Colossians4
1Chiyawaau kaa uchimaawiyekw misiwe taapituu ishi kanawaapamaahkuch chitaapachihaakanuwaauch taan e ihtuutawekuch kaye kuiskw ihtuutuwaahkuch. Chischisikw kaye chiyawaau e ihtaat awen kihchikiishikuhch wechimaamiyekw.2Tasine ayimihaahkw. E ayimihaayekw maak suuhk wii piyekascheyihtamukw kaye nanaaskumaahkw Chishemanituu.3Kaye niyaan ayimiheshtamuunaan Chishemanituu chechii taupayihtwaakuyaahch chechii waawiihtamaahch miywaachimuwin anit yaayimuumaakanuut Christ, an ekaa uhchi chischeyimaakanuut anite utaahch. Ekun wehchi chipahukuyaan anuhchiish, uu e chii ishi waawiihtamaan.4Ayimiheshtamuukw chechii piyekaschihtaakusiyaan e waawiihtamaan miywaachimuwin wesh ekun nipaa ihtin.5Suuhk wii kachehtaaweyihtamukw taan e ishi pimaatisiyekw mekwesiinuu anite anichii ekaa kaa taapwehtahkwaau e pimaatisiyekw. Muush utinamaasukw taanit teupayihch maanh chechii ayimihekuch anichii ekaa kaa taapwehtahkwaau.6Muush chipaa miyuuhtaakusinaawaau kaye chipaa iipwaahkaahtaakusinaawaau e ayimiyekw ekw maak che chischeyihtamekw taan che ishi nishkweushihekw awen e wii naanituu kachesteyihtahkw taan e ishi taapwehtamuwekw.7Chiichishaanuu Tychicus naashch kaa saachihachiht kaye muush kuiskw kaa ihtit ayimiheu aapachihaakan niwiichi aapatisiimakunaan e atushkaamachiht Utipeyihchikeu. Wiya chika tipaachimushtaakuwaau taan e ihtuuchiht.8Eukw wehchi itishahuukw chechii wiihtamaataakw taan e ihtuuchiht anit ekaa che uhchi niihteyihtamekw e maamituneyimiyaahch.9Onesimus kaa ishinihkaasuyich chika wiicheukuu. Eukuu chiichishaanuu kuiskw kaa ihtit kaye kaa saachihachiht anite e ihtaawekw kaa uhchiit. Misiwe chika wiihtamaakuwaauch taan e ihtinaanuyich ute.10Aristarchus kaye wiya chipahwaakanuu utah kaa chipahukuch. Chiwaachiyemikuwaau kaye wiya. Kaye maak Mark chiwaachiyemikuwaau. Barnabas uyuuh wiichiiniihkaawin. Shaash chichii wiihtamaakunaawaau che miyuhkuwekw Mark utihtitaakwe.11Joshua kaye wiya chiwaachiyemikuwaau. Justus wesin eyuu ishinihkaataakanuu uu. Uchii e nishtitwaau eukunich mikw uchii Jewa iinuuch e taapwehtahkwaau waachaapatisiimitwaau Chishemanituuh e atushkaamach. Mistahiih nichii pechi kaachiichihiikuch.12Miin kutak awen e ihtaayekw e uhchiit chiwaachiyemikuwaau eukw uu Epaphras. Kaye wiya atushkuweu Christ Jesus. Muush suuhk chitayimiheshtamaakuwaau e nitutamuwaat Chishemanituuh chechii yaaichikaapuuhiitaakw tekash e nanihiihtamuwekw utiteyihtamuwiniyuu mwehch e ihtitwaau anichii kaa chiishi nihtaauchitwaau kaye tekash kaa taapweyimaatwaau Jesus.13Niya tipiiwe nika chii tipaachimuwaan e ishpish mista aapatisit chiyawaau e wii wiichihiitaakw ekw maak aniyuuh aweyuuh Laodicea ekw maak Hierapolis kaa ishinihkaateyikwaauh ihtaawinh kaa ihtaayitwaauh.14Luke naashch kaa saachihiik kaa nituhkuiinaapatisit ekw maak Demas chiwaachiyemikuwaauch kaye wiyawaau.15Wiihtamuwaahkuch e waachiyemakwaau chiichishaanuuch Laodicea kaa ishinihkaateyich ihtaawiniyuu kaa ihtaatwaau. Nympha kaye waachiyemaahkw ekw maak anichii umaamuuayimihaauch Nympha wiichiihch kaa ayimihaatwaau maanh.16Iskutak chii ayimihtaayekwe uu masinahiikan yaaitei che ayimihtuwekuch anichii umaamuuayimihaauch anite Laodicea kaa ishinihkaateyich kaa ihtaatwaau. Yaaitei kaye che ayimihtaayekw an masinahiikan che petwaakuyekw anichii Laodicea kaa ihtaatwaau umaamuuayimihaauch.17Kaye maak che itekw Archipus chechii chiishihtaat aniyuu kaa miyaakanuut che ishi atushkuwaat Utipeyihchikeuh.18Niya tipiiwe Paul ekw masinahiicheyaan uu e waachiyemitakuch. Ekaawii wanichischisikw chipahutuukamikuhch e ihtaayaan. Nitayimihaan Chishemanituu chechii chishewaatutaataakw.
Canadian Bible Society