Mark8
1กรอย รูขัย ปุ ดูญ เกิด กูย ดาล เจาออ อึนดัว กู. ก็ เพราะ ปุ เกิด หนอฺ จา พระเยซู กเหฺยีย โม กอฺนซิด เจา บวย หวาว ปาย2ไฮ ขึด เหฺยาะเหฺยียล กูย โม แหน เพราะ หนาว กู หลึง ไฮ เจาอไป ตไง แหลว รูหนัว ปุ เกิด หนอฺ จิง จา เล็ย.3คัน ไฮ จิง ออฺน หนาว ลบจี ดุง เทาะ ปุ บืน จา หนอฺ เล็ย อะตูง หนาว จิง แฮ็ว โดย โตน กะนา เพราะ กูย หนืจ หนาว เจา รู อึงฮาย.4โม กอฺนซิด หวาว ปาย “ปา อัดกะฮะ นะแหน จิง ซีน กูย ดาล นะแหน นะเหนีย บืน?”5พระเยซู หม็อฺฮ ปาย “เกิด คะนมปัง กู ซเนะ?” “เกิด กโผล กอน” โม กอฺนซิด อึนเต.6พระเยซู ซัง กูย ฉิม หนะ ขัย ออฺน ตะกาว แซง ปา กแตห์. แหลว หนาว หรับ แอ คะนมปัง กโผล กอน คอบคุน พระเจา แหลวก็ แป็ฮ หล็อฺฮ อึมลาว ออฺน กอฺนซิด จี อึนแจห์ ออฺน โวยโซะ โม กอฺนซิด ก็ หวาว โตน.7แหลว โมหนาว เกิด อะกา เต็อด เจา น็อฺง บีห์บิญ. พระเยซู คอบคุน พระเจ้า ซัง ออฺน โม กอฺนซิด แอ อะกา ขัย อึนแจห์ น็อฺง.8ขูหนะ ก็ จา พ”ซ แหลว โม กอฺนซิด ตอจ หมาล เทาะ ลือ บืน กโผล อึนต็อฺฮ ปิฮ.9เกิด กูย จา ราว อะปอน ผัน หนะ.10พระเยซู อึนเต โวยโซะ ออฺน ลบจี ดุง แหลว หนาว เอง ซ็อฺฮ ถูห์ หนะ โม กอฺนซิด จี ปา เทิน ดาลมานูทา.11โม ฟาริซี โม หนืจ เจา กะฉีน พระเยซู ยัก กอบ หลอฮ หนาว. หนาว เถียร ออฺน พระเยซู หวัว อัดซะจัน เกิด ลัก ปาย พระเจ้า ผัวกะฮอฺม พระเยซู.12แต พระเยซู ตเง็อฮ พ็อฺฮ หวาว ปาย “เกิด หนอฺ กูย รูหนัว แหน ยัก เผิห์ แต อัดซะจัน? ไฮ หวาว หมัดเหม็ย ปาย กูย รูหนัว แหน จิง ปุ เผิห์ อัดซะจัน เกิด ลัก เล็ย!”13แหลว พระเยซู ลบจี ซ็อฺฮ ถูห์ กะลอฺง จี มะหนีง นา หมูย ค็อฺง ทเหลจืด กาลิลี เถิน หมูย ดวง.14โม กอฺนซิด ค็อฺง พระเยซู เกลอะ แอ หมาลจา จี หลึง หนาว เกิด คะนมปัง กู หลึง ถูห์ แต หมูย กอน มัฮขัย.15พระเยซู หวาว หลึง โมหนาว ปาย “ออฺน ออฺ เดอ โมหมวง ออฺน ระหมัด ฉือ คะนม ค็อฺง โม ฟาริซี หนะ ฉือ คะนม ค็อฺง โม ซะดัจ เฮโรด16โม กอฺนซิด หวาว อึนดัว ปาย “อาจาน หนาว หวาว เพราะ โมไฮ ปุ บืน แอ หมาล เจา จา วาห์.”17พระเยซุ ดิง ปาย หนาว หวาว นะขัย ก็ หม็อฺฮ ปาย “เกิด หนอฺ หมวง หวาว ตอฺห์ แต หรืง ปุ แอ หมาล เจา จา? โมหมวง เผิห์ แหลว ด็อฺง ถัน เคาไจ เถ? เหนีย แต กะฮอฺม หมืด กู แหน?18เกิด หมัด เหนีย แต ปุ ซี? เกิด กะตอร ด็อฺง ปุ ซ็อฺง ลัฮ? เจอ ปุ บืน เถ ปาย19ไฮ ซีน กูย อเซิง ผัน หนะ หลึง คะนมปัง อเซิง กอน? แหลว เทาะลือ จา โมหมวง ตอจ บืน มัฮเหนีย?” “บืน ซิบซอง อึนต็อฺฮ” โม กอฺนซิด อึนเต.20พระเยซู หม็อฺฮ ปาย “แหลว เทาะ ไฮ แป็ฮ คะนมปัง กโผล กอน หล็อฺฮ ซีน กูย อะปอน ผัน หนะ ขัย หมาล เทาะ ลือ จา โมหมวง ตอจ บืน ซเนะ อึนต็อฺฮ?” “บืน กโผล อึนต็อฺฮ” โมหนาว อึนเต.21พระเยซู หวาว ปาย “ก็ โมหมวง ปุ เคาไจ หนืจ เถ ลัฮ?”22โม พระเยซู