মথি12
1আত্রংকো সময়তাহা ইশুহা সানুকো দিনতাহা গেহুংবিরিকো ন্যাতা জিংমসা হোদাংমি। আমা পাংপুওয়াকো সোতা আকো য়োংতোংবিহা গেহুংকো মোইপ্যা দ্যইমসা নিচোইমসা চায়ে।2ই তিংমসা ফরিসিবিহা ইশুহিংয়া জাংয়ে, “কাং, নাকো য়োংতোংবিহা পবিত্র সানুকো দিনতা লিংপাংতা মোজোকো জাংওয়া কামবিরে জোদিংয়ো।”3ইশুহা আবিহিংয়া জাংয়ে, “দাউদ জাইপু আসা আকো ব্যারোবিহা আমা পাংপুনুওয়া হাং জোমমে নাবিহা মাপারাইংগা?4আকুহা সেংজাকো সাতা হোমসা সেংজাহিং পিচাপুনতেনুওয়া কোব্রেংহা ব্যারোবিহিংপা চায়ে। লিংপাংতা নিওয়া সেই আকু কোব্রেংহা পাউবি মোকোনাহা হাংসুরে চামতুকোগা।5ন্যাসারাং নাবিহা মোসাকো লিংপাংতা মাপারাইয়াংগা? সানুকো দিনতাহা পাউহা দেমসাতা হাত্রংদো কাম জোমগা। এপারাং আবিহা সানুকো দিনকো লিংপাংহিংয়া মামানেমগা। আদো আবিহা দোষি মাজিংমগা।6কা নাবিহিংয়া জাংরোওয়া, দেমসারোমা ডিয়োওয়া ইচো ইতা নিয়ো।7‘কাহিংয়া সেংচেংবিকো বলিদান মোকো, নাবিকো লামতুওয়া ঘ্যইরো’ তামসা তাংজিকো হিগাতা জাংওয়া নুওয়াংমি কোইনাহা নাবিহা কুং য়োংতোংবিহিংয়া দোষ মাতিংপাকোগা।8কা দিংঙাকো চেংওয়াহা সানুকো দিনকোরে গিরিগা।”9আউসো নোপুমসা ইশুহা আবিকো জোংসুওয়া সাতা হোয়ে।10আউতাহা ইচো খুই সেংপুওয়া দিংঙা নিমি, আসা ইশুহিং দোষ তিংপারো তাওয়া নোমসা ফরিসিবিহা উইয়ে, “লিংপাং অনুসারহা সানুকো দিনতাহা হাইওয়াহিং সাংপাকো তুকোগা না মাতুকোগা?”11ইশুহা জাংয়ে, “নাবিকো লুকামি সানুকো দিনতাহা হোক্রাতা হুইচানাহা নাবিহা সেন্নেপা বাইরেতা দেইমসা মোনোপাকোগা?12লুকাবিরোমা দিংঙাহা সিওপারাং পাংক্যইপা নিও। আকো সোতা লিংপাংতা নিওয়া সেই সানুকো দিনতাহা এনতাওয়া কাম জোকোহা এনতাপা জিংমগা।”13আকো নোইতা ইশুহা আকু খুই সেংপুওয়া দিংঙাহিং জাংয়ে, “নাকো খুই উইদাং হী।” আকুহা খুই হীয়ে, আসা আকো খুইহা আত্রংতারাং সাংমসা দোসরা খুই ত্যাবাপারাং জিংপুয়ে।14আত্রংহা ফরিসিবিহা জোংসুওয়া সাসো নোপুমসা হ্যাপুয়ে আসা ইশুহিং হেপা স্যানেকোমে তামসা হুইসুয়ে।15আপনিকো তোইতা মেংতাপা নোসুওয়া সিদা চ্যইমসা ইশুহা আউসো হোপুয়ে। উইসে দিংঙাবিহা আকো নুনুই হুইপুয়ে, আসা আকুহা আবিকো প্যাকোতা নিওয়া তাংসা হাইওয়াবিহিং সাংপায়ে।16আদো আকুহা আবিহিংয়া ইকো তোইতাহা হাংসুহিংনে হাইরে মাজাংগে তামসা জাংয়ে।17এপারাং এশাইয়া অগমবক্তাকো লাওয়া ই নুওয়াং তাংসা জিংপুয়ে,18“কাং, কুং জেংওয়া জেজেংওয়া ডেইয়াহা ইরাংগা।ইকোসোহা কা সিওপারাং গাগ্রুপা নিও,ইকোতা কা কুং লাংবে হোরোওয়া,আসা ইরাং তাংসা জ্যাকো দিংঙাহিংয়া ন্যায়কো দেরেং হিংপারোওয়া।19ইহা মাস্যাসুরোওয়া, সাডিংপা চিলিংমসারে মাঙারোওয়া, আসা দিংঙাবিকো প্যাকোতারে ঙামসা মেতেইরোওয়া।