Leviuüa25
1Sinai hungh kowi uowi khe Mosi kowi CHAKRAMANG tek pe mih, “Mami laiklow Israeluüa kowi kowtek pe diah: Ang nape enni kown mih pren kowi enni kowuowi mih khin khe enni kowh üa hai laih kowi ranit ning kowi paning chi CHAKRAMANG vüi enni nape tanaiah kown.3Taruk ning mowr dow enni kowh üa hai laih kowi enni nasawt liu kown, grep ruih prek paw enni nakrawi plet kown, now luprak paw enni napaw kown.4Tawkche ranit ning mih ning khe dow enni kowh üa hai laih kowi enni nape tanaiah kown takla. Nakhowk khe dow liu paw enni nasawt kown nadowi, now grep ruih prek paw enni naplet kown nadowi. Nami dow CHAKRAMANG vüi kowi kowh tanai ning chekhai.5Enni changah mih hownia nami ning kowi kowh awr ta phaw mih srui dow enni nakrawi ia paw kown nadowi bowt, now plet pe amia prek dowi kowi awr ta uih mih grep paw enni nakrawi ia paw kown nadowi. Nami paning mih dow üa hai laih kowi enni nape tanaiah phülü kown takla.6Nachenganchepaw nami paning mih dow enni ienah mih nadowi kowi iawngpa awr ta phaw mih towbowt enni nacha kown. Naiawngün dow enni matia vüi, enni kowh narma narlauüa vüi, akeng mih chenchap hownia kowh enni tut-e uang tawi kowi sukkri miuüa vüi, akeng mih prenlang maru-uüa vüi, tawncher hawmh vüi hai kaurawng uaramchak hawmh vüi chakkham naown kown.8“Ranit ning kowi akat chi tanai ning enni klowkah now tanai ning ranit kat chih khe dow 49 ning chekhai.9Nami 49 ning chur kowh 50 ning uang ting khe dow ranit la kowi kowh lacher hamüt ni khe enni kowh pren paprenma kowi enni natum baw kown. Nami ni dow Angak Lawt Lük Ni chekhai.10Nami 50 ning mih ning kowi dow CHAKRAMANG vüi chimsaima enni nasunah kown. Nami ning khe dow pren kowi kowh maru maten tut-e thaulangra laiklow enni naphuang kown. Tawngplawng kowchow panow nami ning kowi dow enni sumta mih kim ün, krawng bawn ün enni plan kata iawk kown, now cham uowi nar miuüa paw nakhalat bowt kown. Nami ning kowi dow ‘Jubili ning ’ pahai enni narük pe kown.1150 ning chih towng enni vüi Jubili ning naown kown. Nami ning kowi dow üa hai laih kowi paw enni nasawt liu kown nadowi, now awr ta phaw mih srui paw enni nakrawi paw kown nadowi. Nami klen kowi plet pe amia prek dowi kowi awr ta uih mih grep paw enni nakrawi klek kown nadowi.12Nami ning dow Jubili ning chekhai. Naiawng rakowi nami ning dow chimsaima pahai enni nachünah kown takla. Nami ning kowi dow üa hai laih kowi kowh iawngpa awr phaw mih towbowt enni nacha kown.13“Nami Jubili ning khe dow kowmatia sumta khowk mih dawngthawnguan naplan kata iawk kown.14Enni matia pungmadawng kowi tasum taran krawng bawn khai hanow lowkkowlowk hang takuan büa diah.15Enni tasum taran krawng bawn khai hanow asum mih hai aran mih amatchi pre ia trui nachangah ingsap kown. Jubili ning uang ting kown mih takra kowi mün ning tak chow naka lup kown mih nachangah ingsap iüah now nami iawng asung natapaw tape iüah kown.16Jubili ning uang ting kown mih che akrama tak hanow nami krawng bawn sung paw enni nakhakah kown takla. Tawkche nami Jubili ning uang ting kown mih che tawn iawlaw khowk hanow nami krawng bawn sung paw enni natanta kown takla. Tawngplawng kowchow panow nalupah kown mih ning chowtaih enni natasum taran kown.17Lowkkowlowk hang takuan büa diah. Enni bowkbowk Thurai kowi ringkawma hown enni nakramah kown takla. Tawngplawng kowchow panow ang dow CHAKRAMANG enni kowh Thurai chekhai.18“Ang kowh rirow hai ang kowh ari aiang enni nachün kown takla. Nami che enni chün hanow