หนะ กอฺนซิด จี ตอฺห์ โซะ เบทไซดา แหลว เกิด กูย หนืจ หนาว ดึง กูย หมัดซอด หมูย หนะ เจา บวย พระเยซู เถียร ดุฮ หมัด ออฺน.23พระเยซู เตอะ กูย หมัดซอด ขัย หล็อฺฮ จี นา กราว โซะ. หนาว กโจ็ฮ เดียะหวี เซอ หมัด กูย ขัย แหลว ดะ เต บวน หมัด หนาว หม็อฺฮ ปาย “หมวง ซีเผิห์ หนอฺ หนืจ หรือ เถ?”24กูย ขัย เหงิบ ซ็อฺฮ หวาว ปาย “ไฮ ซีเผิห์ กูยบืน นะ ขัล อะหลวง ฮุจ จีฮุจ เจา บืน.”25พระเยซู ดะ เต บวน หมัด กูย ขัย เถิน. ซาแหน กูย ขัย อุมหรึง แหม หมัด ค็อฺง หนาว ก็ ออฺ ซี ขูยาง บืน อึนตรัฮ.26พระเยซู ออฺน หนาว ลบจี ดุง ฮาม ปาย “จิ หมูด โซะ แหน เถิน เดอ.”27ซาแหน พระเยซู หนะโม กอฺนซิด จี โซะ กะน็อฺฮ ๆ ปา เทิน ซีซารียา ฟิลิปปี. จี โตน กะนา พระเยซู หม็อฺฮ กอฺนซิด ปาย “อึนเต ไฮ บีห์ แม็ฮ โวยโซะ หวาว อึนดัว ปาย ไฮ เกิด ดาย?”28โมหนาว หวาว ปาย “กูย หนืจ หวาว ปาย หมวง เกิด ยอน เทาะ หวัว เซ็น อึมหระเดียะ+ กูย หนืจ หวาว ปาย เกิด เอลียา กูย หนืจ หวาว ปาย หมวง เกิด กูย+ หวาว มนาย ค็อฺง พระเจ้า รูขัย หมูย หนะ.29พระเยซู หม็อฺฮ หนาว ปาย “แหลว โมหมวง ลัฮ ขึด ปาย ไฮ เกิด ดาย?” เปโตร หวาว “หมวง เกิด พระคริซ”30แหลว พระเยซู ฮาม โม กอนซิด ปุ ออฺน อึนเต ออฺน ดาย ดิง.31แหลว พระเยซุ เริม ซอฺน โม กอฺนซิด ปาย “ไฮ กอฺนกูย+ จิง ต็อฺง เท็อน หรับ อึมเบียะถุก ยัง อึนต็อฺง ดาล ยาง ติง จิง ไกร โม อึงเคา หนะ โม คูบา หนะ โม อาจาน ซอฺน กด ค็อฺง โมเซ ปัดบ็อฺฮ. บันเซ็อด โม ขัย จิง กแจด ไฮ ออฺน แหล็ฮ. แต ตไง เทาะ อไป ไฮ จิง หมอฮ ซ็อฺฮเจา รู แหล็ฮ ขัย.”32พระเยซู อึนเต หนาว ยัง อึนตรัฮ. นะขัย เปโตร ดึง พระเยซู ตะงัจ หล็อฺฮ เจา ฮาม ปุ ออฺน หวาว นะแหน.33พระเยซู หวิฮ ลบ กรอย ซี โม กอฺนซิด อึงฮอก เซอ เปโตร ปาย “จี ออฺน เผ็อน กะมจ ซาตาน+! มนายขึด นะแหน เกิด มนายขึด ค็อฺง กูย ปุ แหมน มนายขึด ค็อฺง พระเจ้า !”34ซาแหน พระเยซู กเหฺยีย โม กูย โวยโซะ หนะ กอฺนซิด ออฺน เจา หวาว ปาย “คัน กูย เหนีย ยัก โตน ไฮ หนาว ต็อฺง ตัฮ บ็อฺฮ จะเอง แหลวก็ หรับ ดอล กางเคน ค็อฺง หนาว โตน ไฮ จี35เพราะ กูย เหนีย ยัก จิง ออฺน จะเอง เผ็อน ก็ จิง บ็อฺฮ จะเอง. แต กูย เทาะ ญอฺม ตัฮ บ็อฺฮ จะเอง เพราะ เผิห์ หลึง ไฮ หนะ คาวออฺ ค็อฺง ไฮ กูย ขัย จิง เผ็อน.36คัน กูย เหนีย บืน หมาล ติงฉิม หลึง กแตห์ แหน ดัวะ แต ต็อฺง เซีย บ็อฺฮ จะเอง จิง เกิด ประโยด หนอฺ?37ปุ เกิด หนอฺ เทาะ จิง แอเจา กแล็ฮ จะ ค็อฺง หนาว บืน.38นะขัย คัน กูย เหนีย อะซ็อฺง กูย เพราะ ไฮ หนะ มนาย ค็อฺง ไฮ หลึง ซไม กูย ปุขือ เทาะ ปุ อึมผาฮ พระเจ้า แหน ไฮ กอฺนกูย ก็ จิง อะซ็อฺง เทาะ จิงหรับ กูย ขัย คัน ตอฺห์ ตไง ไฮ จิง เจา หลึง ซงาราซี ค็อฺง อาหนุ อึมผรม โม เทวะเดีย เทาะ ปอฺดซักซิด.”
Empower Asia Bible Translation Movement