ram kyacia a la um hae paw nynh thua.⁹David nynh tuh-e ram tuh thiing zah nopi pise lu kheit san a hiin te cciataw khyh hae, tuu hae, tangnuapaw hae, lann hae, kalauh hae te boeining hae kha lah hae zah Akhish kalan a ki hae.¹⁰Akhish nynh, “Atunin hum hae mou na thiing hae?” cite a khia ze, David nynh, “Judah ram Negeb,” tuhkhyhze “Jerahmeel hae ram Negeb,” tuhkhyhze “Ken hae ram Negeb,” cite leih a hopya.¹¹“ ‘David nynh tuhte khahte a cyi,’ cite ka konglang a hosei cih hae,” cipaw kha David nynh a tua keiccuze, Gath khua lang thongpang a thuakhaepaw a um khyh nawlan, nopi pise lu kheit sanmah a hiin te cciataw khyh hae. Filistin hae ram kya a um lungkhu balyn tuhcite leih a cyi.¹²Akhish nynh David kha zyn zah a thinlung kyakhe, “Aning nynh a ccungccaw Israel hae kha myarya a huasaku vae hae; tukeiccuze aning tuh ka ryalahtu lang a tang zungzae vae cih,” cite a tua.

¹Tuh ccyh lyakhe Filistin hae nynh Israel hae kha tuk khylan mih rhawkaw hae kha a pum hae. Akhish nynh David kha, “Nang te na ccungccaw hae tuh kamaw ryte rhawkaw hae kya cciabua lanpaw kha solei la nykuh,” a cipya.²David nynh Akhish kha, “Myarya hoy, na ryalahtu nynh ka cyi khonaw kha na nyh cih,” a cipya. Akhish nynh David kha, “Myarya hoy, nang tuh na hiin lungkhu balyn ka pyn rhawviatu lang kae nung cih,” a cipya. Saul nynh Chihiinleihthyapaw A Khia

³Samuel tuh chih vae zah Israel hae balyn tuh rawkhuite um hae zah a khua Ramah khua khe a uu hae. Saul nynh chihiinleihthya hae paw te mitleihthya hae paw kha ram kyate khaleih a dee hae.⁴Filistin hae tuh a sueluakuh hae, te cceih hae zah Shunem khua kya ryahmin a tahku hae. Saul nynh Israel hae balyn kha pum hae zah Gilboa khua kya ryahmin a tahku hae.⁵Saul nynh Filistin rhawkaw hae kha a muih hae tuh, rih zah myarya a thyngkuh.⁶Saul nynh Bawipaw kha he a khia tuh, Bawipaw nynh maan te thuasah, Urim te thuasah, profeh hae kyate thuasah khungru khyh.⁷Tetuh Saul nynh a ryalahtu hae kyakhe, “Chihiinleihthyapaw nopi kha yn ccungpah oh, a kalan ka cceih cih zah ka khia cih,” a cipya hae. A ryalahtu hae nynh, “Endor khua kya lu kheit a um,” a cipya hae.

⁸Te Saul tuh a boeining kha liakute ccangpaw boeining kha lawkuh zah pise hae lu ning ryte cceih hae zah khuazi khe tuh-e nopinung kya a thua hae. Saul nynh, “Chihiin yn leihpya tua, na kya a min kae hopyapaw muisaw kha yn kopya tua,” a cipya.⁹Nopinung nynh, “Chihiinleihthya hae paw te mitleihthya hae paw kha Saul nynh ram kyate a dee hae cipaw tuh hoyte phe na ny. Pawccemou kae hynh chisah khylan ka hiinnaw hynh kaang nae syakhaw?” a cipya.¹⁰Thuasalama Saul nynh amaw kha Bawipaw min phyate thyalawkute byakinpakuh zah, “Bawipaw tuh a hiin thyhte, e ryalaw keiccuze na tungvaw detahnaw ccah lan khyh,” a cipya.¹¹Te nopinung nynh, “Hummou kae kopah cih?” cite khia zah, Saul nynh, “Samuel kha yn kopah,” cite a khung.¹²Nopinung nynh Samuel kha a muih tuh, thawte sia zah, “Pawccemou nae ling? Nang hynh Saul nynh na thua!” cite Saul kha a hopya.¹³Siapharan nynh amaw kha, “Rih nan, pawmou na muih?” a cipya. Nopinung nynh Saul kha, “Laephi kyate pachia yn poupaw kha ka muih,” a cipya.¹⁴Aning nynh nopinung kha, “A muinsan tuh pawtemou a um?” cite khia zah, nopinung nynh, “Paawpipaw lu kheit yn kaethung; angkiccua nynh a kiku,” a cipya. Te Saul nynh Samuel nynh thua cipaw nyh zah, laekhu kya bakhungte sawtuanaw a pya.

