Mark7
1โม ฟาริซี หนะ โม อาจาน ซอฺน กด+ ค็อฺง โมเซ กูย หนืจ บืน เจา รู หมืง เยรูซาเล็ม เจาฮุม พระเยซู.2หนาว หลีห์ ซี ปาย โม กอฺนซิด ค็อฺง พระเยซู จาโดย ปุเหรียว เต ออฺน ไกร โตน หรีด เทาะ โม ฟาริซี ซัง ดัวะ3เพราะ โม ฟาริซ๊ หนะ โม ยิว ดาล หนะ หวัว โตน เทาะ ผอฺห์ถูด ค็อฺง หนาว ซอฺน ตอฺๆ อึนดัว ขือ หนาว จิง ปุ จา หนอฺ จน เหรียว เต โตน หรีด หญูง4หมาล เทาะ เจา รู ตลาด ก็ นะอึนดัว หนาว จิง ปุ จา จน ปาย จิง เหรียว หญูง. หนาว หวัว โตน กด กะน็อฺฮๆ เถิน ดาล ยาง ต็อฺง เหรียว โขม จาน อแด็ฮ คลัฮ หงัฮ วีฮ ทองแดง ออฺน ออฺ.5โม ฟาริซี หนะ โม อาจาน ซอฺน กด ค็อฺง โมเซ หม็อฺฮ พระเยซู ปาย “เหนีย แต โม กอฺนซิด ค็อฺง หมวง ปุ หวัว โตน หรีดขวง ค็อฺง ผอฺห์ถูด เทาะ เขย หวัว ตอฺๆ อึนดัว เจา? หนาว จา โดย ปุ เหรียว เต หญูง โตน หรีด.”6พระเยซู หวาว ปาย “อิซยา อึนเต ดัวะ ตอฺห์ โมหมวง กูย โก็ฮเต เฉียกะลาง ยัง ไกร แหลว เทาะ คีน ดัวะ ปาย ‘พระเจ้า อึนเต ปาย กูย โม แหน ออฺน เกียด ไฮ แต กะ นอฮ แต กะฮอฺม ด็อฺง กู อึงฮาย รู ไฮ.7เทาะ หนาว เจา อึมผาฮ ไฮ ปุ เกิด ประโยค หนอฺ เพราะ หนาว แอ หรีดขวง เทาะ กูย ตัง ซ็อฺฮ เจา ซอฺน นะ ปาย เกิด กด ค็อฺง พระเจ้า.’8“หมวง ปัดบ็อฺฮ กด ค็อฺง พระเจ้า เจา ทือ หรีดขวง ค็อฺง กูย แถน.”9พระเยซู ด็อฺง หวาว เถิน ปาย “ขัย หมวง ปัดบ็อฺฮ กด ค็อฺง พระเจ้า เจา หวัว โตน มนายซอฺน ค็อฺง หมวง เอง.10ขือ โมเซ หวาว ปาย ‘ออฺน เกียด เหมห์ หนะ หนุ ค็อฺง หมวง’ แหลวก็ ด็อฺง หวาว ปาย ‘กูย เทาะ เฉ เหมห์ หนุ จิง ต็อฺง ไกร กแจด.’11แต โมหมวง กลัฮ ซอฺน ปาย คัน กูย เหนีย หวาว หลึงเหมห์ หนุ ปาย ‘หมาลๆ ค็อฺง ไฮ เทาะ หมวง จิง แอจี เปรฺอ บืน ขัย เกิด โครบัน’ (แปล ปาย ทะวาย ออฺน พระเจ้า แหลว)12กูย ขัย ก็ ปุ ต็อฺง ฉูย เหมห์ หนุ เถิน ตอฺจี.13เทาะ หมวง ซอฺน หรีดขวง ค็อฺง ผอฺห์ถูด ตอฺ ๆ อึนดัว นะแหน หมวง ก็ โขม กด ค็อฺง พระเจ้า. แหลว หมวง ด็อฺง หวัว หมาล แบบ แหน เถิน ดาล ยาง น็อฺง.”14พระเยซู กเหฺยีย ออฺน โวยโซะ เจา ตะงัด หนาว เถิน หวาว ปาย “ออฺน ตะงัด ไฮ ออฺน เคาไจ เดอ.15ปุ แหมน หมาล นา กราว เทาะ หมูดจี หลึง กูย จิง หวัว ออฺน กูย เกิด อึมเผรอะหลึง หมัด พระเจ้า แต หมาล เทาะ หล็อฺฮ เจา รู นา กะนง ขัย หวัว ออฺน กูย เกิด อึมเผรอะ หลึง หมัด พระเจ้า.”16ดาย เกิด ลา ตอล ก็ กอน จะ งัด เดอ17ผัว พระเยซู จี รู โม กูย หมูด ดุง แหลว โม กอฺนซิด หม็อฺฮ พระเยซู ตอฺห์ มนาย ขัย.18พระเยซู หวาว ปาย “โมหมวง ก็ ปุ เคาไจ แบบ กูย กะน็อฺฮ ขัย บอ? โมหมวง ปุ ดิง ลัฮ ปาย หมาล นา กราว เทาะ หมูดจี หลึง นา กะนง กูย