য়োনাকো হিগা2
1নায়াকো ফেমা নাপোসো য়োনাহা পরমপ্রভু আপনিকো সেংজাহিংয়া এপা জাংমসা পাচাইয়ে:2“কাহা কুং কষ্টতা পরমপ্রভুহিং মোউচায়ে আসা আকুহা কাহিংয়া জবাব পিচায়ে। কাহা সিংপাংকো লিসো সহায়তাকো সোতা মোউচায়ে আসা নাতিহা কুং মোউওয়া হিংপিয়ে।3নাতিহা কাহিংয়া ঝাহাদিকো চোমেংতা, আকো নাপোকো চোমেংতা বাডোইপুয়ে, আউতাহা কাহিংয়া তিসো হুরাপা য়োইপুয়ে, আসা নাকো সে নিক্যইওয়া চুরাবিহা কুংতা হুইরেয়ে।4কাহা নোয়ে, আপনিকো আবেইসো নাতিহা কাহিংয়া ঘিইপুয়ে, আসা কা ন্যাসারাং হাত্রংরে নাকো পবিত্র দেমসা তিংকো মাছুরোওয়া। 5কুং তোইতা তি লেমসা কুং সাসহিংয়া সাঙেচপাপুয়ে, ঝাহাদিহা কাহিংয়া পুরা নুচপাপুয়ে, কুং পোরোতাহা ঝাহাদিকো বুনিং কাংপুওয়াবিহা মেরোইচপুয়ে।6কাহা লাগাবিকো ডেবে চোইপা নুচপুয়ে, আসা বাসিমতিকো লিতা চোইপা দেকায়ে, আকো লাপুংবিহা তুতেংজুকো সোতা তুংচপুওয়া নিমগা। আদো ও পরমপ্রভু কুং সেংজা নাতিহা কাহিংয়া আকু চোমেংবিসো ঙাজ্যইংরাং লাপামসা পারায়ে।7হাত্রং কুং প্রাণ হ্যাপদাং, আত্রংহা ও পরমপ্রভু কাহা নাতিহিং পাচাইয়ে, আসা নাকো য়ুংওয়া পবিত্র দেমসাসো নাতিহা কুং পাচাইওয়া হিংপিয়ে।8হাংসু হাংসু হাইরে মোকোওয়া মুর্তিবিহিং হুইমমে, আবিহা নাকোসো লেওয়া অনুগ্রহহা মুংকো মাছুমগা।9আদো কা নাকো প্রসংশাকো লেহদিবিহিংপা বলিদান চড়াইরোওয়া, আসা আপনিকো নাপোইওয়াহা পুরা জোরোওয়া। উদ্ধারহা পরমপ্রভুসো লেমগা।”10আত্রংহা পরমপ্রভুহা আকু নায়াহিংয়া ঝাহাদিকো আরিতা য়োনাহিং নোপোংকো আজ্ঞা জোয়ে, আসা নায়াহা এপারাং জোয়ে।
The Seed Company