¹⁵Te Samuel nynh Saul kha, “Pawccemou kae hynh pousahte kaccohkale nae nung?” a cipya. Saul nynh, “Myaryamaw ka lungriathae, pawccecize Filistin hae nynh yn tuk hae, Pachia tuh ccanglang yn hawitaw vae zah profeh hae kyate thuasah, maan kyate thuasah bya yn khung vae khyh; tukeiccuze pawmou ka cyih cih cipaw kha nae hopya ccaw cite nang kha kae ko,” a cipya.¹⁶Samuel nynh, “Nang kha Bawipaw nynh ccanglang ae hawitaw vae zah na rhaw lang a tang vae ze, pawccemou kae tuh nae khia ung?¹⁷Bawipaw nynh ka kyate a ho hawte na tungvaw a cyi vae; Bawipaw nynh peenaw kha na kuih kyate lah zah, na innpaw paw David kha a pya vae.¹⁸Nang nynh Bawipaw bya kha na zui khyh zah, Amalek tungvaw myarya lepaw a thinrianaw kha na ccingsah khyh, tukeiccuze Bawipaw nynh hynh-e uccaw hynh na tungvaw kya atunin a cyi vae.¹⁹Tuhpiaze Bawipaw nynh nang te Israel hae kha Filistin hae kuih kya ae pya cih oh; awkhualan khe nang te na ccapaw hae tuh kamaw ryte umkheih lan; Bawipaw nynh Israel rhawkaw hae kha mah Filistin hae kuih kalan a pya cih hae,” a cipya.

²⁰Vaekheitmawte Saul tuh laekhu kya tharae dyngkuh lan khuliakuh zah, Samuel bya keiccuze myarya a rih; anin ninlang te azi zidae pawpaw mah a ae khyh keiccuze thawzung hoi vae khyh.²¹Tuh-e nopinung nynh Saul kalan yn cceih zah, Saul tuh myarya a rikawthua cipaw he a muih tuh, a kyakhe, “Na seenung nynh na bya kha ka la ngae; ka chi ze ka chih cite nae hopyapaw kha ka ngae.²²Tukeiccuze atu, nang nynh mah na seenung bya hynh beih ngaetua; na malang hin sanlou beihtaraw kae nungpah sah; he na cceih te na thaw a um ccaw, aetua,” a cipya.²³Saul nynh phe mah zah, “Ka ae lan khyh,” a ci. Thuasalama a ryalahtupaw te nopinung nynh thawte soihbia hae zah mih bya kha a ngae. Tukeiccuze laekhu kyate thokuh zah ikhung vawlan a haung.²⁴Tuh-e nopinung nynh a inn kya thobaleihpaw vaetuataw sa kheit hoi zah arangte a chia, vaekhui kha lah zah a nonde koute ransi phing leipaw sanlou lang a rae.²⁵Tuh-e tuh Saul te a ryalahtu hae malang nungpah hae zah, minmin nynh a ae hae. Te thokuh hae zah tuh-e khuazi khe a cceih hae. Filistin hae nynh David A Vua hae

¹Filistin hae nynh mih rhawkaw hae kha Afek khua kya a pum hae, Israel hae tuh Jezreel khua umpaw tuisung pe khe ryahmin a tahku hae.²Filistin bawi hae tuh rhawkaw za kheit phu, thong kheit phu cite aphuphute a cceih hae, David te a ccungccaw hae tuh nulangte Akhish ryte a cceih hae.³Filistin rhawbawi hae nynh, “E Hebru hae hynh hein kya pawmou a cyi hae?” cite khia hae zah, Akhish nynh Filistin rhawbawi hae kha, “E paw tuh Israel Siapharan Saul a ryalahtu David thua khyh tou? Ka kya nin patae te kum patae a um vae, ka kya yn thua takaw te atunin cia a cyiseinaw ccangkheit san ka muih khyh,” a cipya hae.⁴Thuasalama Filistin rhawbawi hae tuh a tungvaw mih thinria; te Filistin rhawbawi hae nynh amaw kyakhe, “E paw hynh kisah tua, na pyapaw hmin lang la ki sah; tuhkhyhze tuh rhawtuknaw kya aening rhaw lang yn tangsei cih. Aning nynh a bawipaw kha bua ccawkuthui nawlan pawtemou a rae kho cih? Ah ccungccaw hae lu kha pyate ccawkuthuinaw kha rae lan khyh tou?⁵Nopi hae nynh law biate hlaw liakuh hae zah,‘Saul nynh athong thong te,David nynh accong ccong tea chia hae,’ citehlaw a sahpya hae paw khahynh-e David hynh thua khyh tou?” a cipya hae.