enni kowh pren kowi thaulangma enni naia uowi kown.19Nami klen kowi luprak paw ahuma enni naka kown; mu duma hown thaulangma enni naia uowi bowt kown.20Maiawng enni ka tuak chepaw naia, ‘Ranit ning mih ning kowi che lup üa lup laih dowi hanow tawng chow a-i nacha kown,’ napa kown.21Tawngpaw hangkow tuak krat büah. Taruk ning mih ning khe lainowmma ang nape enni prasi kown. Nami ning kowi dow sum ning chak vüi enni naka luprak kown.22Naiawng rakowi raiat ning mih ning kowi enni sawt liu khe paw nami luprak prim enni nacha kown, now taku ning mih ning kowi paw enni ngen luprak dowi mowr nami luprak prim enni naka cha kown.23“Chowngchowng saksakma vüi miapaw enni naia sumta krawng bawn kown nadowi. Tawngplawng kowchow panow krawng bawn dow ang kowh chowtaih. Nami dow prenlang maru kowi iawng ang pe tawng enni mih krowngchow taih chekhai.24Enni sum krawng bawn chepaw naia klanla iawk kown mih alow enni natowla reng kown takla.25Enni pungmadawng kowi ngarai lai kowh kowmatia kimchakuüa kowh krawng bawn sumta khai ne hanow sum mih maru kowh lang tasin taken mih tainau nami krawng bawn nakrawi klan kown takla.26Now naiawng nakrawi klan pe kown mih maru miapaw uowi dowi hanow akung kowi aia kowh aklan müa uowi khe aia matia chepaw naia klan kown.27Tawkche aia naklanta kown mih ning hownia Jubili ning nauang ting kown mih nachang ingsap hanow lahawm taka iawng naplanta pe asung kown takla. Nami kung kowi dow aia kowh krawng bawn aia naplan ka iawk kown towbowt.28Nachenganchepaw naplan klanla krawng bawn kown mih pawisa tangka che aia ia kram dowi hanow aia kowh krawng bawn mih Jubili ning uang talen dowi mowr aran mih tut-e nauowi kown. Now Jubili ning uang ting khe dow aia kowh krawng bawn aia naplan ka iawk kown taih.29“Tap uowi mih marow kowi kowh kim che sumta khai hanow sumta mih ning paning mowr dow asum miia naia klan kown mih alow nauowi kown. Nami paning lak kowi dow aia sumta mih kim aia naia klan kown.30Tawkche sumta mih ning paning lak kowi che nami kim aia ia klan dowi hanow naka klan kown nadowi bowt. Nami klen kowi Jubili ning khe paw nami dow naplan ka iawk kown nadowi bowt. Nami kim dow achowngma aran miia hai aran miia kowh krungchakuüa vüi nachowng kown towbowt.31Nachenganchepaw tap uowi dowi mih kua kowi kowh kim dow akuangma mih krawng bawn iawng nadowkah kown takla. Naiawng mih kua kowi kowh kim dow sumta chepaw lowra mih khin khe naia klan kown, now klanah dowi chepaw Jubili ning khe dow naplan kata iawk kown.32“Leviuüa tarapdow nachangla dawngthawnguan kownkow amatni vüi kowi peah mih marow lak kowi kowh kim sumta khai chepaw lowra mih khin khe naia klan büah kown.33Now ia klan dowi chepaw Jubili ning khe dow naplan ka büah iawk kown. Tawngplawng kowchow panow naiawngün kim dow nachangla dawngthawnguan kownkow Israeluüa pungmadawng hownia amatni kaah mih chekhai.34Tawkchedow amatni kowh marow riaret kowi kowh tawncher thing rah süng dow mapaw naia sum büah kown nadowi; nami dow amatni kowh chowngchowng saksakma vüi dawngthawnguan chekhai.35“Enni Israeluüa pungmadawng kowi kimping namkhetuüa ngarai lai kowh kowmatia chakkham hai khupdip tawngklai ia takram dowi mih maru uowi chepaw naia kown. Naiawng mih maru kowi dow enni nakhowngah reng kown takla. Naiawng mih maru dow enni tut-e natawi ia uowila kownkow prenlang maru-uüa kowi enni khowngah iawng enni nakhowngah reng kown takla.36Ngaraima mih maru-uüa paw enni tut-e natawi ia uowila reng kownkow enni