Amos8
1RAMPAUBE Tinggwang ainzwa eh acu keulia. Pielo, tinglum gu matsi biaktui ge!2RAMPAUBE keteugai, “Amos, nang daipai ngau zeu no?” Ih ranggai, “Tinglum gu matsi biaktui ge.” Ge RAMPAUBE a dage ranggai, “A mina Israelme ziemne penlibe gwang dida; Ih penuide saja peu kera a lung nreu dai dilak.3Aide RAMPAUBE Tinggwang ne ndugai, Cipau nai ngqwaki leidung kehapkwa ge dizie, kecai paaudung kekiee ge, penuide maleune gage kelien gai! Nlei mene!”4Aide kingnei lulo, nnui naang kelame de caicim kelame nah kideu ga kegahme de keugi di kelame.5Penui rangla, “Daidau hekei keheci cangdi zie de bi, iciu eh anui mei zwa dailu kerane? Daidau ge sabbath tingba cang di zie de bi, iciu eh anui gu wheat zwa lu kerane? Anui pemdet tei mceu dizie nah pemi tei nkiee luzie, kenret mdet teu eh anui mide cwa kela nzwa.6Anui aiciu eh wheat kesiabe zwa lu kerane, rangkanggeu le kegahme de luilu zie, nah picum gele kennangme de lui luzie.”7Jacob kengang dene RAMPAUBE pekatei sampet dida, “Ih penui kemau bata tei kedi madauge de nsungta dilak.”8Kideube ai ziemne teu kelai dilak ni, nah cika lungh kebam leune hei eh hap sia lak ni? Nile reuki nzwa cidungde pelane cuh hang dizie nah cide pereu mlim rwa nah pekang mlim mie dai di zie, Egypt deudi ga kereuki nzwa.9“Cipaunai ciciu gwang zie, RAMPAUBE Tinggwang ne aide ndugai, tingna tingnaimiak nlüt di kera Ih tei dizie, nah kebaa ting dau kideube Ih tei mui dizie. 10Ih nnui hengyidung kedi pwa suisiet tei dizie nah nnui leidung leune lungrei kwa ge dizie. Ih nnui pelane de teipwa peu roso pai bah zie nah pelane peu kwak dizie. Pena pumlibe ziemne hei eh hap kecu nzwa Ih tei dizie, nah cipau penli tingba benai au kekaa ge zie.11Pielo, petingbadung gwang zeu, RAMPAUBE Tinggwang ne aide ndugai, Ih herakum kideu gage langgai zie, tangku ziemne herakum ma, mede dui kehereu ziemne ma, dede RAMPAUBE samdung kingnei kera ziemne.12Penui tet jaaidi ge gade jaaidi gega gwang, penui tingtünle de naimiak kepetle ge pak gai RAMPAUBE sam peei eh, dede penui cide peei gailak.13Cipaunai hezukeyi relei kemci puidung nah rehangmena hereu eh nnei dizie.14Samaria ga Ashimah rabepui maudung zi teu samkak kelame nah, ‘N tinggwang ring kela nzwa, Dan,’ nah ‘Beersheba lampui bam kela nzwa’ de eh rang kelame, penui kau dizie nah cuh dai gai lak dizie.”
Bridge Connectivity Solutions Pvt. Ltd.