Colossians3
1Chichischeyihtenaawaau kaa wanishkaanaat Chishemanituu Christ nipuwinihch uhchi mwehch kaye chiyawaau e chii wanishkaanikuyekw ekun e ishinaakuhch. Ekw maak muush chipaa naanitaweyihtenaawaau aniyuuh chekwaayuuh ishpimihch kaa ihtakuhkwaauh, anite e apit Christ Chishemanituuh unihiiwiniihch.2Muush maamituneyihtamihiikuukw anihii chekwaayuuh ishpimihch kaa ihtakuhkwaauh namui wii aniyuuh chekwaayuuh utah aschiihch kaa ihtakuhkwaauh.3Wesh taapaa ekw ihtakun aniyene kaa chii ishi pimaatisiyekw. Kaachisteuh chihchiwe chipimaatisiiwinawaauh anite Chishemanituu e ihtaat e wiichichewekw Christ.4Christ e wiichewekw chihchiwe pimaatisiiwin chitayaanaawaau. Kaau maak takushihke utah aschiihch ekut kaye chiyawaau che asich nuukuhiikuyekw kaye che asich chisteyihtaakuhiikuyekw chisteyihtaakuhaakanuute.5Wanaachihtaakw machaatisiiwin taan e ishi ihtakuhch chipimaatisiiwiniwaahch. Wanaachihtaakw wiinisuu pimaatisiiwin, wiinisuu maamituneyihtamuwin, machi nituweyihtamuwin, ekw maak an e mushteneyihtamekw chechii weyuuch ayaayekw chekwaan utah aschiihch. An awen muush kaa mushteneyihtahk chechii weyuuch ayaat chekwaayuuh mwehch e umanituuhkaanamit aniyuu chekwaayuuh ishinaakuniyuu.6Uyuu e ishi pimaatisiitwaau awenichii naashch taapwe chishuwaaheuch Chishemanituuh. Chika waweshihiikuuch maak.7Ekun maak kaa ishi pimaatisiyekw anite utaahch eshkw e chii tipeyimikuyekw machi mushteneyihtamuwin.8Ekw maak anuhchiish chipaa wepinenaawaau uu itaatisiiwin. Puuniikw e chishuwaasiyekw kaye ekun ishpish aahkuyuwesikw kaye ekun ishpish maayaatisiikw. Ekun ekw ishpish paashtaamukw kaye puuniikw e machayimiyekw.9Ekaawii chika uhchi nanatayimitunaawaau wesh chichii wepinenaawaau weskach kaa itaatisiyekw kaye taan kaa chii ihtiyekw,10kaye maak tekash aahchiiuh ekw chit ishi pimaatisiinaawaau. Wetaach ati uschinaakun chimituneyihchikanawaauh chechii nispituwekw Chishemanituu an kaa ushihiitaakw.11Ekw maak namui aapateyihtaakun taan e itiskaanesit awen, Jewa itiskaanesikwe maak ekaa Jewa itiskaanesikwe. Kaye namui aapateyihtaakuniyuu taanite wehchiit awen, taan kaa ishi chiskutamuwaakanuut kaye taan e ishi kanawaapamikut aweyuu. Namui aapatanh uyuuh. Christ e ayaawaat awen upimaatisiiwinihch eukw chihchiwe e iteyihtaakuhch. Misiwe aweyuuh e ishinaakusiyich piihchishkuweu.12Chiyawaau Chishemanituu kaa wiyaapamitaakw kaa payehchisiyich utiiniimh kaye kaa saachihaat, chishewaatisiikw, chistimaacheyimaahkuhch awenichii, tipihteyimisukw, yuuspaatisiikw kaye siipiiwesiikw.13Siipiiwesiistaatukw. Wepeyihtamaatukw tahtwaau e wanituutaakuyekw. Chinituweyihtaakusinaawaau chechii wepeyihtamaatuyekw mwehch Utipeyihchikeu kaa ishi wepeyihtamaataakw.14Maau maauch chihchiwe e iteyihtaakuhch eukw chechii saachihiituyekw. Saachihiituyekwe misiwe chika miyu wiicheutunaawaau.15Pachishtinamuhkw an chiyaameyihtamuwin Christ kaa miitaakw chechii ihtuutaakuyekw chechii wiyeyihtamekw taan chipaa ati ihtinaawaau. Wesh Chishemanituu maamuu chichii wiyeyimikuwaau peyakw miyu chechii ishinaakusiyekw chiyaameyihtamuwinihch e ishi pimaatisiyekw. Nanaaskumaahkw maak Chishemanituu.16Muush maamituneyihtamihiikuwaahkw misiwe kaa ishi aayimuutamaataakw Christ, chitehiiwaahch e kanuweyihtamuwekw. Suuhk wii kachehtaaweyihtamukw e chiskutamaatuyekw kaye e kacheschimituyekw. Chitehiiwaahch uhchi nikamuushtuwaahkw Chishemanituu. Nanaaskumaahkw e nikamuushtuwekw ayimiheu nikamuwinh, David unikamuwinh ekw maak taan e ishi miitaakw kaa payehchisiit ahchaahkw nikamuwinh.17Misiwe chekwaan e ihtuutamekw kaye taan e itweyekw, Utipeyihchikeu Jesus utishinihkaasuwinihch chipaa ishi ihtuutenaawaau e nanaaskumekw Chishemanituu Kuuhtaawinuu wiya Jesus uhchi.18Chiyawaau iskweutikw kaa niipuuyekw nanihiihtuwaahkuch chinaapemuwaauch. Eukw uu chipaa ihtinaawaau e nuushuushkuwekw Utipeyihchikeu.19Chiyawaau kaye naapeutikw kaa niipuuyekw saachihaahkuch chiichiskeuwaauch. Ekaawii machituutuwaahkuch.20Awaashitikw, muush chipaa nanihiihtuwaawaauch chiniichihiikuwaauch taan e ititaakuch. Chika naniheyihtamihaawaau Utipeyihchikeu uu ihtiyekwe.21Chiyawaau uhtaawiimaautikw, ekaawii kachishuwaahaahkuch chitawaashiimuwaauch. Wesh chek chika niihteyihtamuch uyuu ihtuutawekwenich.22Chiyawaau aapachihaakanitikw muush nanihiihtuwaahkuch kuuchimaamuwaauch taan e ititaakuch. Ekaawii mikw e naanaakachihiitaakuch chika uhchi nanihiihtuwaawaauch e wii naniheyihtamihekuch. Kwaast e ihtiyekw chipaa miyu atushkuwaawaauch e chisteyimekw Utipeyihchikeu.23Kwaast chipaa aapatisiihkahtenaawaau chekwaan e aapatisiihkahtamekw, mwehch Utipeyihchikeu e atushkuwekw chipaa ihtinaawaau, namui mikw naapeu e atushkuwekw.24Wesh Utipeyihchikeu Christ eukw chihchiwe kuuchimaamuwaau. Chischisikw maak Utipeyihchikeu che miitaakw tipahamaakusiiwiniyuu aniyuu kenaweyihtahk cheshtinaash che miyaat aniyuu kaa atushkaakut.25An awen ekaa maamuyaam kaa ihtit chika ihtakuniyuu taan che ishi taapishtuwaakanuut. Wesh misiwe awen chika waweshihaakanuu taan e ishi nituweyihtaakuniyich chechii ishi waweshihaakanuut.
Canadian Bible Society