Mark1
1แหน เกิด คาวออฺ หรืง ค็อฺง พระเยซูคริซ กอฺน หมูย ค็อฺง พระเจ้า.2กอฺ ซ็อฺฮ ก็ เกิด นะ เทาะ กูย+ หวาว มนาย ค็อฺง พระเจ้า หมูย หนะ กะหมึฮ อิซยา อึนเต ดัวะ รูขัย ปาย “พระเจ้า หวาว ดัวะ ปาย ‘แหน ไอ เปรฺอ ถวย ค็อฺง ไฮ จี นา มแหนห์ หมวง ตาล กะนา ดัวะ หรับ หมวง.’3จิง เกิด เซง กูย เจา โกก ปา เทิน อัดกะฮะ ปาย ‘หมีน กะนา เขาะ ออฺน ตรง ดัวะ จำ หรับ พเหญีย จิง เจา.’”4นะขัย ยอน เทาะ หวัว เซ็น อึมหระเดียะ+ หนาว จี ปา เทิน แหลง อัดกะฮะ เถดซอฺน โวยโซะ ปาย “ออฺน ตัฮ บ็อฺฮ เบียบ หวิฮ กะฮอฺม เกิด กไม เจา หรับ เซ็น อึมหระเดียะ แหลว พระเจ้า จิง เหลิห์ เบียบ โถด ออฺน หมวง.”5เกิด กูย ยัง ดาล เจา รู ถูๆ ปา เทิน ยูเดีย หนะ หมืง เยรูซาเล็ม เจา บวย ยอน. โม กูย ขัย ญอฺมโถด ญอฺมโหม ตอฺ พระเจ้า ปาย เกิด กูย เบียบ. แหลว ยอน หวัว เซ็น อึมหระเดียะ ออฮน หนาว หลึง ตอม จอแดน.6ยอน จูด อึนฉิจ ผาห์ ฮับ หวัว หลึง เซาะ อูด แอ กแบห์ หมาล ตัน อึงแกง หนาว จา อเตร หนะ เดียะคีล.7ยอน อึนเต โวยโซะ ปาย “จิง เกิด กูย หมูย หนะ เจา กรอย ไฮ. หนาว ขัย ผืด เหลิฮ ไฮ ดาล. แมแต แบห์เฉิง ค็อฺง หนาว ไฮ ก็ ปุ ซมขูน จิง ออน หรีล ซาย ซัด ออฺน.8ไฮ เปรฺอ เดียะ หวัว เซ็น อึมหระเดียะ ออฺน โมหมวง แต หนาว ขัย จิง หวัว เซ็น หลึง ผระกเหวียย.”9ตอฺเจา ปุ ดูญ พระเยซู เจา รู โซะ นาซาเร็ท ปา เทิน กาลิลี หรับ เซ็น อึมหระเดียะ รู ยอน หลึง ตอม จอแดน.10ผัว พระเยซู ซ็อฺฮ รู เดียะ เหงิบ ซ็อฺฮ ก็ เผิห์ ผราฮ แยก หล็อฺฮ เผิห์ ผระกเหวียย แซงเจา กู ปอฺง หนาว ขือ นะ แจม เขรียบ.11แหลว เกิด เซง โซล เจา รู ซะวัน หวาว ปาย “หมวง แหน เกิด กอฺน หมูย เทาะ ไฮ หมัก ดาล หมัดเหม็ย. ไฮ เอิห์ หลึง หมวง.”12มีปลัฮ ขัย ผระกเหวียย หวัว ออฺน พระเยซู หล็อฺฮ จี ปา แหลง อัดกะฮะ กู บวน ขัย ซีซิบ ตไง13ไกร อึงเคา กโมจกะซาจ หญาว. เกิด หมาลก็อฺฮ กู บวน ขัย น็อฺง แต เทวะเดีย+ เจา คันนะซา หนาว.14กรอย รู ยอน ไกร ขุก แหลว พระเยซู หล็อฺฮ จี ปา เทิน กาลีลี เถดซอฺน คาว ออฺ ค็อฺงพระเจ้า15หวาว ปาย “ตอฺห์ เหวเหลีย แหลว ติง อึนฉัล เหวเหลีย เทาะ พระเจ้า จิง หมูด เกิด ซะดัจ ขุม แหลว. ออฺน ตัฮ บ็อฺฮ เบียบ หวิฮ กะฮอฺม เกิด กไม เจา ฉือ แอ คาว ออฺ ค็อฺง พระเจ้า.”16พระเยซู ฮุจ จี โตน ซูย ทเหลจืด กาลิลี กู ก็ เผิห์ ซีโมน หนะ อันดรู แซม ค็อฺง ซีโมน บง อะกา กู หลึง ทเหลจืด เพราะ หนาว เกิด กูย บวย จา กะนา บง อะกา.17พระเยซู หวาว หลึง โมหนาว ปาย “เยอๆ จี หลึง ไฮ ไฮ จิง ซอฺน หมวง ออฺน กอบ กูย แถน กอบ อะกา.”18หนาว อเบีย หนะ ก็ ตัฮ ฮึมลัญ ดัวิ โตน พระเยซู จี ยัง หวัย.19ฮุจ จี บีห์ เถิน ก็ เผิห์ ยอน หนะ ยากอบ แซม หนะ ซาย กอฺน เซเบดี ตะกาว หลึง ถูห์ ฉัวะ ฮึมลัญ กู.20พระเยซู กเหฺยีย ออฺน โมหนาว จี หลึง. หนาว ก็ ตัฮ หนุ ดัวะ หลึง กอฺนจาง กู ปา ถูห์ แหลว โตน พระเยซู จี.21พระเยซู หนะ โม กอฺนซิด เจา ตอฺห์ โซะ คาเปอนาอุม. ตอฺห์ ตไงฉาว+ พระเยซู หมูด จี ซอฺน โวยโซะ หลึง ฮอง+ กะฉุม อึมผาฮ พระเจ้า.22โวยโซะ เทาะ ตะงัด กู ขัย หงึด กะฮอฺม หลึง นา ซอฺน ค็อฺง พระเจ้า เพราะ หนาว ซอฺน เกิด อำนาด ปุ นะ โม อาจาน ซอฺน กด+ โมเซ.23เหวเหลีย ขัย เกิด กูย อึนถรุฮ หมูย หนะ เกิด หมาล หมูด หมูดเจา หลึง ฮอง กะฉุม อึมผาฮ พระเจ้า เตรห์ ปาย24แหน เยซู กูย นาซาเร็ท หมวง เจา หวัว หนอฺ ไฮ? เจา หวัว บ็อฺฮ ไฮ เถ? ไฮ ดิง แหลว ปาย หมวง เกิด ดาย. ก็ เกิด กูย ปอฺดซักซิด เทาะ พระเจ้า ฉูน เจา!”25แต พระเยซู ซัง หมาลหมูด ปาย “ซะงัดๆ หล็อฺฮ จี ออฺน เผ็อน!”26หมาลหมูด ขัย ก็ หวัว ออฺน กูย ขัย ชัก อะหละ เตรห์ เซง ยัง ซำผืด แหลวก็ หล็อฺฮ จี.27โวยโซะ ขูหนะ เทาะ เผิห์ ก็ หงึด กะฮอฺม ดาล หวาว อึนดัว ปาย “เออ ขัย ซี เกิด มนายซอฺน กไม แหน! กูย แหน เกิด อำนาด ดาล ลือๆ ซัง ออฺน หมาลหมูด หล็อฺฮ ไอ ก็ หล็อฺฮ!”28นะขัย หรืง พระเยซู แหน ก็ กะบือ จี ถูๆ ปา เทิน กาลิลี ยัง หวัย.29พระเยซู หล็อฺฮ รู ฮอง กะฉุม อึมผาฮ พระเจ้า ตรง หมูดจี หลึง ดุง ค็อฺง