⁶Te Akhish nynh David kha ko zah, “Bawipaw tuh a hiin thyhte, nang tuh a lungzipaw na thua zah rhawtuknaw kya kamaw ryte na ccia bungthungpaw hynh ahoy cite ka muih; pawccecize ka kya nae thua nin te atunin cia na cyiseinaw ccangkheit san ka muih khyh. Thuasalama Filistin bawi hae nynh tuh nang hynh mih nawccah khyh.⁷Tukeiccuze atu la ki ccavae; lungdaete la cceih; Filistin bawi hae kha mih thinria nawlan pawpaw mah cyih nan,” a cipya.⁸David nynh Akhish kha, “Kae nynh pawmou ka cyi? Siapharan ka bawipaw a rhaw hae kha ccianuate tuk lei lan ciate, na ryalaw kya ka tee takaw te atu cia, na ryalahtu tungvaw kya paw cyiseinaw mou na muih?” a cipya.⁹Akhish nynh David kha, “Nang tuh ka muihnaw kya Pachia vaawpaw hawte ccaenaw um leipaw nynh na thua cipaw ka ny; thuasalama Filistin rhawbawi hae nynh, ‘Aning tuh kaening ryte rhawtuknaw lang cceihbua lan khyh,’ a ci hae.¹⁰Tukeiccuze nang tuh na kya a zuikuh bua hae paw na bawipaw Saul a see hae ryte awkhua takaw te thokuh oh lah, nang kae pyapaw hmin langkhe la cceih oh. The thyapaw kha na thinlung kya nung nan, pawccecize ka malang kou hoy lan rya na law vae. Awkhua takaw te thokuh oh lah, khua he adae takaw te la cceih ccavae oh,” a cipya hae.¹¹Tukeiccuze David te a ccungccaw hae tuh Filistin hae ram lang ki khylan awkhua takaw te a thokuh hae. Thuasalama Filistin hae tuh Jezreel lang a cceihthung hae. Ziklag Rohtu David Phulaw hae

¹David te a ccungccaw hae tuh nin thumnaw nin kya Ziklag khua he a thua hae te, Amalek hae nynh Negeb te Ziklag kha a la thiing hae. Ziklag khua kha tuk hae zah maee te a soi hae,²nopi hae te khua kya um hae paw balyn kha adih ale marya a kyng hae; lu kheit sanmah chia leite marya a cciakhae hae.³David te a ccungccaw hae nynh khua kya he a thua hae tuh, khua kha maee te marya la soi hae zah, mih zu hae, mih ccapaw hae te mih ccanung hae tuh kyngte marya a la cciakhae hae paw kha a muih hae.⁴Tetuh David te a umkheih hae paw tuh thawte sia hae zah, rawnawpaw thawzung phe thang lan ciate a rah hae.⁵David zu hae lu ning, Jezreel khuanung Ahinoam te Nabal nynh a chitawpaw nomaenung, Karmel khuanung Abigail kha mah kyngte a cciakhae hae.⁶David tuh myaryamaw a lungriathae; pawccecize ccungccaw balyn tuh mih ccapaw hae te mih ccanung hae elang myarya mih ngaethya keiccuze David kha lung te deih lan cite a hoku hae. Thuasalama David nynh Bawipaw a Pachia kyakhe thawzung a lawku.

