1 Joni3
1Ilingani bukulwana bwoludo lutakapiwa naTate, kuti tishobwe kuwhi tibana baMwali. Akale ndizwo zwinotisa kuti inyika isitizibe isu nokuti aijakonziba.2Banakwaina banodikana, ngweno tibana baMwali, zwatichaba azwijanu zwazibikana. Koga tinoziba kuti, kana Kristo aswika, tinooba saiye, nokuti tinoombona sobwaali.3Banhu bose banobimba munaiye bano zwichenesa, kuti bebe bachena saiye.4Wose unhu unochinya, unotaluka mulawo, nokuti kuchinya kutaluka mulawo.5Moziba kuti Kristo wakaboneka kuti ebhise luchinyo, akale muna iye amuna luchinyo.6Akuna unogala muna iye unondila mbeli echinya. Unondila mbeli echinya aajanhu ombona akale aatonziba.7Bana, musileke umwenhu emuchenga. Iye unota bululami ulolulama, sobwaali iye wakalulama.8Iye unochinya, ngowaguluzhanje, nokuti guluzhanje wagala echinya kuva pakutanga. Chisoko chokuzha koMwananhulumyana waMwali chakaba chili chokupalaja mishingo yaguluzhanje.9Akuna unhu, unozwalwa naMwali, unochinya, nokuti imbeyu yaMwali inogala mwaali, akale angandile mbeli echinya.10Yomu ndimo mwatinoziba bana baMwali nabaguluzhanje, unhu wose usinota zwilolulama aatoba mwana wamwali kana nooyo usinoda mwanakwaina uwe.11Yeli ndilo iwhi limwakawha kuva pakutanga, linoti, tidanane.12Tisibe sa Keyini wakabeli wokumbi, wakabulaya ununa uwe Abhelo. Ani Keyini wakombulayilani? Nokuti mishingo yiye yaluba mibi, koga yonuna uwe yaluba ikalulama.13Banakwaina musichename, kana inyika imubenga.14Tinoziba kuti takabhuda mulufu tikangwina mubupenyu, nokuti tinoda banakwaina. Wose usina ludo umomulufu.15Wose unobenga mwanakwaina uwe umbulayi, akale moziba kuti akuna umbulayi unabupenyu businopela.16Yeyi ndiyo inzila yatinoziba nayo ludo, Jesu wakatifila. Nasubo tinokwelela kufila pabanakwaina bedu.17Kana umwe ekafuma kova ebona mwanakwaina eyabula esinounwhila ishe, ludo lwaMwali lunoba muna iye chini?18Bana bangu banodikana, tisibe banoda namawhi kana nokulebeleka chete, koga nezwito nechokomende.19Yeyi ndiyo inzila yatinoziba kuti tili bechokomende, akale kuti mwoyo yedu tonyetutusa chini mbeli kukwe,20kojoba myoyo yedu itipandandu, tino ziba kuti Mwali unkulwana kupinda myoyo yedu, akale unoziba zwose.21Banakwaina banodikana kana myoyo yedu isinotipa ndandu, tina mwoya nsimu mbeli kwaMwali,22akale tinowana zwose zwatinokumbila kuva kunaiye, nokuti tinolondota milawo iye nokuta zwaanoda.23Yoyu ndiwo undawo uwe, kuti tidimbwe muzina lyoMwananhulumyana uwe, Jesu Kristo, akale tidanane sokutilaya kukwe.24Yabo banolondota milawo iye, unogala mwabali, naibo mwaali. Ndimo mwatinoziba kuti ugele munasu. Tinozibiswa yezwi nompepo waakatipa.
The Word for the World International