ซีโมน หนะ อันดรู. ยากอบ หนะ ยอน ก็ จี น็อฺง.30ยะผอฺห์ ค็อฺง ซีโมน บิจ ตโก็ฮ กู. ผัว พระเยซู จี ตอฺห์ โมหนาว ก็ หวาว อึนเต พระเยซู ตอฺห์ หรืง ยะผอฺห์ ค็อฺง ซีโมน.31พระเยซู ก็ กอบ เต กะหยุง ออฺน หฺยูร ซ็อฺฮ. มีปลัฮ ตโก็ฮ ขัย ก็ ออฺ อาผอฺห์ ก็ หมีน โดย เดียะ เจา ออฺน พระเยซู หนะ โม กอฺนซิด จา.32ตอฺห์ กะบือ ผัว โผลเผล เกิด กูย ดึง โม กูย อี ตก็ฮ หนะ กูย หมาลหมูดกู เจา บวย พระเยซู.33กูย ติง โซะ ดึง อึนดัว เจา ซะญอ กู นา มแหนห์ ผร็อฺง กเหวียล.34พระเยซู ก็ โป กูย ตโก็ฮ หลึง โหรก หนอฺๆ ดาล หนะ ออฺน หนาว ออฺ ติง ผูย หมาลหมูด ดาล ออฺน หล็อฺฮ จี. หนาว อึนชัด หมาล ขัย ปุ ออฺน หวาว เพราะ หมาล ขัย ตะขัล หนาว.35ยูร ซ็อฺฮ รู กะลัฮ ผืด พระเยซู หล็อฺฮ รู โซะ จี เผียวะเหนีย บวน กแหวน.36ซีโมน หนะ โม จี กโปน พระเยซู.37เผิห์ แหลว ก็ หวาว ปาย “กูย ขูหนะ หนาว บวย หมวง.”38พระเยซู หวาว ปาย “แต โมไฮ ต็อฺง หล็อฺฮ จี โซะ กะน็อฺฮๆ. ไฮ ต็อฺง เถดซอฺน บวน ขัย น็อฺง เพราะ แหน เกิด หวีห์ เทาะ ไฮ หล็อฺฮ เจา หวัว.”39นะขัย พระเยซู จี ถู ปา เทิน กาลิลี เถดซอฺน หลึง ฮอง กะฉุม อึมผาฮ พระเจ้า ปา กะน็อฺฮๆ ติง ผูย หมาลหมูด ออฺน หล็อฺฮ จี.40เกิด กูย เกิด ถูด+ หมูย หนะ เจา บวย พระยซู ผอด อึงคม เถียร ปาย “คัน หมวง ยัก จิง โป ไฮ ออฺน ออฺ หมวง ก็ โป บืน.”41พระเยซู ซ็อฺง ก็ เหฺยาะเหฺยียล กะลอ เต จี เซฺาะ หนาว หวาว ปาย “ไฮ ยัก โป เฮย ออฺน ออฺ ซำขัย!”42มีปลัฮ ถูด ขัย ก็ ออฺ.43แหลว พระเยซู ซัง หนาว ปาย44“จิ อึนเต ดาย เดอ! แต จี บวย มอม+ออฺน หนาว ตรูด แหม. แหลว หมีน หมาล จี แซน โตน มนายซัง ค็อฺง โมเซ ออฺน หรัวะ บืน นา ซาดซะนา. นะขัย กูย ถูๆ จิง ดิง ปาย หมวง ออิ ถูด แหลว.”45แต กูย ขัย หล็อฺฮ จี อึนเต กูย ถูๆ โซะ จน พระเยซู ปุ ฮาน หมูด โซะ. คัน หนาว จิง จี เหนีย หนาว ต็อฺง ตูจ จี ต็อฺง กู แต กราว โซะ แต ก็ ด็อฺง เกิด กูย ถู โซะแซ เจา บวย หนาว.
Empower Asia Bible Translation Movement