⁷David nynh Ahimelek ccapaw ranpibawi Abiathar kyakhe, “Ranpibawi angki kha yn pyatua,” a cipya. Tukeiccuze Abiathar nynh ranpibawi angki kha David kalan a ccyng.⁸David nynh Bawipaw kha khia zah, “E aphu hae hynh ka deehui cih hae tou? Ka phah cih hae tou?” a cipya. Aning nynh, “Deehui hae; solei na phah cih hae zah solei na luesah cih hae,” a cipya.⁹Tukeiccuze David te a kya um hae paw za taruh tuh cceih hae zah Besor Vaw kya a thua hae, tuin kyakhe abang kha a cciataw hae.¹⁰David te a ccungccaw hae za pali nynh po a deehui hae; thuasalama Besor Vaw zua lan myaryasankae mih thawbang vae hae paw za ning tuh nulang a um hae.

¹¹Ramkaw khe Izip paw lu kheit kha muih hae zah David kalan a cciakhae hae. Sanlou kha pya hae zah a ae, nia lanpaw tui kha mah a pya hae;¹²thaeku thae sanlou apaekua te misu thae aroupaw nge ning kha mah a pya hae. He a ae kou tuh, a thaw yn umthui; pawccecize nin thum te zi thum lungkhu sanlou ae lei, tui mah nia leite a la um.¹³Te David nynh amaw kha, “Nang hynh hum ccungccaw mou na thua? Tei kyate mou nae thua?” cite a khia. Aning nynh, “Kae tuh Izip ccangvaepaw ka thua zah Amalek ccungccapaw kya ryalahpaw nynh ka thua. Anuhlang nin thum lyakhe ka cci keiccuze ka bawipaw nynh nulang phe yn cciataw.¹⁴Khereth hae kya-e Negeb, Judah ram kya-e Negeb te Kaleb ram kya-e Negeb kha kae thiing hae zah, Ziklag khua kha maee te kae soi,” a ci.¹⁵David nynh amaw kha, “Tuh-e ccungccaw thiingtu hae paw aphu kalan tuh nae cciakhae cih tou?” a cipya. Aning nynh, “Kae theih lan khyh, na bawipaw kuih kalan mah kae pya lan khyh, cite Pachia min phyate bya nae kinpyaku zetuh, mih kalan kae cciakhae bung cih,” a cipya.

¹⁶Aning nynh David tuh cciakhae bung zah, tuh-e hae tuh Filistin hae ram te Judah ram kya-e myarya lungpaw luadepaw uccaw hae keiccuze ae hae, neih hae, lawbia hae zah hmin takyh kyakhe pong a pazaekuh hae.¹⁷David nynh zetepakaw te awkhualan zete cia minmin kha a tuk hae. Kalauh ccikuh hae zah a ccue hae paw ccangvae hae za pali holeite lu kheit sanmah lue khyh hae.¹⁸Amalek hae nynh a cciakhae hae paw balyn kha David nynh bua a muethui. David nynh a zu hae lu ning kha a luesah hae.¹⁹Ccungccaw adih ale, ccanung ccapaw hae, luadepaw uccaw hae te a law hae paw uccaw miakaw kha pawpaw mah zo khyh; David nynh atyn-are kha bua a kikhae.²⁰Ccangpaw sahiin hae malang a dee hae paw tuuphu hae te vaetua phu hae balyn kha David nynh a kyng hae; ccungccaw hae nynh, “E hynh David kya-e luadepaw uccaw,” a ci hae.

²¹Myaryasankae bang hae zah David nulang zuiku kho leite Besor Vaw kya a cciataw hae paw ccungccaw za ning kyakhe David tuh a thua. Minmin nynh David te a kya um hae paw kha tungku khylan a cceih hae; David nynh tuh-e hae pe a thua te, minmin kha bya a beih hae.²²David kya a zuikuh hae paw ccungccaw hoylei hae paw te ccungkia lei hae paw balyn nynh, “Minmin tuh aening kya a cciabua khyh hae keiccuze bua ah muethui oh paw luadepaw uccaw hae hynh pawpaw mah pyabua lei lan hae, mih zu hae te mih ccaaw hae raveih kha kokuh hae sah lah, cceih hae sah,” a ci hae.²³Thuasalama David nynh, “Ka u te ka neitaw hae, Bawipaw nynh aening oun pyapaw uccaw kong kya tuhcite na cyih lan khyh oh; aning nynh oun khynsah zah oun thiingtu hae phu kha aening kuih kya oun pya vae.²⁴E kong kyahin hum nynh mou nae bya kha ae ngaepah cih oh? Rhawtuknaw kalan a cceihpaw nynh a mue zeihte, uccawvaenia a ngawpaw nynh mah a muebua cih; phe ngankuh lante a neekuh cih hae,” a ci.²⁵Tuin nin te vae tuh David nynh Israel hae elang phungbya te phungzae kha rae zah, atunin cia po atyn.

