Leviuüa24
1Nami kung kowi CHAKRAMANG tek pe Mosi mih,2“Mami ang kowh ana pek Israeluüa kowi kowtek pe diah: Maibu towngh kowi kowh maibu atungma naia towkla reng kownkow küaah now achangma mih kanrawn sau en tut-e pacham uang pawla büa lah.3Nami maibu towngh dow taklowp taklangra te lak kowi kowh sangbowk laitawm tawkpla kra müa uaniang uat kowi chekhai. Nami maibu dow sat kup hownia sat lawt mowr chi atungma CHAKRAMANG pur kowi Arawn natowkah kown takla. Nami dow chowngchowng saksakma nachünah kown mih rirow chekhai.4CHAKRAMANG pur kowi towah mih achangma mih kuh hown kowh maibu towngh uowi. Nami luk kowi kowh maibu maten dow atungma natatowk reng kownkow Arawn namingah kown.5“Uamowuüa kowi kawmdi aiungma mih hown en nape thawpah kawm laipre pah hanow nape awpah kown. Nami kawm apah kowi kawmdi pre set ngia en nape thawpah kown.6Nami kung kowi dow CHAKRAMANG pur kowi kowh towah mih achangma mih kuh hown kowh sowah mih pawitang luk kowi nami kawmpah mih natowah pre tan kown. Nami kawm dow patan kowi taruk pa chi natowah kown.7Nami pre tan mih kawmpah re-e dow anam iungma mih maikhük towk müa achangma mih than natowah kown takla. CHAKRAMANG vüi chakkham uanap iawng hai kawmpah takcha nami than mih uamow natikah kown.8Israeluüa hownia kowh nami kawmpah dow Tanai Ni towng CHAKRAMANG pur kowi Arawn natowah kown. Nami dow Israel krungchakuüa kowh chowngchowng saksakma mih rirow chekhai.9Nami kawm dow Arawn hai achapauüa mih arah chimsaima mih re-e nachaah büah kown. Tawngplawng kowchow panow nami dow CHAKRAMANG vüi chakkham uanap kowi kowh lang chimsai mih uanh chekhai. Nami kawm dow chowngchowng saksakma amatni kowh vüi bak chekhai,” pakhai.10Akat khe Israel chenchap Dan krungchak kowi kowh Dibri chama Selawmit pami dow Aigupta maru hown tachawng khai. Amatchi dow Israeluüa pungmadawng kowi tawi uowi khai. Amatchi kowh dow chapa uowi lowk ia chekhai. Akat khe amatchi kowh chapa mih Israel chenchap maru lowk ia hown tangbung khup rah kowi takhüm khai. Nami khin khe kowiüah kowh chapa dow CHAKRAMANG ming kowi tek naklak khai. Naiawng tek naklak mih ta hanow maru kawmuüa mih nami maru kowi Mosi tut-e kowpawla khai.12Now tawng chow nachangah kown mih CHAKRAMANG hownia ka ana büah dowi mowr nami maru kowi klungta hüah hanow chawngah büah khai.13Now CHAKRAMANG tek pe Mosi mih,14“Ang ming kowi tek naklak mih maru kowi dow tangbung khup rah uat kowi kowpawla büa diah. Nami maru tek naklak khe kowh tawi ta mih maten nami maru lu kowi tang pe rut hanow pacham thuak saksi lah. Nami kung kowi Israeluüa maten mih nami maru kowi hua hown kowng pat pacham kuakah lah.15Israeluüa kowi kowtek pe diah: CHAKRAMANG ming kowi tek naklak mih maru dow aia kowh angak sung aia naka ripra kown16CHAKRAMANG ming kowi tek naklak mih maru kowi dow nakowngta ngengche kown takla. Israeluüa chepaw, Israeluüa tut-e kowh tawi uowi mih akeng chenchapuüa chepaw CHAKRAMANG ming kowi tek naklak mih maru kowi dow nakowngta ngengche kown takla. Naiawng mih maru kowi dow kowng pat huaklu hown Israeluüa nakuakah kown takla.17“Sai maru mih kowi dow aia kowi paw nasaita kown takla.18Maru kowh tawncher krawi saita mih klai dow tawncher kowh tawncher klai naiaw kown takla.19Krawi bawp maru kowh piakta pe maru buk kow khai hanow abawp miia kowi paw bawp kowh bawp klai nabawpah kown takla.20Aia kowi dow hut kowh hut klai, mik kowh mik klai, iüng kowh iüng klai napaw pe kown. Aia krawi chang mih iawng aia kowi paw nachangah kown takla.21Saita tawncher mih maru dow tawncher kowh tawncher klai nape kown takla. Tawkche saita maru mih dow aia kowi paw nasaita kown takla.22Nami rirow dow enni Israeluüa vüi hai enni tut-e kowh tawi uowi mih akeng chenchapuüa vüi hown arisang nachangah kown. Ang dow CHAKRAMANG enni kowh Thurai chekhai,” pakhai.23Naiawngün laiklow dow Israeluüa kowi Mosi kowtek pe khai. Nami kung kowi dow CHAKRAMANG kowi pe piati mih maru kowi tangbung khup rah uat kowi cham pawla hanow huaklu hown kowng pat maru kawmuüa kuakah khai. Israeluüa mih Mosi kowi kowh CHAKRAMANG peah ana iawng rowprowp changah khai.
The Seed Company