peah tangka khawi chepaw, enni sum pe chakkham chepaw enni napaw pe marat kown nadowi. Enni kowh Thurai kowi ringkawma hown enni nakramah kown takla.38Ang dow CHAKRAMANG enni kowh Thurai chekhai. Aigupta pren hownia ang uang lawtla enni mih dow nape enni Kanan pren kownkow hai enni kowh Thurai ang nachowngla kownkow chekhai.39“Enni Israeluüa pungmadawng kowi che ngarai lai kowh kowmatia sak nau hown cham tasum mih uowi khai hanow nami maru kowi dow nar iawng enni natawngah kown nadowi.40Naiawng mih maru kowi dow akeng prenchak uang kowi sukkri miuüa hai akeng prenchakuüa kowi enni tawngah kengah iawng enni natawngah kown takla. Naiawng mih maru dow Jubili ning uang ting dowi mowr nachang enni lup kown.41Jubili ning uang ting khe dow amasi chauüa hailawm aia kowi enni nalawtta kown takla. Nahanow nami maru mih aia kimchakuüa tut-e, aia pipu-uüa kowh dawngthawnguan kowi naplan bowt kown.42Enni Israeluüa dow ang kowh nar chowtaih. Aigupta pren hownia uang lawtla enni mih dow ang chekhai. Naiawng rakowi maru nachangla enni nar kownkow miapaw enni cham ia tasum kown nadowi.43Lowkkowlowk enni natachang nowng kown nadowi. Naiawng hai enni kowh Thurai kowi ringkawma hown enni kramah mih enni natüngah kown.44“Enni tawn nar kown nau hanow enni riaret kowi kowh prenchakuüa kowi enni naia ran kown taih.45Enni tut-e kowh uang tawi uowi mih akeng prenchakuüa kowi hai enni pren kowi kowh dia mih akeng prenchakuüa kowi dow nachangla nar kownkow enni naia ran kown. Naiawngünuüa dow enni kowh dawngthawnguan nachowng kown.46Naiawngün nar dow kowmatia kowh dawngthawnguan iawng hai akung kowi kowmatia chauüa kowi enni naia towla pe kown. Naiawngünuüa kowi dow achowngma enni naia changla nar kown. Nachenganchepaw enni matia chenchapuüa hown dow enni naia tachang nowng kown nadowi.47“Enni pungmadawng kowi kowh uang tawi uowi mih akeng prenchak maru paw naia kureng kown, now enni Israeluüa pungmadawng kowi kowh maru paw naia ngarai kown. Nami khin khe nami ngaraima mih maru natawi chang nar lup kownkow nami prenlang maru tut-e chepaw, aia krungchakuüa tut-e chepaw kowtasum khai hanow48aia kowh dow naia taklanla kown mih alow nauowi reng kown. Aia kowi dow atainau-uüa chepaw, aia pahi pamauüa chepaw, pahi pama chauüa chepaw, aia kowh akeng mih tasin taken miuüa chepaw nakrawi ia klanah kown. Now aia matia paw naia taklanla kown mih kür che uowi khowk hanow naia taklan kown.50Aia che taklan kown nau hanow aia taklan kown mih ning hownia klowkah kowh Jubili ning nauang ting kown mih mün ning tak chow uowi mih nachangah ingsap kown, now asung plan takla mowr mih aia kowi kowh ranah miia kowi napela kown.51Jubili ning nauang ting kown mih khin akrama tak hanow asung huma aplan takla tak, now Jubili ning nauang ting kown mih kra dowk hanow asung a-echow towbowt aplan takla kown. Naiawng hai aia matia naia taklan kown.53Aia kowi dow cham uowi ningphawng mih maru kowi iawng aran miia natuakah kown takla, now nami maru kowi hawt ran miia changah anowng apowng dowi pat enni Israeluüa nakhetla kaneu kown takla.54Naiawng hai aia kowi ia klanah dowi chepaw aia hai aia chauüa mih dow Jubili ning khe naia lawt kown. Jubili ning khe dow aia kowi mih kim iah nalawtta ngengche kown takla.55Tawngplawng kowchow panow Israeluüa dow ang kowh nar chowtaih. Amatni kowi Aigupta pren hownia ang uang lawtla mih dow ang nachangla ang nar kownkow chekhai. Ang dow CHAKRAMANG amatni kowh Thurai chekhai.
The Seed Company