²⁶David nynh Ziklag khua kya he a thua te, luadepaw uccaw abang kha a ruiban hae, Judah piccan hae kalan ky hae zah, “Bawipaw a rhaw hae kya-e luadepaw uccaw lungkhu e nanning elang lasung nynh thua,” a cipya hae;²⁷tuh-e tuh Bethel khua, Negeb kya-e Ramoth khua, Jattir khua,²⁸Aroer khua, Sifmoth khua, Eshtemoa khua,²⁹Rakal khua, Jerahmeel minphuin khua hae, Ken minphuin khua hae,³⁰Hormah khua, Bor-ashan khua, Athak khua,³¹Hebron khua, David te a ccungccaw hae nynh khuaccongnaw khua hae balyn kalan khe a ky hae.
Saul te A Ccapaw hae Chinaw (1Sh 10.1-12)

¹Filistin hae nynh Israel hae kha a tuk hae; Israel hae tuh Filistin hae malang khe ccue hae zah Gilboa Mua vawlan khe patae a chih hae.²Filistin hae nynh Saul te a ccapaw hae kha phah hae zah, Filistin hae nynh Saul ccapaw hae Jonathan, Abinadab te Malkhishua kha a chia hae.³Rhawtuknaw kya Saul tuh myarya a teing; thekawthya hae paw nynh kaw hae zah vaemaw myarya ccih lan a mue.⁴Tetuh Saul nynh a rhawtuk-zunghe ccyngtu kha, “Na thaloi kha thuaakuh lah, kae hynh yn thuing, tuhteze nynh e vingdungawkuh lei hae paw nynh kae hynh ccianuate yn thuing lan khyh hae zah yn zuenah lan khyh hae,” a cipya. Thuasalama a rhawtuk-zunghe ccyngtu nynh myarya rih zah thuing ry khyh. Tukeiccuze Saul nynh a thaloi kha lawkuh zah thaloi dung kha a bakhung thin.⁵Saul a chih vae cipaw kha a rhawtuk-zunghe ccyngtu nynh he a muih tuh, a thaloi kha bakhung thin zah, Saul kya a chihbua.⁶Tuhcite Saul te a ccapaw hae lu thum te a rhawtuk-zunghe ccyngtu te a ccungccaw hae balyn tuh nin kheit lungkhu kya pynkheihlan a chih hae.⁷Jezreel Accya voikheit lang raw um hae paw te Jordan vaw khuraw lang um hae paw Israel hae nynh, Israel hae tuh ccue hae zah Saul te a ccapaw hae tuh a chih vae hae cipaw he a thae hae te, mih khua hae kha poutaw hae zah a ccue hae; te Filistin hae nynh oun cceih hae zah khua hae kha a umnaw hae.

⁸Awkhualan khe, Filistin hae nynh michi hae uccaw khahku lan he oun thua hae tuh, Gilboa Mua vawlan a chih hae paw Saul te a ccapaw hae kha a muih hae.⁹Saul lu kha pae hae zah a rhawtuk-uccaw kha a khah hae, te mih zohtuh inn hae kalan te ccungccaw hae kalan thehoypaw ho khylan, locceihtu hae kha Filistin ram phe lekuh lan a saw hae.¹⁰Saul a rhawtuk-uccaw kha Astartes khozinung beikinn kya a nung hae; a rhua kha Bethshan khualungrua kya a sae hae.¹¹Filistin hae nynh Saul tungvaw a cyisahnaw hae kha Jabesh-gilead khuaccaaw hae nynh he a thae hae tuh,¹²mih rawthung hae paw balyn nynh thokuh hae zah khuazi zidae ccianua hae zah Bethshan khualungrua kya-e Saul rhua te a ccapaw hae rhua kha a law hae. Jabesh khua kya thuakhae hae zah tuin kyakhe maee te a u hae.¹³Mih ru kha lah hae zah Jabesh khua e tamarisk thingku kaw khe a uu hae, te nin sari lungkhu looh-ae a sung hae.

Bible Society of Myanmar

https://app.library.bible/content/1a340f5ae072b2f4