20ওক্রেপা নিওয়া মিপারে ইহা মেমেরোওয়াআসা মোমমোপা লারাইদিংওয়া দিব্রিরে ম্যাস্যারোওয়া। ইহা নোইস্যাতাহা ন্যায়হিংয়া জিয়োওয়াতা পুরারোওয়া।21আসা তাংসা দোসরা জ্যাকো দিংঙাবিহা ইকো তোইতারাং আশা এরোওয়া।”22দিংঙাবিহা সিংঙো দ্যইংচপুমসা মিচো মাতিংওয়া আসা য়্যইমক্যইওয়া ইচো দিংঙাহিং ইশুকোতা পারায়ে। ইশুহা আকুহিংয়া সাংপাপুনতেনুওয়া আকুহা তিংমসা য়্যইকো চুপুয়ে।23ই তিংমসা তাংসা দিংঙাবিহা আআংপেপেচপুমসা এপা জাংসুয়ে, “ইরাং দাউদ জাইপুকো চেংওয়া, আসা সেংজাকো সেকেংত্যাওয়া খ্রীষ্টদোওয়া?”24ই হিংমসা ফরিসিবিহা জাংয়ে, “ইহা জেসাংকো গিরি বালজিবুলকো সেসো জেসাং নোপাচাংমগা।”25আবিকো এপাজিংওয়া নোওয়া সিদা চ্যইমসা ইশুহা আবিহিংয়া জাংয়ে, “হানি লোইতা স্যাসুওয়ানি, আকু লোইহা আপনিরাং দাংপুরোওয়া। এপারাং হানি শহর আসা প্যাপ্যাম্যাম্যাবিকো প্যাকোতা পাইসু-চোংসুওয়া নিনাহা আকুরে দাংপুমগা।26শয়তানমি শয়তানহিং নোপামসা আপনিকো বিরোধ জোনাহা, আবিকো লোইহা হেপা তাইকোগাসা?27নাবিহা কাহিংয়া জেসাংকো জাইপু বালজিবুলকো সেসো জেসাং নোপামকো জাংদিংয়ো। এপা বেনাহা নাবিকো দিংঙাবিহা হাংসুকো সেসো জেসাং নোপাকোগাসা? এপামি জিংনাহা নাবি আপনিবিকো দিংঙাবিরাং নাবিহিংয়া দোষি তিংপারোওয়া।28আদো কা সেংজাকো সেসো জেসাং নোপারোওয়া আসা ইসোরাং সেংজাকো রাজ্যহা নাবিকো প্যাকোতা লেপুনতেমি নিও তাওয়া নুওয়াংহা নাবিহা সিদা চ্যইরোওয়া।”29“ন্যাসারাং হিং, বুচুইওয়া দিংঙাহিং নাগাই মাজিংপা হাংসু দিংঙারে আকো সাকো সোংসাহিং কুকো মাচুরোওয়া। আকুহিং জিংপুনতেনু মেংচে সাহিং কুকো চুরোওয়া।”30“হাংসু কাহিংপা মোতো, আকুহা কাহিং মোসোংপা জোওয়াগা, আসা হাংসু কাহিং মোয়োজরু, আকুহা কুং য়োওয়ারে হিংচাইবিরিপা গাচপারোওয়া।31আকো সোতা কা নাবিহিং জাংরোওয়া, দিংঙাবিকো জোওয়া তাংসা পাপ আসা সেংজাহিং বিরোধ জোওয়াবিহা ছমা জিংকো চুরোওয়া, আদো পবিত্র লাংবেকো তোইতা মাতুপা য়্যইওয়া পাপহা ছমা মাজিং।32কা দিংঙাকো চেংওয়াকো তোইতা য়্যইওয়া পাপহা ছমা জিংরোওয়া, আদো পবিত্র লাংবেকো তোইতা বিরোধ জোওয়া পাপহা ই সময়তারে ছমা মাজিং আসা দেপাওয়া সময়তারে হাত্রংরে ছমা মাজিং।”33“এনতাওয়া ফল সেওয়া সিংতেংহা এনতাপারাং নিনেরোওয়া। সিংতেংরাং এনতাপা মাতানাহা ফলরে এনতাপা মাজিং, সিংতেংহা সেবেসোরাং নাইমগা।”34ও লিং নিওয়া পুইয়াকো চেংবাই! মেংতাপা জিংমসা নাবিহা এনতাওয়া নুওয়াংহা হেপা য়্যইকো চুকোগা? হাংপাতানাহা তুংসিংতা মেইপুওয়া নুওয়াংরাং নামুসো নোমগা।35এনতাওয়া দিংঙাহা আপনিকো তুংসিং নাপোতা নিওয়া এনতাওয়া সোংসাবিসো এনতাওয়া নুওয়াংবি নোপামগা, আদো মেংতাওয়া দিংঙাবিহা আপনিকো নাপোতা নিওয়া মেংতাওয়া নোচেংসো মেংতাওয়া নুওয়াংরাং নোপামগা।