Corinthiame Kenabe13
1Aide Ih nnuida kegwang pia pe kecumbe zieda. “Ma keheibe leune de hangna mede hangcum zierang gade teilu maisia.”2Ih pia pe kenabe kegwang dau Ih mrai rangbeu dida, nah Ih cu bam meliede, pedwa kemau tei kedime nah keda pelane de Ih mrai rang gaila, Ih penui da gwang dai lucai, Ih migede de mbai beulak,3Kedanemene nnui Khrista a dade marang kebamde ci mci neu lalu. Pa au nnui dade mnei ma, dede nnui kakga ngkieng süt.4Kedanemene pecu kemnei gade gwakdi, dede Tinggwang kengkieng gade pa ringlu. Anui de pe dade mnei, dede nnui dade anui pecu ngngwa Tinggwang kengkieng gade ring luzie.5Nnui kenlum ga bammi mebi kecu nnuikatei nnuide mcet gai pielo. Nnuikatei nnuide kedak pielo. Nnui Jisu Khrista nnuida kebam de ci meni—kedak kegai gade nnui siadi zielie mai?6Nah anui kedak kegaide gade siadi kemak nnui cilu kera Ih nlum.7Cu nnui magede tei maudi melu kerane anui Tinggwang dade kiela, anui kedak kegaide gade yilu lie kecu liagai kerane ma, dede nnuide peu petaube teilu kerane, anui kedak kegai gade siadi kecu nzwadi liede.8Kedanemene anui kesangbe de mmau eh ma gede tei gailak, dede kesangbe ziemne rünne teila.9Kedanemene anui kemnei dau nah nnui kengkieng dau anui suiyi bamla. Anui kie kelade au peu nnuide yicanglu kerane.10Ciziemne, Ih nnuida bam kemakdau ma aidungde laisiu aikage rau gaila, ciu eh Ih kegwangdau, a kengkieng de teu Ih nnui dade a zaisiadi melu kerane—cide Rampaube nnuide teu cuhlu kera ziemne acu pwapeu, nnuide teu kaudi kera ziemne ma.11Kekambe, sinamedung, nnui suiyi lu! Yicangsiak lu, hangge ge de kecunglu, kesuizwa lu, kezuyi eh lunghlu. Iciu de keku nah lungciep Tinggwang nnuide ngngwala luzie.12Kemci kemam ge teu hangge ge de kelumlu. Aika kebam kemcimedung pelane nnuide kelum gaila. 13Rampaube Jisu Khrista ngaugia, nah Tinggwang keku, nah Kemci Rabe gade ngngwa ket keteide peu nnui pelane da bam kelube tei lulo.
Bridge Connectivity Solutions Pvt. Ltd.