จิง ปุ หวัว ออฺน กูย เกิด อึมเผรอะ หลึง หมัด พระเจ้า19เพราะ ปุ บืน หมูดจี หลึง กะฮอฺม แต หมูดจี หลึง กะผาฮ แหลวก็ กลอฺง หล็อฺฮ เจา.” (นะขัย พระเยซู ซอฺน ปาย หมาลจา ติงฉิม ยาง อึมเผรอะ เล็ย.)20พระเยซู หวาว ตอฺจี ปาย “หมาล เทาะ หล็อฺฮ เจา รู กูย ขัย ฮะ เทาะ หวัว ออฺน หนาว เกิด อึมเผรอะ.21เพราะ มนายขึด ปุ ขือ ซุผูห์ หวัว ออฺน แกล อึนดัว อึมเผรอะ ตูจ กแจด อึนดัว แกล อึมเปลย22โลบจา อึนดัว หวัว จะ ปุขือ ทอ อึนดัว ลือไจ อึนดัว หวาว อึนโถฮ โม เผียโหล หวัว หมาล โงๆ23หมาล ปุขือ โม แหน ฮะ หล็อฺฮ เจา รู กะฮอฺม กูย หวัว ออฺน กูย เกิด อึมเผรอะ หลึง หมัด พระเจ้า.”24ตอฺ รูขัย พระเยซู หล็อฺฮ จี ปา เทิน หมืง ไทระ หนะ หมืง ไซดอน หมูดจี หลึง ดุง หมูย ปุ ยัก ออฺน ดาย ดิง แต นะขัย ก็ ปุ แว็ด หมัด โวยโซะ.25เกิด กูย กไป หมูย หนะ เทาะ กอฺน กะมอร ค็อฺง หนาว หมาลหมูด ยะแหน ซ็อฺง แหลว ปาย พระเยซู เจา ก็ เผียว เจา ผอด บวน หฺยืง ค็อฺง พระเยซู.26กูย กไป แหน เกิด ปา เทิน ฟินิเซีย หลึง หมืง ซีเรีย เกิด กูย กรีก ปุ แหมน กูย ยิว. ยะแหน อึงคม เถียร ออฺน ผูย หมาลหมูด หล็อฺฮ รู กอฺน กะมอร หนาว.27แต พระเยซู หวาว ปาย “ออฺน กอฺนๆ จา พไซ หญูง. เทาะ จิง แอ หมาลจา ค็อฺง กอฺน เหลียฮ ออฺน อะจอฺ จา ก็ ปุ ออฺ.”28กไป ขัย หนาว “เออ อาจาน แต อะจอฺ เทาะ กู กเดิบ โตะ จา โดย ไอ ก็ ตอจ จา โดย เดล ค็อฺง กอฺนๆ ขัย.”29พระเยซู หวาว ปาย “ก็ เพราะ หมวง ตอฺบ นะขัย ก็ ออฺน ลบจี ดุง. หมาลหมูด หล็อฺฮ จี รู กอฺน กะมอร ค็อฺง หมวง แหลว.”30ยะกไป ก็ ลบจี ดุง เผิห์ ปาย กอฺน กะมอร บิจ กู หมาลหมูด หล็อฺฮ จี แหลว หมัดเหม็ย.31ตอฺ รูขัย แหลว พระเยซู จี รู ปา เทิน หมืง ไทระ พาน หมืง ไซดอน กโฮด ตอฺห์ เทเหลจืด กาลิลี พาน ปา เทิน อึนเจ็อด โซะ.32เกิด กูย ดึง กูย กืห์ กะตอร ตง หมูย หนะ เจา เถียร ออฺน พระเยซู ดะเต โป.33พระเยซู ก็ ดึง กูย อึนถรุฮ ขัย หล็อฺฮ จี ออฺน เผ็อน กูย แอ กมเต จูจ หมูด ผร็อฺง กะตอร แหลว หนาว กโจ็ฮ เดียะหวี แอ เซอ อึนตาห์ กูย ขัย.34แหลว พระเยซู เหงย หมัด ซ็อฺฮ ซะวัน ตเง็อฮ ผืด แหลว หวาว หลึง กูย ขัย “เอฟาทา” (แปล ปาย “ออฺน เบิห์ หล็อฺฮ เดอ.”)35กะตอร กูย ขัย ก็ ซ็อฺง บืน อึนตาห์ ก็ หวาว กะหลัฮ บืน.36พระเยซู อึนชัด โม กูยเทาะ เผิห์ จิ หวาว ออฺน ดาย ตะงัด. แต อึงเฮ็ง ฮาม หนาว ก็ อึงเฮ็ง แต หลือ ดาล ซ็อฺฮ.37ขูหนะ เทาะ ซ็อฺง หงึด ดาล ดึง อึนดัว หวาว ปาย “อือ พระเยซู หวัว บืน ขูยาง เนาะ. แมแต กูย กะตอร ตง ก็ หวัว ออฺน หนาว ซ็อฺง บืน กูย กืห์ ก็ หวัว ออฺน หนาว บืน.”
Empower Asia Bible Translation Movement