36কা নাবিহিং জাংরোওয়া, হাংসু দিংঙা মাতুওয়া নুওয়াংবি য়্যই, ন্যায়কো দিনতাহা আবিহা আকো লেখা পিচানেরোওয়া।37হাংপাতানাহা নাকো য়্যইওয়াসোরাং নাতিহা দোষি জিংরোওয়া, আসা নাকো য়্যইওয়াসোরাং নাতিহা নির্দোষ জিংরোওয়া।38আত্রংহা তাংজিকো উটকেওয়াবি আসা ইচো নিহসো ফরিসিবিহা আকুহিং জাংয়ে, “উটকেওয়া কাবিহিং ইচো চিহ্ন তিংপা, কাবি কাংকো কেংমি।”39ইশুহা আবিহিং জাংয়ে, “হিনি জুকুংকো দিংঙাবিহা সিওপারাং মেংতাওয়া আসা নুংনাংসুওয়া নিও, ইবিহা চিহ্ন মেংচে কাংকো কেংমগা, আদো অগমবক্তা য়োনাকো তোইতা জিংপুওয়া চিহ্ন ল্যামসা ইবিহা দোসরা হাই চিহ্নরে ন্যইচা মামুং,40হাংপাতানাহা হেপা য়োনাহা টেবো নায়াকো ফেমাকো নাপোতা জেংসুং-লিসুং সাসুংয়ু চোইপা য়ুংমে, এপারাং দিংঙাকো চেংওয়ারে সাসুংয়ু চোইপা মোংটোকো লিতা য়ুংনেরোওয়া।41ন্যায়কো দিনতা নিনেবে শহরকো দিংঙাবিহা জামসা হিনি জুকুংকো দিংঙাবিহিংয়া দোষ তিংপারোওয়া, হাংপাতানাহা য়োনাহা সেংজাকো নুওয়াং হিংপানুওয়া আবিহা আপনি আপনিকো পাপহিং হুইতেয়ে। আদো কাং, য়োনারোমা ডিয়োওয়া ইচো ইতা নিও।42ন্যায়কো দিনতাহা মাংকো শেবা দেশকো জাইমুহা জামসা হিনি জুকুংকো দিংঙাবিহিংয়া দোষ তিংপারোওয়া, হাংপাতানাহা সোলোমন জাইপুকো দুংজিকো নুওয়াং হিংকো আকুহা তানাংসো ওয়াংমগা, আদো কাং, সোলোমনরোমাহা ইতা টেবো ইচো নিও।43“হাত্রং মেংতাওয়া লাংবে দিংঙাকোসো নোপুমসা হ্যা, আকুহা শাওয়া মোমসা এনতাপা শাদু নিওয়া জায়গাবি মোমসা তেইমগা, আদো হাংতারে মামুংমগা।44এপাজিংওয়া জায়গা হাংতারে মামুংনুওয়া নাগাইকো য়ুংওয়াত্রাং হোপুরো তামসা আকুহা লায়োংমগা। আউতা লায়োংনুওয়া আকুহা নাগাইকো সাহা হাইরে মাতাপা সাইপুনতেওয়া আসা এনতাপা চোপামসা এপুনতেওয়া তিংমগা।45আত্রংহা ই তিংমসা আকুহা হোমসা ন্যাসারাং নীচো আপনিরোমা ডিয়োওয়া জেসাংবিহিং মোউপামসা পারামগা, আসা নাপোতা হোমসা আবিহা য়ুংমগা, আসা আকু দিংঙাকোহা নাগাইকোরোমা নোইকো দশাহা সিওপা মেংতাপা জিংমগা। হিনি জুকুংকো মেংতাওয়া দিংঙাবিকো দশারে এপারাং জিংরোওয়া।”46ইশুহা উইসে দিংঙাবিহিংপা য়্যইসুদিংনুওয়া, আকো আয়ু আসা এবি বাইরেতা জাদিংমি, আসা আকুহিংপা য়্যইসুকো কেংদিংমি।47আত্রংহা ইচোহা জাংয়ে, “প্রভু, নাকো আয়ুসো এবিহা বাইরেতা জাদিংনা, আসা নাতিহিংপা য়্যইকো কেংদিংনা।”48আদো আকুহিংপা য়্যইদিংওয়াহিংয়া ইশুহা জাংয়ে, “কুং আয়ুসো কুং এবিহা হাংসুগা?”49আসা আকুহা য়োংতোংবিহিং খুইসো তিংপামসা জাংয়ে, “কাং, কুং আয়ু আসা কুং এবিহা ইবিরাংগা।50হাংপাতানাহা হাংসু লোডিংবাতা নিওয়া কুং আপাকো ইচ্ছাহিং পুরা জো, আকুরাং কুং এ, হুম্রি, আসা আয়ুগা।”
The Seed Company