Amos7
1RAMPAUBE Tinggwang aide acu keu liagai. Pielo, heriakting mei lungh cuh kera mtei kecudau pa tangriem hauge de teigai, nah, ainie, cide au hegwangpei luhlüt kelu cai lungh cuh kela mei.2Tangrim cidungde kideu ga ginei kemdiak tyei cang kedicai Ih ranggai, “RAMPAUBE Tinggwang, ngaunggia eh n minadung mau gi beulo; dainzwa eh Jacob ringlu zie no? Pa au ceuham kecune.”3RAMPAUBE pelung nreu lwe pa rangdi, “Cide peu tei dilak.”4RAMPAUBE Tinggwang ainzwa acu keulia: Pielo, RAMPAUBE Tinggwang hetutiak kera mi qugai, cide ma kekiee tei cangh di, hangdeu kang dui kecok nah kideu de de ru nggah dilai di.5Dede Ih ranggai, “RAMPAUBE Tinggwang, kenggia eh mtak dilo; dainzwa eh Jacob ringlu zie no? Pa au ceuham kecune.”6RAMPAUBE pelung nreu lwe, “Aide liede peu tei dilak,” de eh RAMPAUBE Tinggwang ranggai.7Pa aide acu keulia gai: Ainie, Rampaube herie taiga sap, pe ba ga kemdet ria gede si la.8RAMPAUBE a dage ranggai, “Amos, nang daipai ngau zeu no?” Ih ranggai, “Kemdet ria ge.” Ge Rampaube rang eh, “Ainie, Ih a mina Israel kakgage kemdet ria kai zie. Ih penuide saja peu kera alung nreu daidi lakta.9Isaac gu heni kecehudung de ngkap dizie, Israelme gu kemci nidung kau gah dizie, nah Ih hegwangpei Jeroboam gwangram de kingtie le renia cuh zie da.”10Pecai Amaziah, Bethel recabam ni ga cingkupei kedibe, Israel gwangpei Jeroboam dage sam langgai: “Amos Israelme kakgade lungcet kesia riem bam dida. Kideube pe samdung leune lia gai lakta.11Amos aide ziemne ranggai, ‘Jeroboam kingtie gade tsai zie, nah Israelme penui deu gade mbai eh keda deu ga peu gwang bi dizie.’”12Amaziah Amos dage rang, “Caihakecibo, tet di, Judah deu ga pak cailigwang di, nah cikade tangku tyei nah cairasam ranglu.13Dede Bethel aikade caiha rang sita dilu, cide hegwangpei kemcibam ge kecune nah hegwang kige lu.”14Ge Amos Amaziah dage ranggai, “Ih au caihakecime ma mede caihakecime name de ma. Ih au kauruine kekwame ge, Ih sycamore nzütbangdung pie lamlui la.15Dede meurün kwa kela dau RAMPAUBE acu ngngwa lu nah a da rang, ‘Mie cu, a mina Israelme da ge cairasam ranggai lu.’16Cu RAMPAUBE sam kingnei lulo. Nnui rangla, ‘Israelme dage cairasam rang sita lo, nah Isaac leuhme de rang msia tadi lo.’17Ciziemne, RAMPAUBE ainzwa rangla, ‘N nau namdi gade helipui ge tei dizie. N napeidung nah n napuidung kingtie gade kau dizie; ndeu mdet lu eh mzi beu dizie; nah nang nci kemak deu gade tsai dizie, nah Israelme penui deu gade kedame deu ga hebaang tei mie bi dizie.’”
Bridge Connectivity Solutions Pvt. Ltd.