Tarüa35
1Jeriko marow hown tatang klowk mih Jawrdan aw pang kowi kowh Moab pren dowm nai kowi Israeluüa uowi reng tak khe CHAKRAMANG tek pe Mosi mih,2“Mami laiklow Israeluüa kowi kowtek pe diah: Leviuüa nauowiah kownkow enni kaah mih dawngthawnguan hownia amatni kowi enni napela marow ne kown takla. Naiawngün marow riaret kowi tawncher thing rah dowm paw enni napela kown takla.3Nahanow naiawngün marow dow amatni kowh uowi rah nachowng kown towbowt. Now naiawngün marow riaret kowi kowh dowm paw amatni kowh chia, ruapur, rua hai akeng mih tawncher thing rah nachowng kown towbowt.4“Amatni kowi kowh enni napeah kown mih tawncher thing rah dowm dow marow tap hownia 250 lam mowr naown kown takla.5Nami tawncher thing rah dowm dow marow tap uat kowi enni nakhai pe kown. Nami dowm dow marow tap uat kowi satlawt hownia satkup mowr 500 lam, now tawngphak hownia mrawkphak mowr 500 lam chi naown kown. Now naiawngün tadawnglang kowi dow marow nauowi kown. Naiawngün dowm dow amatni kowh tawncher thing rah nachowng kown.6“Leviuüa kowi dow bowkbowk kowi 48 marow enni napeah kown. Naiawngün marow riaret kowi kowh tawncher thing rah süng paw enni napela kown takla. Naiawngün marow maten hownia 6 marow mih dow tatung tanimra marow enni nachangla kown. Nakowngta kown mih tuak uowi dowi kowi cham saita maru khai hanow nami maru dow naiawngün marow kowi naia powt kown.8Enni Israeluüa pungmadawng kowi kowh chowlowkkow krungchakuüa ka dawngthawnguan iawng Leviuüa kowi enni napeah marow kown takla. Krungchak akawmma miuüa dow ahuma nape marow kown, now krungchak a-echow miuüa dow nalang e pe kown,” pakhai.9Nami kung kowi CHAKRAMANG tek pe Mosi mih,10“Mami laiklow Israeluüa kowi kowtek pe diah: Jawrdan aw pownla hanow Kanan pren kowi enni kowuowi mih khin khe enni vüi tatung tanimra marow enni nakhowm nabowkta sangrum kown. Nakowngta kown mih tuak uowi dowi kowi cham saita maru khai hanow nami maru dow naiawngün marow kowi naia powt kown.12Kowng mih maru kowh tainau-uüa lu klai pawkra hownia aia naia plaila kownkow nami marow kowi napowt kown. Nakowi che aia kowpowt hanow Israeluüa chetah tara dowi mowr aia kowi dow naka saiah kown nadowi bowt.13Leviuüa kowi enni napeah kown mih marow hownia 6 marow mih dow enni kowh tatung tanimra marow naown kown.14Naiawngün taruk klüng mih marow hownia sum buk mih marow dow Jawrdan aw satlawt prakowi nauowi kown, now sum buk mih dow Kanan pren kowi nauowi kown.15Naiawngün taruk klüng mih marow dow enni Israeluüa, enni tut-e kowh tawi uowi mih akeng chenchapuüa hai akeng prenchak uang tawi chang lup miuüa vüi tatung tanimra naown kown. Kowngta kown mih tuak uowi dowi kowi cham saita maru khai hanow nami maru dow naiawngün marow kowi naia powt kown.16“Nachenganchepaw nakowngta kown mih saktuak hown lawngha uanh hown chepaw, aiukma mih huaklu hown chepaw, singh dung hown chepaw cham kowngta maru khai hanow nami chang miia dow sai sak mih chekhai. Aia kowi dow nakowngta ngengche kown takla.19Napaw lu klai kown mih maru dow sai sak mih maru kowi nasaiah ngengche kown takla; nami sai sak mih maru kowi dow takrum hown krowksang aia nakowngta ngengche kown takla.20Ransu saktuak hown nawtah chepaw, kuakah chepaw, thawngah chepaw cham kowngta maru khai hanow naiawng chang mih dow sai sak mih chekhai. Naiawng rakowi aia kowi dow nakowngta ngengche kown takla. Napaw lu klai kown mih maru dow sai sak mih maru kowi krum hown krowksang nakowngta ngengche kown.22“Nachenganchepaw ransu saktuak uowi dowi kowi rut tawi khawk tawi kowh cham saita maru mih chekhai hanow sai sak mih maru vüi ari arow kowi uowi iawng aluchowuüa nachang pe kown.25Aia kowi dow lu klai pawk mih maru rut hownia nalawngah kownkow tatung tanimra marow kowi aluchowuüa nasata iawk kown. Nami maru dow chimsaima mih sau hown kowh nümnapah mih uamow lang kri mih kowng dowi mowr nakowi nauowi kown takla.26Tawkchedow tatung tanimra marow hownia nami maru cham ia lawt kown nadowi. Aia che cham lawt khai hanow lu klai pawk mih maru hown takrum kowh aia kowi kowngta khai chepaw lu klai pawk mih luk kowi aprek nauowi kown nadowi.28Nami sai sak mih maru dow uamow lang kri mih kowng dowi mowr tatung tanimra marow kowi nauowi kown takla. Tawkche uamow lang kri mih kowng kung kowi dow aiamat kim kowi aia mih naia plan bowt kown taih.29Lowra kowi enni cham uowi chepaw maiawngün ari aiang dow chowngchowng saksakma enni nachünah kown mih chekhai.30“Sai sak mih maru luk kowi thuak saksi mih che uowi pre sum ia hanow nami maru kowi dow naia kowngta kown. Tawkche thuak saksi mih che lowk iachow taih hanow nami sai sak mih maru kowi naia kowngta kown nadowi.31Kowng tataing mih aprek ka mih maru kowi dow tangka hown naia klanah kown nadowi. Aia kowi dow nakowngta ngengche kown takla.32Tatung tanimra marow kowi kowh kowpowt mih maru kowi dow uamow lang kri mih kowng dowi tak khe tangka hown naia klanah kown nadowi, now aia kowi dow aiamat kim kowi naia pe planah kown nadowi.33Sai maru sak now pren dow tasür talawk khai. Naiawng rakowi enni kowh pren dow enni nasürlawkah kown nadowi. Sai sak mih maru kowi saita dowi matchang pren dow natachim natasai kown nadowi.34Ang CHAKRAMANG dow enni Israeluüa pungmadawng kowi tawi uowi reng chekhai. Enni cham uowiah mih pren kowi ang paw natawi uowi reng kown. Naiawng rakowi pren dow enni naia sürlawkah kown nadowi,” pakhai.
The Seed Company