য়োনাকো হিগা1
1সাইয়ুহা অমিতৈকো চেংওয়া য়োনা হিংপা পরমপ্রভুহা য়্যইয়ে।2আকুহা জাংয়ে, “লো, আকু টেবো শহর নিনেবেতা হোতু আসা আকো বিরুদ্ধতা কুং ন্যায়কো দেরেং হিংপাতু, হাংপাতানাহা আকো দিংঙাবিহা হাসেকো আগো নিমমে, আকুহা কা গেদিংয়ো।”3আদো য়োনাহা পরমপ্রভুকোসো ক্যাপুমসা লেতা তুইপেং দিশাতা হ্যায়ে। আকুহা জোপ্পা শহরতা দেকায়ে আসা আউতা তর্শীশতা হোওয়া ইচো জাহাজ দোসুয়ে। পরমপ্রভুসো তানাং ক্যাকো তর্শীশ হ্যাকো জাহাজতা ভাড়া টামসা লিকো তালাতা বাইয়ায়ে।4আদো সেংজাহা জাহাহাদিতা টেবো বিঙা নিংপুয়ে। ঝাহাদিতাহা টেবো তিকো চুরা লোয়ে আসা জাহাজহা ছুইপুদাংয়ে।5জাহাজ চালাইওয়া দিংঙাবিহা চুসুংপুয়ে আসা সহায়তাকো সোতা আপনি আপনিকো চোইসুংবিহিং পাচাইসুয়ে। আকো নোইতাহা জাহাজ মোনুচাকো তামসা আবিহা আউতা নিওয়া সোংসাবি ঝাহাদিতা বাডোইসুয়ে। আদো য়োনাহা জাহাজকো সোংসাবি এওয়া লিকো তালাতা বোচ্চ্যইপা জিংদিংওয়া নিমি।6জাহাজকো কেপ্টেইনহা য়োনাহিংয়া আউতা জিংদিংওয়া তিংয়ে আসা জাংয়ে, “নাতিহা হেপা জীংকো ছুংগাসা? লো আসা আপনিকো চোইসুংহিং সহায়তাকো সোতা পাচাই। সায়েত আকুহা য়াংবিহিংয়া প্যারাপাকো ছুরোওয়া আসা য়াংবিহা সিমগ্যইরোওয়া।”7আত্রংহা জাহাজ চালাইওয়া নাবীকবিহা তাইবিলারাই জাংসুয়ে, “য়াংবিহা চিট্ঠা বাডোইমসা কাংসুরো, হাংসুকো দোষ জোওয়াকো সোতা য়াংবিকো তোইতা ই কোইচ্যাওয়া ওয়াংমমে।” আবিহা চিট্ঠা বাডোইসুয়ে আসা চিট্ঠাহা য়োনাকো মিংতা পরেয়ে।8আবিহা য়োনাহিংয়া জাংয়ে, “নেহা কাবিহিং জাং, হাংসুকো দোষ জোওয়াকো সোতা ই ক্যইচ্যাওয়া ওয়াংমগা? নাতিহা হাং কাম জোমগা? হানিসো ওয়াংমগা? নাতিহা হানি দেশকো দিংঙাগা? নাতিহা হাং জ্যাগা?”9আকুহা জাংয়ে, “কা হিব্রু গা। ঝাহাদি আসা বাসিমতি নিহদ্যাহিংসা বানাইওয়া লোডিংবাকো সেংজা পরমপ্রভুহিং কা আরাধনা জোমগা।”10য়োনাহা আপনিকো পরমপ্রভুকোসো ক্যাওয়া নুওয়াংহা ল্যায়ে। জাহাজ চালাইওয়া নাবীকবিহা চুসুংপুয়ে, আসা আকুহিং জাংয়ে, “নাতিহা চুসুং-মাইসুংক্যইওয়া কাম জোমকোগুং।”11ঝাহাদিতাহা বিঙাহা সিও-সিওপা জিংপুয়ে। আকো সোতা জাহাজ চালাইওয়া নাবীকবিহা আকুহিংয়া উইয়ে, “বিঙাহিং য়োইকোহা কাবিহা নাতিহিংয়া হাং জোনেকোগা?”12য়োনাহা জাংয়ে, “কাহিংয়া ঝাহাদিতা বাডোইপুই, আসা ঝাহাদিহা চিচোপা জিংপুরোওয়া। কাহা গেদিংয়ো, কুং কারণসোরাং নাবিহা ই কোইচ্যাওয়াতা পরেয়ো।”13আদোরে আবিহা জাহাজহিংয়া আরিতা পারাকো সিওপারাং কোশিষ জোয়ে, আদো ঝাহাদিকো বিঙাহা এং-এং সিও-সিওপা জিংদিংমি আসা আবিহা হাইরে জোমক্যইপা জিংপুয়ে।14আকো সোতা আবিহা পরমপ্রভুহিং পাচাইমসা জাংয়ে, “ও পরমপ্রভু! কাবিহা পাচাইচারোওয়া, ই দিংঙাকো প্রাণকো বদলি কাবিকো প্রাণ মালাংপি। ই ইচো নির্দোষ দিংঙাহিং স্যাওয়াকো দোষহা কাবিকো তোইতা মাহুইকো, হাংপাতানাহা ও পরমপ্রভু, নাতিহিং হেপা ইচ্ছা জিংমি নিমমে, আকুহা নাতিহা জোমি নিও।”15আকো নোইতাহা আবিহা য়োনাহিং তোরোইসুমসা চুরা লোদিংওয়া ঝাহাদিতা বাডোইপুয়ে আসা আত্রংতারাং ঝাহাদিহা চিচ্চোপা জিংপুয়ে।16এপা জিংপুনুওয়া আকু জাহাজ চালাইওয়া দিংঙাবিহা পরমপ্রভুকোসো সিওপারাং চুসুংপুয়ে আসা সেংচেংকো বলিদান চড়াইমসা আকুহিং সেওয়া জোরো তামসা প্রতিজ্ঞা জোসুয়ে।17পরমপ্রভুকো আজ্ঞা সেই ইপু টেবো নায়াহা য়োনাহিংয়া হুইচপুয়ে আসা য়োনাহা আকু নায়াকো ফেমাতা জেইসুং লিসুং সাসুংয়ুং য়ুংয়ে।
The Seed Company